Thil tinrêng bul inṭan dân chu hetiang hi a ni. Pathianin khawvêl leh thil siam zawng zawng hi ni ruk chhungin a siam zo va. Pathianin khawvel a siam zawh khan a thim in a ruak mai a ni a, riruang engmah a la awm lo. Nimahsela, Pathian Thlarau chuan tui chungte chu a awp reng a.

Tin, Pathian chuan, “Êng lo awm rawh se!” a ti a, tichuan êng a lo awm ta a. Pathian chuan êng chu a en a, ṭha a ti hlê a, Êng chu “Chhûn” a vuah a. Êng leh thim chu a ṭhen a, thim chu “Zân” a vuah ta a. Pathian chuan thilsiam ni hmasa berah eng chu a siam a ni.

Thil siam ni hnih ni chuan, Pathianin thu ngawt in lei chung lamah vân a siam a. Lei chung lama tui awm leh lei hnuai lama tui awm te chu ṭhen hrang in van chu a siam a ni.

A ni thum ni chuan, Pathianin khawmual ata tui chu a ṭhen hrang ta a, khawmual chu “lei” a vuah a, tui chu “Tuifinriat” a vuah a. Pathianin a thil siam chu a en a, ṭha a ti hle a.

Tin, Pathianin, “Leiin thing leh thlai chi tinrêngte chhuah rawh se” a ti a. Tichuan chutiang chu a lo ni ta a. Pathianin a thil siam chu a en a, ṭha a ti hle a.

Thil siam ni li ni chuan, Pathianin thu ngawtin Ni te, Thla te, Arsi te a siam a. Pathian chuan lei chung ên tûr te, chhûn leh zân chhinchhiahna tur te, hun bi te leh kum te hriatna turin a siam a ni. Pathianin a thil siamte chu a en a, ṭha a ti hle a.

A ni nga ni chuan, Pathianin thû ngawtin tuia chêng chî zawng zawng te leh sava chi tinrêngte a siam a. Pathianin chu chu a en a, ṭha a ti hle mai a, mal a sawm ta a.

Thil siam ni ruk ni chuan, Pathianin, “Leia tla chi ramsa chi tinrêngte lo awm rawh se!” a ti a. Tichuan a sawi ang takin an lo awm ta a. ṭhenkhat chu ran vulh chi te, lei a bawkvâk chî te, leh ramsa te an ni. Pathianin chu chu a en a, ṭha a ti hle a.

Tin, Pathianin, “Kan anpuiin, keimahni ang tak mihring I siam ang u. Anni chuan leilung leh a chhûnga ramsa zawng zawng chungah thû an nei dawn a ni,” a ti a.

Tichuan Pathianin leia vaivut a la a, vaivutin mihring a siam ta a, amahah chuan nunna thaw a thaw lût a. Chumi hming chu Adama a ni. Pathianin Adama chênna atân huan a siam a, a enkawl turin huanah chuan a dah ta a.

Huan lai takah chuan Pathianin thing danglam bik pahnih a phun a – Nunna thing leh chhia leh ṭha hriatna thing. Pathianin Adama hnenah chuan huana thing rah zawng zawng te chu a ei a thiang a, a chhia leh a ṭha hriatna thing rah erawh a ei a thiang lova. A ei chuan a thi ang tih a hrilh a.

Tin, Pathianin, “Mihring amah chauh a awm hi a ṭha lo ve.” a ti a. Nimahsela Adama ṭanpuitu ni thei tûr ransa zîngah an awm lo.

Tichuan, Pathianin Adama chu tui takin a muthilh tir a. Pathianin Adama nakruh pakhat a lâ a, hmeichhiaah a siam a, Adama hnênah a hruai ta a.

Adama’n a lo hmuh chuan, “Hei zet chu ka anpui a nih hi! Mipa aṭanga siam a nih avângin ‘Hmeichhia’ ni rawh se.” a ti a. Chuvângin, mipa chuan a nû leh a pâ a kalsan a, a nupui nen pumkhat an lo ni ta a.

Pathianin ama anpui ngeiin mipa leh hmeichhia a siam a. Mal a sawm a, an hnênah, “Chi tam tak thlahin leilung hi luah khat rawh u!” a ti a. Tichuan Pathianin a thilsiam tinrengte chu a enin ṭha a ti hlê a, chûng thil zawng zawngte chuan a tilawm êm êm a.

Ni sarih ni a lo thlenin, Pathian chuan a hnâ chu a thawk zo ta a. Tichuan, a hnathawh zawng zawng chu a chawlhsan ta a. A ni sarih ni hi Pathianin a hnathawh zawng zawng a chawlhsanna ni a nih avangin mal a sawm a, a serh ta a.

Adama leh a nupui chu Pathianin huan mawi tak a siam sakah chuan hlimtakin an chêng a. Thawmhnaw inbel lo in an awm ve ve a, mahse an zak chuang lo, a chhan chu Khawvelâh sual a la awm loh vang a ni. Huanah chuan an leng fo ṭhin a, Pathian nên an inkawm ṭhin.

Nimahsela, huanah chuan rûl fing vervêk tak hi a awm a. Hmeichhe hnênah chuan, “Pathianin huana thing rah rêng rêng hi in ei tur a ni lo, a ti chiah maw?” tiin a zawt a.

Hmeichhia chuan, “Pathianin chhia leh ṭha hriatna thingrah tih loh chu huana thingrah tinrêng hi kan ei a phal a sin. Chhia leh ṭha hriatna thingrah erawh chu ‘In ei emaw in khawih emaw a nih chuan in thi ang’ a ti a ni,” a ti a.

Rûl chuan hmeichhe hnênah, “Chu chu a dik lo! Thi teh suh e. In ei veleh Pathian ang in lo ni ang a, amah angin chhia leh ṭha in lo hria ang tih Pathianin a hre reng a nih chu.” a ti a.

Hmeichhia chuan thingrah chu mit la tak a ni tih leh ei atâna îtawm tak a ni tih a hmu a. Ani pawhin fin a duh ve avângin a rah ṭhenkhat chu a lo va, a ei tâ a. Tin, a rah ṭhenkhat chu a hnena awm a pasal a pe a, ani pawhin a lo ei ve ta a.

Thawklehkhatah an mit a lo vâr a, saruak an ni tih an lo inhre ta a. Pawnfên a tan thinghnahte chu ṭhuikhawmin an saruakna thup an tum ta a.

Tin, Pathian huana a lêng thawm mipa leh a nupui chuan an lo hre ta a. Pathian chu an lo bihruksan ta a. Tin. Pathian chuan Adama chu, “Khawiah nge i awm?” tiin a kova. Adama chuan, “Huana i lêng thawm ka lo hria a, saruaka awm ka nih avangin ka hlau ta a. tichuan, ka biru ta a ni,” a ti a.

Tin, Pathian chuan, “Saruak I nih tu in nge hrilh che? Thingrah ei loh tûr ka tih che kha i ei a ni maw?” a ti a. Mipa chuan, “Mi awmpui tûra i hmeichhe mi pêk khan thingrah chu mi pê a, ka ei ta a ni,” a ti a. Tin, Pathianin hmeichhe hnenah chuan, “I thiltih hi eng tizia nge ni le?” a ti a. Hmeichhia chuan, “Rûlin mi tihder a, ka ei ta a ni,” a ti a.

Pathian chuan rûl hnenah, “Ânchhe dawng i ni ta! Bawkkhupin i kal ang a, vaivut i ei tawh ang. Nang leh hmeichhia hi ka indo tir ang che u a, i thlahte leh a thlahte pawh ka la indo tir bawk ang. Hmeichhe thlah chuan i lu a la tithitling ang a, nangin a keartui i la tithitling ang,” a ti a.

Tin, Pathian chuan hmeichhe hnênah, “I nauvei natna chu ka tipung ang a. I duh zawng chu i pasal lam a ni ang a, ani chuan i chungah thu a nei fo vang,” a ti a.

Pathian chuan mipa hnenah, “I nupui thu zawmin ka thu i zawm ta lova. Tunah chuan lei hi ânchhe dawng a lo ni ta; rim taka hna thawkin i thawhrim rah i ei tawh ang. Tin, i thi ang a, i taksa chu vaivutah a kir leh ang,” a ti a. Mipa chuan a nupui chu, mi zawng zawng tan nu a la nih dawn avangin, a hmingah Evi a vuah a, a awmzia chu “nunna petu” tihna a ni. Tin, Pathianin savun kawrfual a siamsak a, a haktir ta a.

Tin, Pathianin, “Tûnah chuan mihring te chu chhia leh ṭha hriain keimahnî ang an lo ni tâ, nunna thingrah chu eiin chatuanin an nung dah ang e,” a ti a. Chuvangin, Pathian chuan Adama leh Evi chu huan mawi tak ata chu a hnawtchhuak ta a. Pathianin nunna thingrah chu tuman an ei lohnan a venghim tûrin huan kawngkhar ah chuan Vântirhkoh thiltithei leh chak takte chu a dah tâ a.

Hun rei tak a liam a, lei chungah mihring an lo pung ta a. An sualin inpawngnekna a nasa ta hle mai a. Sualna a nasat êm avangin Pathianin khawvel chu tuilet nasa tak hmanga tihchhiat a tum ta a.

Nimahsela, Nova chuan Pathian mit a tlung a. Amah chu misualte zinga chêng ni mahse mi fel tak a ni. Pathian chuan tui lettir a tum thu chu Nova a hrilh ta a. Lawng lian tak tuk turin a hrilh tâ a.

Pathian chuan Nova hnênah lawng meter 140 a sei, meter 23 a zau, meter 13.5 a sang tuk turin a hrilh a. Nova chuan Lawng chu thingin a siam ang a, chhawng thum, pindan tamtak nei, inchung leh tukverh neiin a siam tûr a ni. Lawng chuan tuilet chhung zawng him taka Nova leh a chhungte leh khawmuala ramsa chi tinrêng te an awm theih nan an sa himna a siamsak tur a ni.

Nova chuan Pathian thu a zawm a. Pathianin a hrilh ang takin amah leh a fapa pathum te chuan lawng chu an tuk ta a. Lawng chu a len êm avângin a tuk nân kum tamtak a ngai a ni. Nova chuan mite hnenah tuilet tur thu hrilhin Pathian lama hawikir turin a hrilh a, mahse an ring duh lova.

Pathian chuan Nova leh a chhungte hnênah anmahni leh ramsate tâna an mamawh tawk tûr chaw lakhawm turin a hrilh a. Engkim peih fel a nih hnu chuan, Pathianin Nova hnênah amah leh a nupui leh a fapa pathumte leh an nupuite tân lawnga an luh a hun tawh thu a hrilh a.

Pathianin ramsa leh sava zawng zawng a nu leh a pa ṭheuh te chu lawnga an luh a tuilêt chhûnga him taka an awm theihnan Nova hnenah a tir ta a. Pathianin inthawina atana hman theih chi ramsa chi tinrêng zînga mi a nu leh a pa tuak sarih ṭheuh in a tir a. An zavaia lawnga an awm hnû chuan, lawng kawngkhar chu Pathianin a khâr tâ a.

Tin, ruah chu nasa takin a sûr ṭan ta chur chur a. Bâng lovin ruah chu ni sawmli leh zan sawmli a sûr ta a. Leilunga tui hna te chu sahin a lo awm a. Leilunga thil awm zawng zawng, tlang sâng berte hial pawh tui chuan chimpil ta vek a.

Lawng chhûnga mihringte leh ramsate tih loh khawmuala chêng zawng zawng te chu an thi ta vek a. Lawng chu tui chungah lângin a chhunga awm zawng zawng te chu tuiin chîm lovin him takin an awm a.

Ruah a bân hnuin lawng chu tuiah thla nga chhung a lâng a, hetih lai hian tui chu a kam ṭan ta a. Tin, ni khat chu lawng chu tlang chhîpah a innghat ta a, mahse leilung chu tuiin a la chîmpil reng tho va. Thla thum hnuah chuan tlangchhîpte chu an rawn lang ta a.

Ni sawmli a ral leh hnû chuan, Nova chuan lei chu a hul tawh nge la hul lo tih hriat nân Choak pakhat a tirchhuak a. Choak chu lei hul lai zawngin a thlawk kual a thlawk kual a, nimahsela, lei hul lai rêng a hmu lova.

Nakinah chuan Novan ṭhuro a tirchhuak a. Nimahsela lei hul lai a hmu zo bik lova, Nova hnênah a rawn lêt leh a. Kâr khat hnuah chuan ṭhuro a tirchhuak leh a, a rawn kir leh lamin a hmuiah Olive hnah a rawn pû a! Tui chu a kâm ta deuh deuh va, thing leh maute an rawn ṭo leh ta a!

Nova chuan chawlhkâr khat dang a la nghak leh a, tichuan ṭhuro chu a ṭum thumna atân a tirchhuak leh a. Hemi ṭum hi chuan fûkna tur a hmu tawh a, a lo kir leh tawh lova. Tui chu a kang zo ta a.

Thla hnih hnuah chuan Pathianin Nova hnenah, “Tûnah chuan nang leh i chhûngte leh ramsâ zawng zawng te chuan lawng hi in chhuahsan thei tawh ang. Chi tamtak thlahin khawvêl hi luahkhat rawh u,” a ti a. Tichuan Nova leh a chhûngte chu lawng aṭang an chhuak ta a.

Nova chuan lawng aṭang a chhuah hnuin maichâm a siam a, inthawina a tana hman theih ramsa ṭhenkhatte chu chi khat ṭheuh zel hmangin a inthawi ta a.

Pathian chuan, “Mihringte chu thil sual an tih vâng emaw, an naupan lai aṭang rênga sual pawh lo ni sela, Khawvêl hi anchhia lawhin tuilêt in ka tichhe tawh ngai lovang tih ka tiam e,” a ti a.

Pathianin chhimbâl hmasa ber chu a thutiam chhinchhiahna atân a siam ta a. Vana chhimbâl a zâm apiangin, Pathian leh a mîte chuan a thutiam chu an hre reng tawh ang.

Tuilêt zawh kum tamtak hnuah chuan, khawvêlah hian mihring an lo tam leh ta hle a, an zavai in ṭawng chi khat an hmang a. Pathianin leilung luah khat tur a thu a pêk chu zawm lovin an inhawrkhawm a, khawpui an din ta a.

An lo chapo ta hlê a, Pathian thusawi chu an ngaihsak ta lova. Van tawng pha tur in sang an sa ta hial a. Pathianin thil sual ti tura an thawhho zel chuan, thil sual nasa zawk an la ti ṭeuh thei dawn tih a hmu a.

Tichuan, Pathianin an ṭawng hman chu ṭawng hrang hrangin a tihhransak ta a, tichuan, mihring te chu khawvel hmun tinah an lo darh ta a. Khawpui an lo din ṭan tawh chu a hmingah Babel an vuah a, a awmzia chu ‘buaina’ a ni.

Kum za tamtak hnuah chuan, Pathianin mi pakhat a hming Abrama hnenah chuan thu a sawi a. “I khaw lam aṭang leh i laichinho zing aṭang in chhuak la, ram ka la entir tûr che lamah kal rawh. Mal ka sawm ang che a, chi ropui takah ka siam ang che. I hming ka ti ropui bawk ang. Malsawmsaktu apiang che chu mal ka sawm ang a, anchhe lawhtû che chu anchhia ka lawh ang. Nangmah ah chuan khawvêla hnam tin an la thawveng ang,” a ti a.

Tichuan Abrama chuan Pathian thu chu a awih a. A nupui Saraii leh a chhiahhlawh zawng zawng leh a thil neih zawng zawng te nên Pathianin ram a entir Kanaan ram lam chu an pan ta a.

Abraman Kanaan a lo thlen chuan Pathianin, “Dâk chhuak la han en vêl teh. Ram I hmuh theih zawng zawng te hi nang leh I thlahte hnenah rochun atan ka la pe dawn che u a ni” a ti a. Tin, Abrama chuan chumi ramah chuan awmhmun a khuar ta a.

Ni khat chu, Abrama chu Pathian Chungnungbera puithiam, Melkisedeka nen an inhmu a. Melkisedeka chuan Abrama chu mal a sawm a, a hnenah, “Lei leh vân neitu Pathian chungnungbera chuan malsawm che rawh se,” a ti a. Tin, Abraman a thilneih zawng zawng aṭang sawma pakhat Melkisedeka a pe a.

Kum tamtak hnuah pawh Abrama leh Saraii te chuan fapa an la nei lo va. Pathianin Abrama hnênah fapa a la nei ang a, a thlahte chu vana arsi zat an la nih tur thu a tiam nawn leh a. Abrama chuan Pathian thutiam chu a ring a. Pathian thutiam a rin avâng chuan Pathianin Abrama chu mifel ah a puang tâ a.

Tin, Pathianin Abrama hnênah thû a thlung a. Thuthlung chu pawl pahnih te inkâra inremna chu a ni. Pathian chuan, “I ṭhâlbe aṭang ngeiin fapa ka pe dawn che a ni. Kanaan ram chu i thlahte hnênah ka la pe ang,” a ti a. Nimahsela, Abrama chuan fapa a la nei lo va.

Abrama leh Saraii te Kanaan an thlen aṭanga kum sawm a liam hnu chuan, fâ an la nei ta chuang lova. Tin, Abrama nupui Saraii chuan a hnênah, “Pathianin fâ ka neih a remtih loh avang leh nau pai tûrin ka upat lutuk tawh avângin, ka chhiahhlawh Hagari hetah hian a awm a. Ani hi nupuiah nei la tichuan anin ka tan fâ mi hrinsak dawn nia,” a ti a.

Tichuan, Abraman Hagari chu nupuiah a nei ta a. Hagari chuan fapa a hring a, Abraman a hmingah Ismaela a sa a. Ismaela chu kum sawmpathum a upa a lo nih chuan, Abrama hnenah Pathianin thu a sawi leh ta a.

Pathianin, “Kei hi Pathian engkimtitheia ka ni. Nangmah nen thu ka thlung dawn a ni,” a ti a. Tichuan Abrama chu lei si in a bawkkhup tâ a. Pathian chuan Abrama hnenah, “Hnam tam takte pâ i la ni ang a. Kanaan ram chu nang leh i thlahte hnênah an rochun atân ka la pê ang a, chatuan atan an Pathian ka ni ang. I inchhhunga mipa fa tawh phawt chû an serh i tansak tur a ni”.

“I nupui Saraiin fapa a hring ang a-ani chu thutiam fa a ni ang. A hmingah Isaaka i sa tûr a ni. A hnênah thû ka la thlung ang, tin, ani chu chi ropui tak a la ni ang. Ismaela chu chi ropui takah ka la siam bawk ang, nimahsela, ka thuthlung chu Isaaka hnênah ka thlung ang,” a ti a. Tichuan, Pathianin Abrama hming chu Abrahama tiin a thlaksak ta a, chumi awmzia chû “mi tamtakte pâ” tihna a ni. Pathian chuan Saraii hming pawh Sari tiin a thlâksak a, a awmzia chu “ lalnû” tihna a ni.

Chumi nî chuan Abrahaman a ina mipa awm zawng zawng te chu an serh a tansak tâ a. Kum khat vel hnuah chuan, Abrahama chu kum 100 a upa a lo ni ta a, Sari chu kum 90 a lo ni a, Sari chuan Abrahama chu fapa a hrinsak ta a. Pathianin a lo hriattir tawh angin a hmingah Isaaka an sa ta a.

Isaaka chu rawlthar a rawn nihin, Pathianin Abrahama rinna chu a fiah a, a hnênah, “I fapa neih chhun Isaaka kha hruai la, ka hnênah inthawina atan hlan rawh,” a ti a. Abrahama chuan Pathian thu chu a awih a, a fapa chu inthawina atan a buatsaih ta a.

Abrahama leh Isaaka chu inthawina hmun lama an kal laiin, Isaaka chuan, “Ka pa, inthawina tûr thing chu a awm a, mahse berâmno chu khawiah nge a awm?” a ti a. Abrahama chuan, “Ka fapa, inthawina tur beramno chu Pathianin a ngaihtuah chawp mai ang,” tiin a chhang a.

Inthawina hmun an thlenin, Abrahama chuan a fapa Isaaka chu a phuar a, maichamah chuan a muttir a. A fapa tihhlum a tum lai takin Pathianin a hnenah, “Che tawh suh. Naupang chungah khân i kut thlak suh! Tûnah chuan ka tan i fapa neih chhun pawh i ui loh avângin min ṭih takzet tih ka hre ta,” a ti a.

Abrahama chuan an bul hnai mai ah chuan berâmpa hnim buk zinga tâng a hmu a. Pathianin berâmpa chu Isaaka aiah inthawina atân a rawn pe ta a ni. Lawmtakin Abrahama chuan berampa chu inthawi nan a hlan ta a.

Tin, Pathian chuan Abrahama hnênah, “Ka tân thil engkim, i fapa neih chhun tak pawh min pêk phal avângin, malsawm ka sawm ngei ngei ang che. I thlahte chu vana arsi zat aia tamin ka tipung ang. Ka thu i awih avangin i thlahah chuan khawvêla hnam tin an la thawveng ang,” a ti a.

Abrahama chu a lo upa ta hle a, a fapa Isaaka pawh puitling a rawn ni ta a. Tin, Abrahaman a chhiahhlawhte zînga pakhat chu a fapa Isaaka nupui tur rawn hawn sak turin a laichînte awmna lamah a kal tir ta a.

Abrahama laichînte awmna lam pana zinkawng thui tak a zawh hnu chuan, Pathianin chhiahhlawh chu Rebeki hnênah a hruai thleng ta a. Rebeki chu Abrahama unaupa tunu a ni.

Rebeki chuan a chhûngte kalsan chu rem a ti a, Isaaka chenna in lamah chhiahhlawh nen chuan an haw ta a. A thlen veleh Isaaka chuan nupui atan a nei tâ a.

Hun rei tak hnuah chuan, Abrahama a thi ta a, a hnena Pathian in thuthlung ngeia thu a tiam zawng zawng chu Isaaka hnena hlan chhawn a lo ni ta a. Pathianin Abrahaman chithlah chhiarsen loh a neih tur thu a lo tiam tawh a, nimahsela, Rebekin fa a nei thei lova.

Isaaka chuan Rebeki tan a ṭawngṭaisak a, tichuan, Pathianin phir a pai a remti ta a. Naute pahnihte chu Rebeki pum chhûnga an la awm lai in an insual a, Rebeki chuan Pathian hnenah thil awmzia a zawt a.

Pathianin Rebeki hnenah, “I pumchhunga fapa phirte atangin hnam chihnih an la rawn chhuak dawn a ni. An innghirngho ang a, a upa zawk chuan a naupang zawk rawng a la bawl ang,” a ti a.

Rebekin nau a hrin chuan, a upa zawk chu a sena sen thur, hmul thupin a lo chhuak a, a hmingah Esauva an sa a. Tin, a naupang zawk chu a u Esauva keartui chelh reng chungin a rawn chhuak a, tichuan, a hmingah Jakoba an sa a.

Naupangte chu an rawn ṭhan len chuan, Jakoba chu puanin lama awm nuam ti mi a ni a, Esauva erawh sapêl mî tak a ni thung a.Rebeki chuan Jakoba a hmangaih zawk a, Isaaka erawh chuan Esauva a hmangaih thung a.

Ni khat chu, Esauva sa pêl rawn haw chu a ril a ṭam hle mai a. Esauva chuan Jakoba hnenah, “Khawngaih takin i ei tur siam kha min pe rawh,” a ti a. Jakoba chuan, “I fatir nihna min leitir zet la,” tiin a chhâng a. Tichuan, Esauva chuan Jakoba hnenah a fatir nihna chu a hralh tâ a. Tin, Jakoba chuan ei tur ṭhenkhat chu a pe a.

Isaaka chuan a malsawmna chu Esauva hnena hlan a duh a. Nimahsela, chu thil chu a tih hmain Rebeki leh Jakoba chuan an bum a, Jakoba chu Esauva ang a insiam in, Isaaka chu a tar in khua a hmu thei tawh lova. Esauva thuam a inbel a, kel vunte chu a nghawngah leh a kutah te chuan a inbel a.

Jakoba chu Isaaka hnênah kalin, “Esauva ka ni. Mal mi sawm theihnân ka rawn kal a ni,” a ti a. Isaaka chuan kêl hmul te chu a dap a, a thawmhnaw te chu a han hnim a, Esauva emaw a ti a, mal a sawm ta a.

Esauva chuan a fatir nihna leh a malsawmna a rûksak avângin Jakoba chu a haw ta hle a. Tichuan, a pa a thih hnuah Jakoba chu tihhlum a tum tâ a.

Nimahsela, Rebekin Esauva thil tum chu a lo hria a. Tichuan, amah leh Isaaka chuan Jakoba chu ram hla tak a Rebeki laichinte hnena cheng turin an kalbotir ta a.

Jakoba chu Rebeki laichinte hnênah kum tam tak a va awm a. Chutihlai chuan nupui a nei ta a, fapa sawm leh pahnih leh fanu pakhat a nei bawk a. Pathianin mi hausa tak ah a siam ta a.

Kanaan ram a an in a chhuahsan aṭanga kum sawmhnih hnûah chuan Jakoba chu a chhungkua te leh a bawihte, a ran rual zawng zawng te nên an in lamah a let leh ta a.

