Magalata

11Paulusi, mu apositola- kali mu apositola azwa mu bantu kapa kusebelisiwa ku muntu, kono ka Jeso Kresite ne Nyambe Shwetu, ozyu na mubusa ku bafu- 2na bamwi barumeli bonshe, ku nkeleke za Magalata:

3Chishemo kwako ne mpore izwa kwa Nyambe Shwetu no Nfumu Jeso Kresite, 4ozyu nakiha yemwini ku zibbi zetu ye atuhaze ku bubbi bweino nako, kokuya choku shaka kwa Nyambe Shwetu, 5kwakwe kube ne ntubo kuya koo. Amen.

6Ndi komokwa hawa ye muzokera ozyu namikuwa ke chishemo cha Kresite. Ndikomokwa ye shemwazokeli kulingi ezywi. 7Kuno kali ku amba ye kwina limwinya ezywi lya Nyambe, kono kwina bamwi bantu bashaka okureta o bukababu no ku zora ezywi lya Kresite.

8Kono nanga ndiswe kapa ndingiloi lizwa kwiwiru liwambe zywi o mukali nitwa misumwina, a kutiwe. 9Shina aho nitwa amba, nahanu ndiwamba, "Haiba kwina ozyu shaka nawambe ezywi kuzora buti ni mwalishuwa, a hewe chikuto." 10Hanu shendi shaka kuzuminwa ku bantu nali kwa Nyambe? Ndi shaka ku tabisa bantu? Haiba ndishi yereka kutabisa bantu, kali ndili mwika wa Kresite.

11Paha ndishaka ye muzyibe, bakwangu, ye ezywi eli ninda wamba kali ndi zywi lyo muntu. 12Kali ninda tambura ku muntu kapa o kuli zyiiswa. Shali bulyaho, kaili kubonesiwa kwa Jeso Kresite kwangu.

13Ni mwashuwa zo buharo bwangu muchi Juda, buti kandi shandisa e nkelenke ya Nyambe kuhitiliza nokutiye kandishaka kuimanisa. 14Ninda hitiliza ze chi Juda kutanta ne ntaka zangu, aba kabazwa kwetu. Mbobulyaho kandina ku kwatilila e chizo chi be shwetu.

15Kono Nyambe, ozyu nandi sharura mubumo li bama, no kundi kuwa ke chishemo chakwe, 16na boterwa kundi sunda za mwane, ye ndi muwambe kubashi chishi. Nendi shini ku kwata nyama ne maroha. 17Kali nindayenda kwa Jerusalema ku ma apositola bakare kwangu. Shali bulyaho, ninda yenda kwa Arabiya kame nendi boora kwa Damasikasi.

18Aha shekuhita myika yotatwe ninda yenda kwa Jerusalema ye ndikazyibe Kefasi kame ndo kakara neye mazyuba e kumi ne anja. 19Kono kwazya bamunya ma apositola ninda kabona mbita Jakobo mwancu wo Nfumu. 20Kwe chi ndimi ñorera hanu, ndimiha e niti habuso bwa Nyambe, ye kandihomi.

21Paha shendiya kuzishi za Siliya ne Celisia. 22Kali kandishini kuzyibahara ku bashi nkeleke mwa Judeya kuba Kiresite. 23Mbulyo ni bashuwa kutewa ye, "O mukwame ozyu katu shandisanga ndeye sha wamba ze ntumero eyi kashaka kumanisa." 24Ke baka lyangu, bokuha Nyambe entumbo.

21Aho kuhita e myaka ye kumi ne myaka yone, ndoku yenda kame kwa Jerusarema ne Banabasi, kuhindilira ko Tite. 2Ninda yenda kukambama kebaka lyoku kuboniswa noku bikwa buhaso ezywi lya Nyambe elyo ninda amba kubashi chishi. Ninda amba kumbali kwabo abo bonahara ye mba butokwa, kubona kali nenda butuka kapa kubutika bulyo.

