Jakobo

11Jakobo, omwika wa Nyambe newa Nfumu Jeso Kiresite, ku mishobo ye kumi ni tobire ikere kunje ya Isilaele: murumere. 2Bakwangu, muzihinde ke ntabo, hamu si liwana mu bukababu bungi. 3Muzyi ye entatubo ye entumero yenu i reta ku kwatisa.

4Musiye oku kwatisa kumanikize o mutendo wateni, kuti ye muhure ho kusepa bulyo kwa Kireste noku tenda omu ashakira muzintu zonshe. 5Kono heba zyumwinya kwenu ashaka butali, abu kumbire kwa Nyambe, ozyo aha ko bungi ozyo ka kalihili bena ba kumbira, mi mbwa muhe.

6Kono akumbire kentumero, nazyi ye mbwamu tabe Nyambe. Kakuli yenshe ozyo akakana afwana mbwe nji kumpesi lyomu wate litimbiwa ku ruho noku twaliwa konshe-konshe. 7Mi ozyo muntu asha hupuli kuti ye mbwa wane chitu kwa Nyambe. 8O muntu wa bulyaho akwesi engana zobire, kakwatisiki muzintu zonshe.

9Musiye ozyo kali wanini ali tembe ke chibaka chakwe chi hanzi, 10kono omukwame ozyo afumite kechibaka chakwe chi dana, kakuli mbwa fwe shina empalisa yomu mutemwa ina mu sozu. 11Kakuli ezyuba liñatura no kuhisa kwalyo mi lizyumisa e sozu. E mpaliisa yiwa, no burotu bwayo bumana. Kenjira iswana, o mukwame zyo afumite mbwa manine hakati ko musipili.

12Akwesi nfuyauzi muntu ozyo a kwatisa mu nako ye miliko. Kakuli shaka na mane kuwora entatubo, nara wana o mushukwe wo buharo, owo niwa sepiswa kwabena bashaka Nyambe. 13Kwasabi omuntu ena mu miliko ozyo ata ye, "Ndi Nyambe andi lika," kakuli Nyambe kalikiwa ku chibi, mi kame neye ka liki muntu.

14Kono muntu yenshe a likiwa kuya ke ntakazo yakwe, imu kokorora noku muhomenena. 15Cware hai si paka entakazo, ireta e chibi. Mi aho shi chakuli hawa e chibi, chireta efu. 16Bakwangu bashakiwa, mwasha homenenwa.

17Empo ndotu ne mpo irukite izwa kuwiru. Ikezya hanshi kukazwa ku Shi wa mamuni. Kwakwe kwazya kuzoka kapa o munzure kebaka lyoku zoka. 18Nyambe na liketera kutu reta ke zywi lye niti, kuti ye tube mufuta we ziyangantu zama tatikiro kuzintu zonshe ezi na tenda.

19Muzizyi ezi, bakwangu bashakiwa: kube ye muntu yenshe ahwere ku kushuwa, noku liyeha ku kubenga. 20Kakuli hasi benga o muntu kawoli kutenda musebezi wo kuchena kwa Nyambe. 21Mi cware mu zwise masira e chibi onshe no bungi bo bubbi. Muku li bozekeza hanshi mutambure ezywi elyo nilya byarwa, elyo liwora ku haza o myuzya yenu.

22Mube batendi be zywi kali bashuwi bulyo, nemu lihoma. 23Kakuli heba muntu mushuwi we zwyi kono kali mutendi, afwana mbwe o muntu zyo atonda echifateho chakwe mucimboni. 24Ali tonda mo mi cware azwa ho noku yenda mi haho bulyo azibara omu afwanina. 25Kono o muntu ozyo atonda nenja mu murao murotu we ntukuruho, mi azwira habuso kutenda bulyaho, kali kuba bulyo mushuwi ozyo azibara, ozyo mukwame mbwawane enfuyauzi mu zitendantu zakwe.

26Heba muntu ali hinda ye ngwe ntumero, kono heba kamameli o rulimi rwakwe, ahoma mozyo wakwe, mi nentumero yakwe yazya ntuso. 27E ntumero yichena yazya masira habuso bwa Nyambe ne Shwetu nje yinu: kutusa ba azya beshwabo naba nfwirwa mu kushanda kwabo, noku ki chenesa ku fasi.

