IVUUKA YE INGOLO LYA JUDE

11Jude, muhikaana wa Jeeso Kirisiti, mane nne mwaanche wa Jaakovo, kwaavo va jolweezwa nne Ireeza Isheetu, nne ku viikwa mwa Jeeso Kirisiti, mane nne ku sumpwa. 2Insee nne ikozo nne irato, zi njisiwa kweenu.

3Vasakwa (vasunitwa), chiinga nne kala choku nahana kuti nni mungolyere choku hazwa ku iziveenkeene, ku vaalyi ku swanera kuti nni mu ngolyere, mane nne ku mu susuweza kuti mu woolye ku tatavalyera itumero yi vaati nni yaa heewa vaana ve Ireeza va jolola. 4Ka kuti kwiina vantu vamwi vee injiire choku saa lyemuseha mukati keenu. Aavo va kwaame va vaa watulwa kalye. Vakwaame va sa zumini mwe Ireeza, va sandula inse ye Ireeza cho kuva mu vusaangu, mmi cho kulyi sampula Simwiine Ireeza, Jeeso Kirisiti.

5Hanu lyiinu nni mu kumbulusa - nangati mu veezi iichi - iiye Ireeza, choku vuluka vaana va Isiraere ku zwa kwa Igepita, chiinga azwa aho choku ihaya voonse va seena va vaalyi ku zumina. 6Mmi mane nne mangiloyi oonse a sana a vaa woolyi kulyi woonda maziimo awo, mmi choku kazwa ku vuikalo vwaao, Ireeza a vava sumiine che chain, mu keerima ku lyiindira izuva ikaando lye ikatulo.

7Mane siina Sodoma nne Gomora, nne mizi yoonse yi va va zimbulukiite, cho kulyi siiririra mu vusaangu, mbwiita nni valyia nne inyama yi saa shiyeeme.Vava vwiikwa vuti kuti vave chishupo ku veena ha teni va vaa woolyi ku watwiirwa nne ku nyandira zivi zaavo cho mulyiro wu saa kosoki. 8Cho kuswana vulyo, nneezi zilootesi ziizwiire ikwe zilyi sinya miviri nne kulyi tokomolosa ku hala neenza, choku waamba vuvi zintu zi kutekeha.

9Nniha kuva vulyo Mikaere ingiloyi ikaando, choo hondaana nne Javulusi cha vaalyi kulwiira muviri wa Mushe, keena ava mutuki mbwiita vulyo kucho kuti, "Simwiine aku kalyimere." 10Mmi aava vantu va waamba cho vuvilaala zintu zi va seezi. Mmi iizo zi veezi - siina iiri zinyoolozi zi saa nahani mmi nni ziizi chi tambulyesehala - iizi nje ziintu ziva ve ihayi. 11Ku mayivite aavo! Ka kuti va yeendete mu inzira ya Kaine, mane choku shashookera mu inzira ye indisisa ya Balamu yo vufosi kuti va woolye ku waana ituwero. ku zwaaho choku fwiira muku saka ku waana kwa Kore koku suna ku kanana.

12Aava vavoo valyi wuungwire saka a hulu ku iziviswa mu mikiti ye zishemo, chi valyia nnaanwe, nni valyia nni va seena kutiya: Avo makope a seena invula, a hinditwa vulyo nne luhuho. Zisamu za mazinza zi seena ziihantu - zi fwiire koo vere, nnizi nyukwiirwa cho mihisi. 13Masuunda e iwate a tiiza, ee kala nni a toondeza maswavi aawo. Inkaani zi see keere, iizo zi viikirwa keerima ka siiha ka seti nni ka mana.

14Mmi nne Inoke naaye, woku mana iyaanza nne toovere kuzwa kwa Adamu, aa vaati nna porofita cha haavo, nnati, "Mulolye! Ireeza u keeza nni va jolola veena miyaanda miyaanda yiina ikumi. 15U keeza ku watula voonse. U keeza ku kumbulusa aavo va seena Ireeza muva valyi ku chita zoonse ziva vaa chiti choku fosahala, kwaavo mane nne ku waamba kwaavo ku panga vuvi mane nne mu vava mu waambisa cha teni. 16Aava vantu vee kala nni va vireereereere, nne ku saa lyi tumera, va yeenda cho kuya cha maikuto aavo, mane nne tulomo twaavo tu waamba zinti zikaando nne manzwi aka zimbite, nni veena kulyi chita vantu va shiyeeme kuti va woolye ku ziyeza vantu vamwi.

17Mmi uunwe vasunitwa, mu kumbulukwa manzwi a vaa waambwa nne vaapositoloyi kalye kaha Jeeso Kirisiti Simwiine weetu. 18Vava mucho kuti, "Mu mazuva ama manimani ka kuve nne vantu va shewunwiina nni va yeenda mu inzira zaavo zo kulyi chitira muva saka kuya cho vuhuulye." 19Aava mboovo valyi zwiisa ku vamwi, veena mu inyama, choku saa va mu Luhuho,

20Mmi uunwe, vasunitwa, mulyi zaake mwi tumero yi jojola,mmi mu murapere cho luhuho lu jolola. 21Mulyi woonde nenza mu chisemo che Ireeza, nni mu lyivereere chisemo([inse) cha Jeeso Kirisiti Simwiine weetu yo tu lyeteera vuhalo vu saa mani.

22Mu fwire inse aavo vasa zumini sente. 23Haza vamwi choku va zwisa mu mulyiro. Vamwi vahe inse cho kutiya. Choku toya zizwaato ze inyama nne ikwe lyaazo.

24Lyiinu kwaalyi iiye yoo woola kumu woonda kuti mu siye kulyi wiira vulyo, mane nne kumu twaala nni mu seena mulaandu ha vusu voku jolola, kwaakwe cho vuitumero vukaando, 25kwaalyi vulyo iiye Ireeza yoo talyifite mane nne infumweetu kuve nne ku jolola nne vukaando vwe ikute, ku vusa nne ziho, haaha hanu koonse vulyo mane nne ku saa mana, kuve vulyo.