2 Pitorosi

11Simone Pitorosi, o mwika kame mu apositora wa Jeso Kiresite, kwabo niba tambura entumero endotu ifwana shina omo nitwa itambwira, entumero yoku chena kwa Nyambe, kame muhazi wetu. 2Echishemo ne mpore liwezwe kubunene ku nzunu ya Nyambe ne Jeso Kiresite o Nfumu.

3Ezintu zonshe ze ngamu zichenete zo buharo ne zywi lya Nyambe niza hewa kwetu ke nzunu ya Nyambe, ozyo natukuwa ke tubo yakwe ne ngamu. 4Kezi, natuha e nsepiso endotu enene, ye namube kukuli bbatwila mwezo niza tendwa, shake na mushehe mububbi bwe fasi.

5Kabulyaho, mutende ezirotu kokuweza kwi ngamu ke ntumero, ke ngamu, enzunu. 6Ke nzunu yenu, muweze kukuli kuteka, mi kokuli kuteka, muweze kuku zyimana koku gora, kuku zyimana koku gora muweze ko chirumeli. 7Ku chirumeli, muweze ko erato lyo bundambo, kwi rato lyo bundambo, muweze ko erato.

8Heba ezi zintu zina kwenu noku kulira kwenu, kali namube ba zyanguli be nzunu yo Nfumu Jeso Kiresite. 9Kono yenshe ozyo azya ezi zintu abona bulyo za fwihi; mofu. Na zibara zoku cheneswa mububbi bwakare.

10Kabulyaho, bakwangu, mutende hawa ye oku kuyiwa kwenu noku sharurwa kwenu. Heba na mutenda ezi zintu, kali namuwe. 11Mwi njira eyi echizyi choku kabila mu mubuso wa Nyambe o muhazi Jeso Kiresite nazila hewa kwenu.

12Kobulyaho ndili bakanyite oku mikumburusa ezi zintu, noko muzizyi, noko mugorete mwi niti hanu. 13Ndi azyara ye kwina nenja kwangu kumibusa ne ngazyaro ye zintu, aho ndishi kere mwi tente. 14Kakuli ndizyi ye hahanu nandira zwisa e tente yangu, omo Nfumu Jeso Kiresite nandi sunda. 15Nandira mitendera hawa okutiye nimwa ku azyara ezi zintu eme shendi neti.

16Shina omo kali nitwa humpa ko butali etangu zokuli pangira aho katu misumwina zokezya ko Nfumu Jeso Kiresite. Kabulyaho, nitwa bona zo bunene bwa Nyambe. 17Kakuli na tambura kwa Nyambe ekute lya Shwetu ne tubo enene eyo niya retwa ezywi nalita ye, "Ozyu ndi Mwanangu, ozyo ndishaka, kakwe ndili temba." 18Nitwa shuwa ezywi elyo nilyazwa kwi wiru, aho katu kere neye he rundu lichenete.

19Tukwesi eli zywi lyechi porofita elyo nilya tendwa koku gora. Mutenda nenja kubika ko engazyaro. Shina nji rambi i munika mwina kansikwe mbita kezya kwa masikusiku kame nokuzwa koru tungwezi masikusiku mu myezyo yenu. 20Muzyibe ezi tango, Kwaazya o muporofita ozyo a toroka zakwe. 21Kakuli kwaazya echi porofita nicha kezya koku shaka ko muntu. Kabulyaho, a bantu kaba hinditwa ko Ruho ruchenete kaba amba kuzwa kwa Nyambe.

21Ba porofita bahoma nabakezya kuba ntu, bazyii be mbuzi nibana kezya nebana kwenu.Nebareta ntuto zi kauhanya, niba kana Nfumu ozyo naaba wura. Bareta kusinyeha mukati kwabo. 2Bangi nabara chilira zo bushahi,kabo enjira yoniti niyina nyanswa. 3Kobunyimi nabawana mupuzo hawiru lyenu ka mazywi o kuhoma. Kuhoma kwabo kakuliyehi nako nde kusinyeha kwabo kakulali.

4Kakuli Nyambe kali na rekelela mangiroi ana tenda zibbi. Kabulyaho na hewa kwa Tatarasi kuti abikiwe muma wenge muchibaka cho kusiha mbita e nkatulo. 5Kali naa rekerela efasi lyo kale. Kono nahaza Nuwe ozyu ka rukite, niba mwinya bo anja netobire, aho nareta mashanjiba mufasi lyabo kabatenda kali Nyambe. 6Nyambe na manisa minzi ya Sodoma ne Gomora kureka bulyo e nzuliya kutwara ku ma maninikizo, kuti ibe mutara kwezo nazi tendahare kwabena kabatendi za Nyambe.

7Kono Lota ozyo ka chenete, ozyo ka lyatilirwe ko mukaliro wabena kali kaba chilire nobushahi, Nyambe naba ramwina. 8Okuti mukwame arukite ozyo kahara mukati kabo mu zyuba mu zyuba kakatazitwe muruho lwakwe lo ku chena kezi kabona noku shuwa. 9Nfumu azyi moku hazikisa bantu ba nyambe mumiliko nokuhwa nkoto kwabena baazya ku ruka mwi zyuba lyo nkaturo.

10Eyi nji niti kwabena ba bazwira habuso mwi ngazyaro zo mubili nokusa kutika nkamaiso.Kabatiyi mi batenda zabo. Kabatiyi ku nyansa bena barukite. 11Mangiroyi akwesi hawa ngamu na manta, kono ka reteli matuka enkatulo kwa Nfumu.