21Bakwangu, mwa shakali ne ntumelo kwa Nfumu Jeso Kreste, Nfumu we tubo, nemu sharura bantu. 2Tuteye zyumwinya akezya kukabila mu mukopano nazwesi sale lye gauda ne zizwato zi rotu, kame ku kabira mukwame wo njebwe mu zizwato za masira. 3Haiba mutonda o muntu a zwesi zizwato zirotu no kutaye, "Mukare ha chibaka chirotu," kono nokuta mukwame wo njebwe, "Ewe zyimanine kwina," kapa, "Kare kuma tende angu," 4kamuli atuli mukati kenu? Kali shemwa kali baatuli kemihupulo mibbi?

5Muteeze, bakwangu ndishaka, nga Nyambe kali nia shara babotana bo mufasi kutiye bakale ba fumu noku jobola mubuso wa Nyambe wina niwa sepiswa kwabena ba mushaka, 6Kono nimwa bulisa ekute babotana! Ye kali bafumi kabami lyatilile? Kame kali mbabo niba mitwala kunkuta? 7Kaba tuki ezina ndotu oku mu wira?

8Kono, haiba ni mu bumbiliza mulao o chizo mbwe muntimana, "shake bakwako omo oli shakira" mutenda nenja. 9Kono haiba mushaka bulyo ba mwinya bantu mutenda echibi,Mi omurao umiatula ye muli bacholi bo omurao.

10Yenshe akutika omurao wonshe,kono akwanga nanga munjira yonke, aba nomurandu oku chora omurao wonshe. 11"Wa zywina nata ye, "Washa tendi bushahi," Kame nata ye, "washa yahi."Heba kamu tendi bushahi, kono muyaya, muba aba choli bo murao.

12Cwale muambe nokutenda mbwe mbaa bena aba ni ba aturiwe ko murao we ntukuruho. 13Kakuli enkaturo ikezya kwa azya enshe kwa bena kali niba sunda enshe.Enshe zihita enkaturo.

14Entuso njehi ba kwangu, heba zyumunya ena entumero, kono azya emitendo? Nga ina entumero iwora kumuhaza? 15Tuteye mukwetu kana zwati nenja kame aazya e chilyo mwa lilyo zyuba,, 16Tuteye zyumuinya ata kwabo, "yende kempore, katukutilwe noku kuta." Kono ko muhi ezi zibotele omubili, chinji mwaa tusi? 17Munjira ya bulyaho entumelo aiba, yaazya emitendo ifwiite.

18Tema zyumwinya mbwate ye, "akwesi ntumelo eme ndikwesi zitendantu, "Ndi sunde ntumelo yako yaazya ezitendantu, cware eme mbondi ku sunde ntumelo yangu ke zitendantu. 19Muzumina ye kwina Nyambe yenke, mutenda nenja. Kono nima dimona azumina bulyaho, nokututuma. 20Oshaka ku zyiba, mukwame musiru, entumelo eyi yazya ezitendantu yazya entuso?

21Shwetu Abrahama kali nia bikiwa ozyo arukite ke zitendantu aho niya ha mwane Isaka aka tara? 22Mutonde entumero niya bereka nezitendantu zakwe, mi kezi tendantu entumelo yakwe niya kura hawa. 23Entimana niya libumbiliza ina ita ye "Abrahama nazumina Nyambe mi nabaliwa ozyo arukite." Mi noku kuwiwa mushere wa Nyambe. 24Mubwene kuti ye ke zitendantu muntu atendiwa ozyo arukite, kali ke ntumelo bulyo.

25Munjira yi fwana, Rahaba e hure naa bikiwa ozyo arukite kemitendo, anaa tambura ba vara nokubata ye ba yende e njira yingi? 26tutiye omubili waazya oruho ufwite,ko bulyaho entumelo ya azya emitendo yi fwite.

31Kali mbantu bangi abo baswanera kuba bazyiizi, bakwangu. Tuzyi kuti ye twara wana e nkaturo e nene hawa. 2Kakuli bantu bonshe bakwanga munjira zingi. Heba zyumunya ka kwanga mu ku amba mazywi mabbi, ozyo muntu akulite hawa, awora nanga kuyendisa o mubili wakwe wonshe.

3Hanu heba netu bika e ntoli mukanwa ke nkambe kuta ye itu kutike, tuwora oku yendesa e mibili yayo. 4Muremuhe kuti ye a mato manene, nanga neali manene a timbiwa kuruho rugorete, a yendeswa kuchi rabo echinini konshe oko ashaka o muyendisi wao kuti ayende.