3Nanga Tite, ozyo kakere neme ozyo kali Mugerike, na sininikwa o mukanda. 4Aba baloba bokuhoma niba kezya ko kulihiba ye bezye babone buharo bwetu burotu tukwesi kwa Jeso Kiresite. Bashaka ye tuye mu bwika, 5kame kali nitwa libika kwabo munkotera nanga kanini, kokutiye o buniti bwe zywi lya Nyambe lisiyare kwenu.

6Kono kwabo ba bonahara o butokwa ( monshe bulyo omo kabakalire kazi bilaezi kwangu, Nyambe ka sundi e nketururo) - kwabo, nditaye , abo bali bobutokwa kwaazya echo echintu bakambika kwangu. 7Kumbali imunya, niba bona ye ninda hewa ezywi lya Nyambe kwabo kali nebaya ku mukanda, bulyena na hewa Pitorosi oku yendesa ezywi lya Nyambe kwabo nibaya ku mukanda. 8Kwa Nyambe, ozyo natenda ne Pitorosi kazo bwa apositora kwaba nibaya ku mukanda, nikwangu natenda bulyaho kubashi chishi.

9Aho Jakobo, Kefasi, ne Johani abo kaba zyibahere ye mbabo niba zyaka e nkereke, boku shuwisisa echishemo echo ninda hewa, nibaha e anja lya malyo lyoku shangana ne Banabasi neme. Niba tenda ezi ye tuyende kuba sichisi, okutiye abo ye bayende kwabo nibaya ku mukanda. 10Niba tukumbira bulyo tu azyare abo baazya chabo, echintu echo kandi azyara o kutenda.

11Aho shakezya Kefasi kwa Antioke, ninda kana habuso bwakwe kame kabata ye azya kwina nenja. 12Nakushini ku kezya bakwame abo kabazwa kwa Jakobo, Kefasi kalya nibashi chishi. Kono aho sheba kezya aba bakwame, aku reka nokuzwa kwabo bashi chishi. Katiya babo kabashaka zo mukanda.

13Bonshe ama Juda niba kavira kuziiza ezo batenda bamunya. Nanga Banabasi na homenenwa ku kavira mwezo batenda bamunya. 14Kono aho ndibona ye buharo bwabo kabu yendereli ne niti ye zywi lya Nyambe, Ndoku sumwina Kefasi habuso bwabo," Heba oli mu Juda nohara mbwe mwina shi chishi ewe kali oli mu Juda, mbuti ndiwora ku sininika boku kunje bashi chishi kuhara mbwe ma Juda?"

15Eswe tuli ma Juda koku pakwa kali mbahanje bashichishi batenda ezibbi; 16mi swe natuzyi ye kwaazya ozyo a rukite ko kutenda ko murao kono koku zumina mwi ntumero ya Jeso Kiresite. Nitwa kezya mwi ntumero ya Jeso Kiresite oku tiye tube bantu rukite mwi ntumero ya Kiresite kali ke mitendo yo murao. Ke mitendo yo murao kwaazya o muntu shake abe oku ruka.

17Kono, naho tushaka oku ruka kwa Kiresite, eswe, nitwa waniwa netuli batendi be zibbi, cware haha Kiresite a zuminina echibbi? Kazumini! 18Kakuli heba nandi zyaka ezintu ninda yaya , ndili tenda ndemwine ku chola murao. 19Kakuli ko murao ninda fwa ku murao, okutiye ndihare kwa Nyambe.

20Ninda kokoterwa ne Kiresite. Kali ndime shendi lihalira, kono Kiresite ndeye shahara neme. O buharo ndihara hanu mbo munyama ndihara mwi ntumero yo mwana wa Nyambe, ozyo nandi shaka akuliha yemwini kwangu. 21Kandi bikili kumbali echishemo cha Nyambe, heba oku cheneswa ku waniwa ko murao, kwaazya ezo nafwila Kiresite!

