Mareko

11Anu nje mataangiro a manzwi malotu a Jeeso Kresete, Mwana we Ireeza. 2Sina mu ku ngolyetwa mwi ingolo lyo muporofiti Isaya, "Vone, Ni tumiisa muyenzi we lyinzwi ha vusu vwaako, yeeti a ku shiyamiseza inzira. 3Lyinzwi lyaakwe yoo usumpa neena mu muzuka, " Mu shiyamisa inzira ya Simwiine, mu tamalaza inzira zaakwe."

4Johani a veeza, naa koloveza mu muzuka mane ne ku kutaza che ikolovezo yo ku siya zivilala ne ku wonderwa kwe zivi. 5Chisi chonse cha Judea ne vantu vonse va Jerusalema va va zwiiri kwaalyi. Va vaa kolovezwa naaye mu lwiizi lwa Jorodane, ne va lyi wamba zivi zaavo. 6Johani a vaa zweete uvaaki wo vooza vwe ikaamera naa lyi sumiine ibanti lye chikavi mu imunda mane naa lya impanse ne vuuchi vo muzuka.

7A va wambiri kwii wulu naati, "Ku keeza mukaando kwaangu,u ni saa lyikene mane ne ku chuntama kuti ni sumunune tukwere twe insangu zaakwe. 8Ime ni va mu koloveza cha menzi, lyinu iye ukeeza ku mu koloveza che Luhuho lu Jolola.

9Mwaawo mazuva ni kwa chitahala kuti Jeeso a ka zwe kwa Nazareta mwa Ghalaliya neeza ku kolovezwa ne Johani mu lwiizi lwa Jorodani. 10Jeeso choo zwa mu menzi, ava voni iwulu lyii iwuka mane ne Luhuho ni lu sukira mwaalyi ni lwiina mu chiswano che inkuva. 11Lyinzwi ni lyaazwa mu iwulu, "U Mwaanaswiisu Waangu yoo sunitwa. Ni saanga ahulu mwaako."

12Ku zwaaho Luhuho ni lwa mu kwiitira mu muzuka. 13A veena mu muzuka makumi oo nne a mazuva, naa lyikwa ne Saatani. Mu muzuka a veena ne zinyolozi ze inkanda, mane mangiloyi ni va mu tendera.

14Lyinu Johani (wo ku koloveza) chiinga wondwa, Jeeso a veeza mwa Ghalaliya naa wambira kwii iwulu manzwi-malotu e Ireeza, 15mane naati "Inako chi yee izuzirikizwa, mane ne muvuso we Ireeza wiina ha fwihi. Musiye zivilala mu zumine manzwi a jolola."

16Mu ku yeenda he mbalyi -e iwate lya Ghalaliya,naa vona Sayimoni ne Enduru mwanchaa Sayimoni ne va sohera tunyandi twaavo mu iwate, mukuti va vaalyi vayambisi. 17Jeeso naa vacho kuti, "Mwiize, mu ni ichirire, mane mu ni mu chite vawoonzi va vantu." 18Mane ho hwaaho, va vaa siyi tunyandi twaavo che ku mu ichirira.

19Mu ku yendendera havusuzana, Jeeso a vaa voni Jemusi mwaana a Zebediya ne mwanche Johani, ni va wandera tunyandi mu vwaato. 20Ava va sumpi mane ni vaa siya Ishaavo Zebediya ne vahikaana vaavo mu vwaato, aa vo che ku mu ichirira.

21Va vee njiri mwa Kaperaname, ku zwaa a ho lwe Insavata Jeeso ne njira mwi Isinagoge che ku ruta. 22Va vaa komokerwa murutiro waakwe,mukuti a vaalyi ku va ruta sine iri muntu we chizimo chii- na he iwulu ku zamba varuti vakaando vo mulawo we chiJuda.

23Mane ho hwaaho mukwaame mwii Isinagoge yaavo a veena luhuho lu sa jololyi a vaa lyiriri ku iwulu, 24naati, ´´Tu chite nzi chaako,Jeeso wa Nazaretha? U ke izirire ku tumanininisa? Ni kwiizi, Njoowe yoo Ujolola we Ireeza!" 25Jeeso a va kalyimeri idimona naati, ''Tontolye u zwe mwaalyi!'' 26Luhuho lo sa jololyi ni lwa mu sohera hansi chi ku zwa mwaalyi ni lu lyira che lyinzwi lyi na ku iwulu.

27Vantu vonse ni vaa komokwa, mane ne ku lyi vuuza mukati kaavo ni vaati, "Chintunzi ichi? Ituto inhya ya maziimo ena he iwulu? U kalyimera inhuho imbilala mane zi mu teeka!" 28Lyinu lyinzwi ka haakwe nchi lya zuweeka mu chisi chonse che nkanda ya Ghalaliya.

29Chiinga vaazwa mwi Isinagoge, va veeza kuinjira mu inzuvo ya Sayimoni ne Enduru ni veena ne Jemusi ne Johani. 30Nnyina-zala-a-Sayimoni a vaa lyeere naa lwaala ifiiva, Jeeso naa lwiirwa chaakwe. 31A veeza, cho ku mu wonda che iyanza, cho ku mu vuusa; ifiiva che ku zwa mwaalyi, mane naa taanga ku va yumbula.

32Ulo luzuva chitegwana ,izuva ha lye imina, nchi vaa lyeta valwere kwaalyi ne va ve njirwa inhuho za madimona. 33Muzi -mukaando onse u veeza ku kungana ha mulyaango. 34A va siriki vunnginngi vwa vantu va matuku a siyenesiyeni ne ku zwisa madimona mu valyi, mmi cho ku saa zuminina madimona kuti a wambe mukuti a va mwiizi.

35Ha kusasani ahulu, kusiri ku luunza, a vaa zwiiri ku seena vantu cho ku ka chencherera kwa teni. 36Sayimoni ne vamwi vaa veena naavo che ku taanga ku mu saka. 37Chinga va mu wana cho ku mu cho kuti, ''Umwi ne umwi u ka vu ku saka."

38A vaa wambi naati, ''Tu yendere ku mizi i tu vaambene naayo, ni ka hase lyinzwi kwa teni. Nje musevezi u va ni lyeeti hanu''. 39A va yendendi konse konse mwa Ghalaliya, naa kaya vu hasa lyinzwi mu ma Sinagoge aa vo ne ku zwisa inhuho za madimona mu valyi.

40Mulweere we chiseenda a veeza kwaalyi. Naa fuukama naa mu kuumbira nati ''Chokuti ku suna kwaako, u woola kuni joloza." 41Cho ku mu fwira inse, Jeeso naa wolola iyanza lyaakwe che ku mu wonda naati, "Ni saka,Jololye." 42Ho hwaaho vulyo chiseenda cho ku zwa mwaalyi mane naa jolola.

43Jeeso naa mu lwiiririra cho ku koza mmi naa mu hulula kuti a yende. 44Naa mu cho kuti "Sanzi noo ka lwiiri vantu, mmi yende, u ka lyi tondeza ku mupurisiti mane ne ku ka zwisa ineo yo ku jolozwa kwaako kuya cha Mushe mwa va laolyi, ku chitira vupaki ku valyi.

45Mmi iye naa yenda cho ku ka lwiira vantu vonse ne ku patalaza lyinzwi ni kwaa manina lyinu Jeeso na sa si woolyi kwii njira mu muzi mukando na susuluhite. A va manini choo kaya vwi kala mwa wola kuva yeeyena mmi vantu aa vo ni ve kala ni veeza kwaalyi ni va kazwa kumwi ne kumwi.

21Chiinga kwaa mana mazuvazana, a va ka voolyi kwa Kaperaname vantu nni va zuwa kuti kweena ku muzi. 2Nni kwaava nne ikuunga lya vantu mu ku vaa shaalyi ka kwiina chivaka chiikere vulyo ku hindiriza vulyo nne ha mulyango , Jeeso nna woola ku wamba naavo lyinzwi.