Esauvan tihhlum a la duh reng a rin avangin Jakoba chuan a hlau hle a. Tichuan, ran rual ṭhahnem tak chu Esauva pek atan a thawn a. Esauva hnena ran rual va hlantu chhiahhlawh chuan Esauva hnenah, “I chhiahhlawh Jakoba chuan heng rante hi a pe che a ni, a ni pawh a rawn thleng thuai ang,” a ti a.

Amaherawhchu, Esauva chuan Jakoba chu a lo ngaidam daih tawh a, hlimtakin an inhmu leh ta a ni. Tin Jakoba chu thlamuang takin Kanaan ram ah chuan a cheng ta a. Tin, Isaaka chu a thî a, Jakoba leh Esauva chuan an phûm ta a. Abrahama hnêna Pathian thuthlung thutiamte chu tunah chuan Isaaka hnên aṭangin Jakoba hnenah hlanchhawnin a lo awm ta a.

Kum tam tak hnuah, Jakoba chu a lo upat hnu chuan a fapa duat bik, Josefa chu ranrual venga awm a unaute tlawh tûrin a tir ta a.

Josefa chu an pa in a hmangaih bik êm avâng leh anmahni chunga roreltu a la nih tur thu mumanga a hmuh avângin a unaute chuan an haw hle a. Josefa chu a unaute hnên a rawn thlen chuan, anni chuan an lo man a, sala sumdawng ṭhenkhat hnênah an hralh a.

Josefa unaute chuan in lama an haw leh hmain Josefa kawrfual chu an pawt thler a, kêl thisen ah an chiah a. Tichuan, Josefa kawrfual chu an pa an hmuhtîr a, ani chuan ram sakawlhin a tihlum a nih a ring a. Jakoba chu a lungngai ta hle a.

Sala sumdawngte chuan Josefa chu Aigupta ramah an hruai a. Aigupta chu ram zau leh thiltithei tak, Nile Lui hrûla awm a ni. Sala sumdawngte chuan Josefa chu sawrkâr milian hausa tak mai hnênah sal atan an hralh tâ a. Josefa chuan a pu rawng chu ṭha takin a bawlsak a, tin, Pathianin Josefa chu mal a sawm a.

A pu nupui chuan Josefa chu mutpui a tum a, nimahsela Josefa chuan Pathian laka chutiang thil sual tih chu a duh lova. A pu nupui chu a thinur ta hle a, Josefa chu dik lo takin a hêk a, tichuan an man a, tân inah an khung ta a. Tan in ah pawh chuan Pathian laka a rinawm avang in Pathian in mal a sawm a.

Kum hnih hnuah chuan Josefa chu thiam lohna nei lo mahse, tân inah a la tang ta reng a. Zan khat chu Pharaoa chuan (Aigupta miten an lalte an koh dan a ni) amah tibuai êm êm tu mumang pahnih a nei a. A khawnbawl upate zinga tumahin a mumang awmzia chu an hrilhfiah thiam lova.

Pathianin Josefa hnenah mumang hrilhfiah theihna a pe ta a. Tichuan Pharaoa chuan Josefa chu tân in ata a hruai chhuahtir a. Josefa chuan a mumang chu a hrilhfiahsak ta a, a hnenah, “Pathianin hausak kum, kum sarih a rawn thlentir ang a, ṭam kum kum sarih in a rawn zui ang,” a ti a.

Josefa chuan Pharaoa rilru chu a hmin ta hle a, tichuan, Aigupta ram puma thunei ber Pharaoa dawttu ah a siam ta a.

Josefa chuan buh thar ṭhat kum, kum sarih chhung chuan mipui te chu buh chhekkhawm ṭeuh turin a hriattir a. Tichuan, Josefa chuan ṭam kum, kum sarih a lo thlen chuan mipuite hnenah an kham khawp tur buh a hralh chhuak ta a.

Ṭam chu Aiguptaah chauh ni lo, Jakoba leh a chhungte awmna Kanaan ah pawh a nasa hle a.

Tichuan, Jakoba chuan a fapate chu Aigupta rama buh lei turin a tîr ta a. Buh lei tura Josefa hmaa an din lai chuan an unaupa Josefa kha a ni tih reng an hre lova. Nimahsela, Josefa chuan anmahni chu a lo hria a.

Josefa chuan a unaute chu an lo danglam tawh nge la danglam lo tih hriatnana a fiah hnuah, an hnenah, “Keimah hi Josefa, in unaupa kha ka ni! Hlau suh u. Sal anga min hralh lai khan thilsual tih in lo tum a, nimahsela, Pathian chuan thil ṭha lo chu thil ṭha atan a hmang ta a ni. Nangmahni leh in chhûngte ka ṭanpui theihnan che u Aigupta ramah hian rawn awm rawh u,” a ti a.

Josefa unaute chuan an in an han thlen chuan an pa Jakoba hnênah Josefa a la dam tih an hrilh a, Jakoba chu a hlim ta êm êm a.

Jakoba chu upa hle tawh mahse, an chhungkuain Aigupta ramah chuan an kal a, chutah chuan an chêng ta a ni. Jakoba chuan a thih hmain a fapate chu mal a sawm ṭheuh a.

Pathianin Thuthlung thutiamte Abrahama hnêna a hlan chu Isaaka hnênah hlanchhawn a ni a, chumi hnuah Jakoba hnênah, chumi hnuah Jakoba fapa sawm leh pahnihte hnênah leh an chhungkuate hnenah hlan chhawnin a awm a. Jakoba fapa sawm leh pahnihte thlahte chu Israel hnam sawm leh pahnihte an lo ni ta a ni.

Josefa thih hnu chuan, a laichin zawng zawng te chu Aigupta ramah an cheng a. Anmahni leh an thlahte chu chutah chuan kum tam tak cheng chhunzawmin chi inthlah pungin ṭhahnem tak an lo ni ta a. Israel mite tih a hriat anni.

Kum za têl a liam hnu chuan, Israel fate chu an lo pung ta hle mai a. Aigupta mi te chuan Josefa leh an tâna a thiltihte chu an hre reng ta lova. Israel mite chu an lo ṭhathnem tak em avangin an hlau ta a. Chuvangin, chutihlai a Aigupta ram awptu Pharaoa chuan Israelte chu Aigupta mite salah a siam ta a.

Aigupta mite chuan Israel mite chu tihluihnain in tâm tak leh khawpui te hial an saktir ta a. An thawhrimna chuan an nun a timangang takzet a, nimahsela, Pathianin anmahni chu mal a sawm a, chithlah tam leh zual an lo nei ta a ni.

Pharaoa chuan Israel mite an pun chak zia a hmuhin, Israel fa, mipa nausen thawh phawt chu Nile Lui a paiha tihlum zel tûrin mipuite hnênah thu a pe ta a.

Israel mi tu emaw chuan mipa fa a hring a. Amah leh a pasal chuan an theih chhûng, chu naute chu an thukru a.

A nu leh paten an thuhruk theih tak loh hnuah chuan nausen chu tihhlum a nih lohnan Nile lui kama phairuang zinga luang bawm tui chunga lângah chuan an dah a, a chungah eng tak la thleng ang maw tia hriat tumin a farnu chuan a thlir reng a.

Pharaoa fanu chuan bawm chu a hmu a, a chhûng chu a zuk en a. Naute a hmu a, a fapa atân a la ta a. Ani chuan Israel nu pakhat chu naute awmtu atan a la a, nau awmtu tura a lak chu naute nu ngei kha a ni tih reng a hre lo. Naute chu a lo ṭhang lian a, a nu hnute hnek a ban hnu chuan Pharaoa fanu hnenah chuan a kir leh ta a, ani chuan a hmingah Mosia a lo sa a.

Ni khat chu, Mosia a lo puitlin hnuin, Israel mi sal pakhat chu Aigupta miin a lo vaw lai a hmu a. Mosia chuan a Israel chanpui chu chhan a tum a.

Mosia chuan tumahin an hmu lo turah ngaiin, Aigupta mi chu a tihlum a, a ruang chu a phum a. Nimahsela, Mosia thiltih chu tuin emaw a lo hmu a.

Pharaoa chuan Mosia thiltih chu a lo hriat chuan thah a tum ta a. Mosia chu Pharaoa sipaite lak ata a him theihnan Aigupta ata thlaler lamah a tlanbo ta a.

Mosia chu Aigupta aṭanga hla tak thlalêrah chuan Berâm vengin a va awm ta a. Chu lai ram mi chu nupuiah neiin fapa pahnih a nei a.

Ni khat chu, a berâmte a ven laiin, hnimbuk alh lai a hmu a. Nimahsela, hnimbuk chu a kang ral si lo. Mosia chuan a hmuhchian zawk theihnan hnim buk lam chu a va pan ta a. Hnim buk a pan lai chuan, Pathian aw hian, “Mosi, I pheikhawk kha phelh rawh. I dinna hmun kha lei thianghlim a ni e,” a ti a.

Pathian chuan, “Ka mite tawrhna ka hmu a. Aigupta sal ata Israel mite i hruaichhuah theihnan Pharaoa hnênah ka tir dawn che a ni. Kanaan ram, Abrahamate, Isaaka te, Jakoba te hnêna ka tiam tawh ram chu anmahni ka pe dawn a ni,” a ti a.

Mosia chuan, “Miten tuin nge min tir tih hre duh ta se, engtinnge ka chhan ang?” a ti a. Pathian chuan, “Awma ka ni. An hnenah chuan, “AWMA chuan in hnenah mi tir a ni,” tiin hrilh rawh. Kei hi Lalpa, in thlahtu Abrahama te, Isaaka te, Jakoba te Pathian ka ni. Hei hi kumkhuaa ka hming chu a ni, tiin hrilh bawk rawh,” a ti a.

Mosia chuan a hlauthawng a, ṭha taka thu a sawi theih a inrin loh avangin Pharaoa hnena kal chu a duh lo va, chuvangin, Pathianin Mosia unaupa Arona chu amah ṭanpuitu atan a tîr ta a. Pathian chuan Mosia leh Arona hnênah Pharaoa chu a luhlul hle dawn a ni tih a hrilh lawk a.

Mosia leh Arona chu Pharaoa hnênah an kal ta a. A hnênah, “Israelte Pathian chuan heti hian a ti, ‘Ka mite chhuahtir rawh!’ tiin,” an ti a. Pharaoa chuan an thusawi chu a ngaihsak lova. Israelte chhuah zalen a hnêkin, hna a thawh rim tir ta sauh zawk a.

Pharaoa chuan mipuite chu chhuahtir a la remtih loh fo avangin Pathianin Aigupta ram ah hremna rapthlak chi sawm a thlêntîr ta a. Heng hremna hmang hian Pathian chuan Pharaoa leh Aigupta pathiante aia thil a tih theih zawk zia Pharaoa chu a hmuhtir ta a ni.

Pathianin Nile Lui chu thisenah a chantîr a, nimahsela, Pharaoa chuan Israelte chu a la chhuah tir duh lo va.

Pathianin Aigupta ram khatin chungu a rawn tir a. Pharaoa chuan Mosia hnenah chungu te chu tibo tûrin a ngen a. Nimahsela, chungu te chu an thih zawh vek hnuah chuan Pharaoa chuan a thinlung a tikhauhva, Israelte chu Aigupta ram ata a chhuahtîr duh ta chuang lo va.

Chuvangin, Pathianin thosi a rawn tîr a. Chumi hnuah tho a rawn tîr leh a. Pharaoa chuan Mosia leh Arona chu a kova, an hnênah chu hremna chu an tihtawp chuan, Israelte chuan Aigupta ram an chhuahsan thei ang a ti a. Mosia a ṭawngṭai a, tho zawng zawng te chu Pathianin Aigupta ram ata a la bo ta a. Nimahsela, Pharaoa chuan a thinlung a tikhauhva, mipuite chu chhuah zalentîr a duh ta chuang lo va.

Chumi zawhah chuan, Pathianin Aigupta mite ran vulh zawng zawngte chu natnain a tihlum a. Nimahsela, Pharaoa chuan a thinlung a tihkhauh a, Israelte chu chhuahtîr a duh ta chuang lo va..

Tin, Pathianin Mosia chu Pharaoa hmaah vutte chu van lamah theh chiam tûrin a hrilh a. Chutianga a han tih chuan, Aigupta mite chuan khawihli durh nâ tak mai an lo vei ta a, nimahsela Israelte chuan an vei ve lo. Pathian chuan Pharaoa thinlung chu a tihkhauhsak a, tichuan, Pharaoa chuan Israelte chu chhuah zalentîr a duh ta chuang lo.

Chumi hnuah chuan, Pathianin rial rawn tîrin chung rialte chuan Aigupta ram chhunga thlai zawng zawng deuh tho chu dêng chhiain, pawna chhuak rêng rêngte chu a denghlum ta a. Pharaoa chuan Mosia leh Arona chu a kova, an hnenah, “Ka lo sual ta a ni. In kal thei ang,” a ti a. Tichuan, Mosia chu a ṭawngṭai a, vân aṭanga rial rawn tla chu a bang ta a.

Nimahsela, Pharaoa chuan a thinlung a tikhauhva, thil a ti sual leh ta a. Israelte chhuah zalentîr chu a remti leh ta lo va.

Chuvangin, Pathianin Aigupta ram pum chungah chuan khaukhuap rual a lentir ta chiam a. Heng khaukhuapte hian rialten an denchhiat loh thlai la awm zawng zawng te chu an ei zo ta vek a.

Tin, Pathianin ni thum chhung thimna a thlentîr a. A thim em avangin Aigupta mite chuan an in an chhuahsan thei ta lo va. Nimahsela, Israelte awmna chu a eng thung a.

Heng hremna pakaw hnuah pawh hian Pharaoa chuan Israelte chhuah zalentîr chu a la remti ta lo fova. Pharaoa a la hel fo avangin, Pathianin hremna hnuhnung ber thlentîr a tum ta a. Chu chuan Pharaoa rilru a thlak danglam tawh ang.

Pathian in Pharaoa hnênah, Israelte a chhuahtîr loh chuan Aigupta mi fatir mipa zawng zawng leh ran piang hmasa ber te chu tihhlum a tum thu a hriattîr ta a. Pharaoan chu thu chu a hriatin, Pathian thu rin leh a thu zawm chu a la duh chuang lo a.

Pathian chuan amah ringtute tan an fa tir te chu chhanhima an awm theih dan tur kawng a buatsaihsak a. Chhungkaw tin chuan berâm no sawiselbo an thlang ang a, an tihlum tur a ni.

Pathian chuan Israelte hnênah chuan berâm no thisen chu an kawngka biangah leh kawngka lu chungah te an tât ang a, a sa chu an rawh ang a, chhang dawidim telh loh nen hmanhmawh takin an ei tur a ni tiin a hrilh a. An ei hunah pawh Aigupta ram chhuahsan thei turin an inpeih reng tur a ni tiin a hriattîr bawk a.

Israelte chuan Pathianin thu a pêk ang zelin thil engkim an ti a. Zan laiah chuan Pathian chuan Aigupta ram chu a rawn fang a, Aigupta mi fatir mipa zawng zawng te chu a rawn tihlum ta a.

Israel chhungkaw tinte chuan an kawngka biangah leh an kawngka lu chungah thisen an tah avangin Pathian chuan chung in te chu a kal hlên a. Inchhunga awm zawng zawng te chu an hîm a. Berâmno thisen avang chuan an hîm ta a ni

Amaherawhchu, Aigupta mite chuan Pathian thupêk chu an ring lova, an zawm hek lo. Chuvangin, Pathianin an in te chu a kalhlen lova. Aigupta fa tir mipa zawng zawngte chu a tihlum ta a.

Aigupta mi, mipa fa tir tawh phawt chu, tânina tang aṭanga Pharaoa fa tir thlengin, an thi ta vek a. Aigupta rama mi tâm tak te chu thil lungchhiatthlak tak rawn thleng avang chuan nasa takin an ṭap a ni.

Chumi zan la la chuan, Pharaoa chuan Mosia leh Arona chu a kova, an hnênah, “Israel mite hi hruai ula, Aigupta hi chhuahsan nghal rawh u,” a ti ta a. Aigupta mipuite pawh chuan Israel mite chu chhuak nghal tûrin an tur ta sek a.

Israel mite chu Aigupta an chhuahsan tak avang chuan an hlim ta êm êm a. Sal an ni ta lo va, Ramtiam lam an pan ta! Aigupta mite chuan Israelte chu rangkachakte, tangkarua te leh thil hlu dangte pawh, an dil apiang an neihtîr ta zêl a. Hnam dang zînga mi ṭhenkhat chuan Pathian an ring a, Israelten Aigupta an chhuahsan laiin an rualin an kal ve a ni.

Pathianin chhunah an hmaah chhum ding kal tîrin a hruai a, zânah erawh chu chhûm ding chu mei dingah a lo chang ve leh ta thung a. Pathian chu an hnênah a awm reng a, an kal laiin a hruai zêl a . Amah an zui chu an tih tur reng ani.

Hun rei vak lo hnuah, Pharaoa leh a mite chuan an rilru an thlak a, Israelte chu an sala siam leh an duh a. Mite chuan Pathian chu Pathian tak awmchhun a nihzia an lo hriata, Lalpa chu Pharaoa leh a pathiante aiin thil a tithei zawk tih an lo hriatna turin Pathianin Pharaoa chu a tiluhlul a ni.

Tichuan, Pharaoa leh a sipaite chuan Israelte chu anmahni sala an siam leh theihnan an ûm ta a. Israelten Aigupta sipai rawn kal an hmuh chuan, Pharaoa sipaite leh Tuipuisen inkarah anmahni chu an tâng ta a ni tih an hrechhuak ta a. An hlau ta êm êm a, “Engvangin nge Aigupta kan lo chhuahsan aw? Kan thi dawn ta a nih hi,” tiin an auva.

Mosia chuan Israelte hnênah, “Hlau suh u! Pathian chuan vawiin ah hian in hmelmate chu a do sak dawn che u a, a chhanhim dawn che u a ni,” a ti a. Tichuan Mosia hnenah chuan Pathianin, “Tuipuisen lam pan turin mipuite chu hrilh rawh,” a ti a.

Tin, Pathianin Israel mite chu Aigupta miten an hmuh theih lohnan chhum ding chu Israel mite leh Aigupta mite inkârah a awmtîr ta a.

Pathianin Mosia chu tui chungah a bân phâr turin leh tui chu tiṭhen turin a hrilh ta a. Tin, Pathianin tuipui kaltlang theihna tur kawng siam a nih theihnan thli a rawn tlehtîr ta a, tichuan tuipui chu ding lam leh vei lamah a lo inṭhen ta a.

Israel mite chuan leichâr a kalin lehlam lehlama tui bang ding luah chung nen tuipui chu an zawh chhuak ta a ni.

Tichuan, Aigupta miten Israelte him taka chhuak an hmuh theihnan Pathianin chhum chu a sawn chho va. Aigupta mite chuan anmahni chu umzui an tum ta a.

Tichuan, tuipui tan zawnga kawng awmah chuan Israelte chu an ûm ta a, nimahsela, Pathian chuan Aigupta mite chu a zuk timangang a, an tawlailir ke te a tih tan sak a. “Tlanchhe rawh u! Pathianin Israel mite hi a dopui a ni,” tiin an auva.

Israel mite him taka lui ral lehlam an thlen hnuin, Pathianin Mosia chu a kut pharchhuak leh tûrin a hrilh a. Chutianga a han tih chuan, tui chuan Aigupta sipaite chu a rawn chîm ta a, tui chu a luan pangngaiin a luang leh ta a ni. Aigupta sipaite chu an zavaiin tuiah an tlahlum ta vek a.

Israelten Aigupta mite thi an han hmuh chuan Pathian an ring a, Mosia pawh chu Pathian zawlnei ngei anih an ring ta a.

Israel mite chu Pathianin thihna leh sal an nihna ata a chhanchhuah avangin an hlimin an phur ta êm êm a. Tunah chuan Pathian rawngbawl turin an zalên ta a. Israelte chuan an zalênna thâr lawmnan leh Aigupta sipai lak ata a chhanhim avangin Pathian fakna hla tamtak an sa a.

Pathianin Israel te chu hnêhna a chantîr avang leh sal an nihna ata a chhanchhuah avangin kum tin Kalhlen Kût hmang tûrin thu a pe ta a. He Kût hi berâmno sawiselbo talhin, chhang dawidim telh loh eiin an hmang ṭhin a ni.

Pathianin Israel mite Tuipuisen a daikaitîr hnu chuan thlalêr kaltlangin Sinai tlang a hruai thleng a. He tlang hi Mosian thingbuk alh a hmuhna kha a ni. Tlang bulah chuan mipuite chuan an puanin an zâr a.

Pathian in Mosia leh mipuite hnenah, “Ka thu in awiha ka thuthlung in pawm chuan, ka tân ro thlan bîk, lal puithiam leh hnam thianghlim in lo ni ang,” a ti a.

Ni thum hnuah, mipuite chu thlarau lam thil atana an in buatsaih hnuah chuan, Pathian chu Sinai tlang chip aṭangin khawpui rî te, kawlphe te, meikhu te leh tawtawrawt rî rîng tak nen a rawn chhuk ta a. Nimahsela Mosia chauh lo chu tlang chhoh a remti lova.

Tin, Pathian chuan an hnênah thuthlung a pe a, an hnênah “Kei hi Lalpa, in Pathian, Aigupta sal in nihna ata chhanchhuaktu che u ka ni. Pathian dang in be tur a ni lo,” a ti a.

“Milem in siam tur a ni lo va, in be tur a ni hek lo, Kei hi Lalpa, Pathian thikthuchhia ka nih avangin. Ka hming a naranin in lam mai mai tûr a ni lo. Chawlhni in serh thianghlim tûr a ni. Ni ruk chhungin hna in thawk tur a ni a, ni sarihni chu in tan chawlhna ni tûr a ni a, min hriatrengna ni tûr a ni.”

“I nu leh i pa i chawimawi tûr a ni. Tual i that tûr a ni lo. I uire tûr a ni lo. Ruk i ru tûr a ni lo. Dawt i sawi tûr a ni lo. I ṭhenawmpa nupui emaw a in emaw, a thil neih eng mah i awt tûr a ni lo.”

Tin, Pathianin heng thupêk sawmte hi lungphek pahnihah a ziak a, Mosia hnenah a pe ta a. Pathian chuan dân thupêk te leh inthawina dân zawm tur dang tam tak a pe bawk a. Heng dan te hi mipuiten an zawm chuan, Pathianin mal a sawm ang a, a venghim ang a. An zawm loh erawh chuan, Pathianin a hrem dawn a ni

Pathian chuan Israelte hnenah chuan biakbûk an sak tûra a duh chu kimchang takin a hriattir bawk a. Chu chu inbiakna puanin tih a ni a, pindan pahnih a awm a, puanzar hlai takin a daidang a. Puanzar hnung lam pindanah chuan Puithiam lalber chauh luh phal a ni, chutah chuan Pathian a awm avangin.

Mi tupawhin Pathian dân a bawhchhiat chuan Inbiakna puanin hma lama maicham lamah chuan ran a rawn keng thei ang a. Puithiamin ran chu a lo tihlum ang a, maichamah chuan a hal ang. Ran thisen hlana awm chuan mi sualna chu a khuh ang a, Pathian hmaah chu mi chu a tithianghlim ang. Pathianin Mosia unaupa Arona leh Arona thlahte chu a tâna puithiam ni turin a thlang a.

Mipuite chuan Pathian chauh chu chibai bûka, ama thlan bik hnam ni tura Pathianin dân a pek zawng zawng te chu zawm tûrin rem an ti a. Nimahsela, Pathian thu zawm tura an intiam hnu rei lo te ah Israelte chu namen lovin an lo sual ta a.

Mosia chu Sinai tlang chhipah chuan ni tam tak Pathian nen an inbia a. Mipuite chuan a lo kîr hun an nghahna lamah an chau zo ta a. Tichuan, Arona hnenah rangkachak an rawn keng a, an tan milim siamsak turin an ngen ta a.

Arona chuan rangkachakin sebawngno lem a siam a. Mipuite chuan atthlak takin chu milem chu chibai an bûk a, a hnênah inthawina an hlan ta a. Pathian chu an sualna avang chuan a thinur ta êm êm a, anmahni chu tihboral a tum ta a. Nimahsela, Mosia chu an tân ṭawngṭai a, Pathianin a ṭawngṭaina chu a ngaihthlaksak a, anmahni chu a tiboral ta lova.

Mosia chu tlang atanga a rawn chhuk a, milem chu a hmuh chuan, a thin a ûr ta êm êm a. Tichuan, Pathianin Thusawmpek a ziahna lungphekte chu a paih keh ta a.

Tin, Mosia chuan milem chu a rawt dip dêrh a, tuiah a phul a, mipuite chu a intîr a. Pathianin mipuite zîngah hri a lentîr a, mi tamtak an thi a.

Mosia chuan Thusawmpek ziahna keh ta thlakna tur lungphek thar a siam a. Tin, tlangah chuan a han lawn leh a, Pathian hnênah mipuite chu ngaidam turin a ṭawngṭai a. Pathian chuan Mosia ṭawngṭaina chu a ngaihthlaksak a, anni chu a ngaidam ta a. Mosia chu lungphek thara Thusawmpek inziak nên chuan tlang ata a rawn chhuk a. Tin, Pathianin Israelte chu Sinai tlang atangin Ramtiam lam panin a hruai ta a.