31Magarata ba basiru! Ozyo na mirowa ndini? Habuso bwa mensho enu Jesu Kireste na bonahara kokuzyura ye na kokoterwa. 2Chinu che chintu chonke ndishaka ku lituta kwenu: Ni mwatambura o Ruho ke zitendo zo mirao kapa ko ku zumina ezo ni mwa shuwa? 3Mbo bulyaho muli basiru? Koku tatika ko Ruho, she mushaka kumanikiza ke nyama?

4Ni mwa shandiswa muzintu zingi ke mbango—heba zachaha keli kembango? 5Kana ozyo amiha o Ruho no kutenda enkezo ze makazo mukati kenu azitenda ke zitendo zo murao kapa koku shuwa ke ntumero?

6Sina Aburahama "na zumina kwa Nyambe mi nikwa baliwa kwakwe ye kucena," 7ke njira iswana, mushuwisise, cware, mbabena bakwesi entumero ba kuiwa bana ba Aburahama. 8Entimana, nizabona kuti ye Nyambe nara chenesa basi Chishi ke ntumero, evangeli ni ya kutaziwa kwa Aburahama katanzi, kuta ye, "Abantu be fasi lyonshe mbo ba wane enfuyazi kebaka lyako." 9Cware he, bena bakwesi entumero beena enfuyazi hantu honke ne Aburahama, shi we ntumero.

10Abo bonshe aba ba basepete ezitendo zo murao, bakutitwa; mi mbo bulyaho kuñoretwa, "Akutitwa yenshe ozyo azya kuchirire zonshe ziñoretwa mu mbuka ye murao, no kuzitenda." 11Hanu kuzyibahere ye kwazya ozyo arukite habuso bwa Nyambe ke murao, kakuli ababa chenesetwe nebara hara ke ntumero. 12Kono omurao kali we ntumero, kono, "Omuntu ozyo atenda ezitndo zo murao, aswanera kuhara kezo."

13Keresite na turukurura ku chikuto cho murao kokuba chikuto eye muchibaka chetu—kakuli kuñoretwa, " Akutitwa yenshe ozyo ahangama ha chikuni"— 14kokuta ye enfuyauzi za Aburahama zi kezye kuba si Chishi ka Keresite Jeso, kuta ye ke ntumero tuwora okutambura ensepiso yo Ruho.

15Bakwangu, mundireke ndi ambe ke njira yo buntu. Entumererano-itendetwe abuntu, kwazya ozyo awora ku ubikira kumbari kapa kuyekaza ho, heba so tometwe ko murao. 16Cware ensepiso niya tewa kwa Aburahama ne shika lyakwe. Ka yi ambi ye "ba sishika," kutoroka ye kubantu bangi, kono ku muntu yenke bulyo, "ne ku shika lyako," nali Keresite.

17Echi nditoroka hanu chechinu: Omurao, owo niwa kezya kubuso bwe zilimo zoli 430, kaubiki kumbari entumelerano eyo ni ya bikiwa kwa Nyambe ku katanzi. 18Cware heba embuyoti iwaniwa ko murao, mi kau sikezyi ke nsepiso. Kono Nyambe naiha kwa Aburahama ke nsepiso.

19Chinji cware, entuso yo murao njei? Niwa wekeziwa kebake lye zibbi, mbita shaka akazye si shika lya Aburahama kozyo ensepiso niya tenderwa. Omurao ni bikiwa mu nkamaiso ku mangeloi ko muzyimanini. 20Cware omuzyimanini kali omuntu yenke, kono Nyambe yenke bulyo.

21Kana omurao ukirwisa ne nsepiso za Nyambe? Fwe kali mbo bulyaho! Kakuli nali nikwahewa omurao ureta obuharo, nali okucheneswa noko nikwa kezya ko murao. 22Kono entimana niza shimina ezintu zonshe zina mwinshi ye chibi. Nyambe natenda bulyanu kuti ye ensepiso yo kutuhaza ke ntumero mwa Jeso Keresite ihewe ku bena bazumina.