3Lyiinu vankosi voonne va va keeza kwaalyi nni va ka lyetete unkosi yoo fwire imwi imbalyi. 4Chinga va vona kuti ka va woolyi kwi njira ha mulyaango, va va ka wumbutulyi chituwa che inzuvo, nni va woola ku susikiza haansi mumbeta wo unkosi yaa va fwiire imwi imbalyi.

5Jeeso chiinga vona kuzumina kwavo na cho unkosi yaa ava fwiire imwi imbalyi kuti, "Mwaanaswiisu wangu, zivi zaako chi zaa wonderwa." 6Lyiinu Vangolyi va ve ikere aho ni vaa tanga ku lyi vuuza mu inkulo zaavo, 7Uuzu unkosi u waamba vulye? U tukana! Njeeni yoo wiila ku woondera zivi kwaanda Ireeza?''

8Jeeso a veezivi mu luhuho lwaakwe kuti ava vantu va vaa zeezete nzi. Naa va cho kuti, "Chinzi ha mu zeza vulyo mu nkulo zenu? 9Chihuva chinzi ku cho uzu unkosi yoo ufwire imwi imbalyi, 'Zivi zako chi zaa wonderwa' nandi ku cho kuti 'Ziime, u hinde mumbeta wako, mane u yende'?

10Naa cho unkosi yoo ufwire imwi imbalyi kuti, 'Mwi izive kuti Mwaanaswisu wo Mukwame u herwa ziho zo ku wondera zivi.' 11''Ni ku cho kuti, zime u hinde isasa lyako u yende ku inzuvo yako.'' 12Ho hwaaho naa zima chi ku hinda isasa lyakwe chi ku zwa mu inzuvo ha vusu vo umwi no umwi mu va va shaalyi va komoketwa, ni va temba Ireeza, mane ni va cho kuti, ''Ka twiini ku vona chiswana nee ichi.

13Naa zwa chi ku yendera kwi ikanda lya menzi, ikunga lyonse ni lya mushaala mu masulye, naa va lwira lyinzwi. 14Ivaati choo hita, naa vona Levi mwana swisu wa Alufeyasi ne ikere he itante yaa yoo hinda mitero naa mu cho kuti ''Ni shaalye mu masulye.'' Naa ziima chi ku mu shaala mu masulye.

15Ivaati Jeeso cho kweete ku lya mu nzuvo ya Levi, vahindi ve mitero ne va izwiire vuvilaala va vaa alyi ku lya ne Jeeso ne varutwana vaakwe, ka kuti va va musheere mu masulye va vaalyi vaangi. 16Vangoolyi va vaalyi MaFarasayi chiinga vaa vona kuti Jeeso u kweete kulya ne vapangi ve zivi ne vahindi ve mitero, va va cho varutwana vaakwe kuti, ''Chinzi haa lya ne vapanga vuvilala ne vahindi ve mitero?''

17Jeeso chiinga a zuwa a vaati ''Vantu vakolyete mu muviri ka vasaki inganga, va lwaala nji va isaka. Ka heena ni va iziri ku sumpa vantu va shiyeme, mmi ni va iziri vapanga vuvilaala''.

18Varutwana va Johani ne va Farasayi va va lyi nyimine zilyo, Mmi vantu ni veeza kwaalyi chi ku mu cho kuti ''Chinzi varutwana va Johani ne varutwana va va Farasayi ha va lyi nyima zilyo vaako avo ne va sa lyi nyimi zilyo?'' 19Jeeso a va va cho kuti ''Aa vantu va izite ku iseso va wola ku lyi nyima zilyo, kamwalye wo mukwaame naa siina naavo?'' Ku vona va siina ne kamwalye wo mukwame keti chi va lyi nyima zilyo.

20Mmi lyiinu ka kwiize mazuva a chita kuti kamwalye wo mukwame ka hiindwa mukati kaavo, aho njeti ni va woolye ku lyi nyima zilyo. 21Ka kwiina muntu yo woola ku lukira chijira chihya ha chizavalo chikulukulu, cho kuti njo vulyo chigamba chi woola ku haluka, chihiya mu chikulukulu, cho ku va ne igamba ivilala.

22Ka kwiina muntu yoo wola ku viika vujwara vu hiya mwi ikavi lyo vujwara lyi kulukulu, ha kuva vulyo vujwara vu wola ku patula makavi mmi vujwara ne makavi zonse cho ku fwa. kwanda o vulyo, viike vujwara vu hiya mwi ikavi lyi hiya lyo vujwara.

23Luzuva lwe Insavata Jeeso a vaalyi ku ya vu yenda mu luwa lo mundalye, varutwana vaakwe ni vaa tannga ku ya vu chera mundalye. 24VaFarasayi ni va mu cho kuti ''Vone, chinzi ha vaa chita chintu chi sa zumininwa lwe Insavata?''

25Naa va cho kuti '' Aa kena mu vaa valyi kuti Dafita a va chiti vulye choo lyi vulyite na fwire inzala- iye ne vakwame va veena naye- 26mwaa va injiri mu inzuvo ye Ireeza Abiyathari naa lyi Mupurista, cho ku ka lya chinkwe chi jolola, chi sa lukere ku lyiwa umwi no umwi kunze lya mapurisita, mane naa ha ne vaa vena naavo?''

27Jeeso naa cho kuti "Insavata iva pangirwa muntu, kwanda muntu ku pangirwa inSavata. 28Lyinu, Mwana Swisu wo Mukwame nje iye Ireeza, konse ne we Insavata."

31Mmi hape nne njira mwi Isinagoge mu veena unkosi ya veena iyaanza lyi nyonyoveere. 2Vantu vamwi nniva chuuta ku vambana naaye ku vona kuti mwa hoze lwe Insavata ku chitira kuti woolye ku muvona mulandu.

3Jeeso nna wamba nne unkosi we iyaanza lyi vaa nyonyoveere'', Zimee aha mukati ka vantu voonse". 4Ku zwaaho nna wamba nne vantu, A kwiina kaha mulao ku panga vulotu luzuva lwe Insavata naandi ku horofaza, ku haza, naandi ku ihaya? Mmi nni va tontola.

5Nna lola imbalyi zoonse nna vengete, mmi nna sasamiswa nne ku zuminina inkulo kwaavo, mane nna cho unkosi, wololye iyaanza lyaako. Nna lyi wolola, mmi iyaanza lyaakwe nni lya voola mu maziimo sakata. 6Vafarasayi nni veena Heroda cho ku zwira haanze ku voona kuti va voola ku mu ihaya vulye.

7Jeeso nne varutwana vaakwe, nni vaaya ku iwate, mmi ikuunga lya vantu vaangi nni lya mushaala mu masulye kuzwa kwa Ghalaliya nne kuzwa kwa Judiya 8nne kuzwa kwa Idumiya mane vulyo nne ku zaamba Jorodani nne ku zimbuluka Tiyere nne Sidona. Chiinga va zuwa zintu zaa vaalyi ku waamba, vuungi vuungi vwa vantu nni vweeza kwaakwe.

9Mane nna kumbiira varutwana vaakwe kuti va mu vakanyeza vwato vu niini che ivaka lya vantu vangi, ku chitira kuti saanzi va mu lyaatoolyi. 10Ka kuti a va hoza vangi muku vaku chita kuti zumwi ne zumwi ya veena ku katazeha nna mu chuutira kuti a mu wonde.

11Kumwe nne kumwe vulyo Inhuho imbilaala kuzi valyi ku muvona, zi vaalyi ku wiira haansi ha vusu vwaakwe choku huwa, nni zicho kuti, u mwaanaswiisu we Izeera." 12Nna zi kalyimera kuti saanzi zi mu izivisa ku vantu.