Pathian chuan Israelte hnêna a thuthlung in a ken tel dan an zawm tûra a duhte chu a hriattir hnuah, Sinai tlang an chhuahsan ta a. Pathianin Ramtiam, Kanaan an tih bawk, lamah chuan a hruai ṭan ta a. Chhum ding chu Kanaan lam panin an hmaah a kal a, tichuan anni chuan an zui ta a.

Pathianin Abrahama te, Isaaka te leh Jakoba te hnênah Ramtiam chu an thlahte a la pêk tûr thu lo tiam tawh mahsela, tunah hrih chuan chutah chuan hnam chi hrang hrangte an la chêng a. Chung mîte chu Kanaan mîte tia hriat an ni. Kanaan mîte chuan Pathian chu chibai bûkin a thu a zawm hek lova. Pathian diklo te chu chibai an bûk a, thil sual tamtak an ti a.

Pathianin Israelte hnenah, “Ramtiama Kanaan mite chu in tiboral vek tûr a ni. Anmahni nen inremna in siam tûr a ni lova, nupui pasalah in nei tûr a ni hek lo. An milem zawng zawngte chu in tichhe vek tûr a ni a. Ka thu in zawm loh chuan, kei ni lovin an milemte zawk chu chibai in bûk mai ang,” a ti a.

Israelten Kanaan ramri an thlen chuan, Mosian mi sawm leh pahnih, Israel hnam tin ami mi pakhat ṭheuh zel a thlang a. Anni chu ramtiamah zu kala a ram chu eng ang nge a nih zu enthlithlai tûrin a hrilh a. Anni chuan Kanaan mîte chu michak an ni nge ni lo tih hre turin an va enthla dawn a ni.

Mi sawm leh pahnihte chu Kanaan ram fanga ni sawmli an zu thang hnu chuan an rawn kir leh ta a. Anni chuan mipuite hnenah chuan, “Ram chu a ṭha hle a, thlai te pawh a hnianghnar a ni,” an ti a. Nimahsela, enthlatu zinga sawm te chuan, “Khawpui chu a nghet hle a, a mi chengte pawh mi lian takte an ni! Kan han beih vaih chuan anni chuan mi hneh ang a, min tihlum ngei ngei ang,” an ti ve thung a.

Chu veleh enthlatu dang pahnih, Kaleba leh Joshua te chuan, “Kanaan mite chu an sangin an chak tih chu a dik a lawm, nimahsela, anni chu kan hneh thei ngei ang! Pathianin min do sak dawn a ni,” an ti a.

Nimahsela, mipuite chuan Kaleba leh Joshua thu chu an ngaihsak ta lova. Mosia leh Arona chungah an thinrim ta a, an hnênah, “Engvanginnge he hmun ṭihbaiawm takah hian min hruai ni? Indonaa kan thih a, kan nupuite leh kan fate sala an tân ai chuan Aigupta ramah khan lo awm zawk ila ni tur,” an ti a. Mipuite chuan Aigupta lama anmahni hruai kîr leh tûrin hruaitu dang thlan an duh ta a.

Pathian chu a thinur ta hle a, tichuan Inbiakna Puanin ah chuan a rawn kal ta a. Pathian chuan, “Ka chunga in hel tak avangin mipui zawng zawngte chu thlalêrah an vakvai tawh ang. Joshua leh Kaleba tih loh, mi tupawh kum sawmhnih emaw kum sawmhnih aia upa emaw tawhphawt chu chutah chuan an thi ang a, Ramtiamah chuan an lût ngai lovang,” a ti ta a.

Mipuiten chu thu chu an hriatin an thiltih sual chu pawi an ti a. An ralthuamte chu an la a, Kanaan mite bei tûr chuan an kal ta a. Mosia chuan Pathian chu an hnenah a awm loh avangin kal lo turin a hriattir a, nimahsela, a thu chu an ngaihsak lova.

Chu indonaah chuan Pathian chu an hnenah a kal ve loh avangin, hnehin an awm a, an zinga mi tam tak chu tihhlum an ni ta a. Tichuan, Israel mite chu Kanaan aṭang chuan an kîr a, thlalerah chuan kum sawmli chhung an vakvai ta a.

Israelte thlalêrah kum sawmli chhung an vahvaih lai chuan, Pathianin an mamawh a phuhruksak a. Ani chuan vân atangin chhang, mana an tih chu a pe a. Sa an ei theihnan Vahmim rual (sava te lutuk lo) te chu an riahbûk ah a tîr a. Chung hun lai zawng chuan Pathianin an thawmhnaw te leh an pheikhawkte chu chûl lo tûrin a vawnhimsak a.

Pathian chuan anmahni chu mak takin lungpûi ata tui a pe a. Chutiang a ni chung pawhin, Israel mite chu Pathian leh Mosia chungah an la phunnawi ta fo va. Chutichung pawh chuan, Pathian chu Abrahama te, Isaaka te, leh Jakoba te hnêna a thutiamah chuan a la rinawm ta fova.

Mipuiten tui an tlakchham hun a lo thleng leh a, Pathianin Mosia hnenah, “Lungpui chu thu pe la, tichuan, chuta ṭang chuan tui a lo chhuak mai ang,” a ti a. Nimahsela, Pathian thupêk anga lungpui chu thu pe lovin, hmawlhin vawihnih a vuak tâk zawk avangin mi zawng zawng hmaah Pathian a chawimawi ta lo va. Mitin in atan lungpui ata chu tui a lo chhuak ta a, nimahsela, Pathian chu Mosia chungah a thinûr a, a hnênah, “Ramtiamah i lut lovang,” a ti ta a.

Israelte thlalêrah kum sawmli an vahvaih hnu chuan, Pathian laka hel zawng zawngte chu an thi zo ta vek a. Tin, Pathianin mipuite chu Ramtiam hnaihah a hruai thleng ta a. Mosia chu a lo upa ta hle a,mipuite a hruainaa amah tanpui tûrin Pathianin Joshua a thlang ta a. Pathian in Mosia hnenah, engtik niah emaw Mosia ang zawlnei a la rawn tîrh tûr thu a tiam bawk a.

Tin, Mosian Ramtiam chu a hmuh theihnan Pathianin tlang chhipa han lawn tûrin a hrilh a. Mosia chuan Ramtiam chu a hmu a, nimahsela, Pathianin a luh a phal ta lo a. Tin, Mosia chu a thi ta a, Israelte chuan ni sawmthum chhung an sûn a. Joshua chu an hruaitu thar a lo ni ta a. Joshua chuan Pathian a ring a, a thu a awih avangin hruaitu ṭha tak a lo ni ta a ni.

A tawpah chuan Israelte tan Kanaan ram an luh hun a lo thleng ta a. Joshua chuan Kanaanho khawpui Jeriko, kulh bang nghet taka hung hnan ah chuan enthlatu pahnih a tîr ta a. Chu khawpuiah chuan nawhchizuar pakhat, Rahabi an tih chu a awm a, ani chuan ênthlatute chu a lo thukrû a, a hnuah an tlanchhuah theihnan a lo pui bawk a. He thil hi Pathian a rin avanga ti a ni. Anni chuan Israelten Jeriko an tihchhiat hunah Rahabi leh a chhungte chu hûmhim an tiam ta a.

Israelte chuan Ramtiam an luh theihnan Jordan lui an kân a ngai a. Pathianin Joshua hnênah, “Puithiamte chu kal hmasak tîr rawh,” a ti a. Puithiamten Jordan lui an rah veleh, tui luang lai chu a chawl ta a, tichuan, Israelte chu leichârah kalin vaukam lehlam an kai thei ta a ni.

Mipuiten Jordan lui an kân hnu chuan, Pathianin Joshua chu Jeriko khaw chak tak beih dan tur a hrilh ta a. Mipuite chuan Pathian thu chu an awih a. Pathianin a hrilh ang takin sipaite leh puithiamte chuan Jeriko khawpui chu ni ruk chhung nîtin vawi khat an hel chhuak a.

Tin, a ni sarih nî ah chuan, Israelten khawpui chu vawi sarih an helchhuak leh a. A tawpna atana an hel lai chuan, puithiamten tawtawrawt an lo ham laiin sipaite chu an lo auchhuak a.

Tin, Jeriko kulh chu a chim ta a. Israelte chuan Pathian thupêk ang ngei in khawpui chhunga awm zawng zawngte chu an tichhe ta vek a. Rahabi leh a chhungte chauh chu an zuah a, anni chu Israel hnamah an tel ve ta a ni. Israelten Jeriko an tihchhiat thu Kanaan rama hnam dang awm ten an lo hriat chuan, Israelte chuan anmahni pawh an rawn bei mai ang tih an hlau ta hle a.

Pathian chuan Israelte chu Kanaan rama awm eng hnam nên mah inremna thu thlung lo tûrin thu a pe a. Nimahsela, Kanaan rama hnam chi khat, Gibeon an tih te chuan, Joshua chu tihderin Kanaan piah ram hla tak atanga rawn kal angin an insawi a. Anni chuan Joshua hnenah anmahni nên inremna siam tûrin an ngen a. Joshua leh Israelte chuan Pathian hnenah Gibeon mite chu khawilam mi nge an nih tih rêng an zawt lova. Tichuan, Joshua chuan anmahni nên inrêmna a siam ta a.

Israelte chuan Gibeon miten an bum tih an hriatchhuah chuan an thin a rîm a, nimahsela, inremna an siam chu Pathian hmaa thutiam a nih avangin, Israelte chuan an kaltlangpui ta a ni. Engemaw chên hnuah chuan, Kanaan ram a hnam dang, Amorho lalte chuan Gibeon mite chu Israelte nên inrêmna an siam tih an lo hria a, tichuan, an sipaite chu punkhawmin sipai rual lian takah an siam a, Gibeon mîte chu an bei ta a. Gibeon mite chuan Joshua hnênah ṭanpuina ngênna an thawn ta a.

Tichuan, Joshua chuan Israel sipaite chu a kokhawm a, Gibeon mîte awmna thlêng tûrin zankhuain an kal ta a. Zingkâr hma takah Amorhote chu an va ṭhawng ta thut a, an bei ta a.

Chumi ni chuan Pathian chu Israelte lamah ṭangin a dopui a. Amor mite chu a tichiai a, rial nasa tak tlaktîrin, chûngte chuan Amor mi tam tak a denghlum ta a.

Israelten Amor mite an hneh hman ngei theihna tûrin hun an mamawh tawk an neih theihnan Pathianin ni chu vanah a chelh dinsak a. Chumi ni chuan, Pathianin Israelte chu hnehna ropui tak a chantîr ta a ni.

Pathianin chung sipaite chu a hneh hnu chuan, Kanaan hnam tamtak chu Israelte bei tûrin an in punkhawm ta chiam a. Joshua leh Israelte chuan anni chu an bei a, an tihlum ta a.

He indona zawh hnu hian, Pathianin Israel hnam tin te chu Ramtiam a an chanpual tûr ṭheuh ram a pe ta a. Tin, Pathianin Israelte tân an ramchhung hmun tinah muanna a thlentîr ta a.

Joshua a lo tar hnu chuan Israel mipuite chu a kokhawm a. Tin, Joshua chuan Pathianin Sinai tlânga Israelte hnêna a thuthlung chu an zawm ngei tûr a nihzia a hriat nawntîr leh a. Mipuite chuan Pathian laka rinawm tur leh a dante zawm tûrin an intiam a.

Joshua thih hnu chuan, Israelte chuan Pathian thu an awih ta lova, a dân te an zawm lova, Kanaan mi la awm te chu an hnawtchhuak hek lo. Lalpa, Pathian tak biak aiin Kanaan pathiante chu an be ta zawk a. Israelte chuan lal an nei lova, chuvangin mitînin mahni ṭha tihzawng zawngin an ti mai a.

Israelten Pathian thu an awih loh tâk zel avangin Pathianin an hmelmate hnehtîrin anni chu a hrem ta a. An hmelmate chuan an thilneihte ruksakin an tihchhiatsak a, an zinga mi tamtak an that bawk a. Kum tâmtak Pathian thu awih lova an awm a, an hmelmate awpbeh an nih hnu chuan Israelte chuan an thiltih sual chu an sim a, Pathian chhanchhuahna an dil ta a.

Tin, Pathianin chhanchhuaktu a pe a, ani chuan an hmelmate lak ata a chhanchhuak a, an ramah muanna a thlentîr ta a. Nimahsela, mipuite chuan Pathian an theihnghilh a, milemte an lo be leh ta a. Chuvangin, Pathian chuan an bul hnaia awm an hmêlma, Midian mîte chu anmahni hnehtîr a remti ta a.

Midian mite chuan Israel mite lova thlai zawng zawngte chu kum sarih chhûng an laksak a. Israel mite chu an mangang ta hle mai a; Midian mîte hmuh loh tûrin pûkah te an biru a. A tawp khawk ah, anmahni chhanchhuak tûrin Pathian an au ta a.

Ni khat chu, Israel mi pakhat, Gideona chuan a rukin, Midian miten an ruksak lohnan, buh a lo vua a. Lalpa vantirhkoh chu Gideona hnenah a rawn kal a, a hnenah, “Nang mi chak huaisen, Lalpa chu i hnênah a awm e. Kal la, Israel mîte chu Midian mîte lak ata chhanchhuak rawh,” a ti a.

Gideona pa chuan milem pualin maicham a nei a. Pathianin Gideona hnênah maicham chu tichhe tûrin a hrilh a. Nimahsela, Gideona chuan mipui a hlauh avangin zân thlengin a nghak ta a. Tin, maicham chu a tichim a, a tikehsawm ta a. Milem puala maicham awmna ṭhin ah chuan Pathian tan maicham a din ta a, chumi chungah chuan Pathian hnênah inthawina a hlan ta a.

A tuk zingah chuan mîten maicham chu tuin emaw an tichimin an tichhia tih an hmuhin an thinûr ta hle a. Gideona that tûrin a inah an va kal a, nimahsela, Gideona pa chuan, “Engvanginnge in pathian chu ṭanpui in tum a? Amah chu pathian a nih chuan, amah leh amah invênghim ang hmiang,” a lo ti a. Chu thu a sawi avang chuan, mîte chuan Gideona chu an that ta lova.

Tin, Midian mîte chu Israelte thil rû tûrin an rawn kal leh ta a. An tam em avangin chhiarsen rual an ni lova. Gideona chuan anmahni bei tûrin Israelte chu a kokhawm a. Gideona chuan amah chu Pathianin Israelte chhanhim tûrin a hmang ngei dawn tih a hriatchian theihnan Pathian hnênah chhinchhiahna pahnih a dil a.

Chhinchhiahna pakhatna atan, Gideona chuan berâm hmul chu leiah a dah a, Pathian chu leichungah ni lovin berâm hmul chungah chauh dai awmtîr turin a ngen a. Pathian chuan chutiang chuan a ti ta a. A tukah, berâm hmul tih loh lei chung zawng chu hnawntîr tûrin a ngen a. Pathianin chu pawh chu a ti a. Chu chhinchhiahna pahnih te chuan Pathianin Gideona chu Midian mite laka Israelte chhanchhuak tûrin a hmang dawn a ni tih a rawn tihchiansak ta a.

Israel sipai 32,000 te chu Gideona hnênah an rawn kal a, nimahsela, Pathianin an tam lutuk tiin Gideona a lo hrilh a. Tichuan Gideona chuan indo hlau mi 22,000 te chu an in lamah a kirtîr a. Pathianin Gideona hnenah mi a la ngah mah mah tih a hrilh a. Tichuan, Gideonan sipai 300 tih loh mi dang zawng chu an in lamah a hawtîr ta a.

Chumi zan chuan Pathianin Gideona hnênah, “Midianho riahbûkah zu kal la, an thil sawi i hriat hunah i hlau tawh lovang,” a ti a. Tichuan, chumi zan chuan Midian mîte riahbûkah a zu kal a, Midian sipai pakhatin a ṭhianpa hnena a mumanga a thil hmuh a hrilh chu a zu hria a. A ṭhianpa chuan, “He mumang awmzia chu Gideona sipaite chuan Midian sipaite chu an hneh dawn tihna a ni,” a lo ti a. chu thu chu Gideonan a hriatin, Pathian chibai a bûk ta a.

Tin, Gideona chu a sipaite hnenah a kîr leh a, tawtawrawt leh, bel ruak leh meichher a pe ṭheuhva. Midian sipaiho te an muthilh laiin an riahbûk chu an zu hual ta a. Gideona sipai 300 te chuan bel ruak chhungah meichher an dah avangin Midian mîte chuan meichher eng chu an hmu thei lova.

Tin, Gideona sipai te chuan an bêl chu a rualin an tikeh a, thawk leh khatah meichher êng chu a rawn engchhuak ta phut a. An tawtawrawtte chu an hâm a, “Lalpa leh Gideona ngunhnam,” tiin an auva.

Pathianin Midian mîte chu a tichiai ta a. Tichuan anmahni leh anmahni an insual a, an inthat a. Chu veleh, Israel mi in lama lo awm zawng te chu Midian mîte umchhuahpui turin an han ko va. An zinga mi tamtak an that a, a dang zawng chu Israel ram atangin an umchhuak ta a. Chumi ni chuan Midian mi 120,000 an thi a. Pathianin Israelte chu a chhanhim ta a.

Mipuite chuan Gideona chu an lal a siam an duh a. Gideona chuan a lo remti lo va, nimahsela, Midian mîte rangkachak bêngbeh an laksak ṭhenkhat chu a dil a. Mipuite chuan Gideona chu rangkachak ṭhahnem tak an pe ta a.

Tin, Gideona chuan rangkachakte chu puithiam lalten an hak ṭhin ang thawmhnaw danglam bîk siam nan a hmang ta a. Nimahsela, mipuiten chu thil chu milem angin chibai an bûk ta a. Chuvangin, Pathianin milem an biak avang chuan Israel mîte chu a hrem leh ta a. Pathian chuan an hmelmaten an hneh a remti ta a. A tawpah chuan Pathian ṭanpuina an dil leh a, Pathian chuan chhanchhuaktu dang a rawn tîr leh a.

Hetiang hi vawi tam tak a thleng nawn a ni: Israelte chu an sual ang a, Pathianin a hrem ang a, an sual an sim ang a, Pathianin anmahni chhanchhuak tûrin chhanchhuaktu a rawn tîr ang. Kum tamtak chhung Pathianin Israelte chu an hmelmate lak ata chhanchhuak turin chhanchhuaktu a rawn tîr ṭhin a ni.

A tawpah chuan, mipuiten Pathian hnênah hnam dang zawng zawngten a lal an neih ang chu an dîl ta a. Lal chak leh sang, indonaa anmahni hruai theitu tûr an duh a. Pathian chuan an thil ngen chu a duhzawng a ni lo mahse, an dil ang ngeiin lal chu a pe ta a.

Saula chu Israelte lal hmasa bêr a ni a. Mipuite duh angin a dung a sangin a hmel pawh a ṭha a. Saula chu Israelte chunga lal a nih hnuah, hun rei vak lo chhung chu lal ṭha tak mai a ni a. Nimahsela, Pathian thu awih lovin sual takin a lo awm ta a, chuvangin, Pathianin nakina amah thlaktu tûr atan midang a thlang ta a.

Pathian chuan Saula hnua lal tûrin Israel tlangval Davida chu a thlang ta a. Davida chu Bethlehem khua chêng a ni a, berâm vengtu a ni. Davida chuan a pa berâm a ven changin berâm rawn bei ṭhintu sakeibaknêi leh savawm te chu a lo tihlum tawh a. Davida chu mi inngaitlawm leh mi fel tak a ni a, Pathian a ring a, a thu a awih a.

Davida chu sipai ṭha leh hruaitu ṭha tak a lo ni ta a. Davida chu tleirawlte a la nih laiin, milian Goliatha chu a bei a. Goliatha chu sipai inzirchhuak, chak tak leh meter thum dawn a sang hi a ni a. Nimahsela, Pathianin Davida chu a ṭanpui a, Davida chuan Goliatha chu a that a, Israelte chu a chhanchhuak ta a. Chumi hnuah pawh chuan, Davida chuan Israel hmelmate lakah vawi tam tak hnehna a chang a, chuvangin, mipuiten amah chu an fak a.

Saulan mipuiten Davida an hmangaih avang chuan a thîk ta a. Davida chuan Saulan vawi tam tak tihhlum a tum avangin a bihrûksan ta a. Ni khat chu, Saula chuan Davida chu thah tumin a zawng ta a. Davida birûkna pûk ah ngei chuan Saula chu a va lut a, nimahsela, Saula chuan a hmu lova. Davida chu Saula bul maiah chuan a awm a, a that thei rêng a, nimahsela a that duh lova. Thah aiin, Davida chuan Saula hnênah lal a nih theihnan amah chu a that daih thei tawh a ni tih tihchiannan Saula puan chu a hlep ta a.

A tawpah chuan Saula chu indonaah a thi ta a, Davida chu Israelte lal a lo ni ta a. Lal ṭha tak a ni a, mipuiten amah chu an hmangaih a. Pathianin Davida chu mal a sawm a, a hlawhtlintîr a. Davida chu indonaah vawi tamtak a kal a, Pathianin a ṭanpui a, Israel hmelmate chu a hnehtîr a. Davida chuan Jerusalem chu a la a, ama khawpuiah a siam ta a. Davida lal chhung hian, Israel ram chu ram thiltithei leh hausa tak a lo ni ta a ni.

Davida chuan Israel miten Pathian chibai an bûka a hnêna inthawina an hlan theihna tur Temple sak a duh ta a. Mipuite chuan Mosia din Inbiakna Puanin ah kum 400 vel lai Pathian chibai bûkin a hnênah inthawina an lo hlan tawh a ni.

Nimahsela, Pathianin zawlnei Nathana chu Davida hnênah he thuchah nen hian a tir a, “Indo mi i nih avangin nang chuan ka tan Temple mi sak sak lovang. I fapa in a sa zawk dawn a ni. Nimahsela, nasa tâkin mal ka sawm ang che. I thlahte zinga mi pakhat chu ka mite chungah lal a ni ang a, an chungah kumkhuain ro a la rel ang!” a ti a. Davida thlah kumkhuaa rorêl thei tûr awmchhun chu Krista chauh hi a ni. Chu Messia chu Pathian mithlan a ni a, ani chuan khawvel mîte chu an sual lakah a chhandam dawn a ni.

Heng thute hi Davidan a hriatin Pathianin duhsakna nasa tak leh malsawmna tam tak a hnêna a tiam avangin Pathian hnênah lawmthu sawi nghalin Pathian chu a fak a. Davida chuan engtikah nge Pathianin heng thilte hi a tih dawn tih a hre lo. Nimahsela, thil a lo thlen zêl dan enin, Israelte chuan Messia lo kal tûr chu hun rei tak, kum 1,000 dawn lai mai an nghah a lo ngai ta a ni.

Davida chuan dikna leh rinawmna nên kum tâm tâk ro a rel a, Pathianin a ni chu mal a sawm a. Amaherawhchu, a hun hnuhnung lamah chuan Pathian lakah nasatakin thil sual a lo ti ta a.

Ni khat chu, Davida sipai zawng zawng te chu ral dova an kal bo laiin, a lal in ata a dâkchhuak a, hmeichhe hmelṭha tak inbual lai a hmu a. Hmeichhe hming chu Bethsebi a ni.

Hmun dang hawisan ta lovin, Davida chuan chu hmeichhia chu a hnêna rawn hruai turin mi a tîr ta a. Chu hmeichhia chu a mutpui a, a in lamah a hawtîr leh ta a. A hnu rei lo teah Bethsebi chuan Davida hnênah nau a pai thu a hriattîr ta a ni.

Bethsebi pasal Uria chu Davida sipai ṭha bêrte zinga pakhat a ni a. Davida chuan Uria chu indona hmun aṭangin a haw tîr a, a nupui hnêna awm turin a hrilh a. Nimahsela, Uria chuan sipai dang zawngten ral an do laia in lama lo awm chu a duh lo va. Tichuan, Davida chuan Uria chu indona lamah a tîr kîr a, sipai hotu hnênah Uria chu hmelmatên an thah ngei theihnan hmelmate chakna lai bêr hmuna awmtir turin a hrilh ta a.

Uria thah a nih hnu chuan, Davidan Bethsebi chu nupuiah a nei ta a. Chumi hnu chuan, Davida chu fapa a hrinsak a. Pathian chu Davida thiltih ah chuan a thinûr hle a, tichuan, a sualna tenawmzia chu hriattîr turin Davida hnênah zawlnei Nathana a tîr ta a. Davida chuan a sualna chu a sim a, Pathianin a ngaidam ta a. Davida chuan a damchhung zawngin, hun harsa ah pawh nise, Pathian chu a zui a, a thu a awih ta a.

Nimahsela, Davida sualna hremna atan, a fapa nausen chu a thi ta a. Davida inchhungkhurah chuan a dam chhung zawngin innghirngona a thleng ta a, Davida thiltihtheihna chu nasatakin a tlakhniam phah a. Davida chu Pathian lakah lo rinawm tawh lo mahse, Pathian chu a hnêna a thu tiamah chuan a la rinawm reng a. Tichuan, Davida leh Bethsebi chuan fapa dang an nei a, a hmingah Solomona an sa a.