23Cware entumero ne ishini ku kezya, katu shiminitwe mwinshi yo murao, kushiminiwa mbita aho ikezya ku bonahara entumero. 24Cware kame omurao oku tuhitira mbita aha akezya kuhura Keresite, kuti ye tube ba barukite ke ntumero. 25Kono hanu ina entumero shiya huli, sitwa azya kwina mwinshi yo muhitili. 26Kakuli mwenshe muli bana ba Nyambe ke ntumero mwa Keresite Jeso.

27Enwe mwenshe nimwa korobezwa mwa Keresite, ni mwa tambura Keresite. 28Kwazya Mujuda kapa Magerike, kwazya omwika kapa ozyo arukuruhite. kwazya omukwame kapa omukentu, mwenshe mulichintu chonke mwa Keresite Jeso. 29Cware heba muli ba Keresite muzyibe ye mu ba sishika lya Aburahama, aba joboli ke ensepiso.

41Ndita ye ozyu a jobora, kubona bulyo ye mwance, afwana mbwe mwika, naha ali mwine we chifumu. 2Kono ena mwinshi lyo muyendisi naba basepiwa mbita zyuba eli niba bika beshi.

3Neswe bulyaho, aha katuli bance, neswe katu shuminitwe ku murao we fasi. 4Kono enako aha sheili zyuziliza, Nyambe na tuma mwane, ku kupakiwa ku munketu, ozyu na pakirwa mu murao. 5Natenda zi kute ahaze bena bena mwinshi lyo murao, kutiye tu añuliwa neswe mbwe banna.

6Kakuli mulibana, Nyambe na tuma Oruho rwa mwane mu myozyo yetu, azyu akuwa, "Abba, Shwetu." 7Cware koshili mwika, kono mwana, kame haiba mwana, paho newe ojobora ka Nyambe.

8Kono mweyo nako, aha kali ka muzyi Nyambe, ni mwa tendwa beka kwabena, bena manta o muntu, kali abazimu. 9Kono hanu shimwakezyi kuzyiba Nyambe, nali hanu shana mizyibi Nyambe, mbuti shemushaka kuzoka kuboora ku murao we fasi wazya entuso? Mushaka ye mube beka kame?

10Mu mukuteka mazyuba ne myezi miya ne nako kame myaka! 11Nditiya ye ke njira i munya emisebezi yangu nenwe kali ibe chimunya.

12Ndimi kumbira, bakwangu, mube mbwe ndime, kokuta ye neme ndabi shina ndinwe. Kwazya bumango obu mwandi tendi. 13Kono muzyi ye kaili butuku bo mubili nibwareta ye ndiwambe ezywi lya Nyambe kwenu ku matatikizo. 14Naha kuli ye mazyimo o mubili wangu ami yereka, kali nimwandi toya kapa kundi kana. Shali bulyaho nimwa ndi tambura mbwe ndili ngiroyi lya Nyambe, mbwe ndime Jeso Kresite mwini.

15Kwi, cware, oku kwina e nfuyauzi? Ndimita ye, nali kuworeseka, ne muna zwisi mensho enu no ku andiha. 16Paho, shindazoki chira chenu kakuli ndamisumwini e niti?

17Batabere okumi koma, kono zazya ntuso. Bashaka kumi ntontoza, kutiye mu babotere. 18Mburotu oku botera che baka lirotu, kali ye mbita nendi kere nenwe.

19Bana bangu banini, kame ndimishuwira kukubaza koku reta mwanche mwifasi mbita Kiresite shaka na be kwenu. 20Ndi tabera ye nali ndiba nenwe hanu no ku zora omu ambiro wangu, kakuli ndimi zunzunya.