13Naaya ku iwulu lye iruundu, choku sumpa vaa vaalyi ku saka, mmi nni veeza kwaalyi. 14Nna sala veena ikumi ne toovere (vaa vaati nna suumpa va Apositoloyi) kuti va woolye kuva naaye mane nne kuti ava tume kuka waamba mulayeza, 15nne kuva nne ku laula koku zwiisa madimona. 16Mmi nna sala veena ikumwe nne toovere: Sayimoni, iiye waa vaahi izina lya Pitorosi;

17Jemusi mwanaswiisu wa Zebediya, nne Johane mwacha Jemusi, iiye waava hi izina lya Boanerigesi, lyi landununwa kuti vaana vo ku tiimba; 18nne Enduru, Filiipi, Batholomiyu, Mateu, Toomasi, Jemusi mwanaswisu wa Alufeyaasi, Thaddaeusi, Sayimoni wee impuupu 19nee Judaasi Isikariyota, yaa vaa keeza kuku muwuza.

20Mmi nna ya ku irapa, mmi ikuunga nni lyeeza ha mwiina, mu va vaalyi kusa woola kulyia zilyio. 21Lyiinu vee irapa lyaakwe chiinga va zuwa kaha iichi, nni va yeenda kuti vaka mu hiinde, ka kuti va vaacho kuti, cha zoverwa kuzeeza.'' 22Va ngolyi va zwa kwa Jerusalema nni vaacho kuti, " Wi njiirwa Baluzebule," mane, "U zwiisa madimona cha simwiine wa madimona."

23Jeeso naa va suupira kwaalyi choku wamba naavo che ingulyi naati, "Saatani u zwiisa vulye Saatani? 24Mmi haiva muvuso nni ulyi sandukira uuwo wiine, uuwo muvuso keeti chiwu ziima. 25Haiva inzuvo ilyi sandukire iiyo yiine, iiyo inzuvo keeti chiyi ziima.

26Haiva Saatani wa ziima iiye mwiine cho kulyi sandukira, keeti cho woola kulyi zimanina, mane wiizi cha a sika ha kumana. 27Mane ka kwiina yo woola ku injira mu inzuvo yo unkosi yo kolyete choku yiva zivyia zaakwe kwanda kuti a sumine yoo yoozu mukwaame piri, mmi ku zwaaho nje cha woola kuiva.

28Cho vusakusima nni mulwiirite, zivi zoonse kazi wonderwa vaana va vantu, mane nne kutukana koonse kuva tukana, 29mmi zumwe ne zumwe yeeti nna tuke luhuho lu jolola keeti na wonderwa, mmi wiina mulaandu we chivi chi saa mani." 30Jeeso nna wamba vuti ka kuti va vaalyi kucho kuti wiina luhuho luvilaala."

31Mmi lyiinu va nyina nne va mukulwe nni veeza ku ziima haanze. Nni va tuminina vantu, kuti vaka mu suumpe. 32Mmi nni kwaava nna zimbulukitwa vantu vaangi, vava mucho kuti, "Va nyoko nne va mukulwaako veena haanze, mane keete vaku ghana."

33Mmi nna ve tava kuti va mayo nne va mukulwaango nja vahi? 34Na lola ikuunga lyiva mu zimbulukite cho kucho kuti, "Vone, aava nje va mmayo nne va mukulwaangu! 35Mmi lyiinu zumwe nne zumwe yoo panga ku suna kwe Ireeza, uuzo muntu nje mwaachaangu, nne nchiishjaangu, nne va mmayo."

41Mane naa taanga ku wamba manzwi ku imbalyi iwate. Mmi ikuunga lya vantu vaangi nni va mu zumbulukite, mmi ne njera mu vwaato vu veena mwi iwate cho ku ikala. Ikuunga lya vantu vaangi nni ve ikala he iriizo. 2Mmi naa va lwiira ingulyi, mmuku va ruuta kwaakwe,

3Mu teeke, mulyimi a va yende ku vwaala intaanga zakwe. 4Cho si vwaala, ziimwi ntaanga ni za wiira mu inzira, mmi zizuni ni ze za che ku lya intaanga. 5Mmi ziimwi ni za wiira mumangomwe ku sena ku veena ivu lyingi. hoo hwaa ho cho ku mena, ka kuti ke na ku veena e ivu lyingi.

6Mmi e zuuva chiinga lyaa zwa, zi va hiyi, ka kuti ke na zi veena mihisi, ni za mamina chi za zuma. 7Mmi zimwi intaanga ni zaa wiira mu mwiya. Zisamu zo mwiya chiinga za kula cho ku tutumiza intaanga, cho ku kangwa ku zwiisa zihaantu.

8Zimwi intaanga zi va wiire mo shiyeme ni za taanga ku viika zihaantu chii zi kweete ku kula, mane ni zee njiha, zimwi zii vaa viiki too nne, kumana iyaanza mane zimwi kumana iyaanza ne kaamwiina, zimwi mwaanda." 9Mane naava cho kuti, " wiina matwi o ku zuwaa, a zuuwe."

10Mmi Jeeso cho wiina ye yeena, va veena ha fwihi naaye ni veena ikuumi ne too veere va vaa mu vuuza che ingulyi. 11Naa va cho kuti, "Uunwe mu heerwa zi lyi wunngwiire zo muvuso we Ireeza. Kwaavo veena hanzee chimwi ne chimwi ingulyi, 12ka kuti ha va loola, vusakusiima va loola, mmi ka va voni, ne ku zuwa va zuwa, mmi ka va zuwisisa, cho kuti chiintu va woola ku sanduuka mmi Ireeza o va wondera."

13Mmi na vaa cho kuti, "Mane mu zuwiisiiza iyi ingulyi? Mmi lyinu mu mu zuwiisiiza vulye zimwi ingulyi? 14Mulyimi yoo vwaala intaanga njeye njo vwaala manzwi. 15Zimwi nje izo zi wiira he imbaalyi ye inziira, ha va vwaalwa lyinzwi. Mane ha vaa lyi zuuwa, Cho vuhweeru Saatani wu iza cho ku hinda lyiinzwi lyi va vwaalwa mu vaalyi.

16Mmi ziimwi njeezi zi va vwaalwa mu ma ngomwe, njaava, ha vaa zuwa manzwi, hoo hwaa ho va lyi tumbula cho ku sanga. 17Mmi ka ziina mu hiise mwaazo, mmi cho ku lyi kataza inako infwiihi. Lyinu milyiko ne ku nnyaandiswa ziiza che ivaka lye lyinzwi, kuzwaaho cho ku chuunchuuna.

18Mmi ziimmwi njezi zi va vwaalwa mu miiya. Va zuwa manzwi, 19mmi va suuni ze inkanda, inziyezi zo vuhumi, kutavera zintuzana ku injiira cho ku diinka lyinzwi, mane cho ku sa haa. 20Mmi kwiina ziina zi va vwaalwa mu ivu lyi shiyeme. Va zuwaa manzwi cho ku a tambula mane cho ku zwiisa zihantu: vamwii makuumi oo taatwe, mane vamwi makuumi a mana iyaanza ne lyimwiina, mane vamwi mwaanda."

21Jeeso na va cho kuti, mmu woola ku lyeeta ilambi mwi nzuvo cho ku lyi viika mu itundu, nandi ku ikonde lyo mumbeta? Uu lyi lyeta cho ku lyi viika ha me kalyiro e ilambi. 22Ka kwiina chi lyi wongwire cheete ne che vulye ku izivwa, Mame ka kwiina chipiri cheeti ne chi vulye ku izivwa. 23Mmi wiina matwi o ku zoowa, mu siiye a zuwee!"

24Na va cho kuti," mu teeke ahulu ku zi mu zuwa, chilyikanyiso cho lyikanya chaacho, ko lyikaanywa chaacho, mmi ko wererwa. 25Mmi wina, kwa kwee ka heewa vuungi, mane ya seenna, kwaalyi ka hindirwa nne che nna naacho ."

26Mmi nna cho kuti," Muvuso wee Ireeza u kola unkosi a va vwaalyi intaanga mu lu kaanda. 27U laala masiku cho ku vuuka chi lyaazwa, mmi intaanga zi mena mane cho ku kuula, mmi na seezi kuuti vulye. 28Inkaanda iviika zilyo ka vuhayo: Kutaanga ikova, kuzwaaho zihantu, mane nne vuheka mu zihantu. 29Mmi lyinu zihantu ha zivuzwa cho ku hueera u tuminiza ijeekiso, ka kuti ku siinza chikwaa sika."