5Kenjira iswana o rulimi chibbamu chinini ha mubili, kono ruki nanuna ke zintu zinene. Mu bone aka liro kanini omu kawora ku yisikiza o mutemwa o munene. 6O rulimi noro muliro, e fasi lye zibbi likere mukati ke zibbamu zemibili yetu. U sihisa omubili wonshe mi no ku bika ho muliro o buharo bonshe. Ndoro rwini rukibika ha muliro ke here.

7Ezi pau zo mu mutemwa zonshe, zizyuni, ziyenda ke bumo, nezi bumbantu zo muwate zikwesi zitengururwa mi kazi tengururwanga kubantu. 8Kono ko rulimi, kwazya o muntu o zyo awora kuru tengurura. Mbubbi bo kabuwoli ku yendeswa, ruzywire omuzwakera uyaya.

9Tutemba o Nfumu ne Shwetu karo, mi tukuta bantu karo, abo niba tendwa mu chiswaniso cha Nyambe. 10Mu muromo uswana kuzwa e nfuyauzi ne chikuto. Bakwangu, ezi zintu kazi swaneli kutendahara.

11Nga eziba lyonke liwora kutira amenji a lyoha nawo a rura? 12Ba kwangu, nga e chikuni che feiga, chi bika olivera? Kapa e chishamu cha manjembele chibike feiga? Kapa amenji e zwai kuba menji a lyoha.

13Ndini atalifite no ku shuwisisa mukati kenu? Mu musiye ozyo muntu a sunde buharo burotu ke misebezi yakwe muku kibika hanshi ko butali. 14Kono heba okwesi o munna urura no kushaka zintu zo mozyo wako, osiye kuki nanuna no kuhoma kurwisa buniti.

15Obu kali mbutali buzwa kuwiru. Kono, bwe fasi, bwazya o Ruho Ruchena, bwa mademona. 16Kakuli oko kwina o munna nechi shaka mozyo, kwina kulyangana ne zitendantu zibbi. 17Kono o butali buzwilira kuwiru buchenete hawa kokutatika, mi ne mpore, kuliketa, kubiraera za bamwi, kuzyura chishemo ne chiyangantu chirotu, kwazya chishweka, nokuba ne niti. 18Mi echiyangantu cho kuchena chi byalitwe mu mpore mukati kabo ba tenda e mpore.

41Kwi zizwa enkani nokusa shuwana hakati kenu? Kali ye zizwa ku ntakazo zenu ezo zilirwisa mukati kenu? 2Mu rakaza mi mwazya. Muyaya noku shaka, mi kamuoli kuziwana. Murwa noku kanana. Mwazya kakuli kamu kumbili. 3Mukumbira mi kamuwani kakuli mukumbira ko bubbi, kuti ye muzi sebelise ku ntakazo zenu.

4Enwe kaba sepahali kwa Nyambe! Kanti kamuzyi ye chilikani ne fasi chitoyo ne Nyambe. Mi cware ozyu ashaka kuba muyenze wefasi alizora e chira cha Nyambe. 5Kapa haho muhupura kuti ye entimana zi amba zintu za azya ntuso, "O Ruho oru nabika mwetu rukwesi hawa muna?"

6Kono Nyambe aha e chisemo chingi, cware e ntimana ita ye, "Nyambe a rwisa balitemba, kono aha chisemo kubena bali bozekeza hanshi." 7Cware mulihe kwa Nyambe. Mukane Diyabulosi mi mbwa butuke kuzwa kwenu.

8Mukezye kumbali ne Nyambe, mi mbwa kezye kumbali nenwe. Muchenese ma anja enu, enwe batendi be chibi, mi mu chenese myozyo yenu, enwe be ngana zobire. 9Muchoke myozyo, mu kumba kumbe, mi mulire! Okusheka kwenu kuzoke kube kuchoka myozyo, ne ntabo yenu izoke ibe ku lishonda. 10Muli bozekeze hanshi habuso bwa Nyambe, mi mbwa minanune.