Kum tam tak hnuah, Davida chu a thi ta a, a fapa Solomona chuan Israelte chungah ro a rêl ṭan ta a. Pathianin Solomona chu a bia a, engnge a duh ber a zawt a. Solomona chuan finna a dil ta a, a thil dil chuan Pathian a tilawm hle a, khawvela mifing bêr a nihtîr ta a. Solomona chuan thil tamtak a zîr a, rorêltu fing tak a lo ni ta a ni. Pathian chuan mi hausa takah a siam ta bawk a.

Solomona chuan Jerusalemah Temple a sa ta a, chumi sakna atân chuan a pa Davida chuan a lo ruahman a, a châkte a lo lakhawm tawh a ni. Mipuite chuan Inbiakna Puanin ah ni tawh lovin Temple ah chuan Pathian chu chibai bûkin a hnênah inthawina an hlan ta a. Pathian chu Temple ah chuan a rawn awm a, a mite zîngah chuan a rawn chêng ta a ni.

Amaherawhchu, Solomona chuan ram dang hmeichhiate a hmangaih a. Pathian thu kalhin nupui tamtak a nei a, 1,000 dawn lai an ni. Nupuia a neihte hi ram hrang hrang a mîte an ni a, anni chuan an pathian ṭheuh an rawn chhawm a, an be chhunzawm zel bawk a. Solomona chuan a lo upat hnuin an pathiante chu chibai a buk ve ta a.

Pathian chu Solomona chungah chuan a thinûr ta hle a, a rinawmloh avanga hremna atan Israel hnam chu Solomona thih hnuah lalram pahniha a ṭhen darh tûr thu a tiam ta a ni.

Solomona thih hnu chuan, a fapa Rehoboama chu a rawn lal ta a. Rehoboama chu a tak mai a ni. Amah chu lal a siam turin Israel hnam tin a mite chu an lo kalkhawm a. Rehoboama hnenah chuan Solomona khan hna hahthlak tak tak a thawhtîr thu te leh chhiah tamtak a chawitîr thu te sawiin an vui thu an thlen a.

Rehoboama chuan, “Ka pa Solomona khan hna a thawhrim tir viau che u ah in ngai a, nimahsela, kei hian ani aiin hna ka thawh rimtir zawk dawn che u a ni, tin, ani aiin ka hrem nasa zawk bawk ang che u,’ tiin, anmahni chu â takin a lo chhang a.

Israel hnam sawmte chu Rehoboama lakah an hel ta a. Hnam hnih chauh chu a lamah an ṭang ta a. Heng hnam hnihte hi Juda lalram an lo ni ta a ni.

Israel hnam sawm Rehoboama laka helte chuan Jeroboama chu an lal atan an siam a. An lalram chu hmar lamah an din ta a, Israel lalram tih a lo ni ta a ni.

Jeroboama chu Pathian lakah a hel ta a, mipuite chu thil sual a tihtîr a. Juda lalrama Temple ah chuan mipuiten Pathian aia an biak tur milem pahnih a dîn ta a.

Juda leh Israel lalram te chu an lo inhmelma a, an indo ta fo va.

Israel lalram thar a lal zawng zawngte chu an sual vek a. Heng lal tam tak te hi an aia lal nih duh Israel midangten an that ta a.

Israel lalrama lal zawng zawngte leh mipui tam zawkte chuan milêm an bia a. An milêm biaknaah chuan hmeichhiat-mipatna hman sualna leh nausêna inthawina te pawh a tel ṭhin a ni.

Juda lalte chu Davida thlahte an ni a. Chung lal ṭhênkhatte chu lal ṭha tak an ni, ro ṭha takin an rel a, Pathian chibai an bûk a. Nimahsela, Juda lal tam zawkte chu sual leh diklo taka thil ti mi an ni a, milêmte an bia a. Chung zinga lal ṭhenkhatte chuan pathian tak ni lo te hnêna inthawinan an fate pawh an hlan a. Juda mipui tam zawk te pawh Pathian lakah an hel a, pathian dangte an bia a.

Pathian chuan Israelte hun tawn zawng zawngah zawlneite an hnênah a tîr a. Zawlneite chuan Pathian hnên aṭangin thu chah an dawng a, tin, Pathian thuchah chu mipuite hnênah an hriattîr leh a ni.

Elija chu Israel lalrama Ahaba a lal laia zawlnei a ni a. Ahaba chu mi sual a ni a, mipuite chu pathian tak ni lo Baal be tûrin a fuih a. Elija chuan Ahaba hnenah, “Ka sawi leh hma loh zawng Israel lalramah ruah emaw dai emaw rêng rêng a tla tawh lovang,” a ti a. Chu chuan Ahaba a tithinûr ta hle a ni.

Pathianin Elija chu thlaler lui lamah amah thah tumtû Ahaba biruksan turin a hriattir a. Tûktin leh tlai tinin savate chuan chhang leh sa an rawn ken ṭhin a. Ahaba leh a sipaiten Elija chu an zawng a, nimahsela, an hmu zo lova. Khawkhêng chu a nasat êm avangin lui tui chu a kang ta a.

Tichuan, Elija chu an ṭhenawm ram lamah chuan a kal ta a. Chumi rama hmeithai pakhat leh a fapa chuan ruahtui a tlak loh vânga ṭam lo thleng avang chuan ei tûr an lo tlachham dawn ta mai a. Nimahsela, Elija chu an lo ngaihsak a, tichuan, an chhangphut leh sahriak bûr chu phai thei lo tûrin Pathianin a ṭanpui ta a ni. Ṭam chhung atan ei tûr an lo nei ta a ni. Elija chu chutah chuan kum engemaw zât a awm ta a.

Kum thum leh a chanve hnuah chuan, Pathianin ruah a sur tir leh tawh dawn avangin Elija chu Israel lalrama kira Ahaba hnena thu va sawi turin a ti ta a. Ahaban Elija chu a lo hmuh chuan, “Nang i ni maw, buaina siamtupa!” a lo ti a. Elija chuan, a hnenah, “Nang kha buaina siamtu chu i ni! Lalpa, Pathian tak chu i hawisan a, Baal i bia a. Israel lalrama mi zawng zawng te chu Karmel tlangah rawn hruai vek rawh,” a ti a.

Baala puithiam 450 nen, Israel lalrama mi zawng zawngte chuan Karmel tlâng an pan ta a. Elija chuan mipuite hnênah, “Eng tia rei nge tuilairapa in awm dawn? Lalpa chu Pathian a nih chuan a rawng bawl ta che u! Baala chu Pathian a nih chuan a rawng chu bawl rawh u!” a ti a.

Tin, Elija chuan Baal puithiamte hnênah, “Bawngchal that ula, inthawina atan buatsaih rawh u, nimahsela, mei chhem suh ang che u. Kei pawhin chutiang bawk chuan ka ti ang a. Meia rawn chhângtu Pathian chu Pathian tak a ni ang,” a ti a. Tichuan, Baal puithiamte chuan inthawina an buatsaih a, mei erawh an chhêm lova.

Tin, Baal puithiamte chu Baal hnenah, “Baal, min lo ngaithla rawh,” tiin an ṭawngṭai ta a. Nilêngin an ṭawngṭai a, an auva, chemte tein an inzai bawk a, nimahsela, chhânna a awm hauh lo.

Ni tlak dawnah chuan, Elija chuan Pathian hnêna inthawina a buatsaih ta a. Tin, mipuite hnenah tui bêl sawm leh pahnih te chu inthawina chungah, sate, thingte leh maicham bul vela lei te pawh a huh kim vek thlenga leih tûrin a hrilh ta a.

Tin, Elija chu a ṭawngṭai a, “Lalpa, Abrahama Pathian, Isaaka Pathian, Jakoba Pathian, vawiinah hian nang chu Israelte leh kei i chhiahhlawha Pathian i nihzia rawn lantîr ang che. Heng mîte hian nang chu Pathian tak i nihzia an hriatnan min rawn chhang ang che,” a ti a.

Chuvêleh, van aṭangin mei a rawn tla thla a, sate, thingte, lungpuite, hnawmhnawkte, leh maicham vela tui te lamin a rawn kâng ral ta a. Mipuiten chung thilte chu an hmuh chuan, leiah an tlu a, “Lalpa chu Pathian a ni! Lalpa chu Pathian a ni!” an ti a.

Tin, Elija chuan, “Baal puithiam te kha a tû a mah lo chhuahtir suh u,” a ti a. Tichuan, mipuite chuan Baal puithiamte chu an man a, chumi hmun atâ chu an hruai chhuak a, an that ta a ni.

Tin, Elija chuan lal Ahaba hnênah, “Ruah a sur dawn avangin, khawpui lamah kîr thuai rawh,” a ti a. Vân chu a rawn thim ta thuai a, ruahpui vanawn a rawn sûr ta a. Lalpan khawkhêng chu a rawn titawp a, Pathian tak a nihzia a rawn tichiang ta a ni.

Elija hnuah, Pathianin Elisa chu a zawlnei ni tûrin a thlang a. Pathianin Elisa hmangin thilmak tâm tâk a ti a. An hmelmate sipai hotu, vun natna nasa tak vei, Naamana chungah pawh thilmak a thlêng a. Ani chuan Elisa chanchin a lo hria a, amah tidam turin a ngên ta a. Elisa chuan Naamana hnênah Jordan luiah vawi sarih inhnim tûrin a lo hrilh a.

A tîr chuan, Naamana chu a thinrim a, chu thil chu atthlak a a lan avângin a ti duh lova. Nimahsela, a hnuah a inlamlêt a, Jordan Luiah chuan vawi sarih a inhnim ta a. A rawn chhuah hnuhnung ber tum chuan a vun chu a lo dam ta viah a! Pathianin a tidam ta a ni.

Pathianin zawlnei dang tam tak a tîr a. Chung ho zawng zawngte chuan mipuite chu milêm biak bansân tûrin leh midangte hnênah dikna leh zahngaihna lantîr tawh tûrin an hrilh ṭheuh va. Zawlneite chuan mipuite chu Pathian thu awiha thil sual tih an bansan loh chuan, Pathianin thiamloh a chantîr ang a, a hrem dawn a ni tiin an vaukhan lawk a ni.

Mipuite chuan Pathian thu zawm loh hun an ngah zawk a. Zawlneite chu an tiduhdah fova, an tihlum bawk ṭhin a. ṭumkhat pawh, zawlnei Jeremia chu tuikhûr tui awm tawh lohnaah dah lutin thi tûrin an kalsan a. Tuikhur mawng a chirhdûpah chuan a pil a, nimahsela, lal chuan a chungah zah a ngai a, a chhiahhlawhte chu Jeremia thih hmain tuikhur ata a lakchhuahtîr a.

Mipuiten zawlneite chu haw hle mahse zawlneite chuan Pathian tân thu an sawi chhhunzawm zel a. Mipuite hnênah an sual an sim loh chuan Pathianin a hrem tûr thu hrilhin an vaulawk a. Mipuite hnênah Pathian tirh Messia rawn kal tur thutiam chu an hriatnawntîr ṭhin bawk a.

Israel lalram leh Juda lalram te chu Pathian lakah an lo sual ta a. Pathianin Sinai tlânga an hnêna a thuthlung chu an lo bawhchhe ta a. An sual sima amah chibai bûk leh tura hrilh tûrin Pathianin an hnênah a zawlneite a tîr a, nimahsela, an awih duh lo va.

Chuvangin, Pathianin lalram pahnihte chu hremin, an hmelmaten a an hneh a rêmti ta a. Assuria lalram thiltithei leh nunrawng tak chuan Israel lalram chu a hneh ta a ni. Assuria te chuan Israel lalrama mi tam takte chu an that a, thil hlu tinrêngte chu an la a, a ram chhung hmun tâm tak chu an hal ta a.

Assuariate chuan hruaitu zawng zawngte, mi hausa te, leh mi themthiamte chu an khalhkhawm a, Assuria ramah an hruai ta a. An thah bâng Israel mi rethei tak tak te chauh Israel lalramah chuan an châmbâng ta a.

Tin, Assuariate mite chuan Israel lalram lo din tawhna ah chuan ramdang mite an awmtîr a. Chung ramdang mîte chuan khawpui chhe tawhte chu an din ṭha leh a, Israel lo la chambangte chu nupui pasalah te an nei a. Israel mi, ramdang mi nupuia neite thlah kal zel te chu Samari mi tih an lo ni ta a ni.

Juda lalrama awmte chuan Israel lalrama awmtena Pathian an rîn loh avang leh a thu an awih loh avanga Pathianin a hrem dan te chu an lo hria a. Nimahsela, milemte, Kanaan mite pathiante pawh, an la be rêng thova. Pathian chuan anmahni zilh turin zawlneite a tîr a, nimahsela, an awih duh chuang lova.

Assuria miten Israel lalram an tihchhiat atanga kum 100 vel a ral hnu chuan, Pathianin Babulon lal, Nebukadnezzara chu Juda lalram do turin a tir ta a ni. Babulon chu lalram thiltithei tak a ni a. Juda lal chuan Nebukadnezzara sal a awm leh a hnena kumtin sum ṭhahnem tak pek a remti ta a ni.

Nimahsela, kum rei vak lo hnuah chuan, Juda lalram chu Babulon lakah a hel ta a. Tichuan, Babulon mite chu an rawn kir leh a, Juda lalram chu an bei ta a. Jerusalem khawpui chu an la a, Temple chu an tichhia a, khawpui leh Temple a ro zawng zawng chu an la vek a.

Juda lal chu a hel avanga amah hremna turin Nebukadnezzara sipaite chuan lal fapate chu lal hmaah chuan an tihlum ta a, tichuan, amah pawh a mit an tihdelsak a. Chumi zawhah chuan, lal chu Babulon tânina thih thlênga tâng turin an hruaichhuak ta a.

Nebukadnezzara leh a sipaite chuan Juda lalrama mi zawng zawng deuhthaw chu Babulonah an hruai ta a, mi rethei bêr bêr te chauh chu thlai chingtu atan an hnutchhiah ta a ni. Hemi hun, Pathian mîten tihluihnaa Ramtiam an chhuahsan hun hi, Saltan lai tia hriat a ni.

Pathian chuan an sualna avangin ramdangah awmtîr mahsela, anmahni leh a thutiamte chu a theihnghilh lo va. Pathian chuan a mîte chu ngaihvenin an hnênah a zawlneite hmangin thu a la sawi chhunzawm reng a. Kum sawmsarih hnuah Ramtiama an la kîr leh tûr thu a tiam a.

Kum sawmsarih vel hnuah chuan, Persia lal Kuran Babulon mite chu a hneh a, tichuan, Persia lalram chuan Babulon lalram chu a rawn luahlan ta a. Israel mite chu Judate tia hriat an lo ni ta a, an zinga a tam zawkte chu Babulonah an damchhûngin an awm ta a. Juda mi upa tawh tak tlêmte te chauhvin Juda ram chu an la hre reng a.

Persia lalram chu ram chak tak nimahsela, a ram lak mipuite chungah chuan zah a ngai thei thung a. Kura chu Persia lal a nih hnu rei lo tê ah Juda mi tupawh Juda rama kîr leh duh apiang Persia ram an chhuahsan theihna tur thupêk a chhuah ta a. An hnenah Temple sak ṭhat lehna tur sum pawh a pe bawk a! Tichuan, kum sawmsarih chhung sala an tân hnuin, Juda mi tlemte ho khat chu Juda ram Jerusalemah chuan an kîr leh ta a ni.

Mipuiten Jerusalem an lo thlen chuan, Temple leh khawpui bangte chu an din ṭha leh a. Hnamdangten an chungah ro la rêl hrih mahse, Ramtiamah chuan an chêng leh ta a, Temple ah Pathian chibai an bûk leh thei ta a ni.

A tîr te atangin Pathianin Messia rawn tîr tûrin rêm a lo ruat tawh a. Messia rawn tirh a nih tur thu hi Adama leh Evi hnênah tiam hmasak bêr a ni a. Pathian chuan Evi aṭangin chithlah a lo piang ang a, ani chuan rûl lu a la tithitling ang tih a lo tiam tawh a. Evi bumtu rûl kha Setana a ni a. Chu thutiam awmzia chu Messia chuan Setana chu a la hneh dawn tihna a ni.

Pathianin Abrahama hnênah amah kaltlangin khawvela hnam tin an la thawven tûr thu a tiam a. He malsawmna hi nakinah Messia lo kal huna tihfamkim tûr a ni. Ani chuan khawvela hnam tin te chhandam an nih theihna tûr kawng a la siamsak dawn a ni.

Pathian chuan Mosia hnenah hun lo la kal turah Mosia ang zawlnei dang a la rawn tirh tur thu a tiam a. Hei hi nakin huna lo kal tur Messia chungchanga thutiam dang chu a ni.

Pathian chuan Lal Davida hnenah a thlahte zinga mi pakhat chu Pathian mite chunga lal a lo la nih tûr thu leh kumkhuain ro a la rêl tûr thu a tiam a. Chumi awmzia chu Messia chu Davida thlah ngei a la ni ang tihna a ni.

Pathianin zawlnei Jeremia kaltlangin Sinai tlanga Israelte hnêna a thuthlung ang ni lo, Thuthlung Thar a la siam tûr thu a tiam ta a. Chu thuthlung tharah chuan Pathianin a dan chu mite thinlungah a ziak ang a, mite chuan Pathian chu mimal takin an hre tawh ang a, a mîte an ni ang a, an sualte a ngaidam tawh bawk ang. Messia ngei chuan Thuthlung Thâr chu a rawn ṭan ang.

Pathian zawlneite pawh chuan Messia chu zawlnei, puithiam leh lal a nih tûr thu an sawi a. Zawlnei chu Pathian thu hria a, mipuite hnêna Pathian thu puangtu chu a ni a. Pathianin Messia a rawn tirh tura chu zawlnei fel famkim a ni ang.

Israel puithiamte chuan mite chu an sualna avanga hremna an tawrh tûr ai inthawina Pathian hnenah an hlan a. Puithiamte pawh chuan Pathian hnênah mipuite tân an ṭawngṭai ṭhin a. Messia chu Pathian hnêna amah leh amah inthawina famkim anga inhlan tur a nih avangin puithiam lalber tha famkim a ni tur a ni.

Lal chu lalram awptu leh mipui rorêltu a ni a. Messia chu lal sawisêlbo, a thlahtu Davida lalṭhutphaha la rawn ṭhu tûr chu a ni. Khawvelah kumkhuain ro a la rêl ang a, ro fel taka rêlin diktakin thuthlukna a siam dawn a ni.

Pathian zawlneite chuan Messia chungchang dang tamtak an hrilhlawk bawk a. Zawlnei Malakia chuan Messia rawn kal hmain zawlnei ropui tak a rawn kal tûr thu a hrilhlawk a. Zawlnei Isaia chuan Messia chu nula thianghlim aṭanga rawn piang tûr a nih thu a hrilhlawk a. Zawlnei Mika chuan Bethlehem khua a a pian tûr thu a hrilhlawk a ni.

Zawlnei Isaia chuan Messia chu Galili ah a cheng ang a, thinlung lungchhiate a thlamuan ang a, sala mante hnênah zalenna thu a puang ang a, tânina tangte hnenah chhuahna thu a la puang ang tih a sawi a. Messia chuan damlo te leh bengngawngte, mitdêlte, ṭawngtheilo te, leh kal theilo te a tihdam tûr thu a hrilhlawk bawk a.

Zawlnei Isaia chuan Messia chu chhan awm lova huat a nih tûr thu leh hnawl a nih tûr thu a hrilhlawk bawk a. Zawlnei dangte chuan amah thattuten a kawr tân ṭhum an la vawr tûr thu leh ama ṭhian ngeiin a la phatsan tûr thu an sawi lawk a. Zawlnei Zakaria chuan a ṭhian hnênah chuan Isua a phatsan manah tangka sawmthum an la pêk tûr thu a lo sawi lawk tawh bawk a ni.

Zawlneite chuan Messia thih dân tûr an hrilhlawk bawk a. Isaia chuan miten chil an chhak ang a, an hmusit ang a, an la vuak tûr thu a hrilhlawk a. Thil sual engmah ti lo mahse, an chhun ang a, hrehawmna leh lungngaihna nasa tak tuara a la thih tûr thu a lo sawi lawk a ni.

Zawlneite chuan Messia chu mi famkim, sual nei lo a nih tur thu an sawi a. Mite sualna avanga hremna chu tawrhsakin a la thî ang a. A tawrhna chuan Pathian leh mihringte inkarah inrêmna a thlen ang a. Hemi avang hian, Messia tih hrehawma awmtîr chu Pathian duhdan reng a nih thu an sawi a.

Zawlneite chuan Messia chu a thi ang a, mithi zing aṭang a tho leh ang tih an lo hrilhlawk a. Messia thihna leh thawhlehna avângin Pathianin misualte chhandamna tûr leh Thuthlung Thar bul ṭanna tûra a rêmruatna chu a tipuitling thei tawh ang tiin an lo hrilhlawk a.

Pathian chuan zawlneite hnênah Messia chungchang tam tak a puang a, nimahsela, chung zawlneite hunlai chuan Messia chu a lo la kal lo a ni. Hrilhlawkna hnuhnung ber puan a nih hnu kum 400 chuang a liam hnu chuan, a hûn teah, Pathianin Messia chu khawvêlah a la rawn tîr dawn a ni.

Tun hma chuan, Pathianin a mite hnênah a vantirhkohte leh a zawlneite hmangin thu a sawi ṭhin a. Nimahsela, an hnêna thu a sawi lohna chu kum 400 lai a lo ni ta. Thawklehkhatah, Vantirhkoh pakhat hi Pathian thuchah kengin puithiam upa tawh tak Zakaria hnênah a rawn inlâr ta a. Zakaria leh a nupui Elizabeti chu Pathian ngaihsak mi an ni a, nimahsela, Elizabeti chuan fa rêng a nei thei lo va.

Vântirhkoh chuan Zakaria hnênah, “I nupui chuan fapa a hring ang a. A hmingah Johana in sa ang. Thlarau Thianghlimin a khat ang a, mîte chu Messia tan a buatsaih dawn a ni!” a ti a. Zakaria chuan, “Ka nupui leh kei hi fa nei tûr chuan kan upa tawh lutuk a ni! Engtinnge he thil hi a thleng ang tih ka hriat theih ang?” a ti a.

Vantirhkoh chuan Zakaria hnenah, “Pathianin he chanchin Ṭha hi i hnêna sawi tûrin min tîr a ni. Nimahsela mi rin loh avangin, nausen a lo pian hma zawng i ṭawng thei dawn lo a ni,” tiin a chhang a. Chu veleh Zakaria chu a ṭawng thei lo ta nghal a. Tin, Vantirhkoh chuan Zakaria chu a kalsan a. Chumi hnu chuan, Zakaria chu inah a haw a, a nupui chu a lo râi ta a.

Elizabeti naupai chu thla ruk a lo tlin chuan, thawklehkhatah, Vântirhkoh ngai kha Elizabeti laichin, Mari hnênah a rawn inlâr a. Mari chu nula thianghlim, Josefa nena innei tura inhual lai a ni a. Vantirhkoh chuan, “I rai ang a, fapa i hring ang a. A hmingah Isua i sa tûr a ni. Pathian Chungnûngbera Fapa a ni ang a, kumkhuain ro a rêl ang,” a ti a.

Mari chuan, “Chung chu engtin nge ni ang? mipa ka nei si lo,” tiin a chhang a. Vântirhkoh chuan, “Thlarau Thianghlim chu i chungah a rawn thleng ang a, Pathian thiltihtheihna chuan a hliahkhuh ang che. Tichuan, nausên chu Pathian Fapa, mi thianghlim a ni ang,” tiin a hrilhfiah ta a. Mari chuan Vantirhkoh sawi chu a rîng a, a pawm ta a.

Vantirhkohin Mari hnêna thu a sawi hnu rei lo te ah chuan, Mari chuan Elizabeti chu a va tlawh ta a. Elizabetin Mari chibai bûkna thu a hriat veleh Elizabeti pumchhûnga naute chu a che ta a. Pathianin an tana thil a tihsak avang chuan an hlim dun hle a. Mari chu thla thum lai a cham hnu chuan a in lamah a haw leh ta a.

Elizabetin fapa a hrin hnuin, Zakaria leh Elizabeti chuan Vântirhkohin a hrilh angin a hmingah Johana an sa ta a. Tichuan, Pathianin Zakaria chu a ṭawng theih tir leh ta a. Zakaria chuan, “Pathian chu fak rawh u, a mite a hriatrêng avangin! Nang, ka fapa, Pathian Chungnungbera zawlnei ti a koh i la ni ang a, mite hnênah an sualte ngaihdam an la nih dan tur thu i la hriattîr ang,” a ti a.

Mari chu Josefa, mi fel tak nen chuan an inhual ta a. Mari a rai tih a hriatin, a naupai chu a fa a ni lo tih a hria a. Mari chu tihhmingchhiat a duh lova, tichuan, ngawi renga ṭhen a tûm ta a. Chutianga a tih hma chuan, a hnênah Vantirhkoh a lo kal a,a rawn bia a.