30Mmi na va cho kuti," Tu woola ku swanisa vulye muvuso wee Ireeza, naandi tuu woola ku tendesa ihii ingulyi ku taarusa? 31Ku kola lutaanga lwe mustard, chi luu vweerwa, nje lutaanga lu ninni ku zamba zonse mu nkaanda. 32Mmi, ha zii vwaalwa, zii kula mane cho ku zaamba zivwaalo zo mu luuwa, zii panga mitavi mikando, kuti tuzuni twee wuluu tu pange zizumbo mu minzunde yaacho."

33Che ingulyi ziingi zi swaana neyi a va wambi manzwi ku valyi, ku voona va vaalyi ku woola ku zuwisisa, 34mmi ka hena a va wambi navo ne ku sena ingulyi. Mmi cho wina ye yeena, nna tarusa chimwi ne chimwi ku varutwana vaakwe.

35Uulo luzuva, che lyi minna, na va cho kuti, "Tu yeende ku imbalyi yimwi." 36Ni va siiya inkuunga, mmi nni va hiinda Jeeso ka kuti a ve nna kalye mu vwaato. Maato a mwii a ve nna naaye. 37Mmi ni kweeza kanyuudwe ka vilala mane masunda naa taanga kwi njiira mu vwaato mmi vwaato che ku manina cho vwi izwire.

38Mmi Jeeso i yee a veena kumasulye, nna lyere ha mushaamu. Mmi nii va mu vuusa, ni vaati, "Muruti, ko wiina isipe kuti che tu fwaa?" 39Mmi, na vuuka, nna kalyimera luhuho naati, "Ikozo, tontolye. "Mmi luhuho ne lwa zima, cho ku tontoza.

40Mmi na va cho kuti, Mu tiiya nzii? Nahaanu ka mwina itumero? 41Ni ve njirwa lyoowa lyiingi niva tanga ku lyi cho kuti." Njenni uzu, mukuti nne luhuho ne iwaate lyi mu teeka.?"

51Va veeza kuyimwi imbalyi ye iwate, ku chisi cha Gerasenesi. 2Ivaati Jeeso mwa suuka vulyo mu vwaato, ku vaeeza unkosi yaa valyi ku ka zwa ku makumbu yaa veena inhuho imbilala.

3Uuzu unkosi a vaalyi ku ikala ku makumbu. Ka heena ku va siina a va lyi ku woola ku mu woonda, nandi ku mu sumina che itewu. 4Chaa a vaa sumiinwa kangi-kangi che zihaka ne itewu. Mmi a va pusulyi itewu ne ku chola zihaka. Ka kwiina yaa veena ziho zo ku mu woonda.

5Masiku ne musihalyi wonse ku makumbu ne ku maruundu, a vaalyi ku lyira che lyiinzwi lyiina ku iwulu, mane naa lyi fuunda cha mavwe a cheka. 6Chiinga a vona Jeeso neena chivakazana a vaa tiyiriri kwaalyi, naa ka fukama havusu vwaakwe.

7Naa lyira che lyiinzwi lyina ku iwulu naati, ''Ni pange nzii chaako, Jeeso, Mwaanaswiisu we Ireeza Mu Kaando ku Vonse? Ni ku kumbira cha iiye mwiine Ireeza, siye ku ni sukulula.'' 8Ka kuti a vaalyi ku mu cho kuti, ''Zwee mwaalyi, uuwe luhuho lu vilaala.''

9Naa mu vuuza kuti, ''Njo uwe ini?'' Naa mu itava kuti, ''Izina lyaanngu nje Vunngi-vunngi, ka kuti tu vanngi.'' 10Naa mu kuumbiira kanngi-kanngi kuti kanzi a itumini kunze lye chisi.

11Lyinu ku veena muraka we ziguluve u vaalyi ku lya he iruundu, 12mmi ni ya mu kuumbira, kuti, ''Tu tumine ku ziguluve; mane tu injire mu zilyi''. 13Naa i zuminina; inhuho imbilala ku zwa mwaalyi chi ku injira mu ziguluve, ni zaa ngombola chi ku suuka iruundu che kuu ke injira mwi iwate, ziguluve zoonse zi va ka mini mwii iwate zi vaalyi ku lyikana miyaanda i lyikana makuumi oo uvere.

14Va vaa lyiisiiza ziguluve va va ngombolyi chi ku ka wamba ku muzi mukaando ne chisi chonse. Lyinu vantu vonse ni vaa zwa cho ku yenda kuti va ka vone chi vaa chitahalyi. 15Ni veeza kwa Jeeso chi ku vona unkosi yaa va injiirwa vunngi vunngi vwe inhuho imbilalala, na ikeere haansi, naa zweete, mane naa kwanine mu ingana, vantu ne vaa tiya.

16Va vaa voni chi va pangahalyiri unkosi yaa a va injiirwa inhuho imbilala va va lwiiri vamwi chi va mu pangahalyiri konse ne che ziguluve. 17Ni vaa tannga ku mu kuumbira kuti a zwee mu chisi chaavo.

18Ivaati cho wii injiira mu vwaato, unkosi yaa va iinjirwa inhuho imbilala naa mu kumbira kuti a yende naaye. 19Mmi ka hena a va zuminini ichi, naa mu cho kuti, '' Kwiya ku inzuvo yaako ne ku vantu vaako, u ka va lwiire chaa ava ku chitiri Simwiine ne inse yaa ava ku fwiiri. 20Ava yeendi na ka waamba zikulu cha Jeeso zaa ava mu pangiri kwa Dikapolisi, mmi zumwi no zumwii naa komokwa.

21Ivaati Jeeso chiinga a lutira ku imwi mbalyi, mu vwaato, ku veeza ikuunga ni lya mu zimbuluka, cho wiina ha imbalyi ye iwate. 22Ku veena mukulwaana we Isinagoge, yo u suumpwa Jairasi, a veeza, chinga voona Jeeso, chi ku fuukama ha mateende akwe. 23Naa mu kumbiira kanngi-kanngi, kuti, ''mwaana-kazana wangu cho u fwa. Ni ku kumbiira kuti wiize njo u muviike maanza kuti a holye mane a halye.'' 24Naa yenda naye, ne ikuunga ni lya mu shaala mu masuulye ne lyi chuutiire ahulu mwaalyi ku mu zimbuluka.

25Ku veena mukulwakazi ya vaalyi kwii itiika malaha zirimo zi woonda ikuumi ne toovere. 26A vaa nyaandi ahuulu mane kulyi mu maanza e inganga ziingi naa teendesa chimwii ne chimwii cha veena nacho kuti a holye, kunze lyo kuti a ve ne mazimo malotu chizimo cho ku vihalyira ku vusu. 27Cha va zuwiire cha Jeeso. A va keeza ku masuulye akwe choo ka vu yenda hakati ke ikuunga, na gunka chizavalo chaakwe.

28Ka kulyi a va cho kuti, '' chi na gunka zizavalo zaakwe, mu ni hoolye.'' 29Chiinga mu gunka malaha a va ziimi ku itiika, naa zuuwa mu muviiri waakwe kuti cha hoozwa mu masukuluka akwe.

30Mane hoo hwaaho Jeeso na zuwa kuti inunuho chi ya zwa mwaalyi. Na chevuka mukati ke ikuunga chi ku vuza kuti, ''Njeeni wa ni gunka?'' 31Varutwana vakwe ni va mu cho kuti, ''Ko u vweene ikuunga lyonse ilyi lyi ku zumbulukite, ku zwaaho u cho kuti, 'Njeni wa ni gunka?''' 32Mmi Jeeso na lola-lola kuti a voone waa panga vulyo.

33Uzuu mukulwakazi che kwi iziiva cha mu pangahalyira, a va tiite mbwiiteri na chachalyika. A veeza naa wa ha vusu vwaakwe naa mu lwiira vuniti voonse. 34Naa mu cho kuti, ''Mwaanakazana, waangu kuzumina kwaako chi kwa ku hooza. Yende che ikozo mane u hozwa mu vutuku vwaako.''