12Kono zipau zaazya nzunu naza tendelwa ku kwatiwa noku yaiwa.Kabazyi ezo batuka. 13Nabana maniswa. Nabana wana mupuzo wabo kezitendantu zabo zibbi .Bahazyara ye kuhara nenja kamwi mburotu hawa. Ezibata zabo ne mirandu. Balikora ezitendantu zibbi nabazana nenwe ze mikiti. 14Bakwesi mensho azwyire bushahi bwa bakentu; kaba kalikolwisi ne zibbi. Bahambiliza e myuzya yaazya kuliketete mukutenda zibbi, e myezyo yabo ina kutenda ezzibi. Mbana be chikuto!

15Niba reka njira endotu. Neba zyoba ne bahumpite njira ya Balamu mwana Beore, kashaka ku hora kuzintu kazikere nenja. 16Kono Nawana kukanwa koku shotoka murao. E mbongoro kai ambi kezywi lyo muntu niya siya obu purupuru bo porofita.

17Aba bantu bafwana mbwe ndiziba lyaazya menji. Bafwana mbwe mazyuba ayendishwa ku ruho. Kansike kanene kabikirwa abo. 18Baamba kobubbi. Ba jingiza bantu ke ntakazo yo mubili. Ba jingiza bantu bashaka ku rendera mwabena bahara mukusha tenda zirotu. 19Ba sepisa entukuruho kwabo, kono kwabo beni mbeka bachora mirao. Kakuli o muntu mwika kuzintu zimuwora.

20Yenshe ozyo azwa mububbi bwe fasi ke nzunu yo Nfumu muhazi Jeso Kiresite, aboola kwabena kame batenda izintu zibbi, mazyimo obubbi bwabo a maninikizo ahita a matatikizo. 21Nakura ba nenja kwabo kusha zyiba enjira endotu yoku ruka kapa kusha izyiba noku zoka ku mirao ichenete eyo niya hewa kwabo. 22Ezi ntangu nzeniti kwabo:" Ombwa aboora ku burusi bwakwe. Echi gurube echo chazazywa chiboola kwi tapa."

31Hanu, ndimiñorera enwe bashakiwa, eli eñoro lichilira nji nkupuzo yoku nyunga engana zenu ze niti, 2kuti ye mwara hupure a mazyi ao niya ambiwa ku mapolofita bachena ne ntaero yo Nfumu ne Muhazi kuma apositola benu.

3Muzyibe echi tango, abashauli bara kezya mu mazyuba amanikizo. Bara shaura mi bayenda kubuso kuya ke ntakazo yabo. 4Bara amba ye, "E nsepiso yoka boora kwakwe njeyi? Kuzwaho barara beshwetu, ezintu zonshe zishi swana, kuzwa ku matatikiro oku bumba."

5Bazibara kokushaka kuti ye ewiru ne chishi zakezyi kubako kuzwa mu menji ni ka menji, karee oko, ke ntaero ya Nyambe, 6nokuti ye kazezi zintu, efasi lye ina e nako nilya shinyiwa, nilya mina mu menji. 7Kono hanu ewiru ne chishi zibikirwe omuliro ke ntaero iswana. Zibikirwe e zyuba lye nkaturo nensinyeho ya bantu abo kaba zumini kwa Nyambe.

8Mwasha kangwi oku shuwisisa, bashakiwa, kuti ye ezyuba lyonke ne Nyambe lifwana mbwe e mwyaka yoli 1000, mi e mywaka yoli 1000 ifwana mbwe ezyuba lyonke. 9O Nfumu kayendi ko kuliyeha kuamana ne nsepiso zakwe, shina kamo bazyibire kuliyeha bamwi. Kono a liketete kwenu. Katabeli ye zyumwinya kwenu ashinyehe, kono muntu yenshe atende echibaka chokubaka.

10Kono, ezyuba lya Nyambe lyara kezya mbo musa: E wiru lyara mana ke rata enene. Ezintu zonshe zizyaka efasi zara hiswa no muliro, mi e fasi ne zitendantu zalyo zara bonahazwa.

11Kakuli ezi zintu zonshe zara shinyeha mweinu e njira, mbantu munji shaka ne mube? Mu hare obuharo buchena ni bwe chirumeli. 12Muli tukiseze noku hweresa okukezya kwe zyuba lya Nyambe. Helyo zyuba, ewiru lyara hisiwa mu muliro,mi nezintu zibumba e fasi zara nyanyumunwa mukuhisa kunene. 13Kono kuya ke nsepiso yakwe, tulindire mawiru maya ne fasi nja, omu nemu kare kuchena.

14Mi cware, bashakiwa, shina aho muziliberere ezi zintu, mutende komo muworera muwaniwe mwazya e zibbata nokusa waninwa mafosisa habuso bwakwe, mwi mpore. 15Kame, muazyare omozyo mure wakwe ube empuruso, shina mu namiñorera mushakiwa wetu Paulusi, kuya kobutali obu nibwa hewa kwakwe. 16Paulusi a amba kezi zintu mu mañoro akwe onshe, omu mwina e zintu zi kababu kuku shuwisisa. Bakwame abo kabatwali ko mozyo nokusa ba nenja bazyonaura ezi zintu, shina mu batendera entimana zimwinya, ku nshinyeho yabo bene.

1718Cware, bashakiwa, shina aho muzyi ezi zintu, muli babarere mubeni kuti ye mwasha zwi munjira ko buhomi bwa bantu ba azya omurawo mi mu zyoberwa o kusepahara kwenu. Kono mukure mu chisemo ne nzunu yo Nfumu ne Muhazi Jeso Kiresite. E tubo yibe kwakwe kuzwa hanu mbita o koo. Amen!