Vantirhkoh chuan, “Josef, Mari chu nupuia neih hlau suh. A naupai chu Thlarau Thianghlim laka mi a ni a sin. Fapa a hring ang a. A hmingah Isua i sa tûr a ni (chumi awmzia chu ‘Lalpan a chhandam’ tihna a ni), ani chuan mite chu an sualna lak ata a chhandam dawn si a,” a ti a.

Tichuan, Josefa chuan Mari chu nupuiah a nei a, inah a hruai haw ta a, nimahsela, nau a hrin hma loh zawng a pawl lo.

Mari nau neih hun a lo thlen dawn hnaih ah chuan, Rom sawrkar chuan mitinte hnênah an thlahtute khuaa kala hming ziak turin thu a pe a. Josefa leh Mari chu an thlahtu Davida a nih avângin, an awmna Nazareth atang chuan Davida khua Bethlehem lam panin zinkawng thui tak chu an zawh a lo ngai ta a.

Bethlehem an thlen chuan, riahna tûr rêng a lo awm lova. Riahna tur an hmuh chhun chu ransa awmna pindan chiah chu a ni. Chutah chuan nausen chu a piang ta a, a mutna tûr khum a awm loh avângin, a nu chuan ran chaw pekna thlengah chuan a muttir a. A hmingah Isua an sa ta a.

Chumi zân chuan, an bul hnaia phulah chuan berâm vêngtu ṭhenkhatte chu an berâmte vêngin an lo awm a. Thawklehkhatah, Vantirhkoh êng tak mai a rawn lang ta phut a, an hlau ta a. Vantirhkoh chuan, “Hlau suh u, in tân chanchinṭha ka rawn thlen che u a ni. Messia, Krista chu Bethlehem khuaah a piang ta!” a ti a.

“Nausên chu va zawng ula, ani chu puana tuam ran chaw pekna thlenga mû in va hmu ang,” a ti a. Thawklehkhatah, Vântirhkohte chu vânah, “Pathian chu ropui takin awm sela, leia a lawm êm êm mihringte hnênah remthu lêng rawh se!” tia Pathian fakin an lo awm ta chiam mai a.

Berâmpute chu Isua awmna hmunah chuan an va thleng thuai a, Vantirhkoh sawi angin ran chaw pekna thlenga mu in an va hmu a.An hlim êm êm a. Berâmpute chuan an thil hmuh leh hriat zawng zawngte avanga Pathian fak chung zelin an berâmte awmna phul lamah chuan an kîr leh ta a.

A hnu hun engemaw chenah chuan, khawchhak lam râmte a awm mifingte chuan vânah arsi danglam tak mai an hmu a. Judate lal thar a lo piang ta tihna a ni tih an hre chhuak a. Tichuan, chu lal chu hmu tûrin hla takah an zin ta a. Bethlehem ah kalin Isua leh a nu leh pate awmna in chu an va hmu ta a.

Mifingten Isua leh a nu an hmuh chuan, bawkkhupin chibai an bûk a. Isua hnênah thilpek hlu takte an hlan a. Tin, in lamah an haw leh ta a.

Zakaria leh Elizabeti fapa Johana chu a lo ṭhanglian chho zel a, zawlnei a lo ni ta a. Thlalêrah a khawsa a, khaukhuap leh khawizu a ring a, sanghawngsei hmulin a inthuam a.

Mi tam takte chu Johana thusawi ngaithla tûrin thlalêrah an lo kal a. Ani chuan an hnenah thu sawiin, “Sim rawh u, vanrâm chu a hnai tawh e,” a ti a.

Mipuiten Johana thuchah an hriat chuan, an zinga mi tam takte chuan an sualte an sim a, Johanan a lo baptis ta a. Sakhaw hruaitu tam takte chu Johana baptis tûrin an lo kal bawk a, nimahsela, anni chuan an sualte an sim lova, an sualte an puang bawk hek lo.

Johana chuan sakhaw hruaitute hnenah chuan, “Nangni rûl tûr neite u! Sim ula, in nun dan tidanglam rawh u. Thing rah lo apiang an kit ang a, meiah an paih lût ang,” a ti a. Johana chuan zawlneiten, “Ngai teh, ka tirhkoh chu i kawng buatsaih turin i hmaah ka tir e,” ti a an lo sawi chu a thlen famkimtîr ta a ni.

Juda mi ṭhenkhat chuan Johana chu Messia a nih leh nih loh an zawt a. Johana chuan, “Messia ka ni lo ve, nimahsela, ka hnungah lo kal tûr mi pakhat a awm. Amah chu a ropui êm avangin a pheikhawk hrui phelh tlak pawh ka ni lo,” a ti a.

A tukah chuan, Isua chu Johana baptis tûrin a lo kal a. Johanan a hmuh chuan, “En teh u! Pathian Berâm No khawvel sual kalpuitu tûr saw,” a ti a.

Johana chuan Isua hnênah, “Baptis tûr chein ka tlak love, i mi baptis ka ṭul zawk si a,” a ti a. Nimahsela, Isuan, “Min baptis tûr a ni, hei hi tih tûr dik tak a nih avangin,” a ti a. Tichuan, Isua chu thil ti sual ngai lo ni mahse, Johana chuan a baptis ta a.

Isuan baptisma a chan zawha tui ata a lo chhuah laiin, Pathian Thlarau chu ṭhuro anga rawn inlârin a chungah a zu fu a. Chutih lai chuan, van atangin Pathian awin, “Nang ka fapa duhtak, ka lawm êm êma chu i ni,” a rawn ti a.

Pathian chuan Johana hnênah, “Thlarau Thianghlim chu rawn chhukin mi tu emaw i baptis chungah a rawn fu ang a. Chumi chu Pathian fapa chu a ni e,” tiin a lo hrilh tawh a. Pathian pakhat chauh a awm. Nimahsela, Johanan Isua a baptis lai khan, ani chuan Pa Pathian rawn ṭawng chu a hria a, Fapa, Pathian Isua chu a hmu a, Thlarau Thianghlim pawh a hmu bawk a ni.

Isua baptis a nih zawh veleh, Thlarau Thianghlim chuan thlalêrah a hruai ta nghala, chutah chuan ni sawmli leh zan sawmli chaw a nghei a. Tin, Setana chu Isua hnênah a lo kal a, sual turin a thlem a.

Setana chuan Isua hnênah, “Pathian fapa i nih chuan, heng lungte hi chhangah chantir rawh, tichuan i ei thei dawn nia,” tiin a thlem a.

Isuan, “Pathian thuin a ziak ang in ‘mihringten an nunna tûrin chhang ringawt an mamawh lova, Pathian kaa thu tin chhuak an mamawh a ni,” tiin a chhang a.

Tin, Setana chuan Isua chu Biakin chhip zumah a hruai a, a hnênah, “Pathian fapa i nih chuan, tla thla rawh, ‘Pathian chuan nangmah chawi tûr che in a vântirhkohte thu a pe ang a, tichuan, i ke in lung i chhuih dawn lo nia,’ tih ziak ang khan,” a ti a.

Nimahsela, Isuan Pathian thu hmangin Setana chu a chhang a. Isuan, “Pathian thu ah chuan, Pathianin, ‘I Pathian fiah suh,’ tiin a mite thu a pe a ni,” a ti a.

Tin, Setanan Isua chu khawvel lalram zawng zawng leh an ropuinate a entîr a, a hnênah, “Bawkkhupin chibai mi bûk la, heng zawng zawng hi ka pe dawn che a nia,” a ti a.

Isuan a chhang a, “Setan, kalbo daih rawh! Pathian thu ah chuan, “I Pathian chauh chibai bûk la, ama rawng chauh bawl rawh,” tiin a mite thu a pe a ni,” a ti a.

Isua chu Setana thlemnaah a tlu ta lova, tichuan, Setanan a kalsan ta a. Tin, Vântirkohte an rawn kal a, Isua rawng an rawn bawlsak ta a.

Setana thlemna a hneh hnu chuan, Isua chu Thlarau Thianghlim thiltihtheihna nen a awmna Galili ram lamah a kir leh ta a. Isuan mite zirtîrin hmun hrang hrang a tlawh a. Mitinin amah chu an fak a.

Isua chu a naupan laia a chenna Nazareth khuaah chuan a va kal a. Sabbath niin Pathian Biakin ah chuan a kal a. A hnênah a chhiar atan zawlnei Isaia lehkhabu an lo pe a. Lehkhabu zial chu a hawng a, a thû ṭhenkhat chu mipuite hriatah a chhiar ta a.

Isua chuan, “Riangvaite hnêna chanchin ṭha hril tur leh, salte hnêna chhuahna thu te, mitdêlte hnena mitvâr neih lehna thu te, tihduhdah tuarte chhuahna thu leh Lalpa lungawi kum thu sawi tûr tein Pathian Thlarau chu ka hnênah a awm,” tih thu chu a chhiar a.

Tin, Isua chu a ṭhu a. Mitin te chuan amah chu nguntakin an en a. A Pathian thu chhiar chuan Messia chungchang a kawk tih an hria a. Isuan, “Ka thu chhiar te kha tunah hian a thleng mek a ni,” a ti a. Mitin chuan mak an ti hle a. “Amah hi Josefa fapa a ni lawm ni?” an ti a.

Tin, Isuan, “Zawlnei chu ama khaw lamah chawimawiin a awm lo tih thu hi a dik takzet mai. Zawlnei Elija hun lai khan Israel ramah hmeithai tam tak an awm a. Nimahsela, kum thum leh a chanve chhung ruah a sûr loh lai khan, Pathianin Israel rama hmeithai ṭanpui turin Elija chu a tîr lo va, hnam dang hmeithai hnênah zawk a tîr a nih kha,” a ti a.

Isuan, “Zawlnei Elisa hun laiin, Israel ramah phar natnaa na mi tam tak an awm a. Nimahsela, Elisa chuan anni ho chu tumah a tidam lo. Israel hmelmate hotu, Naamana phar natna chauh a ti dam a ni,” a ti a. Isua thusawi ngaithlatute chu Juda te an ni a. Tichuan, chu thu a sawi chu an hriatin, namen lovin a chungah an thinur ta a.

Mipuite chuan Isua chu Biakin ata an hnukchhuak a, kham kotlanga namthlak a tihhlum turin an hruai a. Nimahsela, Isua chu mipui zingah a kaltlang a, Nazareth khua chu a chhuahsan a ni.

Tin, Isuan Galili bial a fang a, mipui tam tak a hnenah an rawn kal a. Damlo emaw piangsual tam takte, mitdel, kebai, bengngawng, ṭawngtheilo te pawh a hnênah an rawn hruai a, Isuan anni chu a lo tidam a.

Ramhuai man tamtak te chu Isua hnenah an rawn hruai a. Isua thupekin ramhuaite chu mite khawchhung ata an chhuak a, “Pathian Fapa i ni,” tiin an au va. Mipuite chuan mak an ti hle a, Pathian chibai an buk ta a.

Tin, Isuan mi sawm leh pahnih a thlang chhuak a, anni chu Tirhkohte tia a kohte chu an ni. Tirhkohte chu Isua hovin an zin ṭhin a, a hnen aṭangin an inzir a ni.

Ni khat chu, dan lam thiam Juda mi hi Isua chu fiah turin a rawn kal a, a hnenah, “Zirtirtu, Chatuana nunna ka neih theihnan engnge ka tih tur?” a ti a. Isuan, “Engnge Pathian dan ah inziak le?” a ti a.

Dan lam thiam mi chuan, “Pathian dan chuan, ‘Lalpa i Pathian chu i thinlung zawng zawngin, i thlarau zawng zawngin, i chakna zawng zawngin, i rilru zawng zawngin i hmangaih tur a ni. Tin, nangmah i inhmangaih angin i vengte i hmangaih tur a ni,’ a ti a,” tiin a chhang a. Isuan, “I tidik e! Chu thil chu ti la, tichuan i nung ang,” a ti a.

Nimahsela, dan lam thiam mi chuan mifel a nihna tihchian a duh avangin, “Tunge ka vengte chu?” tiin a zawt ta a.

Isuan dan lam thiam mi chu tehkhin thu hmangin a chhang a, “Juda mi pakhat hi Jerusalem aṭangin Jeriko lamah zin turin a kal a.”

“Chumi chu a kal lai mêkin, suamhmang rual hian an rawn bei ta a. A thil neih zawng zawng an laksak a, amah chu thi lo tawk chauhvin an vua a. Tin, an kal bo ta a.”

“Chumi hnu lawkah chuan, Juda puithiam hian chu kawng chu a rawn zawh a. Chu sakhaw hruaitu chuan suam leh vauk tuartupa chu a hmuh chuan kawng sîr lehlamah a hel a, ṭanpuina mamawh tak pa chu a haider a, a kal chhunzawm zel a.”

“A hnu rei lo te ah, Levi mi pakhat hian chu kawng chu a rawn zawh ta a. (Levi mite hi Juda hnam chi khat niin, Temple a puithiamte ṭanpuitute an ni). Levi mi pawh chuan suam leh vuak tuar pa chu ngaihsak lovin kawng sîr lehlamah chuan a hel ve leh ta a.

“A hnua chumi kawng rawn zawhtu chu Samari mi a ni a. (Samari mite hi Juda mi hnamdang mi nupui neiho thlahte an ni. Samari mite leh Juda mite chu an inhaw tawn ve ve a). Nimahsela, Samari mi chuan Juda mi chu a hmuhin, a khawngaih ta em em a. Tichuan, a bawihsawm a, a hliamte chu a tuamsak a.”

“Samari mi chuan a sabengtung chungah a chuantîr a, kawngsîr khualbuk pakhatah a kalpui ta a, chutah chuan a enkawl a.”

“A tukah, Samari mi chuan a zinkawng a zawh chhunzawm a ngai a. Khualbuk enkawltu hnênah chuan sum engemaw zat a pe a, a hnênah, ‘Amah hi lo enkawl la, hei aia tam i lo sêng a nih chuan, chung i sênso te chu ka lo kîr leh hunah ka rul leh ang che,’” a ti a.

Tin, Isuan dân lam thiam hnênah chuan, “Engtinnge i ngaih? An pathum zinga a tu bêr hi nge suam leh vuak tuartu pa vêngte chu ni ang,” tiin a zawt a. Ani chuan, “A khawngaihtu chu,” tiin a chhang a. Isuan a hnênah, “Kal la, chutiang chuan ti ve rawh,” a ti a.

Ni khat chu, rorêltu tlangval hausa hi Isua hnênah a rawn kal a, a hnênah, “Zirtirtu ṭha, chatuana nunna ka chan theihnan engnge ka tih tur?” a ti a. Isuan a hnênah, “Engatinge ‘ṭha’ mi tih? Ṭha chu pakhat chauh a awm, chu chu Pathian a ni. Nimahsela, chatuana nunna neih i duh chuan, Pathian dânte chu zawm ta che,” a ti a.

“Engte nge ka zawm tûrte chu?” a ti a. Isuan, “’Tual that suh. Uire suh. Ru suh. Bum suh, i nu leh i pa chawimawi rawh, tih leh nangmah i inhmangaih angin i vêngte hmangaih rawh’ tih te hi” a ti a.

Nimahsela, tlangval chuan, “Chung dân zawng zawng chu ka naupan têt ata ka zawm zel ṭhin. Chatuana nung turin engnge ka la tih ngai?” a ti a. Isuan amah chu a en a, a hmangaih ta a.

Isuan a hnênah, “ṭha famkima awm i duh chuan, kal la, i thil neih zawng zawng hralh la, sum chu pachhia te hnênah pe rawh, chutichuan, vânah ro i nei ang. Tin, lo kal la, mi zui ang che,” a ti a.

Tlangval chuan Isua thusawi chu a hriatin, a lungngai ta êm êm a, mi hausa tak a ni a, a thil neih zawng zawng sem ral chu a duh loh vang a ni. A inher a, Isua hnên ata a kal bo ta a.

Tin, Isuan a zirtirte hnênah, “Mi hausa tan Pathian rama luh chu harsa tak a ni! A ni, mi hausa Pathian rama luh aiin sanghawngsei hriau benga luh tlang a awl zawk,” a ti a.

Zirtirten Isua thusawi chu an hriatin, mak an ti êm êm a, a hnênah, “Tunge chhandam ni thei ang le?” an ti a.

Isuan zirtirte chu a en a, an hnênah, “Chu chu mihring tân tih rual a ni lo va, nimahsela, Pathian nen chuan engkim tih theih a ni,” a ti a.

Petera chuan Isua hnênah, “Engkim kalsanin kan zui che a. Kan lawmman tur chu eng nge ni ang le?” a ti a.

Isuan, “Mi tin inte emaw, unaute emaw, farnute emaw, pa emaw, nu emaw, fate emaw, ramte emaw keimah avanga kalsan apiang chuan a leh zâ an hmu ang a, chatuana nunna an chang bawk ang. Nimahsela, mi tamtak a hmasate chu a hnuhnung ah an awm ang a, mi tamtak a hnuhnungte pawh a hmasa ah an la awm ang” a ti a, a chhang a.

Ni khat chu, Peteran Isua hnênah, “Lalpa, ka unauvin vawi engzat nge ka chungah thil tisual sela ka ngaihdam tur? Vawi sarih thlengin em ni ang?”a ti a. Isuan a hnênah, “’Vawi sarih thlengin ka ti lo va che, ‘Vawi sarih hmun sawmsarih thlengin ka ti zawk che a ni!’” a ti a. He thu a sawi hian, Isuan kan ngaidam zêl tur a ni a tihna a ni. Tin, Isuan he tehkhin thu hi a sawi ta a.

Isuan, “Pathian râm chu lalber tu emaw a bawihte hnêna sum chungchang tihfel tum nen in ang ani. A chhiahhlawh zinga pakhat chuan kum 200,000 hlawh hu tangka sum a pu hnenah chuan a ba a.”

“Bawih chuan a leibat chu a rulh theih loh avangin, lal chuan, ‘Amah leh a chhungte a hi a leiba rulhnan sal angin zuar rawh u,’ a ti a.”

“Bawih chu lal hmaah chuan a bawkkhup a, a hnênah, “Khawngaihtakin ka chungah zahngai rih la, ka bat che kha a vaiin ka pe vek ang che,” a ti a. Lal chuan bawih chu a khawngaih ta a, tichuan, a bat chu a ngaidam a, a kaltir ta a.”

“Nimahsela, lal hnên ata a kal chhuah hnu chuan, a bawihpui pakhat a sum thla li hlawh hu sum batu a va hmu a. A bawihpui chu a man a, ‘I bat kha mi pe rawh,’ a ti a.”

“A bawihpui chu a bawkkhup a, a hnenah ‘Khawngaihtakin ka chungah zahngai la, ka bat che kha a zain ka pe vek ang che,’ a ti a. Nimahsela, chutichung pawh chuan, a bawihpui chu a ba a tlak hma loh zawng tânin ah a va khung ta a.”

“Bawih dangte chuan thil thleng chu an hmuhin, an mangang ta êm êm a. Lal hnênah chuan an va kal a, engkim an va hrilh a.”

“Lal chuan bawih chu a kova, a hnênah, ‘Nang bawih sual, mi dil chiam avang khan i bat zawng zawng kha ka ngaidam che a. Chutiang bawk chuan ti ve tur I ni asin,’ a ti a. Lal chu a thinûr ta êm êm a, tichuan, bawih sual chu a bat zawng zawng a tlak hma loh zawng tânin ah a va khung ta a.”

Tin, Isuan, “In thinlunga in unaute in ngaihdam loh chuan hetiang hian ka Pa Vâna miin in chunga a tih dan tûr chu a ni,” a ti a.

Isuan a zirtirte chu mite hnêna thu hril leh zirtir tûrin thingtlang khaw hrang hrangah a tirchhuak ta a. Isua hnên an rawn thlen leh chuan, a hnênah an thiltihte an hrilh a. Tin, Isuan anni chu dil ral lehlama hmun fianrial ah hûn rei lo te chawl hahdam tûra kalpui atân a sawm a. Tichuan, lawngah an chuang a, dil ral lehlamah chuan an kal ta a.

Nimahsela, Isua leh a zirtîrte lawnga an chhuak lai lo hmutu mi tam tak an awm a. Chung mite chuan anni chu râl lehlama lo lehkhalh turin dil kam hrulah chuan an lo tlan a. Tichuan, Isua leh a zirtîrte an va thlen chuan, mi tam tak anmahni nghaktu an lo awm reng tawh a.

Mipui chu, nunau chhiar tel lohvin, 5,000 chuang lai an ni a. Isuan mipuite chu a lainat ta êm êm a. Vêngtu nei lo berâm angin a hmu a. Tichuan, anmahni chu a zirtir a, an zinga damlo te a tidam ta a.

Tlai lam a nih chuan, zirtîrten Isua hnênah, “Khua a lo tlai ta a, kan hnaihah khua a awm si lo. Ei tûr eng emaw tal an va hmuh theihnan mipuite hi kal tîr ta che,” an ti a.

Nimahsela, Isuan zirtîrte hnênah, “Nangnin ei tur pe ta che u,” a ti a. Anni chuan, “Engtinnge chu chu kan tih theih ang? Chhangpêr panga leh sangha te pahnih chauh kan nei a ni,” an ti a.

Isuan a zirtîrte hnênah mipuite chu, sawmnga rual ṭheuh zelin hlobet chunga ṭhuttir tûrin a hrilh a.

Tin, Isuan chhangper panga leh sangha pahnih chu a la a, van lam enin Pathian hnênah ei tûr avang chuan lawmthu a sawi a.

Tin, Isuan chhang leh sangha chu a phel a. A phelte chu a zirtîrte pein mipuite hnênah a semtîr ta a. Zirtirte chuan an sem zel a, sem zawh tih a awm ta lova. An vaiin an ei a, an puarin an tlai ta a.

Chumi zawh chuan, zirtîrten an ei bang nawite chu an rût a, an ruhkhawm chuan bawmrang sawm leh pahnih a la tikhat zo va! Chung zawng zawng chu chhangper panga leh sangha pahnih aṭanga rawn awm anni.

Tin, Isuan a zirtirte chu mipuite a ṭintir chhungin anni chu lawngah lo chuanga, dil râl lehlama lo zu kal tûrin a hrilh a. Isuan mipuite a kal tîr zawh chuan, ṭawngṭai tûrin tlângah a han chho va. Isua chu mahni chauhvin a awm a, zân rei tak thlengin a ṭawngṭai ta a.

Chutihlai chuan, a zirtîrte chuan lawng an lo kar mek a, nimahsela, zan rei tawhah pawh, dil lai an la thleng chauh mai a. Anmahni lama thli a tleh nasat em avangin lawng chu harsa takin an kar ṭâng ṭâng a.

Tin, Isua a ṭawngṭai zawhin a zirtîrte hnênah a kal a. Dilah chuan tui chungah kalin an lawng lam chu a va pan ta a ni.

Zirtirte chuan Isua chu an hmuhin hmuithla hmu ah an inngai a, an hlau ta êm êm a. An hlau tih Isuan a hria a, tichuan, anmahni chu a ko va, an hnênah, “Hlau suh u. Keimah ka ni alawm!” a ti a.

Tin, Peteran Isua hnênah, “Lalpa, nang i nih chuan, tui chunga i hnêna lo kal thu mi pe rawh,” a ti a. Isuan Petera hnênah, “Lo kal ta che,” a ti a.

Tichuan, Petera chu lawng ata a chhuka, Isua hnên lam panin tui chungah chuan a kal tan ta a. Nimahsela, tawite a kal hnu chuan, Isua en tawh lovin a mit chu a la sawn a, tuifawn chu a en ta a, thlipui chak tak chu a hre ṭan ta a.

Tin, Petera chuan a hlau ta a, tuiah a pil tan ta a. “Lalpa, mi chhandam rawh!” tiin a au a. Isuan amah chu a ban ta nghal a, a chelh ta a. Tin, Petera hnênah, “Nang rin tlem, engah nge i rinhlelh le?” a ti a.

Petera leh Isua chu lawnga an luh chuan thli tleh chu a bâng ta nghal a, tui fawn pawh a reh ta a. Zirtirte chuan mak an ti hle a. A hnênah, “Pathian Fapa i lo nih takzet hi,” tiin, chibai an bûk a.

Ni khat chu, Isua leh a zirtirte chu dil ram lehlam a Gerasin mite awmna bial lamah lawngin an kal a.

Dil ral lehlam an thlen chuan ramhuai man mi pakhat hi Isua lam panin a rawn tlan a.

Chu pa chu a chak em avangin tuman an thunun thei lo va. Mipuiin khaidiata a kut leh a kete an thlun pawhin a tichat zel a.

Chupa chu chung lai hmuna thlanah te chuan a awm a. A chhun a zanin a au a au ṭhin a. Puan reng reng sin lovin a awm a, lungte pawhin a inzai fo ṭhin.

Isua hnen a lo thlenin a hmaah a bawkkhup a. Isuan ramhuai hnênah chuan, “He mi kawchhung ata hi lo chhuak rawh!” a ti a.

Ramhuai mana chu aw ring takin a auva, “Isu, Pathian chungnungbera Fapa, kei leh nang engnge kan inzawlna awm? Min nghaisa lul suh ang che,” a ti a. Tin, Isuan ramhuai hnênah, “I hming engnge ni?” a ti a. Anin a hnênah, “Ka hming chu Nuaia a ni, tam tak kan ni si a,” a ti a. (‘Nuai’ hi Rom sipai pawl pakhat, sipai sang engemaw zat awmna a ni).