35Ivaati cho si wamba, ku veeza vantu va vaalyi ku ka zwaa ku mukulwana we Isinagoge, Ni vaati, '' Mwaana kazana wako chaa fwa. Chiinzi hoo sii kateeza muruti?''

36Ivaati Jeeso chiinga zuwa mu va wamba vantu, a va cho muruti we Isinagoge kuti, ''Siye ku tiya. Uwee zumine vulyo. 37Ka hena a va zuminini umwii no umwii ku musindikiza, kunze lya Pitorosi, Jemusi, and Johani, mukulwa Jemusi. 38Va veeza ku inzuuvo yo mukulwana we Isinagoge naa vona vantu ni va tolyiya ahulu. Ne va lyira ne ku boonda.

39Chiinga injira mu inzuvoo, a va vacho kuti, ''chinzi chi mu sasamiisa inkulo ne ku lyira? ''Uuzu muhuire kaa fwiire mmi u lyeere.'' 40Va va mu seki. Mmi na zwiisikiza voonse kunze cho ku shala ne vesi ne vaanyina muhuire, ne vaa veena naavo, ni ve injira mwaa vena muhuire.

41A vaa hindi iyaanza lyo muhuire naa mu cho kuti, ''Talitha Koum,'' ichii ku cho kuti, ''Miukazanaana ni ku cho kuti, ziime.'' 42Hohwaaho muhuire naa ziima chi ku yenda (a veena zirimo zi woonda ikumi ne toovere). Ni vaa komokwa ahulu. 43A vaa wambi cho ku koza lyinzwi kuti kaanzi va lwiiri vaantu chaa pangahala. Naa va cho kuti va muhe cho kulya.

61Mmi Jeeso a vaa ka zwi kwa teni cho ku ya ku muzi kwa a zwa, varutwana vaakwe ni va mu shaala mu masulye. 2InSavata chiinga yaa sika, a va yendi ku iSinagoge cho ku ka ruta kwa teni. Vungi vwa vantu va vaa zuwi cho ku komokwa. Va vaa wambi ni vaati, "A vaa waani kuhi aa maano?" "Kutalyifa nzi uku kwaa heerwa?" "Zintu nzi izi zi komosa zaa panga cha mayanza aa kwe?" 3"Lyaaho uzu ka heena muveezi, mwaanaswisu wa Mariya, Mukulu wa Jemusi ne Josesi ne Judasi ne Sayimoni? ''Vanchizhaakwe ka ku veena hanu naaswe?" Mmi va vaa nyeezwa ne Jeeso.

4Jeeso naa va cho kuti, " Muporofita kaa vulyi ku kutekwa mbwiteeri mu muzi mwaazwa ne mukati ka vakwantu ne mu nzuvo yaakwe." 5Ka naa a va siri ku woola ku chita misevezi mikaando kwanda o ku vika valweere manza ne ku va hoza. 6Ku saa zumina kwaavo ku vaalyi ku mu komosa. Mmi na yenda mu mizi naaya vu hasa lyinzwi.

7A vaa sumpi va woonda ikuumi nne tooveere cho ku tannga ku va tuminiza vooveri-vooveri, cho ku va ha ziho zo ku zwiisa inhuho zi vilala, 8mane naa va laerera kuti sanzi va hindi chintu mu musipiri waavo kunze lye inkolyi: insinyi chinkwa, nandi chihindizo mane nandi malyi mu mabanti aa vo, 9ne kuti va zwaate insangu mmi va siye ku zwaata zihembe zo uvere.

10Mmi naa va cho kuti, "Ha mu sika he inzuvo,mu ikalyirire heeyo inzuvo mbwiteeri heeti ni mu ka zwiire mwee icho chisi. 11Mmi ha iva kwiina muzi weeti ne u vulye ku mu tambula nandi ku mu teeka, ha kuti che muzwa mu ulyi, mu kunkumune insaangu zeenu ku chitira vupaki ku valyi."

12Va vaa yendi ni va ka vu lwiira vantu kuti va zwe mu zivi zaavo. 13Va vaa zwiisa madimona manngi ne ku hoza vanngi ni va va sinnga mafuta.

14Simwiine Herude a vaa zuwi che izi zintu mukuti izina lya Jeeso chi lyi va izivinkeene kumwi no kumwi. Vamwi va vaalyi ku cho kuti "Johani wo ku koloveza chaa va vuswa mu vafu chingi iizi ziho ze imakazo zi tendete mwaalyi." 15Vamwi ni vaati ''Nje Elija." Ni ku va vulyo vamwi va vaa voolyi ni vaa cho kuti, "Muporofita vulyo,sineeri nje vaporofita ve inako za kalye."

16Mmi Herude chiingaa zuwa vulyo naati, "Johani u ni vaa kosolyi insingo, chaa a va vuswa." 17Mukuti Herude a vaa lawulyi kuti Johani a wondwa cho ku injirikwa muntorongo che ivaka lya Herudiyasi (muka Filipo, mwanchaakwe), Mukuti a va hindi cho ku mu sesa.

18Mukuti Johani a vaa lwiirite Herude kuti, "Ku fosaheere ku sesa muka mwanchaako." 19Mmi Herudiyasi a va nyeezwa iyi indava cho ku iwonda che inkulo naa saka ku mu ihaya mmi ni ku sa wolyeki, 20mukuti Herude a vaalyi ku tiya Johani; a veezi haalyi mukwaame yoo u tamalyere mane naa jolola chinngi a vaa lyi ku mu vavalyera. Nandi ku teeka Johani ku vaalyi ku mu sasamisa ni ku va vulyo a vaalyi ku mu teeka cho ku saannga.

21Ku vaavi ne chivaka cho kuti Herude a chite mukiti wa mazaalo aakwe mwaa va sumpite vasimaziimo, vahitizi ne valaulyi mwa Ghalaliya. 22Inako ye zilyo ze chitengwana, mwaanakazana wa Herudiyasi a veeza cho ku va zaanina mmi naa lyi tumeresa Herude ne veene vaakwe. Simwiine naa cho uzu mukazana kuti, "Ni kumbire chimwi ne chimwi, mmi mu ni chi ku he."

23A vakoonki kwaalyi naati, "Chimwi ne chimwi cheeti u sake kwaangu mu ni chi ku he, ne imbaalyi yo muvuso waangu." 24Mmi naa yenda ku vannyina cho ku ka va vuuza kuti "Ni ka kumbire nzi kwaalyi?" Ni vaati, ''Mutwi wa Johani wo ku Koloveza." 25Hoo hwaa ho, cho ku ka injira kwa simwiine cho ku hweera naa ka kumbiira naati "Mu nihe mutwi wa Johani wo ku koloveza ni wu ka vikitwa mu kasuva ke iwukite."

26Nandi iyi indava i vaa sasamisa simwiine a vaa kangwa ku kaana mukuti a vaa lyi kanite mane ne ku tiya veene vaakwe va veena he itafulye. 27Simwiine a vaa tumi isolye lyimwi mu masolye a kwe kuti lyi ka mu lyeetere mutwi wa Johani. Isolye lyi vaa yendi cho ku ka kosola mutwi wakwe. 28A vaa lyeeti mutwi wakwe mu impulyeeti ku mukazana, mukazana cho ku u twaalyira vaannyina. 29Varutwana vaakwe chiinga vaa zuwa vulyo va veeza cho ku hinda muviri wakwe cho ku ka u wuunnga mu ikumbu.

30maapositoloyi, chi va kungeene ne va zimbulukite Jeeso, ni va mu lwiira zonse zi va va chiti ne zi va vaa ruti. 31Jeeso naa va cho kuti, ''Mu zwiire noonweena ku chivaka chi lyi wungwiire kuti mu woolye ku ka huuza." Mukuti vunngi vwaavo va vaalyi ku yeenda vamwi ni va ka voola, lyinu ka na va veena mane ne chivaka cho ku lya. 32Mmi ni vaa zwa cho vwaato cho ku ya ku chivaka chi lyi wungwiire ku ka va voo voona.