21Mundi sumwine, enwe mu botera kuba munkotera yo murao, kamu teezi ku murao? 22Kuñoretwa ye Abburahama kena bana bechikwame bo bire, zyumunya ku mwika we chikentu kame zyumunya ku mukentu arukururuhite. 23Kono ozyu naretiwa ku munkentu wo mwika kokuya cho mubili, kono zyumunya naretiwa kumukentu a rukuruhite che nsepiso.

24Ezi zintu mbozi torokiwe mbwe zi zyimanina zintu, kokuta ye aba bakentu bazyimanina ezilikani zo bire. Zyumunya azwa ku rundu lya Sinai kame nareta bana ba ba beka. Ozyu ndi Hagare. 25Hagare azyimanina erundu lya Sinai lina mwa Arabiya; kame azyimanina Jerusalema yahanu, kokuti ye mwika na bana bakwe.

26Kono Jerusalema ina kuwiru irukuruhite, kame ndinyinetu. 27Kakuli kuñoretwa, "Mutabe, enwe kamureti banche. Muhuwereze entabo, enwe kamushuwi kukubaza koku reta mwanche. Kakuli abana bomukentu narekiwa mbangi kuhita bo mukentu akwesi mukwame wakwe."

28Kono nwe, bakwangu, mbwe Isaka, muli bana be nsepiso. 29Mweiyo nako ozyo napakiwa ko mubili na shandisa ozyu napakiwa ko Ruho. Mbobulyaho kufwana hanu.

30Cware zinji ziwamba entimana? "Tande omwika wo mukentu ne mwane. Kokuta ye omwana wo mwika kali shaka nawane e nkabero no mwana wo mukentu ozyu a rukuruhite." 31Paho, bakwangu, kali tuli bana bo munkentu wo mwika, kono wo mukentu a rukuruhite.

51Ke ntukuruho Kiresite natu rukurura. Zyimane ko kugora, kuzwaho, washa libiki kame munkotera ye jokwe lyo bwika. 2Tonde, Eme, Paurusi, ndita ye heba noli siyilira kutendwa mukanda, Kiresite kwaazya echo naku tendere mwinjira yonshe.

3Ndi amba kame ku bakwame bonshe bali rekerera ye baye ku mukanda ye ba kuteke wonshe murao. 4Mu koshokote kwa Kiresite , enwe shake namu waniwa namu rukite ko murao; kamushi boni echishemo

5Ko ruho, ke ntumero, tulindire ensepo imunya yoku cheneswa. 6Mwa Kiresite Jeso nozyo naya ku mukanda nozyo kali nayenda kwaazya china ho, mbita e ntumero bulyo njeyo itendahara ke rato. 7Ko butuka nenja. Ndini nami bindisa oku kuteka e niti? 8Oku kusininika kakuzwi kwakwe ozyo nami kuwa!

9O mumeno munini utenda ye obusu ye buzimbe. 10Ndikwesi ensepo ku Nfumu ye kali nemu tonde kungi. Yenshe ozyo ami sesa nara liha murandu, yenshe bulyo.

11Bakwangu, heba ndishi amba zo mukanda, chinji aho ndishi shandisiswa? Mwi njira yiyo echo chiwisa kuya kuchi fapano nicha zwiswa mo. 12Kwabo bami sesa, ndishaka ye niniba lifahura abo beni!

13Kakuli enwe nimwa kuwirwa kwi ntukuruho, bakwangu. Kono mwasha tendesi e ntukuruho kuzo mubili; kono, ke rato mulituse mubeni. 14Kakuli ko murao wonshe niwa bumbilizwa ntaero yonke; mumo" oshake ozyo ozyakite neye omo olishakira we mwini. 15Kono heba namu lishuma noku remeka mubeni, mu mamere ye namu reke kuli kulimana.