Ramhuaite chuan Isua hnenah, “He ram ata hi min hnawkchhuak lul suh ang che,” tiin an ngên a. Chulai hmuna tlang pangah chuan vawk rual tam tak an lo tla a. Tichuan, ramhuaite chuan Isua hnênah, “Vawk kawchhungahte sawn min luhtir zawk rawh!” tiin an ngen a. Isuan, “Kal rawh u!” a ti a.

Ramhuaite chu an chhuak a, vawk kawchhungahte chuan an lut ta a. Vawk rual chu khamah an tlan chhuk chiam a, dilah an tlan lût a. Vawk rual chu sanghnih lai an ni.

Vawk vulhtute chuan thil thleng an han hmuh chuan, khuaah tlan lûtin mitin hnênah Isua thiltih an hmuh chu an sawi a. Khuaa mipuite chu an rawn kal a, tun hmaa ramhuaiin mana kha an va hmu a. Rilru pangngai pua thu in an rawn hmu a, puan a lo sin a, mi pangngai angin a lo awm a.

Mite chuan an hlau ta a, Isua chu an ram ata chhuak tûrin an ngen a. Tichuan, Isua chu lawngah a chuang a, kal tûrin a inbuatsaih ta a. A hmaa ramhuaiin a mana khan Isua hnêna awm reng a ngên a.

Nimahsela, Isuan a hnênah, “Ni love, i inah haw la, Pathianin i tâna thil a tihsak zawng zawng che leh a khawngaihzia che hi i ṭhiante leh i chhungte va hrilh rawh,” a ti a.

Tichuan, a kal a, Isuan thil a tihsak dante chu mitin a hrilh ta a. Mi tupawh a chanchin lo hre tute chu mak tihnain an khat a.

Isua chu dil ral lehlamah a kîr leh ta a. Chuta a thlen chuan, mipui tam tak a hnênah an lo kalkhawm a, amah chu an nêk huai huai a. Mipui zingah chuan hmeichhe pakhat kum sawm leh kum hnih thi pûta dam lo hi a awm a. A sum zawng zawng te chu Daktawr tam tak te hnenah amah an tihdamna atan a pe fai vek tawh a, nimahsela, a natna chu a zual zawk mah a.

Chumi chuan Isuan dam lo tam tak a tihdam tawh thute chu a lo hria a, “A puan chauh pawh dek thei ila, tihdamin ka awm ve ngei ang,” tiin a ngaihtuah a. Isua hnungah chuan a va kal a, a puan chu a va dek ta a. A deh veleh a thiput chu a lo reh ta nghal a.

Isuan a chhung ata thiltihtheihna a chhuak tih a lo hre nghal a. Tichuan a hawi vel a, “Tunge mi dek kha?” a ti a. Zirtirte chuan, “Mipui i vêlah awmin an nêk huai huai che a, ‘Tunge mi dek’ engtiziaa ti nge i nih?” an ti a.

Hmeichhia chu Isua hmaah hlau leh khûr chungin a bawkkhup a. Tin, a thiltih leh tihdama a awm tak thu chu a hrilh ta a. Isuan a hnênah, “I rinna hi i dampui a ni e. Thlamuang takin kal ang che,” a ti a.

Ni khat chu, Isuan mipui tam tak te chu dîl kam hnaihah a zirtîr a. Tichuan, a thu ngaithla tûrin mi ṭhahnem tak an rawn kal avangin, an hnêna thu a sawina tûra hmun thawl tawk a awm theihnan Isua chu dîl kamah lawngah a chuang ta a. Lawnga ṭhuin mipuite chu a zirtir ta a.

Isuan an hnênah he tehkhin thu hi a sawi a. “Buh chi thehtu buhchi thehin a feh a. A theh laiin a thên kawng dungah a tla a, savaten an rawn tlan zo ta a.”

“A ṭhen pialtlep lei pan hmunah a tlâ a, a ṭo ta nghal a, nimahsela, lei chhungah zung a kâi thuk thei lova. Ni a lo tlangsan a, a lo lumin, em vuaiin a awm a, a rawp ta mai a.”

“A ṭhên hnim hlingnei zîngah a tla a. An ṭo ta mai a, nimahsela, hlîngte chuan a dipral ta a. Tichuan, hnim hlîngnei zînga ṭo te chuan rah reng a chhuah ta lo va.”

“A ṭhen lei ṭhaa a tla a. A rawn ṭhang lian a, a leh sawmthum te, a leh sawmruk te, emaw a leh za te hialin a lo rah ta a. Tupawh beng nei chuan hre rawh se,” a ti a.

He tehkhin thu hian zirtîrte a tibuai hle a. Tichuan, Isuan a hrilhfiah ta a, “Buh chî chu Pathian thu hi a ni. Kawng dunga thu thehnate chu Pathian thu hretûte hi an ni, nimahsela, a awmzia an hrethiam lova, Diabolan an thû hriat chu a laksak ta a.”

“Pialtlep chunga thu thehnate chu Pathian thu hriaa lawm taka pawmtute hi an ni. Nimahsela, harsatna leh tihduhdahna an tawhin an tlu mai thin.”

“Hnimhlingnei zinga thû thehnate chu Pathian thû hretûte an ni a, nimahsela, hun a lo inher a, damchhung khawsak lungkhamna te, hausakna te, nawmsakna te chuan Pathian an hmangaihna chu a dîp ta a. Zirtîrna an hriat chuan rah rêng a chhuah lova.”

Nimahsela, lei ṭhaa thu thehnate chu Pathian thû hria a, ring a, rahchhuahtute chu an ni,”a ti a.

Isuan Pathian ram chanchin tehkhin thu dang tam tak a sawi a. Entirna turin, “Pathian ram chu anṭam chi fang khat miin a lova a theh ang chu a ni. Chu chu thlai chi zawng zawng zinga tê ber a ni tih in hria e.”

“Nimahsela, a lo to sân hunah chuan huan thlai zawng zawnga sâng bêr a lo ni ta a, a len tawk avangin savate pawh an lo kal a, a zârahte chuan an riak a.” a ti a.

Isuan tehkhin thu dang a sawi a, “Pathian ram chu dawidim hmeichhiain a lak a, chhangput zinga a zaa a thawh vek thlenga a phuma ang chu a ni.”

“Vanram chu lova ro phum rûk ang a ni. Chu chu miin a hmu a, a thukrû a, a lawm avangin a neih zawng zawng chu a va hralh a, chu lo chu a lei ta a.”

“Pathian ram chu tuikeplung hlû tak ang chu a ni leh a. Chu chu tuikeplung hmanga sumdawng pakhatin a hmu a, a neih zawng zawng chu a va hralh a, a lei ta a.” a ti a.

Tin, Isuan mi ṭhenkhat mahni thiltih ṭhat a innghat a, midangte hmuhsittute hnênah tehkhin thu a sawi a. “Mi pahnih Pathian Biakinah ṭawngṭai turin an kal a. Pakhat chu chhiahkhawntu a ni a, pakhat chu sakhaw hruaitu a ni.”

“Sakhaw hruaitu chuan hetiang hian a ṭawngṭai a, “Pathian, midangte ang a suamhmangte, fel lote, uirete ka nih loh avang leh, he chhiahkhawntu ang pawh hi ka nih loh avangin lawmthu ka hrilh a che.”

“Entîrnan, chawlhkar khat apiangah vawi hnih chaw ka nghei ṭhin a, ka neih apiang sawmah pakhat ka pe ṭhin,” a ti a.

“Nimahsela, chhiahkhawntu erawh chu hla takah a ding a, vân lam pawh a dak ngam lova, ‘Pathian, ka chungah zah ngai ang che, mi sual ka nih avangin,” tiin a awm a inchûm a inchûm ta zawk a.

Tin, Isuan “Tih tak meuhvin ka hrilh a che u, Pathianin chhiahkhawntu ṭawngṭaina chu a hria a, thiamchangah a puang ta a. Nimahsela, sakhaw hruaitu ṭawngṭaina chu a lawm lo va. Inngaihlu apiang Pathianin a titlawm ang a, inngaitlawm apiang a chawimawi ang,” a ti a.

Ni khat chu, Isuan chhiahkhawntu ṭhahnem tak leh misual dangte a thû ngaithla tur a rawn kalkhawm te chu a zirtîr a.

Chulai hmuna sakhaw hruaitu ṭhenkhat lo awm tên Isuan misualte chu ṭhian anga pawl an lo hmu a, tichuan, amah chu an sawisel ṭan ta a. Chumi avang chuan, Isuan an hnênah he tehkhin thu hi a sawi ta a ni.

“Mi tuin emaw fapa pahnih a nei a. A naupang zawk chuan a pa hnênah, ‘Ka pa, ka rochan ai mi pe rawh!’ a ti a. Tichuan, a pa chuan a ro chu a fapate pahnih hnênah chuan a sêm ta a.”

“Ni rei lote chinah a fapa naupang zawk chuan a chanâi zawng zawng chu a la khawm vek a, khaw lam hla takah a kal a, suaksual taka a nunnaah a sum chu a khawhral ta mai mai a.

“Chumi hnu chuan, fapa naupang zawk awmna ramah chuan ṭam nasatak a tla a, chaw leinan sum a nei ta lova. Tichuan, hna a hmuh theih awm chhun, vawkchaw pêk hna chu a thawk ta a. Vawkchaw a intihpuar duh hial khawpin a ril a ṭam a, a mangang takzet a ni.”

“A tawpah chuan, fapa naupang zawk chuan, ‘Engnge ka la tih ni? Ka pa chhiahhlawh zawng zawngten ei tûr an ngah tehlul nên, kei hetah rilṭam êm êmin ka awm a. Ka pa hnênah ka kîr leh ang a, a chhiahhlawh pakhat anga min siam turin ka ngên teh ang,’ a ti a.”

“Tichuan, fapa naupang zawk chu a pa in lamah a kîr leh ta a. Hla taka a la awm laiin a pa chuan a lo hmu a, a khawngaih êm êm a. A fapa lam pan chuan a tlan a, a kuah a, a fawp ta ngawih ngawih a.”

“A fapa chuan, “Ka pa, vâna mi chungah leh nangma mithmuhin thil ka tisual e. I fapaa vuah tlak ka ni ta lo ve,’ a ti a.”

“Nimahsela, a pa chuan a bawihte hnênah, ‘Puan ṭha ber te kha han la thuai ula, ka fapa hi han sîntir rawh u. A kutah zungbûn te, a kephahah pheikhawkte buntîr rawh u. Sebawng no thau tak kha talh rawh u, hlimtakin i ei ang u, he ka fapa hi a thi a, a lo nung leh ta a nih hi! A bo va, kan hmu leh ta a nih hi!” a ti a

“Tichuan, hlimtakin an awm ṭan ta a. Rei lo teah, a fapa upa zawk chu lova a hnathawhna aṭangin a lo hawng ta a. Rimawi tum ri leh lam thawm chu a hre ta a, thil thleng mêk engnge ni ang aw tiin a ngaihtuah ta a.”

“Fapa upa zawk chuan hlimna an siamna chhan chu a unaupa a lo haw leh vang a ni tih a hriatin a thinûr ta êm êm a, inah a lut duh ta lova. A pa a lo chhuak a, ina lut turin leh hlimtaka a awm ho tûrin a thlem a, nimahsela, a duh lo va.”

“Fapa upa zawk chuan a pa hnênah, ‘Kum hei leh chen hi i tân rinawmtakin hna ka thawk a! I thu lah hi ka awih lo ngai si lova, ka ṭhiante nena hlimna ka siamna tûrin keltê pawh mi pe ngai si lova. Nimahsela, hei i fapa, sualtaka khawsaa i sum eiral vektu hi a lo haw veleh ama tan sebawng no thau tak kha i lo talh vei a,’ a ti a, a chhang a.”

“A pa chuan, ‘Ka fapa, ka hnêna awm reng i ni alawm, ka neih zawng zawng hi i ta a ni e. Hlim tak a lawm tur kan ni reng a ni,, hei i nau hi a thi a, a lo nung leh ta a. A bo va, kan hmu leh ta a ni si a,’ a ti a.” a ti a.

Ni khat chu, Isuan a zirtîrte pathum, Petera te, Jakoba te leh Johana te chu a hnênah a hruai a. (Zirtir Johana hi Isua baptistu kha a ni lo). Tlang sâng takah ṭawngṭai turin an chho ta a.

Isua a ṭawngṭai lai chuan, a hmel chu ni angin a lo êng a, a silhfente chu êng angin a lo vâr ta a, leia puan sutu rêng rêngin an sûk vâr theih loh khawp hiala vârin a lo tle ta sûr a.

Tin, Mosia leh zawlnei Elija an rawn inlâr a. Heng mite hi kum zâ tel hma lam khan khawvelah an lo chêng tawh a. Jerusalema Isua a thih tleitlakna tûr thu an sawi a.

Mosia leh Elija chu Isua nen an inbiak lai chuan, Peteran Isua hnênah, “Kan tan heta awm hi a ṭha e. Bawkte pathum i khawh ang u, i tan pakhat, Mosia tan pakhat, Elija tan pakhat,” a ti a. Petera chuan engnge a sawi a hre lo.

Peteran thu a sawi laiin, chhhum chhah tak a lo zing a, anmahni chu a hliah ta a, chhumah aw a lo chhuak a, “Hei hi ka Fapa duhtak, ka lawm êm êma chu a ni. Ama thû ngai rawh ,” a ti a. Zirtîr pathumte chuan an hlau ta êm êm a, leiah an tlu ta a.

Tin, Isuan anmahni chu a khawih a, an hnênah, “Tho ula, hlau suh u,” a ti a. An dâk chhuak a, Isua chu amah chauhvin an hmu ta a.

Isua leh zîrtir pathumte chu tlang ata chu an chhuk a. Tin, Isuan an hnênah, “He lai hmuna thil thlengte hi tuma hnênah la hrilh suh u. Ka thi dawn ta a, tin, mithi zing ata ka tho leh ang. Chumi hnuah chuan mite hnênah in sawi thei tawh ang,” a ti a.

Ni khat chu, Isuan Lazara dam loh thu a lo hria a. Lazara leh a farnu pahnih, Mari leh Marthi te chu Isua ṭhian tha tak an ni a. Isuan chu chanchin chu a lo hriatin, “He na hi thihna tûr a ni lo, Pathian ropuina tur a ni zawk e,” a ti a. Isuan a ṭhiante chu a hmangaih a, amaherawhchu, a awmna ngaiah ni hnih a la awm ta cheu va.

Ni hnih a ral hnu chuan Isuan a zirtîrte hnênah, “Judai ramah i kal leh ang u,” a ti a. A zirtîrte chuan a hnênah, “Zirtîrtu, hman lawkah khan Judaten tihhlum an tûm che kha,” an ti a. Isuan an hnênah, “Kan ṭhian Lazara chu a muhil a, ka kai harh ngei tûr a ni,” a ti a.

Isua zirtîrte chuan, “Lalpa, a muthilh tawh chuan a dam leh ang chu,” an ti a. Tin, Isuan fiah takin an hnênah a sawi a, “Lazara a thi a ni. Chuta ka awm lo chu ka lawm a ni, kei min rin theihnan,” a ti a.

Isuan Lazara te khua a thlen chuan, Lazara thihna chu ni li lai a lo ni tawh a. Marthi chu Isua hmu turin a va chhuak a, a hnênah, “Lalpa, heta awm ni la chu ka nuṭa a thi lo tur. Nimahsela, Pathian hnêna i ngen apiang Pathianin a pe ang che tih ka ring e,” a ti a.

Isuan a hnênah, “Kei hi thawhlehna leh nunna chu ka ni. Tupawh mi ring chu thi mah sela, a nûng reng ang. Tupawh mi ring chu kumkhuain an thi lo vang. Chu thu chu i ring em?” a ti a. Marthi chuan a hnênah, “Ring e, Lalpa, Krista, Pathian Fapa i ni tih ka ring e,” a ti a.

Tin, Mari chu a lo thleng ta a. Isua ke bulah a bawkkhup a, a hnênah, “Lalpa, heta awm ni la chu ka nuṭa a thi lo tur,” a ti a. Isuan an hnênah, “Lazara chu khawiahnge in zalh? a ti a. Anni chuan a hnênah, “Thlanah a awm. Lo kal la, en teh,” an ti a. Tin, Isua a tap ta a.

Chu thlan chu puk a ni a, a kawngkaah chuan lung pakhat a awm. Isuan thlân a lo thlen chuan, an hnênah, “Lung hi lum sawn rawh u,” a ti a. Nimahsela, Marthi chuan, “A thihna ni li a ni tawh si a, a uih tawh ang,” a ti a.

Isuan a hnênah, “Mi rin chuan Pathian ropuizia i hmu ang, ka ti lo che em ni?” a ti a. Tichuan, lung chu an lum sawn ta a.

Tin, Isua a vanvadak a, “Ka pa, ka thu i ngaihthlak avangin i chungah ka lawm e. ka thu i ngaithla zel ṭhin tih ka hria e, nimahsela, helai hmuna mipui ding vêl te tana he thu hi sawi ka ni, nangin mi tîr tih an rin theihnan,” a ti a. Tin, Isua chuan aw ring takin, “Lazar, lo chhuak rawh,” a ti a.

Tichuan, Lazara chu a lo chhuak ta a! Thlan puana tuamin a la awm a. Isuan an hnênah, “Phelh ula, kaltir rawh u,” a ti a. Juda mi tam takin he thilmak tih avang hian Isua an lo ring ta a.

Nimahsela, Juda sakhaw hruaitute chuan an thik a, tichuan, Isua leh Lazara tihhlum theih dan tur thu phiar turin an inhawrkhawm a.

Judate chuan kumtin Kalhlen Kut an hmang ṭhin a. Pathianin kum zâ tel liam ta a Aigupta rama sal an nihna ata a chhanchhuahna lawmna a ni. Isuan mipuite hriata thuhril leh zirtîr a tan atanga kum thum hnu velah chuan, Isuan a zirtîrte hnênah anmahni nen Kalhlen Kut chu Jerusalema hman a duh thu a hrilh a, chutah chuan amah chu thahin a la awm dawn a ni.

Isua zirtirte zinga pakhat chu a hming Juda a ni a. Juda chu zirtîrte tangka ip kawltu a ni a, nimahsela, sum ngaina mi a ni a, tangka ip ami chu a ru ṭhin a. Isua leh a zirtîrte chu Jerusalem an rawn thleng a, Juda chu Juda hruaitute hnênah a han kal a, Isua chu an hnêna a mantîr theihnan tangka nen inthleng pui a rawt a. Ani chuan Juda hruaituten Isua chu Messia a nih an hnawl a, tihlum tura an phiar mek thu a lo hre tawh a.

Juda hruaitute, puithiam lalberin a kaihhruaia te chuan Juda chu Isua phatsan tûrin tangka sawmthum an pe a. Zawlneiten an sawilawk tawh ang ngeiin he thil hi a lo thleng ta a ni. Juda chuan rem a ti a, tangka chu a la a, a kal bo ta a. Isua mantirna remchang a zawng ṭan ta a ni.

Isua chu a ziritrte nen Jerusalemah Kalhlen Kût an lo hmang a. Kalhlen Kût chaw an ei laiin, Isuan chhang ṭhenkhat chu a la a, a phel a. “Hei hi la ula, ei rawh u. Hei hi ka taksa, in aia pek tura chu a ni. Mi hriat rengnan hei hi ti ṭhin rawh u,” a ti a. Hetiang hian Isuan a taksa chu an tan hlan a la ni dawn a ni tih a sawi a.

Tin, Isuan nô chu a la a, “Hei hi in rawh u. Hei hi ka thisena Thuthlung Thâr in sualte ngaihdamnana chhuak chu a ni. In in apiangin mi hriat rengnan hei hi ti ṭhin rawh u,” a ti a.

Tin, Isuan a zirtirte hnênah, “In zinga mi pakhat hian mi phatsan ang,” a ti a. Zirtîrte chu an lûngngâi ta hle a, chutiang thil ti tur chu tunge ni ang tiin an zawt a. Isuan, “Chhang them ka peka chu mi mantîrtu tur a ni ang,” a ti a. Tin, chhang chu Juda hnênah chuan a pe ta a.

Judan chhang a lak zawh chuan, Setana a kawchhungah a lut ta a. Juda chu a kalchhuak a, Juda hruaitute chuan Isua an man theihnan ṭanpui a duh ta a. Chung hun chu zan ani.

Chaw ei khamah chuan, Isua leh a zirtîrte chu Olive Tlângah an kal a. Isuan, “Zaninah in zâin min phatsan ang. ‘Berâm vengtû chu ka vua ang a, berâm zawng zawngte chu an darh ang,’ tih ziak ang khan,” a ti a.

Petera chuan, “Midang zawngin phatsan che mahsela, kei chuan ka phatsan lovang che,” a ti a. Tin, Isuan Petera hnênah, “Setanan neih vek cheu a duh a, nimahsela Peter, i rin a bo lohnan ka ṭawngṭaisak che a ni. Zaninah âr a khuan hmain vawi thum mi phat ang,” a ti a.

Petera chuan Isua hnênah, “Thi dawn pawh ni ila, ka phat tawp lo vang che,”a ti a. Chutiang bawkin zirtîr dangte zawng zawng chuan an ti ta ṭheuh va.

Tin, Isua chu a zirtîrte nên hmun pakhat, Gethsemane an tihah chuan an kal ta a. Isuan zirtirte chu thlemnaa an luh lohnan ṭawngṭai tûrin a hrilh a. Tin, Isua chu mahnia ṭawngṭai tûrin a kal ta a.

Isuan, “Ka pa, a theih chuan, he tawrhna nô hi mi intîr lul suh ang che. Nimahsela, mihring sualnate ngaihdamna kawng dang a awm lo a nih chuan, i duhzawng chu tihin awm rawh se,” tiin, vawithum a ṭawngṭai a. Isua chu a lungngai em em a, a thlan chu thisen far ang mai a ni a. Pathianin amah tichak tûrin vântirhkoh a rawn tîr a.

A ṭawngṭai zawh apiangin, Isua chu a zirtîrte hnênah a va kal a, nimahsela, a zirtîrte chu an lo muhil a. A kal vawi thumnaah chuan, Isuan, “Tho rawh u! Mi mantîrtu tûr chu a lo hnaih tak hi,” a ti a.

Juda chu Juda hruaitute, sipaite leh mipui tam tak nen an rawn kal a. Khandaihte leh talhtumte an rawn keng a. Juda chu Isua hnênah a va kal a, “Chibai, Zirtîrtu,” tiin a fawp a. Hei hi Juda hruaitute tan an mi man tura chu an hriat theihnana chhichhiahna a ni. Tin, Isuan, “Juda, fawpin mi phatsan a ni maw?” a ti a.

Sipaiten Isua an man lai chuan, Peteran a khandaih a phawi a, puithiam lalber bawih beng chu a sahthlak sak a. Isuan, “I khandaih kha dah bo rawh. Min chhan tûrin Vântirhkoh rualte chu ka Pa hnênah ka dil thei a sin. Nimahsela, ka Pa thu chu ka zawm tûr a ni,” a ti a. Tin, Isuan a beng chu a tihdamsak a. Isua an man zawh chuan, zirtîrte chu an tlanbo ta vek a!

Zanlai a ni a. Sipaite chuan Isua chu puithiam lalber inah thu zawt fiah tûrin an hruai a. Petera chuan hla tak aṭangin a zui a. Isua chu inchhunga an hruai luh laiin Petera chu pawnah a lo awm a, meilum a lo ai a.

Inchhungah chuan Juda hruaitute chuan Isua chu thu an zawt a. Dawta hekin thuhretu der tam tak an siam a. Amaherawhchu, an hekna thute chu an inang lo va, chuvangin, Juda hruaitute chuan a thiltih sual an finfiah thei ta lova. Isua chuan engmah a sawi lo a ni.

A tawpah chuan, puithiam lalber chuan Isua chu a en a, “Min hrilh rawh, Messia, Pathian Fapa chu i ni em?” a ti a.

Isuan, “Ni e, Pathian ding lama ṭhu a, vân aṭanga lo kal min la hmu dawn a ni,” a ti a. Puithiam lalber chuan a silhfente a pawtthler a, “Hretu dang kan ngai tawh lo ve! Amah ngeiin Pathian Fapa a nih thu a sawi in hre tawh a. Engtinnge in ngaih?” a ti a.

Juda hruaitu zawng zawngte chuan puithiam lalber hnênah, “Thi tlak a ni,” an ti a. Tin, Isua hmai an tuam a, chil an chhak a, an hnek a, nuihza siamnan an hmang ta a.

Peteran pawn lama a lo nghah laiin, chhiahhlawh nula pakhat hian a lo hmu a, a hnênah, “Nang pawh Isua hnêna awm i nih kha!” a ti a. Petera chuan a pha a. A hnuah hmeichhe dangin chutiang bawk chaun a rawn ti leh a, Petera chuan a pha leh a. A tawpah, mite chuan, “Isua hnêna awm kha i ni tih kan hria e, Galili rama mi in ni ve ve si a,” an ti a.