33Mmi vantu vava va voni chi vazwa vamwi cho ku va lyemuha, nni vaa ngombola cha mateende ku zwa mu mizi, yaavo cho ku ka va sikira intanzi ne ku ka kungana ha vusu vwaavo. 34Chiinga vaa sika he irizo cho ku waana ikunnga ikaando, Jeeso chiinga a va lola cho ku va fwiira inse mukuti va vaalyi ku kola imberere zi seena mulyisani. Mmi naa taanga ku va torokera zintu zi nngi.

35Inako chiinga yaa yenda, varutwana vaakwe cho ku iza kwaalyi cho ku mu cho kuti, ''Tu ina mu chivaka chi lyi wungwiire mane ne inako chi ya tu siya.'' 36Va lwiire va yendendere mu mizi ina hafwihizana va ka lyi sakire zilyo va lye."

37Iiye naa va itava kuti, "Unwe mu va he zilyo va lye.'' Va va mu cho kuti, ''Tu woola ku ka va wulyira chinnkwa cha madenarii a lyikana mwaanda yo uvere kuti ze va lye?'' 38A va va cho kuti, ''Mukweete zinnkwa zoo nngayi?'' Mu yende mu ka vone.'' chinnga va va ka waani, va veeza cho kuti, ''Zinnkwa zi mana iyaanza ne nswi zoo uvere."

39A vaa lawiiri vantu vonse kuti va ikalye che zitopazana ha insangani. 40Va va ikalyi mu zitopazana; zitopazana zo mwaanda ne za makumi a mana iyaanza. 41A vaa hindi zinkwa zi mana iyaanza ne inswi zoo vere, naa lola ku iwulu cho ku zi tohonolofaza cho ku kauhanya ziinkwa naa ziha varutwana vaakwe kuti va ka zi viike ha vusu vwa vantu. Mmi naa hinda inswi zoovere chi ku va kauhanyeza vonse.

42Va vaalyi vonse mbwiiteeri chiinga ve ikuta. 43Va vaa kunganya ziinkwa zonse zi vaa shaalyi, mane ne inswi cho ku izuza matundu a mana ikume ne vuuveri. 44Vakwaame va vaalyi zinkwa va vaalyi ku lyikana mwaannda i mana iyaanza.

45Ku zwaa aho vulyo naa chita kuti varutwana vaakwe va yendere ku imwi imbalyi, kwa Bethesaida, mmi iye cho ku lwiira ikunnga kuti lyi patalalye. 46Chiinga vaa yenda vonse,Jeeso naa yendera ku irundu ku ku chencherera. 47Chiteengu chi vaa siki ne vwaato chi vu vaalyi ku yendera ha kati ke iwate, mmi iye naa sheere yeeyena mu lukaanda.

48Mmi naa vona vukaavo vu va veena mu vulyi ku ku zuha mu kuti luhuho lu vaalyi ku hapaana naavo. Hakusasani a hulu ni ku siri ku luunza a veeza ku valyi, naa kaya vu yenda ha iwulu lya menzi, naa sa ku hita ha valyi. 49Mmi ha va mu voona u kaya vu yenda ha iwulu lya menzi, va va zezi kuti isaku cho ku lyirira ku iwulu, 50mukuti mu ku mu vona va vaa tiyi. Hoo hwaa hoo naa va cho kuti, ''Mu siye ku va ne lyoowa! Njee Ime! Mu siye ku tiya!''

51A va injiri naavo mu vwaaato ne luhuho cho ku ziima ku huunnga. Ni vaa shala va komokeerwa mu makaando. 52Mukuti ka hena va vaa woolyi ku taluhanya kuti ziiinkwa zi vaalyi ku talusa inzi. Kwandaa a vulyo, inkuulo zaavo zi vaa zuminini.

53Chiinga vaa luutira kwii ishiira lyimwi, va veeza ku sika ha ikanda lya Ghenasareta cho ku siika vwaato vwaavo. 54Mu va mana vulyo ku suuka, cho ku mu lyemuha. 55Ni vaa ngombweera ku mwi ne kumwi mu chisi choonse ni va ka lyeeta valweere kwaalyi mu ma matirasi, kumwi ne kumwi ku va va zuwirire kuti u keeza kwa teni.

56Konse kwaa a vaalyi ku ya ,mu mizizana, mizi mikando, ne mu zisi va vaalyi ku lyeeta valweere ku mawuzikizo, mmi ni va mu kumbiira kuti a va sirike nandi vulyo kuti va wonde nxwe ye chizavalo chaakwe. Vunnginngi vonse vu vaalyi ku mu wonda vu vaalyi ku hozwa.

71Mafarasayi naa vamwi va ma Sikiribe va vaalyi ku ka zwa kwa Jerusalema va veeza ku kungana ne va mu zimbulukite.

2Mmi va vaa voni vamwi va varutwana vaakwe ne va kweete ku lya chinkwa cha maanza a pangite zi fosaheere, njo ku cho kuti, a saa sambite. 3(Mukuti Mafarasayi ne Majuda onse ka va lyi mbwiiteri ha va samba manza, mukuti va si kweterere mu chizo cha vakulwaana vaavo. 4Mafarasayi chi va ka zwa ku mawuzikizo, ka va lyi mbwiiteri ha va saamba. Mane kwiina imwi milao miingi iva shaala mu masulye cho ku koza, ku swana ne ku shanza inkomoki, impoto, tusuva to ulooto, ne masofa ha va lyiira.)

5Mafarasayi ne Masikiribe va vaa vuza Jeeso kuti, ''chinzi varutwana vaako ha va saa yendi ku ya che chizo cha vakulwaana, ka kulyi ke te va lya chinkwa cha maanza a saa sambite?''

6Naa va cho kuti, ''Izaya a va mu porofiti sinte uunwe muvalyizinantizi. A va ngolyi, 'Ava vantu va ni kuteka cho tuholo twaavo, mmi inkulu zaavo zina kulye naame. 7Va ni woovamera ku salyi kwe initi, ne vaaruta milao ya vantu ne ilyi ituto zavo.'

8Mu viikira ku imbaalyi milawo ye Ireeza cho ku woonderera zizo za vantu.'' 9Na va cho kuti, ''Unwe mu veene mukaana milawo ye Ireeza cho ku shalaa zizo zenu mu masulye! 10Mu kuti Moshe a vaati, '' Mukuteke va isheenu ne va nnyineenu, 'mane, yoo wamba vuvilaala chi veesi ne vannyina kaa fwee cho vusakusima.'

11Mmi mu cho kuti, '' muntu haa cho veesi nandi vannyina, '' Ituso yeeti ni mwaa tambula ku zwa mwaangu nje Corban,''' ( njo ku cho kuti, 'Iheewa Ireeza')- 12lyinu ka usi mu zuminini ku chitira veesi ne vannyina chintu. 13Mu maniisa ziho ze mulawo we Ireeza che chizo chennu. Ne zimwi zi swana naazo zi mu panga.''

1416Naa vola a sumpi ikunga mane naa va cho kuti, ''Mu ni teeke, mu vonse, mane mu zuwisisa. 15Ka kwiina chiina kunze lyo muntu chi woola ku mu viihaza ha chi injiira mwaalyi. Chi zwa mu muntu nje chi mu viihaza.''

17Ivaati Jeeso choo zwa he ikunga cho u injiira mu inzuvo, varutwana vaakwe va va mu vuza che ingulyi. 18Jeeso naati, 'Naanwe ka mwiini ku zuwisisa? Ka mwiini ku vona kuti chi injira mu muntu ne chi zwa kunze keti che chi mu viihaza. 19Mukuti keeti chi chi injira mwi inkulo yaakwe, mmi chi injira mwi ivumu lyaakwe mane cho ku zwiira ku chimbuzi?'' Chaa manzwi a va pangi kuti zilyo zi jololye.