16Kono ndi amba , yende ko Ruho mi kali no kulike entakazo yo mubili. 17Kakuli entakazo yo mubili kayi yendereli niyo Ruho, mi kakuli ntakazo yo ruho kayi yendereli niyo mubuli. Kakuli ezi kazi zuminzani, mi kokutiye washa tendi ezo oshaka. 18Kono heba ohitirwa ku Ruho waazya kwina mwinshi yo murao.

19Cware hanu mitendo yo mubili ibonahara: Bushayi, kushachena, ntakazo, 20kulapera bazimu, bulozi, bukali, kushaba nenja, muna, bukali koku benga, kulirwisa, kukanana, kushashangana, 21ku shaka chintu cho muntu, budakwa, zidakwa, ne zintu zifwana mbwe zizi. Ndi misumwina, omo ninda misumwina hena katanzi, abo batenda ezi zintu kali neba jobore o mubuso wa Nyambe.

22Kono zilyo zo Ruho ndi rato, kutaba, empore, kukwata mozyo, kuruka, burotu, ntumero, 23kulikokobeza nokuli yendesa nenja yemwini; ezo kazi yendereli nezo kwaazya murao. 24Abo bena kwa Kiresite Jeso niba kokotera o mubili ko kuku tabera ne ntakazo.

25Heba netu hara ko Ruho, tuyende ko Ruho. 26Twasha rakazi zaazya ntuso, kulibengisa nabamwi, kulirakaza tubeni.

61Bakwangu, haiba muntu nawaniwa mu cibbi, enwe muchenete muswanera ku mubooza muruho ro kuli kokobeza. Mulikete okutiye mwasha yerekwa nenwe. 2Mukulike e miziyo ya ba yenzenu, kame mubumbilize o murao wa Kiresite.

3Haiba kwina ozyu azyara ye eye muntu mwene nikwazya, aki homa. 4Muntu no muntu atatube mutendo wakwe, kame ne baka lyokuli nanuna kwakwe zakwe yenke kali no muzyumuna. 5Kakuli muntu no muntu mbwali hindire omuziyo wakwe.

6Ozyu na zyiiswa ezywi bashanganine zintu zirotu no mu zyiisi. 7Mwaha homiwa. Nyambe ka neiwa, zonshe ezo a byara o muntu, zenzo na zyangure. 8Ozyo a byara e mbuto ha mubili wakwe kwazya echo na zyangure. Ozyo a byara e mbuto yo Oruho nara zyangura o buharo kabumani ro Ruho.

9Twasha kwangi kutenda borotu, ke nako i rukera tura shangana muku zyangura, heba katu kwangili hakati. 10Mpaho he, bulyena tukwatire e nako, tu tende zirotu ku bantu bonshe, sihuru kwabena bakere munjuwo ye ntumero.

11Mubone mañoro a manene ndimiñorera ke anja lyangu. 12Bena bashaka kubonisa oburotu ke nyama ba yereka kumi sininika ye muye ku mukanda. Batenda ezi okutiye baha shandisiwa ke chifapano cha Kiresite. 13Kali ye nabo bakitwaranga ku mukanda ba chilira o murao, kono bashaka ye enwe muye ku mukanda okutiye bali nanune ke mibili yenu.

14Kono nendisiye kuli nanuna mbita ke chifapano cho Nfumu Jeso Kiresite, kokuya kobuti fasi nilya kokoterwa kwangu, neme ku fasi. 15Katubali aba nibaya ku mukanda kapa aba kali nibaya ku mukanda, echi tubara ko chibumbo chiya. 16Kame bantu bonshe bahara o buharo obu, empore ne chishemo zibe nenwe, bulyaho nikwa Isiraere ya Nyambe.

17Kuzwa hanu kwazya ozyu andisese, kakuli ndina e zibata za Jeso ha mubili wangu. 18E chishemo cho Nfumu Jeso Kiresite chibe no ruho rwenu, bakwangu. Ameni.