Tin, Petera chuan, “Hemi hi ka hria a nih chuan Pathianin anchhia mi lawh rawh se,” tiin chhia a chham ta a. Âr a khuang ta nghal a, tin, Isua chu a hawi a, Petera chu a en a.

Petera chu a chhuak a, a ṭap ta zawih zawih a. Chutihlai chuan, phatsântu, Juda chuan Juda hruaituten Isua thi tura thiam loh an chantîr lai a lo hmu a. Juda chu lungngaihnain a lo khat ta a, a kal chhuak a, amah leh amah a intihlum ta a.

A tuk zing hma takah chuan, Juda hruaituten Isua chu Rom ram awptu Pilata hnênah an hruai a. Pilatan Isua chu thiam loh chantîrin tihhlum tûr thu a pek an beisei a ni. Pilatan Isua hnenah, “Judate lal i ni em?” tiin a zawt a.

Isuan, “I sawi ang chu a ni, nimahsela ka lalram chu he khawvela mi hi a ni lo. Ni sela chuan ka chhiahhlawh ten min hum tur. Pathian thutak hriattîr hi khawvela ka rawn kal chhan a ni. Tupawh thutaka mi apiangin ka thu an pawm ṭhin,” a ti a. Pilatan, “Thutak engnge ni?” a ti a.

Isua nen an inbiak zawh hnu chuan, Pilata chu mipuite hnênah a va chhuak a, an hnênah, “A sualna engmah ka hmu lo,” a ti a. Nimahsela, Juda hruaitute leh mipuite chuan “Khengbet rawh!” tiin an au va. Pilata chuan, “A sualna ka hmu lo,” tiin a chhang a. Nimahsela, an au nasa lehzual sauh va. Tin, Pilata chuan a vawi thumna atân, “A sualna ka hmu lo,” a ti a.

Pilata chuan mipuiten buaina an chawkchhuak ang tih a hlau a, tichuan, a sipaite chu Isua khenbehtîr a rêmti ta a. Rom sipaite chuan Isua chu an vua a, puan senduk an sintîr a, hling lukhum an khumtîr a. Tin, “En teh u, Judate Lal hi!” tiin nuihza siamnan an hmang a.

Sipaiten Isua chu nuihza siamnana an hman zawhin, khengbet tûrin an hruai ta a. A thihna tur kraws an puttîr a.

Sipaite chuan Isua chu “Luruh” an tih hmunah chuan an hruai a, a kut leh a kete chu Krawsah an khengbet a. Nimahsela, Isuan, “Ka Pa, anni hi ngaidam rawh, an thiltih hi an hre lo a ni,” a ti a. Pilatan “Judate Lal,” tih chhinchhiahna ziahtîrin Isua lu chunga târ tûrin thu a pe a.

Sipaite chuan ṭhumvawrin Isua silhfen chu an insem a. Hemi an tih hian, “Ka silhfente an insem a, ka kawr atan ṭhum an vawr a,” tih hrilhlawkna kha an thlenkimtîr ta a ni.

Isua chu suamhmang pahnih inkarah an khengbet a. Pakhat chuan hmusit takin a ṭawngkhum a, pakhat zawk erawh chuan, “Pathian meuh pawh i hlau na nge? Keini zawng kan sual a ni, he mi hi zawngin engmah a tisual si lo,” a ti a. Tin, ani chuan Isua hnênah, “Isu, i ram i thlen hunah mi hre reng ang che,”a ti a. Tin, Isuan a hnênah, “Vawiinah ka hnênah Paradis-ah i awm ve ang,” a ti a.

Juda hruaitute leh mipui zinga mi ṭhenkhatte chuan Isua chu an nuihsawh a. A hnênah, “Pathian Fapa i nih chuan, Kraws ata kha lo chhuk la, intidam ta che! Tichuan kan ring ang che,” an ti a.

Tin, chawfak hun lai vel nimahse khawvel a lo thim ta veka. Chawfak hun aṭanga darkar thum chhung khua a thim ta mupa.

Tin, Isuan aw ring takin, “A kin ta! Ka Pa, I kutah ka thlarau ka kawltîr e,” a ti a. Tin, a lû a kun a, a thlarau a thlah ta a. A thih hnu chuan, lir a lo nghinga, mipuite leh Temple a Pathian awmna daidangtu puanzar hlai tak chu a chung aṭangin a hnuai lam thlengin a thler chhuak ta a ni.

Isuan mipuite tan Pathian hnêna kal theihna kawng chu a thihna kaltlangin a lo hawng ta a ni. Isua vengtu sipaiin thil thleng zawng zawng a hmuh chuan, “He mi hi mi fel tak a ni ngei mai. Pathian Fapa a ni,” a ti a.

Tin, Josefa leh Nikodema, Juda hruaitu pahnih, Isua Messia a nih ringtute chuan Pilata hnênah Isua ruang an dil a. A taksa chu puanin an tuama, lunga kerkuakah chuan an zalh ta a. Thlan kawngkaah chuan a kharna atan lung lian tak an lum ta a.

Sipaiten Isua an khenbeh zawh chuan, ringlotu Juda hruaitute chuan Pilata hnênah, “Kha mi dawheh, Isua khan ni thum niin mithi zing ata ka tho leh ang a ti a. A ruang chu a zirtîrten an laka mithi zing ata a tho leh ta tia an sawi lohnan a thlan chu tu in emaw a venghim ngei tûr a ni,” an ti a.

Pilata chuan, “Sipai ṭhenkhat hruai ula, thlan chu a him thei ang berin siam rawh u,” a ti a. Tichuan, thlan luhna a lung chungah chuan chhinchhiahna an dah a, ruang chu tumahin an ruk theih lohna tûrin chutah chuan sipaite chu an dah ta a.

Isua phum a nih ni, a tuk chu Chawlhni a ni a, chumi ni chuan Judate chu thlana an kal phal an ni lo. Tichuan, Chawlhni zawh zingkâr hma takah chuan, hmeichhe ṭhenkhatte chuan Isua thlanah a ruang chunga rimtûi chulh tûra kal tûrin an inbuatsaih a.

Thawklehkhatah lir nasa takin a lo nghing ta thut a. Vantirhkoh, kawlphe anga eng chu van ata a rawn inlâr ta a. Thlan chhinna lung chu a rawn lum sawn a, a chungah chuan a ṭhu a. Thlan vengtu sipaite chuan an hlau ta em em a, mitthi ang maiin leiah an tlu ta a ni.

Hmeichhiate chu thlan an rawn thlen chuan, Vantirhkoh chuan an hnenah, “Hlau suh u. Isua chu hetah a awm lo ve. A sawi ang ngeiin mitthi zing ata a thawhleh tawh kha! Thlan chhung hi bih ula, en rawh u,” a ti a. Hmeichhiate chuan thlan chhung chu an bih a, Isua ruang zalhna hmun chu an en a. Chutah chuan a ruang chu a lo awm tawh lo va.

Tin, Vântirhkoh chuan hmeichhiate hnênah, “Kal ula, zirtirte hnênah, ‘Isua chu mitthi zing ata a tho leh tawh a, Galili ramah in hmaah a kal e,’ tiin hrilh rawh u,” a ti a.

Hmeichhiate chu hlauhna leh lawmnain an khat a. Chanchin Ṭha chu zirtîrte hrilh turin an tlan ta a.

Hmeichhiate chu zirtîrte hnêna chanchin ṭha hrilh tura an tlan laiin, an hnênah Isua a rawn inlar ta a, tin, amah chu chibai an buk a. Isuan, “Hlau suh u. Kal ula, ka zirtîrte chu Galili a kal turin hrilh rawh u. Chutah chuan min hmu ang,” a ti a.

Isua mitthi zing ata a thawhleh ni chuan, a zirtir pahnihte chu khaw hnai deuh pakhat panin an kal a. An kal lai chuan, Isua chunga thil thleng te chu an sawi dun a. Messia a nih an lo beisei tawh ṭhin a, nimahsela, tihhlumin a awm ta si a. Tunah hmeichhiaten amah chu a nung leh ta tih an sawi a. Engnge rin tur an hre ta lo va.

Isua chuan anni chu a rawn pan a, an hnênah a kal ve ta a, nimahsela, tunge a nih an hre lo va. Ani chuan eng thu nge an sawi tih a zawt a, anni chuan ni tlemte liam ta chhunga Isua chunga thil chhinchhiah tlak thleng zawng zawng te chu an hrilh ta a. Anni chuan Jerusalema thil thleng engmah hre lo mikhual hnêna thu sawi angah an inngai a.

Tin, Isua chuan Pathian thuin Messia chungchâng a sawite chu anmahni a hrilhfiah ta a. Zawlneiten Messia chuan hrehawm a tuar ang a, thahin a awm ang a, nimahsela, a ni thum niin a tho leh ang an tih thu te chu a hriatthartir leh a. Mi pahnih ten riah an tumna khua an thlen chuan, tlai lam a lo ni dawn ta a.

Mi pahnihte chuan Isua chu an hnena awm tûrin an sawm a, tichuan a awm ve ta a. Zanriah ei tura an inpeih hnu chuan Isuan chhang a la a, Pathian hnênah lawmthu a sawi a, tichuan, a phel ta a. Anni chuan Isua a ni tih an lo hre ta nghal a. Nimahsela, rei lo teah a ral ta mai a.

Mi pahnihte chuan, “Isua a nih kha! Chuvang chu a ni Pathian thu min hrilhfiah lai khan kan thinlung a harh huai reng ni!” an ti a. Jerusalem ah an kîr leh ta nghal a. An va thlen chuan, zirtîrte hnênah, “Isua a tho leh ta! Amah kan hmu tawh!” an ti a.

Zirtîrte an inbiak lai chuan, thawklehkhatah Isua chu an awmna pindanah chuan a inlâr a, an hnênah, “Thlamuang takin awm rawh u!” a ti a. Zirtîrte chuan thlarau emaw an ti a, nimahsela, Isuan an hnênah, “Engvanginnge in hlauh a, in rinhlelh ni? Ka kut leh kete hi en rawh u. Thlarauvin keimah ang hian taksa a nei lo ve,” a ti a. Thlarau a nih loh zia fiahnan, englo ei tûr a dil ta a. Sangha chhum hmin hrang khat an pe a, a ei ta a.

Isuan, “Pathian lehkha thua ka chanchin an ziak zawng zawngte chu a thleng kim ngei tur a ni tih ka hrilh a che u,” a ti a. Tin, Pathian thu an hriatthiam theihnan an rilru a tihvâr sak ta a. Ani chuan, “Messian hrehawm a tawrh tûr thu te, a thih tur thu te leh mitthi zing ata a thawhleh tûr thu te chu ziah a lo ni daih tawh a ni”, a ti a.

“Pathian thu in a ziak ang khan ka zirtirten mitinte hnenah an sualte ngaihdamna an channa turin an sim tur a ni tiin an la puang ang. Hei hi Jerusalemah an ṭan ang a, tin, hmun tina mitin te hnênah an la kal ang. Heng chungchangah hian thuhretute in ni e,” a ti a.

Isua chu ni sawmli chhungin a zirtîrte hnênah vawi tam tak a inlâr a. Vawi khat phei chu, ṭum khatah mi 500 aia tam hnênah a inlâr a! A zirtirte hnênah chuan amah chu a nung a ni tih kawng tam takin a inhriattir a, Pathian lalram chungchang a zirtîr a.

Isuan a zirtîrte hnênah, “Lei leh vâna thuneihna zawng zawng ka hnênah pek a ni tawh. Chutichuan, kal ula, hnamtin zirtîrah te siam ula, Pa leh Fapa leh Thlarau Thianghlim hmingin baptis ula, thu ka pek zawng zawng che u zawm tûrin zirtîr rawh u. Ngai teh u, in hnênah ka awm zel ang,” a ti a.

Isua mitthi zing ata a thawhleh aṭanga ni sawmli hnuah chuan, ani chuan a zirtîrte hnênah, “Thlarau Thianghlim in hnena a lo thlena thiltihtheihna Ka Pain a pek hma loh che u chuan, Jerusalemah hian awm reng rawh u,” a ti a. Tin, Isua chu vanah a chho ta a, chhum chuan hmuh phak lohvin a hliah ta a ni. Thil siam zawng zawng chunga rorêl turin Pathian kut ding lamah a han ṭhu ta a.

Isua vana a lawn hnu chuan, zirtîrte chu Isuan ti tur a thu a pek angin Jerusalemah chuan an awm ta a. Chutah chuan ringtute chu ṭawngṭaiin an awmkhawm reng a.

Kumtin, Kalhlen Kut zawh ni 50 naah Judaten ni pawimawh tak Pentecost tia hriat chu an lawm ṭhin a. Pentecost hi Judaten buh thar an lawm hun a ni a. Khawvel pumpuia Judate chu Pentecost lawmho turin Jerusalem an an kal ṭhin a. Hemi kum hian, Isua vân a a lawn hnu chawlhkar khat velah Pentecost hi a lo thleng a ni.

Ringtute an awmkhawm vek laiin, ri thlipui ang chuan an awmna in chu a rawn luah khat ta a. Tin, thil engemaw mei alh ang chu ringtu zawng zawngte lu chungah chuan a rawn inlâr ta a. An zain Thlarau Thianghlimin an khat ta vek a, ṭawng dangtein an lo ṭawng ta a ni.

Jerusalema mite chuan chu thawm chu an hriatin, mipuite chuan thil thleng chu en turin an va kal a. Ringtuten Pathian thiltih ropui an puan an han hriat chuan mahni ṭawng ṭheuhva an hriat avangin mak an ti hle a.

Mi ṭhenkhat chuan zirtîrte chu uain ruiah an puh a. Nimahsela, Petera chu a dingchhuak a, an hnênah, “Ngai rawh u! Heng mite hian uain an rui lo ve. Zawlnei Joela hrilhlawknaa Pathianin, ‘Ni hnuhnungahte chuan ka Thlarau ka leih ang,’ a tih kha a lo thleng ta a nih hi”.

“Israel mite u, in hmuh leh in hriat tawh angin Isua kha Pathian thiltihtheihna hmanga chhinchhiahna ropui leh thilmakte titu kha a ni a. Nimahsela, nangnin in lo khengbet a”.

“Isua chu thi mahsela, Pathianin mitthi zing ata a kaitho leh a. Hei hian hrilhlawknain a sawi, ‘I Mi Thianghlima chu thlanah i ṭawih ral tîr lo vang,’ tih thu kha a lo thleng ta a ni.”

“Isua chu tunah hian Pa Pathian ding lamah chawimawiin a awm ta a. Tin, Isuan a lo tiam tawh ang ngeiin Thlarau Thianghlim chu a rawn tîr ta a ni. Thlarau Thianghlim chuan tûna in hmuh leh in hriatte hi a rawn thlentîr ta a nih hi”.

“He mi, Isua hi in khengbet a. Nimahsela, Pathianin Isua chu Lal leh Messia ni fawmin a siam ta tih lo hre rawh u!” a ti a.

Petera thusawi ngaithlatu mipuite thinlung chu chu a thusawi chuan nasa takin a khawih ta a. Tichuan, Petera leh zirtîr dangte hnênah chuan, “Unaute u, engnge kan tih tak ang?” tiin, an zawt a.

Peteran an hnênah, “Pathianin in sualte a ngaihdamnan sim ula, Isua Krista hmingin baptisma chang ṭheuh rawh u. Tin, anin Thlarau Thianghlim thilpêk a pe bawk ang che u,” a ti a.

Mi 3,000 velin Petera thusawi chu an ring a, Isua zirtîr an lo ni ta a. Baptisma chantîr an ni a, Jerusalem Kohhranah an awm ta a ni.

Zirtîrte chu Tirhkohte zirtîrin inpawlin, chaw ei hovin, ṭawngṭaiin an awm reng a. Pathian fak ho nuam an ti a, an thil neihte chu an inṭawm a. Mi zawng zawng lawmzawngin an awm ṭhin a. Nitin, ringtute chu belhchhahin an awm zel a.

Ni khat chu, Petera leh Johana chu Biakinah an kal a. Biakin kawngkhar lam pana an kal lai chuan, kebai kût dawh hi an hmu a.

Petera chuan kebai chu a en a, a hnênah, “Tangka pek tur che ka nei lo. Nimahsela, ka neihchhun ka pe ang che. Isua Krista hmingin tho la, ke in kal tawh rawh,” a ti a.

Pathianin kebâi chu a tidam ta nghal a, ke in a kal ṭan ta a, a zuang a zuang a, Pathian a fak a. Biakin tuala awm te chuan mak an ti hle a.

Mipuite chuan tihdama awma chu en tûrin an rawn kal ta thuai a. Petera chuan an hnênah, “Engvanginnge he mi tihdama awm hi mak in tih? Keimahni thiltihtheihna leh ṭhatna avanga tidam kan ni lo ve. Isua thiltihtheihna leh Isuan rinna a pêk vang zawk a ni.”

“Nangni hi Isua tihlum tura Rom ram awptu hrilhtute in ni a. Nunna siamtu chu in that a, nimahsela, Pathianin mitthi zing ata a kaitho leh ta a ni. Nangni chuan in thiltih hi hrethiam lo mah ula, Messia chuan hrehawm a tuar ang a, a thi ang tia hrilhlawkna a lo thlen famkim theihnan Pathianin in thiltih hi a hmang ta a ni, chutichuan, sim ula Pathian lam hawi rawh u, tichuan in sual te chu a tleng fai dawn nia,” a ti a.

Biakina hotute chu Petera leh Johana thusawi avang chuan an lûngni ta lo va. Tichuan, anmahni chu an man a, tânin ah an khung ta a. Nimahsela, mi tam takin Petera thusawi chu an ring ta a, Isua ringtu zat chu an lo pung a, mi 5,000 vel lai an lo ni ta a.

A tukah chuan, Juda hruaitute chuan Petera leh Johana chu puithiam lalber leh sakhaw hruaitu dangte hnênah an kalpui a. Petera leh Johana hnênah chuan, “He kebai hi eng thiltihtheihna hmangin nge in tihdam?” tiin an zawt a.

Petera chuan, “He mi in hmaa ding hi Isua, Messia thiltihtheihna hmanga tihdam a ni. Isua chu in khengbet a, nimahsela, Pathianin nung tûrin a kaitho leh a ni! Nangnin duh lovin in hnawl a, nimahsela, Isua thiltihtheihna lo chuan chhandamna kawng dang reng a awm lo ve,” tiin a chhang a.

Hruaitute chuan Petera leh Johana te huaizia an hmuh chuan mak an ti hle a, zîrna nei lo, mi mawl mai an ni tih an hre si a. Nimahsela, heng mite hi Isua hnênah an awm tawh tih an hre ta a. Petera leh Johana chu an vau zawh chuan an chhuah ta a.

Kohhran hmasa hruaitute zinga mi pakhat chu a hming Stephena a ni a. Mi hming ṭha, finna leh Thlarau Thianghlima khat a ni. Stephena chuan thilmak tam tak a ti a, mite chu awihawm takin Isua chu ring turin a sawipui ṭhin.

Ni khat chu, Stephena chuan Isua chanchin a zirtîr laiin, Isua ring lo Juda ṭhenkhatte chuan Stephena chu an rawn hnial tan ta a. An thin a rim ta em em a, sakhaw hruaitute hnênah Stephena chungchang chu dawtin an hêk ta a. Anni chuan, “Pathian leh Mosia a sawichhiat thu kan hria!” an ti a. Tichuan, sakhaw hruaitute chuan Stephena chu an man a, puithiam lalber leh Juda hruaitu dangte hnênah an kalpui a, chutah chuan a hma aia tam zawk hretu derte chuan Stephena chu dawtin an hek ta a ni.

Puithiam lalber chuan Stephena hnênah, “Hengte hi a dik em?” tiin a zawt a. Stephena chuan amah chu chhangin Abrahama hun lai atanga Isua hun lai thlenga Pathianin thil ropui tam tak a lo tih tawh te leh Pathian miten a thupek an zawm loh fo dan te a hriat nawntir a. Tin, “Nangni mi luhlul leh helhmang te hian Thlarau Thianghlim hi in dodal fo va, in thlahtuten Pathian an hnawl fo va, a zawlneite an thah ang bawk khan. Nimahsela, an thiltih aia ṭha lo zawk thil in ti a ni! Messia kha in that a!” a ti a.

Sakhaw hruaitutên chu thu hi an hriat chuan, an thinûr ta êm êm a, an beng an hup a, ring takin an au va. Stephena chu khawpui aṭangin an hnuk chhuak a, tihlum tûrin lungin an dêng ta a.

A thih dawnin, aw ring takin a auva, “Isu, ka thlarau la ang che,” a ti a. Tin, bawkkhupin a tlu a, aw ring takin a au leh a, “Lalpa, he an thil tihsual hi an chungah mawhphurhtîr suh ang che,” a ti a. Tin, a thi ta a.

Tlangval Saula chuan Stephena tihlumtute chu a lo rêmtihpui a, lunga an den lai chuan an puante chu a lo vensak a. Chumi ni chuan Jerusalema mi tamtakin Isua zuitute chu an tiduhdah ṭan ta a, tichuan, ringtute chu hmun dangahte an tlanchhe ta a. Nimahsela, chutiang a ni chung pawh chuan, an kalna apiangah Isua chanchin an sawi zel a.

Isua zirtîr pakhat a hming Philipa chu tihduhdah hun laia ringtu Jerusalem tlanchhiatsantute zînga pakhat a ni a. Samaria ah kalin Isua chanchin a hril a, tin, mi tam tak chhandamin an awm ta a. Tin, ni khat chu, Pathian vântirhkoh pakhatin Philipa chu thlalêra kawng pakhatah chuan kal tûrin a hrilh a. Kawnga a kal laiin, Philipa chuan Ethiopia mi sawrkar mi pawimawh pakhat a tawlailira chuang chu a va hmu a. Thlarau Thianghlim chuan Philipa chu chu pa hnênah chuan kala va be tûrin a hrilh ta a.

Philipan tawlailir a pan lai chuan, Ethiopia mi chuan zawlnei Isaia ziak ami a chhiar lai chu a va hre ta a. Chu mi chuan, “Talh tûrin berâm angin ani chu an hruai a, Berâm no ngawi reng angin ani chuan a ka a ang lo. Diklo takin an sawisa a, an zah hek lo. A nunna an laksak ta si a,” tih thu hi a lo chhiar a.

Philipa chuan Ethiopia mi hnenah chuan, “I chhiar kha a awmzia i hria em?” a ti a. Ethiopia mi chuan, “Mi tuin emaw min hrilhfiahsak loh chuan ka hrethiam thei lo a ni. Lo kal la, ka bulah rawn ṭhu ta che. Isaia hian ama chungchang nge a ziah midang chungchang?” a ti a, a zawt a.

Philipan Ethiopia mi hnênah chuan Isaia chuan Isua chungchang a ziak a ni tiin a hrilfiah ta a. A hnena Isua chanchin sawinan Philipa chuan Pathian thu dangte pawh a hmang bawk a.

Philipa leh Ethiopia mi chu kawnga an kal lai chuan, tui awmna hmun an lo thleng ta a. Ethiopia mi chuan, “En teh! Sawtah saw tui a awm e! Baptisma ka chang thei ang em?” a ti a. Tin, ani chuan tawlailir khalhtû chu tawlailîr tiding tûrin a hrilh a.

Tichuan, tuiah chuan an lut thla a, Philipa Ehiopia mi chu a baptis ta a. Tuia ata an lo chhuah hnu chuan, Thlarau Thianghlimin Philipa chu hmun dangah a la bo ta daih a, chutah chuan mite hnênah Isua chanchin a hril ta zêl a.

Ethiopia mi chu a in lam panin a kal ta zel a, Isua a hriat tak avangin a hlim hle a.

Saula chu Stephena thattute puan lo vensaktu tlangval kha a ni a. Ani chuan Isua a ring lo va, tichuan, ringtute chu a tiduhdah ta a. Ringtu a hmei a paa mana tanina khung tûrin Jerusalem khuaa in tinah chuan a kal ṭhin a. Puithiam lalberin Saula chu Damaska khawpuia kala Kristiante man tûr leh Jerusalema hruai leh tûrin phalna a pe ta a.

Saula chu Damaska khaw pana a kal laiin, vân ata êng tak hian a vel chu a rawn en a, ani chu leiah a tlu ta a. Saula chuan tu emawin, “Saula! Saula! nangin engati nge mi tihduhdah hi?” a tih chu a hria a. Saula chuan, “Tunge i nih, Lalpa?” a ti a. Isuan a chhang a, “Isua, i tihduhdah hi ka ni,” a ti a.

Saula chu lei ata chu a tho va, engmah a hmu thei ta lo va. A ṭhiante chuan ani chu Damaska khuaah kai chunga an hruai luh a lo ngai ta a. Saula chuan ni thum chhung engmah eiin a in lo va.

Damaskaah chuan zirtîr pakhat a hming Anania a awm a. Pathianin a hnênah, “Saula thlênnaah va kal rawh. A mit a vâr leh theihna tûrin a chungah i kut i nghat dawn nia,” a ti a. Nimahsela, Anania chuan, “Lalpa, he mi hian ringtute a tihduhdah ṭhin thu ka hria asin,” a ti a. Pathian chuan a chhang a, “Va kal mai rawh! Judate leh hnam dang te hnêna ka hming puangtu atan ka thlang tawh a ni. Ka hming avangin hrehawm tam tak a la tuar dawn a ni,” a ti a.