20Naa cho kuti, "Chi zwa mu muntu nje chi mu viihaza. 21Mukati ko muntu, ku zwa mu inkulu, ku iza minahano mivilala, vusahi, vusa, ku ihaya, 22vuhuulye, kulakaza, zifosaheere, ziziyeza, kulakalyisa, inkulu ilakaza, ku twaala isuvi, ku lyi hindira he iwulu, vuholo. 23Vonse uvu vu vilaala vu zwa mukati, mane njo uvona vu viihaza muntu.''

24A va katuki aho na ya ku chisi cha Tire ne Sidoni. A veeza kwi injiira mwi inzuuvo mane na sa suni kuti vantu ve izive kuti kweena, mmi ka kwiina mweeti na va wungulwa. 25Hoo hwaaho mukulwaakazi, wo mwaanakazana yaa veena inhuho imbilala a vaa zuwi chaakwe, neeza, cho ku wa ha mateende akwe. 26Lyinu uzu mukulwaakazi ivaalyi Muherika, ne ilyi MuSaerophoenician che chizo. Naa mu kumbira kuti a zwiisa madimona mu mwaanakazana waakwe.

27Naa mu cho kuti, ''Vahwiire valyiisikwa intaanzi. Ka kuti ka ku shiyeme kuhinda chinkwa cha vahwiire cho ku chiha vambwa.'' 28Mmi naa mu itava kuti, ''Nfwa, Simwiine, vambwa navo va lya vufwaafwa vwa vahwiire kunsi lye itaafulye.''

29Naa mu cho kuti, ''Mukuti chi wa wamba vulyo, u sumunukite ku yenda. Idimona chi lyaa zwa mu mwaanakazana wako. 30Naa vola ku inzuvo yakwe naa ka waana muhwiire u fupi ha mumbeta, mane ne idimona ne lyi zwiire mwaalyi.

31Mmi naa voola a zwii mu chisi cha Tire, mmi naa zaamba chisi cha Sidon naa ya ku iwaate lya Ghalaliya ku ka ya ne ku chisi cha Dekapolisi. 32Mmi ni va mu lyeetera muntu yaa seena a valyi ku zuwa mane neena vukaavo vo ku waamba, ni va mu kumbiira kuti a mu viike iyaanza.

33A va mu hindiri ku imbalyi ne ku seena yo u vweene, mane ne injiirika munwe waakwe mukutwi kwaakwe, chiinga a mana ku swa mate, naa wonda lulyimi lwaakwe. 34A vaa lolyi ku iwulu, naa kwiita luhuho cho ku mu cho kuti, ''Ephphatha,'' Icho nje ku cho kuti, ''Iiwuke!'' 35Mane hoo hwaaaho ku zuwa kwaakwe cho ku iwuka, mane chi vaa wondete lulyimi lwaakwe chi vaa fwi, naa taanga ku waamba sinte.

36Naa va lwiira kuti sanzi va lwiiri muntu. Mmi mu ku va lawiira vulyo, avo mane mu va valyi ku wambiira ahulu chaayo. 37Va vaa komokwa ahulu, ne vaa cho kuti, ''U pangiite chimwi ne chimwi sinte. Mane u woola ku panga kuti va saa zuwi va zuwe, va saa wambi va wambe.''

81Mwaawo mazuva, ku veena hape ikunnga i kaando mane ni ku seena chi lyiiwa. Jeeso naa sumpa varutwana vaakwe cho ku va cho kuti, " 2Ni fwiisiizwa inse nje ilyi ikunnga mukuti chi va a zwiira kuvusu naame mazuva oo tatwe mmi ni ku seena cho ku lyaa. 3China va cho kuti va voolye ku mizi yaavo, mwendi va woola ku zuminina mu inzira. Hape vamwi vazwa kulye." 4Varutwana vaakwe ni va mu itava kuti, "Tu woola ku wana kuhi zinnkwa zi lyikeene ku ikutisa vantu moo wunu muzuka?''

5A va va vuuza kuti, "Mu kweete zinnkwa zoo nngayi?" Ni vaati, " zi mana iyaanza ne too uvere" 6A vaa lawuiiri ikunnga kuti lyi ikalye hansi. A vaa hindi zinnkwa zi mana i yaanza ne too uvere, naa aha vuitumero, cho ku zi kauhanya, naa a ha varutwana vaakwe kuti va zi viike ha vusu vwaavo, ni va zi viika ha vusu vwe ikunnga.

7Va veena ne tuswiizana, mmi chiinga a mana ku tu raperera, cho ku tu ha varutwana vaakwe kuti naato va tu wavire vaantu. 8Va vaalyi mane cho ku ikuta. Va vaa kunganya vufwaafwaalyi vu vaa shaalyi, vu vaa kwani mu matundu makaando a kwana iyaanza ne too uvere. 9Vantu voonse va vaalyi ku yendera ku miyaanda yiina ikumi yoo nne. Mmi naa a va cho kuti va kwiyaa. 10Hoo hwaa hoo naa a zwa ne varutwana vaakwe cho ku injira mu vwaato ni vaa zuhira ku chisi cha Dalimanuta.

11Mafarasai cho ku iza ni vaa tanga ku lyi kananisa naaye. Ni va saka chishupo mwaalyi chi zwa ku iwulu, ku mulyika. 12A vaa kwitiri luhuho lwaakwe kunnsi a hulu naa va cho kuti, "Lyaaho chinzi imbuto ya lyilyahanu ha mu saka chishupo? Vusakusima ni mu lwiirite, ka kwiina chishupo cheeti ne chi heewa imbuto ya lyilyahanu." 13Mmi naa va siya, cho ku voola cho ku injira mu vwaato, naa ya ku imwi mbalyi.

14Lyinu hanu varutwana va vaa zivalyi ku lyi hindira zinnkwa. Ku veena vulyo chinkwa chii mwiina mu vwaato. 15A va va kalyimeri naati, "Mu lolye, mane mu ikalye ne mu lyi lyiisiiza mu lyi vavalyere mu chivirisa cha Mafarasayi ne chivirisa cha Heruda."

16Varutwana cho ku lyi wamba mukati kaavo, "Mukuti ka tu iina chinnkwa." 17Jeeso a vaa lyemuhi ichi chintu, mmi cho ku va cho kuti, "Chinzi ha mu kweete mu wamba cho ku vula chiinkwa? ka mwiini ku lyemuha? ka mwiini ku zuwisiza? Chi mu vaa holohi inkulo?

18Mwiina menso, aa ka mu voni? mwiina matwi, aa ka mu zuwi? aa ka mu kumbulukwa? 19Chivaka chii ni vaa hindite zinkwa zi mana iyaanza cho ku chi kauhanyeza valyikana mwaanda i mana i yaanza, mu vaa kunganyiza vufwaafwaalyi vwe chinkwa mu matundu o nngayi?" va va itavi ni vaati, "Ikumi ne too uvere."

20Lyinu chi ni kauhanyeza vo mwaanda yo nne zinnkwa zi mana iyaanza ne too uvere, mu vaa izuza matundu oo nngayi? Va va mu cho kuti, ''A mana iyaanza ne too uvere" 21Naa a va cho kuti, "Ka mwiini ku zuwisiza?"

22Va veeza kwa Bethesaida. Vantu va veena kwa teni va vaa lyeeti mukwaame a va fwiire menso mmi ni vaa kumbira Jeeso kuti a mu wonde. 23Jeeso naa a mu kokera cho ku mu hindira hanze lyo muzi. Chiinga a mana ku mu swiira mu menso cho ku mu viika manza, a va mu vuuza kuti, "Kwiina cho u vweene?"

24Na inusa mutwi, cho kuti, "Ni vweene vantu ni va swana si neeri zisamu zi kaya vu yeenda." 25A voolyi a viiki manza a kwe hape ha menso aakwe, mmi unkosi cho ku iwula menso aakwe, ku vona kwaakwe cho ku voozekezwa, cho ku taanga ku vona chimwi ne chimwi vulyo sinte. 26Jeeso naa mu tuminiza ku inzuvo yaakwe, "Sanzi u ke injiri mu muzi."