11Mwasha ambi zibbi kuamana nabakwenu, bakwangu. O muntu zyo a amba zibbi kuamana nomuyenze kapa ku atura muyenze, a amba zibbi kuamana no murao mane a atura o murao. Haiba mu atura o murao, koshibi o mutendi wo murao, kono muatuli. 12Yenke bulyo ozyu aha murao noku atura. Ndeye yenke zyo awora kuhaza nokushinya. Ndiweni we, ewe o atura muyenzo?

13Cware muteeze, enwe mu amba ye, "Shunu kapa zyona mbotu ka kabire mou munzi, no kuka kara mo mwaka, nokuka wulisa, noka tenda mali." 14Ndini azyi ezo shaka nezi tendahare zyona, no buharo bwako chinji? Kakuli oli mume ubonahara kenako endana no kumana.

15Kono, mu ambe bulyena, "Heba ashaka Nyambe, tura hara noku tenda echi ne china." 16Kono hanu mukitemba ke mirero yenu ya azya e ntuso. Okuli temba kobulyaho kubbi. 17Cware ku yenshe ozyo azyi kutenda zirotu kono kazitendi, kwakwe chibi.

51Mukezye hanu, enwe mu fumite, mulire no ku kumba kakuli e shando limi kezyera. 2E chifumu chenu chi borete, ne zizyabaro zenu siza liwa ku maharantene. 3E gauda ne chilivera zenu sezabi ne ngura. E ngura yazo yaraba bupaki bumi kwata. Yara mana mibili yenu mbwe muliro. Mubikire zi chifumu chenu ku ma manikizo a mazyuba.

4Mubone, aa nga masheleni aba bereki benu- a masheleni aya nimwa kwatira aba niba zyangura mawa enu. Mi echiliro chaba zyanguli nichaka shuwahara mu matwi o Nfumu atu rwira. 5Nimwahara nenja mu fasi nokuli kora. Nimwa nunisa e myezyo yenu mu zyuba lyoku yaya. 6Ni mwa atura no kuyaya o muntu a rukite. Kali na kana.

7Mulikete, bakwangu, mbita nakezye o Nfumu. Mutonde, ozyo alima alindira kuzyangura nenja mwibu. A lindira nali kekete, mbita zishiwana onvura wo kujora niwa mamanikizo. 8Nenwe, bulyaho, mulikete. Mugore myezyo, kakuli okukezya ko Nfumu kwina hafwihi.

9Mwasha biraeli, bakwangu, kulizokera, koti ye ne mureke ku atuliwa. Muwene, muatuli azyimene ha chizyi. 10Muhinde mutara, bakwangu, kuku shanda no ku gora myezyo kwa ba porofita, aba kawamba muzina lyo Nfumu. 11Muwene, tu hinde bena niba kwatisa ye ba fwiyawirwe. Nimwa shuwa ze shando lya Jobo, kame muzyi no butokwa bo Nfumu, buti a nfwira enshe ne chishemo.

12Hawiru lyezi, bakwangu, mwasha fwizyi, ke wiru ne hanshi, kapa koku konkeswa. Shali bulyaho, Oreke o "Kuzumina" kwako ibe "Kuzumina" kame "Kukana" kwako ibe "Kukana", koti mwaha gwili munkaturo.

13Kwina zyumunya kwenu a kere mushando? Mumu reke a rapere. Kwina zyo a boterwa? Mumu reke a zyimbe njimbo ze tubo. 14Kwina zyumunya kwenu a rwara? Mumu reke a kuwe bakuru be nkereke, bake bamu raperere. Bamu singe mafuta muzina lyo Nfumu. 15E ntapero ye ntumero ihoza murwere, mi no Nfumu mbwa mubuse. Heba na tenda zibbi, Nyambe mbwa mukwatire.

16Muwambe e zibbi zenu ku bayenzenu, mi muli raperere, koti ye muholisiwe. E ntapero yo muntu a chenete i gorete hawa mu mitendo yayo. 17Eliya kali muntu mbo ndiswe. Na rapera cho buniti ye onvura asha shoki, kame kali na shoka mu chishi ke myaka yo tatwe ne myezi ye anja ni konke. 18Kame Eliya oku rapera kame. E wiru lyoku tira onvura, mi nefasi lyoku reta eziyangantu.

19Bakwangu, heba zyumunya kwenu azwa mwi niti, zyomunya aku mutengurura, 20ozyo muntu azyibe ye yenshe ozyu a zora ozyo a tenda zibbi kwi njira zakwe mbwa muhaze kurufu, mi mbwa zike e zibbi zingi.