Tichuan, Anania chu Saula hnênah a kal a, a chungah chuan a kut a nghat a, a hnênah, “Isua, he lai hmun pana i kal laia i hnêna rawn inlâra khan, i mit a lo vâr leh theihnan leh Thlarau Thianghlima i lo khah theihnan i hnenah hian min tîr a ni,” a ti a. Saula chuan a hmu thei leh ta a, tin, Anania chuan ani chu a baptis ta a. Tin, Saula chuan chaw te a ei a, a lo chak leh ta a.

Saula chuan Damaska a Juda mite hnênah chuan thuhril a ṭan ta nghal a, “Isua hi Pathian Fapa a ni!” tiin a sawi a. Judate chuan tun hmaa ringtute tiduhdah ṭhintu khan tunah Isua a lo ring ve ta tih an hmuh chuan mak an ti hle a! Saula chuan Judate hnênah Isua chu Messia a nihzia fiah tak leh awihawm takin a sawipui ṭhin a.

Ni tam tak hnuah chuan, Judate chuan Saula thah dan tûr remruatna an siam ta a. An thah theihnan mite chu khawpui luhnaa amah lo chang tûrin an tîr a. Nimahsela, Sualan an thiltum chu a lo hria a, a tlanchhuah theihnan a ṭhianten an lo pui a. Zan khat chu amah chu bawmin khawpui bangah an khai thla ta a ni. Saulan Damaska a chhuahsan hnu chuan, Isua chanchin a hril chhunzawm ta zêl a.

Saula chu Jerusalemah zirtîrte hmu tûrin a kal ta a, nimahsela, amah chu an lo hlau va. Tichuan, ringtu Barnaba chuan Saula chu tirhkohte hnênah a hruai a, Saulan Damaska khuaa huai taka thu a hrilzia te chu anmahni chu a hrilh ta a. Chumi hnuah chuan, zirtîrte chuan Saula chu an lo pawm ta a.

Tihduhdahna avanga ringtu ṭhenkhat Jerusalem tlanchhiatsantûte chu hmun hla tak Antiokei khawpui thleng an han kal a, Isua chanchin an hril zel a. Antiokei a mi tam zawk chu Juda mi an ni lo va, nimahsela, an zînga mi tam tak te chu a vawi khatna atân rîngtu an lo ni ve ta a. Barnaba leh Saula te chu chung mite hnenah chuan Isua chanchin zirtîr belh zêl tur leh Kohhran tichak tûrin an han kal ta a. Antiokei ah chuan a ni Isua rîngtute chu “Kristiante” tia an koh tan ni.

Ni khat chu, Antiokei khuaa Kristiante chu chawngheia an ṭawngṭai laiin, Thlarau Thianghlim chuan an hnênah, “Barnaba leh Saula te hi ka koh chhan hna thawk turin tihrang rawh u,” a ti a. Tichuan, Antiokei kohhran chuan Barnaba leh Saula tân chuan an ṭawngṭai ta a, an chungah an kut an nghat a. Tin, anni chu hmun dang tam taka Isua chanchin ṭha chu hril tûrin an tirchhuak ta a. Barnaba leh Saula chuan hnam hrang hrang a mite chu an zirtîr a, mi tam takin Isua an lo ring ta a.

Saulan Rom ram a fan chhuah hnu chuan a Rom hming “Paula” tih chu a hmang ṭan ta a. Ni khat chu, Paula leh a ṭhian Sila chu Philippi khuaaah Isua chanchin ṭha hril turin an kal a. Khawpui pawn lui kam hmun pakhat mite ṭawngṭai tûra an kal khawmna hmunah chuan an kal a. Chutah chuan nu pakhat a hming Ludi, sumdawng mi hi an zu hmu a. Ani chuan Pathian a hmangaih a, chibai a bûk ṭhin a.

Ludiin Isua thu a rin theihnan Pathianin a thinlung a tihvâr sak ta a, amah leh a chhungte chuan baptisma an chang ta a. Ani chuan Paula leh Sila chu an ina thleng tûrin a sawm a, tichuan, an thlêng ta a.

Paula leh Sila te chu ṭawngṭaina hmunah mipuite nên an inhmu fo ṭhin a. Nitin chulai hmuna an kal lai chuan ramhuai man sal hmeichhe pakhat hian anmahni chu a rawn zui ṭhin a. Chu ramhuai chu hmanruaah hmangin chu hmeichhia chuan mi hma lam hun tûrte a sawilawk ṭhin a, tichuan, aienthiam a nih angin a pu tan sum tam tak a hai luhsak ṭhin a.

Sal hmeichhia chuan an kal lai chuan, “Heng mite hi Chungnungber Pathian bawihte an nih hi. Chhandamna kawng an hrilh che u a ni,” tiin a lo au fo thin a. Chutianga a tih fo avang chuan Paula chu a lungni ta lo va.

A tawp a tawpah chuan, ni khat chu sal hmeichhia a au ṭan laiin, Paula chu a lehhawi a, a kawchhunga ramhuai hnênah chuan, “ Isua hmingin, a kawchhung ata lo chhuak rawh,” a ti a. Ramhuai chuan a chhuahsan ta nghal a.

Sal hmeichhe neitute chu an thinrim hle mai a! Sal hmeichhia chuan ramhuai tel lovin mite hmalam hun a sawi thei lo tih an hrechiang a. Miten amah neitute hnênah chuan an hmalam hun a lo sawisakna turin sum an pe tawh dawn lo tihna a ni.

Chutichuan, sal hmeichhe neitûte chuan Paula leh Sila chu Rom thuneitûte hnênah an hruai a, anni chuan an lo vua a, tâninah an khung ta a.

Paula leh Sila chu tânin chhungril berah an khung a, an kete chu kawl an buntîr bawk a. Chutichung pawh chuan zanlaiah Pathian fakna hla an la sa a.

Thawklehkhatah lir nasa takin a lo nghing ta a! Tânin kawngkhârte chu an lo inhawng a, tan ina tâng zawng zawngho kawl bunte chu a lo inphelh ta a.

Tânin vêngtu chu a lo harh a, tânin kawngkhar inhawng a han hmuh chuan, a hlauthawng ta êm êm a! Tânin a tâng zawng zawngte chu an tlan bo ta vek emaw a ti a, chutichuan, intihhlum a tum ta a. (Tânina tângte tlanchhuah a phal chuan Rom thuneitûte chuan ani chu an tihlum dawn a ni tih a hre reng a ni). Nimahsela, Paulan amah chu a hmu a, aw ring takin a au va, “Engmah intih suh, kan zain hetah hian kan la awm vek alawm,” a ti a.

Tâng vêngtu chu khur chungin Paula leh Sila hnênah chuan a va kal a, an hnênah, “Chhandama ka awm theihnan engnge ka tih tur?” tiin a zawt a. Paula chuan, “Isua ring la, nang leh i chhungte nen chhandamin in awm ang,” tiin a chhang a. Tin, tâng vêngtu chuan Paula leh Sila chu a inah a hruai lut a, an hliamte chu a silfai sak a. Paula chuan chumi ina awm zawng zawng te hnênah chuan Isua chanchin ṭha chu a hril ta a ni.

Tâng vêngtu leh a chhungte zawng zawng chuan Isua an ring ta a, baptisma an chang ta a ni. Tin, tâng vêngtu chuan Paula leh Sila chu ei tur a hlui a, an hlimtlang ta êm êm a.

A tukah chuan, khawpui roreltute chuan Paula leh Sila chu tânin ata an chhuah a, Phillipi khua chhuahsan tûrin an ngen a. Paula leh Sila chuan Ludi leh ṭhian ṭhenkhatte an tlawh a, tin, khawpui chu an chhuahsan ta a. Isua chanchin ṭha chu a darh zau ta zel a, Kohhran pawh a ṭhang lian zêl bawk a.

Paula leh Kristian hruaitu dangte chu khawpui tam tak fangin, mite hnênah Isua chanchin ṭha thu hrilin, an zirtîr a. Kohhrana ringtute fuihna leh zirtirna atan lehkhathawn ṭhahnem tak an ziak bawk a. Chung lehkhathawn ṭhenkhatte chu Bible lehkhabute an lo ni ta a.

Pathianin khawvel a siam lai khan, thil engkim kha a ṭha famkim vek a ni. Sual a awm lo va. Adama leh Evi te chu an inhmangaih dûn a, Pathian an hmangaih bawk a. Natna leh thihna a awm lo va. Chutiang chu Pathianin khawvel awm dân tûra a duh dân chu a ni.

Setana chuan Evi chu a bum theihnan huanah khan rul hmangin a ṭawng a. Tin, hmeichhia leh Adama chu Pathian lakah an lo sual ta a. An sual avangin leia mi tin te hi kan na a, kan thi ṭhin a ni.

Adama leh Evi ten thil an lo tih sual tak avangin, thil ṭhalo lehzual a lo thleng ta a. Anmahni chu Pathian hmelma an lo ni ta a ni. A rawn nghawng chhuah chu, chuta chinah chuan mihringte chu sual nungchang pu sain an rawn piang chhuak ta a, Pathian hmelma an lo ni ta bawk a ni. Pathian leh mihring inkara inlaichinna chu sualin a tichhe ta a. Nimahsela, Pathian chuan chu inlaichinna chu siamṭha leh tûrin rem a ruat a.

Pathian chuan Evi thlahte zinga mi pakhatin Setana lu a la tihthitlin tur thu leh Setana chuan a keartui a la tihhliam tûr thu a tiam ta a. Chumi awmzia chu Setanan Messia chu a la tihlum ang a, nimahsela, Pathianin a kaitho leh ang a, tin, Messia chuan Setana thiltihtheihna chu a la tichhiatsak dawn tihna a ni. Kum tâm tak hnuah, Pathianin Isua hi Messia a nih thu a rawn puang ta a.

Pathianin tuilêt hmanga khawvel pumpui a tihchhiat lai khan, amah ringtûte himna tûrin lawng a buatsaih sak a. Chutiang bawkin, mi tinrengte hi an sualte avangin tihboral an phu a, nimahsela, Pathianin amah ringtûte chhandam tûrin Isua a pe a.

Kum za tam tak chhung chu, mipuite chu an sualte avanga an phu tawk hremna entirnan, an tan puithiamte chuan Pathian hnênah inthawina an lo hlan ṭhin a. Nimahsela, chûng inthawinate chuan an sualna chu a la bo thei si lo. Isua hi Puithiam Lalber a ni a. Puithiam dangte ang lo vin, khawvela mi zawng zawngte sualna la bo thei inthawina awmchhun a nih angin amah leh amah a inhlan ta a. Isua chu puithiam sawiselbo a ni, mi zawng zawng sualna avanga hremna chu a lo phur ta si a.

Pathianin Abrahama hnênah, “Nangmah avangin leia hnam tin an la thawvêng ang,” a ti a. Isua chu Abrahama thlah a ni a. Amah avangin hnam tin malsawmin an awm ta a, Isua ringtu apiangte chu sual ata chhandam a nih avang leh, thlarau lama Abrahama thlah a lo nih tak avangin.

Pathianin Abrahama hnênah a fapa Isaaka chu inthawina atâna hlan tûra a hrilh khan, inthawina atan a fapa Isaaka aiah Pathianin berampa a pe ta zawk a. Kan vâi hian kan sualte avangin thih kan phu vek a! Nimahsela, Pathianin kan aia thi tûrin Isua, Pathian berâm no chu inthawina atan a lo hlan ta a ni.

Aigupta ramah Pathianin hri hnuhnung bêr a lentîr lai khan, Israel chhungtin te hnênah berâm no sawiselbo talh ṭheuh tûrin leh a thisen chu an kawngka biangah te leh an kawngka lu chungah tât tûrin a hrilh a. Pathian chuan thisen chu a hmuhin, an inte chu a kal hlen a, an fatîrte chu a tihlum ta lo va. He hun pawimawh hi Kalhlen Kût tia hriat a lo ni ta a.

Isua chu kan Kalhlen Kût berâm no a ni a. Amah chu mi famkim, sualna nei lo, Kalhlen Kût lawm hun laia thaha a ni. Mi tupawhin Isua a rin chuan, Isua thisen chuan a sual man chu a peksak a, Pathian hremna chuan chu mi chu a kalhlen ta a ni.

Pathian chuan a hnamthlan Israelte nen thuthlung a siam a. Nimahsela, tunah erawh chuan mitinte tan Pathianin Thuthlung Thar a siam ta a. He Thuthlung Thar avang hian, hnam tina mi tupawhin Isua rinnain Pathian mite zîngah a lo tel thei ta a ni.

Mosia kha Pathian thu puangtu zawlnei ropui a ni a. Nimahsela, Isua hi zawlnei zawng zawnga ropui bêr a ni. Amah hi Pathian a ni a, chuvang chuan, a thiltih leh a thusawi apiangte chu Pathian thiltih leh Pathian thû an ni a. Chuvang in, Isua hi Pathian Thu tih a ni.

Pathianin Lal Davida hnênah a thlahte zînga pakhat chu Pathian mite chungah lal niin chatuanin ro a la rel ang tih a tiam a. Isua hi Pathian fapa leh Messia a nih avangin, amah hi Davida thlah chatuana rorêl thei chu a ni.

Davida chu Israel lal a ni a, nimahsela, Isua erawh hi chu thilsiam zawng zawng chunga lal a ni. A lo kal leh dawn a, a lalramah dikna leh remnain chatuanin ro a rêl ang.

Vantirhkohvin nula thianghlim Mari hnênah Pathian Fapa a la hring ang tih a hrilh a. Chuvang chuan, nula thianghlim a la nih lai pawhin Thlarau Thianghlimin a hliahkhuh a, nau a lo pai ta a. Mipa a hringa, a hmingah Isua a sa a. Chutichuan, Isua chu Pathian leh mihring a ni.

Isuan thilmak tam tak a ti a, chungte chuan Pathian a nihzia an lantîr a. Tui chungah a kal a, thlipui a hau reh a, damlo tam tak a tidam a, ramhuaite a hnawtchhuak a, mitthi a kaitho va, chhangpêr pangâ leh sangha te pahnihte chu mipui 5,000 chuang hraina daih khawpah a chantîr a.

Isua chu zirtîrtu ropui a ni bawk a ni, Pathian Fapa a nih avangin thuneihna nen thu a sawi ṭhin a. Nangmah i inhmangaih angin midangte i hmangaih tûr a ni tih a zirtîr a.

I hausakna leh thil dang zawng zawng aiin Pathian i hmangaih tur ani ngai tih a zirtîr bawk a.

Isuan khawvela thil dang zawng zawngte aiin Pathian lalram chu a hlu zawk tih a sawi a. Tute tan pawha pawimawh ber chu Pathian lalram chan chu a ni. Pathian lalrama lût tûr chuan i sual lak ata chhandam i nih a ngai a ni.

Isuan mi ṭhenkhatin amah chu an lo lawm ang a, chhandam an nih tûr thu leh midangten chutianga an tih ve loh tur thu a zirtîr a. Ani chuan mi ṭhenkhatte chu lei ṭha ang an ni a ti a. Chung mite chuan Isua chanchin ṭha chu an lo lawm a, chhandam an ni ta a. Midangte chu kawng dung lei changa tla ang an ni a, chutah chuan Pathian thu chi chu a lut tlang lo va, rah a chhuah ta lo a. Chung mite chuan Isua thû chu an hnawl a, a lalramah an lut lo vang.

Isuan Pathianin misualte a hmangaihzia a zirtîr a. Ani chuan anmahni chu ngaihdam a duh a, a fâ atana siam a duh a ni.

Isuan Pathianin sual a hua tih a zirtîr bawk a. Adama leh Evi te an lo sual khan, chu chuan an thlahte zawng zawng chu a nghawng ta vek a. Chumiin a nghawng chhuah chu, khawvêla mi zawng zawng te chu an lo sual ta a, Pathian nên an inṭhen ta a ni. Chutichuan, mi zawng zawng chu Pathian hmelma an lo ni ta a.

Nimahsela, Pathianin khawvel a hmangaih êm êm a, chutichuan, a fapa mal neihchhun chu a pe a, tupawh amah rîng apiangte chu an sualte avanga hrem an nih lohnan leh, Pathian nen chatuana an nung tawh zawkna turin.

I sualna avangin thiamloh chang i ni a, thih chu i phu a ni. Pathian chu i chungah a thinûr ngei ang, nimahsela, a thinûrna chu nangmahah ni lovin Isua chungah a leih baw ta a. Isua Krawsa a thih lai khan, hrem i nihna tûr ai amah chu hremin a lo awm ta a ni.

Isuan thil sual a ti ngai lo va, nimahsela, nang leh khawvela mi zawng zawng te sualnate a lakbo theihnan inthawina sawiselbo atan hremna leh thihna chu a thlang a. Isuan amah leh amah chu inthawina atâna a inhlan avangin, Pathianin eng sual pawh, sualna rapthlak bêrte pawh, a ngaidam thei a ni.

Thil ṭha tihte chuan a chhandam thei lo che. Pathian nêna inlaichinna nei tûrin tih theih engmah i nei lo. Isua chauhvin i sualte a tlengfai thei. Isua chu Pathian Fapa a ni a, i thih ai Krawsah a thi a, Pathianin a kaitho leh tih i ring tur a ni.

Pathianin Isua ringtu leh an Lal atana pawmtu apiang a chhandam ang. Nimahsela, tupawh amah rîng lo chu a chhandam dawn lo a ni. I rethei emaw i hausa emaw, mipa i ni emaw hmeichhia i ni emaw, târ i ni emaw thalai i ni emaw, leh khawia chêng nge i nihin awmzia a nei lo vang. Pathianin a hmangaih che a, nangmah nên inlaichinna hlimawm tak a neih theihnan Isua i rin a duh a ni.

Isuan amah ring turin leh baptisma chang tûrin a sawm che a. Isua hi Messia, Pathian fapa neihchhun a ni tih i rîng em? Misual i ni tih leh Pathian hremna i phu tih i ring em? Isua chu Krawsah i sualte la bo tûrin a thi tih i ring em?

Isua i rin a, i tana a thiltihte i rin bawk chuan Kristian i lo ni ta a ni! Pathianin Setana thim lalram ata chhuahtîr chein, Pathian lalram engah chuan a dah ta che a ni. Pathian chuan i nun hlui sual kawng zawh ṭhin chu la bovin nun thar felna kawng zawhtu nun chu a pe ta che a ni.

Kristian i nih chuan, Pathianin Isua thiltih avangin i sualte chu a ngaidam ta a ni. Tunah chuan, Pathianin hmelma ni lovin ṭhian ṭha ah a ngai che a ni.

Pathian ṭhian leh Lal Isua chhiahhlawh i nih chuan, Isuan a zirtîr che kha i zawm duh tawh ang a. Kristian ni tawh mahla, sual turin thlem i la ni ang. Nimahsela, Pathian chu a rinawm a, i sualte i puan chuan a ngaidam ang che tih thu a sawi a ni. Ani chuan sual do tûrin chakna a pe ang che.

Pathianin ṭawngṭai tur te, a thu zîr tur te, Kristian dangte nêna Pathian be ho tûrte, i tana a thiltihte midangte hrilh tûrte in a ti che a ni. Heng zawng zawngte hian amah nena inlaichinna thuk zawk i neih theihnan a pui dawn che a ni.

Kum 2,000 dawn lai chu, khawvel pumpuia mi tam takten Isua Messia chanchinṭha hi an lo hre tawh a. Kohhran chu a lo ṭhang lian zêl a. Isuan khawvel tawp hunah a lo kal leh tûr thû a tiam a. Amah chu lo la kal hrih lo mahse, a thutiam chu a la hlen dawn a ni.

Isua lo kal leh tûr kan nghah lai hian, Pathianin thianghlim tak leh amah chawimawi a nung tûrin min duh a. Midangte hnênah a lalram chanchin hrilh tûrin min duh bawk a. Isua leia a awm lai khan, “Ka zirtîrte chuan khawvel zawng zawng a mihringte hnênah Pathian lalram chanchin ṭha hi an hril ang a, tichuan, tawpna chu a lo thleng ang,” a ti a.

Hnam tam takin Isua chanchin hi an la hre lo va. Vana a lawn hmain, Isuan Kirstiante hnênah chanchin ṭha hi la hre ngai lo te hnênah puang tûrin a hrilh a. Ani chuan, “Kal ula, hnam tin zirtîrah te siam rawh u!” a ti a. “Buh seng turin buhte chu an hmin zo ta!” a ti bawk a.

Isuan, “Bawih chu a pu aiin a ropui lo. He khawvel thuneitûten min huat angin, keimah avangin an tiduhdah an che u a, an tihlum ang che u. He khawvelah hian hrehawm tuar mah ula, thlamuang takin awm rawh u, Setana, khawvel roreltu chu ka hneh ta. Ka tan thih thlenga rinawma in awm chuan, Pathianin a chhandam ang che u!” a ti a.

Isuan a zirtîrte hnênah khawvel tawp huna mi chunga thil lo thleng tur sawifiahnan tehkhin thu a sawi a. Ani chuan, “Mi pakhat hian lovah chi ṭha a theh a. A mutthilh hlanin a hmelma a lo kal a, buh zingah chuan buh lem a theh a, a kal bo leh ta a.

“Buh chu a lo ṭo va a lo vui chuan, in neitu bawihte chuan, ‘Ka pu, lovah khan chi ṭha i theh a. Buh lem saw engvanga lo awm nge ni le?’ an ti a. An pu chuan,’”Chu chu hmelma in a lo ti ta a nih chu,’ a ti a.”

“Bawihte chuan a hnênah, ‘Buh lemte chu pawtchhuak mai ila rem i ti em?’ an ti a. Ani chuan, “Ti lo ve, chutianga in tih chuan buh chu in pawt tel hlauh dah ang e. Buh seng hun thleng nghak ula, chumi zawh chuan, buhlemte chu hal tûrin la khawm ula, nimahsela, buh te chu buh inah sêng lût rawh u,” a ti a”

Zirtîrte chuan tehkhin thu awmzia chu an hrethiam lo va, chuvangin, anmahni chu hrilhfiah turin Isua an zawt ta a. Isuan, “Chi ṭha thehtu chuan Messia a entîr a. Lo chuan khawvel a entîr a. Chi ṭha chuan Pathian lalram a mite a entîr a.”

“Buhlem chuan misual fate a entîr a. Hmelma, buhlem thehtu chuan Diabola a entîr a. Buhseng chuan khawvel tawp hun a entîr a, buh âttute chuan Pathian vantirhkohte an entîr bawk a.”

“Khawvel a tawp hunah chuan, vantirhkohten Diabola mite zawng zawng chu an thiar khawm ang a, rawhtuina meiah an paihlut ang a, chutah chuan hrehawm nasa tak tuara ṭah leh ha ṭhial a awm tawh ang. Tin, a fela te chu an Pa Pathian lalram ah chuan nî angin an êng tawh ang.” a ti a.

Isuan khawvel tawp hmain leia a rawn kal leh tur thu a sawi bawk a. He lei a chhuahsan ang bawk khan a rawn kal leh dawn a, chumi awmzia chu, lei taksa a pu ang a, vân chhum zingah a lo kal dawn a ni. Isua lo kal leh hun chuan, ringtu thi ta te chu an tho leh ang a, vânah amah nen an intawk ang.

Tin, Kristian nung dama la awm reng te chu vanah lakchhohvin an awm ang a, mitthi zing ata tho leh Kristiante nen an chengza tawh ang. Chutah chuan an zain Isua hnênah an awm tawh ang. Chumi hnuah chuan, Isua chu a mite nen remna leh thlamuanna famkim changin an awm tawh ang.

Isuan amah ringtu apiangte hnênah lallukhum pek a tiam a. Thlamuanna famkim changin Pathian nen chatuana nungin ro an rel tawh ang.

Nimahsela, Pathianin Isua ringlotute ro a la rel ang a. Hremhmunah a paihlut ang a, chutah chuan lungngaihna nasa tak tuara ṭah leh ha ṭhial a awm ang. Mei mit ngai lo chuan anmahni chu a kâng reng ang a, a lungte chuan chawl lovin an ei reng tawh ang.

Isua lo kal leh hunah chuan, Setana leh a lalram chu a rawn tichhe vek ang a. Setana chu meidîlah a paih ang a, chutah chuan Setana chu Pathian aia amah zui zawktute nen, mei chuan a kâng kumkhua tawh ang.

Adama leh Evi’n Pathian thupêk an awih lo va, khawvelah sual an luhtîr hnu khan, Pathianin khawvel chu anchhia a lawh ta a, tihchhiat tur in thuthlukna a siam ta a. Nimahsela, engtik niah emaw chuan Pathianin vân thar leh lei thar a siam ang a, sawisel tur awm lo, ṭha famkim an ni ang.

Isua leh a mite chu lei tharah chuan an chêng ang a, ani chuan thil nung zawng zawng chungah kumkhuain ro a rêl ang. Mittûi zawng zawng a hru hul ang a, chutah chuan hrehawmna, lungngaihna, ṭahna, sualna, natna emaw thihna emaw a awm tawh ngai lo vang. Isuan a lalramah chuan remna leh dikna in ro a rêl ang a, a mite nen kumkhuain an cheng tawh ang.