27Jeeso naa zwiira ne varutwana vaakwe ku mizi i sumpwa Sizariya Filipo. Mu nzira a vaa vuuza varutwana vaakwe kuti, "Vantu va cho kuti nje ime ini?" 28Ni vaa mu itava kuti, "Johani wo ku koloveza. Vamwi vati, 'Elija,' mmi vamwi aavo, 'Umwi wa vaporofiti."

29A va va vuuza kuti, "Uunwe mu cho kuti nje ime ini?" Pitorosi na itava kuti, "Njo uwe Kirisiti." 30Jeeso naa a va lwiira cho ku koza kuti va siye ku lwiira vantu chaakwe.

31Mmi naa a tanga ku va ruta kuti Mwaana wo Muntu u swanerwa ku iza ku nyaanda mu zintu zinngi, mane keeza a kanwa ne Vakulwaana, Mapurisita makaando ne Varuti vo mulawo, mane no ku ihayiiwa, mmi cho ku vuuka mu mazuva oo tatwe. 32A va va lwiiri naa jolweeza indava. Mmi Pitorosi naa mu hindira he imbalyi cho ku taanga ku mu kalyimera.

33Mmi Jeeso naa lola varutwana vaakwe ku zwaa aho cho ku kalyimera Pitorosi naati," Zwee ha masulye aangu, Saatani! Ka u viikite ingana yaako mu zintu ze Ireeza, u iviikite mu zintu za vaantu." 34Ku zwaa aho naa sumpa ikunga konse ne varutwana vaakwe, cho ku va cho kuti, "Cho kuti ku ina muntu yoo u saka ku ni ichirira, u swanera ku lyi lyisaampula, a hinde chifapaano chaakwe, cho ku nii ichirira."

35Mu kuti zumwi no zumwi yoo u saka ku vuluka vuhalo vwaakwe ka vu mu zovere, mane zumwi no zumwi yoo u zoverwa vuhalo vwaakwe che ivaka lyaangu ne lya manzwi a jolola, kaa a vu vuluke. 36Muntu u voolyerwa nzi mu ku lyikunganyiza inkanda yonse, mmi cho ku zoverwa ne vuhalo vwaakwe? 37Muntu u wola ku zwiisikiza nzi mu maziimo o vuhalo vwaakwe?

38Zumwi no zumwi yoo u ni fwiira insoni moo lunu luhasi lu sanguheere mane ne lu viihere, Mwaana wo Muntu keeza naa mu fwiire insoni ha kuti cho u keeza mu ikanya i Veesi ne mangiloyi a jolola."

91Mmi nna va lwiira nna cho kuti, "Cho vusakusima nni mulwiirite, kwiina vamwi va ziimeene hahanu va seeti nni va fwe nniva seeni ku vona muvuso we Ireeza nni u keeza che ziho." 2Mazuva a mana iyanza nne kamwina chiinga a mana, Jeeso nna hiinda Pitorosi nne Jemusi nne Johani cho kuya ku iwulu lye iruundu ilyelye nni veena voo voona. Mmi lyiinu nna sanduka ha vusu vwaavo. 3Zizwato zakwe nni za veera a hulu, ku tuva ku kaando, ku tuva ku zamba mirora ye inkanda muyi tuvisa.

4Lyiinu chi vasi kwete ku wamba nne Jeeso, Elija nne Moshe nni vaa voneka. 5Pitorosi nne tava Jeeso naati, "Muruti, ku lotu kuti tu kwiina hanu, mmi lyiinu chite kuti tu zaake zitomba zoo tatwe, chimwi nchako, chimwi ncha Mushe, chimwi chive cha Elija." 6( Ka kuti ka hena a veezi chaava ku lukera ku wamba mukuti va vaalyi kalyiriirwa.)

77 Ikope nni lyeeza choku va wumbiriza. Lyiinu lyinzwi nni lyaazwa mwi ikope, "Uzu njeye mwanaswiisu waangu uni suni a hulu." Mumu teeke." 8Va vaati chi va lola mumbalyi ho hwaaho, nni vaa shaala ka kwiina u va vweene, mbwita iiri Jeeso vulyo yee yeena.

9Va vaati chi va suuka ku iruundu, Jeeso nna va laula kuti saanzi valwiiri vantu chi vaa vona, mbwita iiri Mwanaswiisu wo Mukwaamwe chi nna na vuka mu lufu. 10Lyiinu nni valyi vikira iiyi indava mukati kaavo, ku zwaaho aavo choku taanga ku waambinsaana mukati kaavo "kuti ku vuuka mu vafwiire" ku teewa nzi.

11Lyiinu nni va mu vuza kuti,"'Chiinzi vangolyi ha vaacho kuti Elija u lukere kwiiza lwe ntanzi?" 12Nna vaacho kuti, Elija wiiza ku ntanzi ku viika zintu nenza. Lyiinu chiinzi ha ku ngolyetwa kuti Mwanaswiisu wo Mukwaame u lukera ku nyanda nne ku hindirwa haansi? 13Lyiinu nni mu lwiira kuti Elija a veeza, a vaa chiti zoonse zi vava kusaka kwaalyi, mu ku ngolyetwa mu mangolo.

14Va vaati chi va voola ku varutwana va Jeeso, va va voni kuti va zumbulukitwa vantu vangi, va ngolyi vava ku va kananisa. 15Lyiinu vantu va vaati chiinga va vona Jeeso vava komokwa, nni vaa ngombweera kwaalyi kuka mu rumeresa. 16Jeeso nna vuuza varutwana vaakwe, "Mu kweete mu mulyi kananinsaana naavo chechi?"

1717. Umwi wa vantu ku zwa mu vuungi nna mu itava kuti, "Muruti, nna lyeeta mwanaswiisu waangu kwaako. Wiina luhuho lu muchita kuti a siye ku wamba. 18Ulu luhuho lu mu zuminiza choku mu wiisikiza haansi, u manina koto u zwa ifulu mu kaholo, u suma meeno aakwe, muviri waakwe choku zuminina. Naacho varutwana vaako kuti va zwiisa ulu luhuho mmi vaa kaangwa." 19Jeeso nna ve tava kuti, "Unwe ve chivaka cho kuvula itumero, ka nni kalye naanwe luvaka lu sika hayi kuti mu zumine? Mu mulyeete kwaangu."

20Nni va lyeeta muswisu kwa Jeeso. Lyiinu luhuho chiinga lwa vona Jeeso nni lwa wiisikiza muswiisu haansi choku taanga ku zwa ifulu mu kaholo. 21Jeeso choku vuuza veesi, "Wiina luvaka lu sika hayi neena vuti?" Veesi nni vaacho kuti, "Chinga a vaati a ku zaalwa. 22kangi lwiina ku mu sohera mu mulyiro hamwi mu menzi nni lu lyika ku mu ihaya. Cho kuti u woola ku chita chimwi tu fwiire inse"

23Jeeso nnaacho kuti, "Cho kuti mu woola? Zintu zoonze zi woolyeka kwaalye yoo zumina" 24Ho hwaaho, veesi muhwiire choku huwa nni vacho kuti, "Nni zumina, nni tusa muku saa zumina kwaangu!" 25Jeeso chiinga vona kuti vantu va ka ngombwerere kwaalyi, a va kalyimeri luhuho luvi naacho kuti, "Uwe luhuho lo ku saa waamba nne ku saa zuwa, nni kucho suunu, zwe mwaalyi, sanzi nno voolyi wii njire mwaakwe."

26Luhuho luvi nni chi lwaa lyira choku wiisikiza muswiisu haansi ku zwaaho choku zwa mwaalyi. Muswiisu a va lolyeki mane iiri u fwire, vuungi vwa vantu nni vaacho kuti, "chaa fwa!" 27Jeeso nna mu woonda che iyaanza choku mu nyemuna, muswiisu choku ziima cha mateende.

28Lyinu Jeeso chinga njira mu inzuvo, varutwana vaakwe choku mu vuzukiza ku imbalyi, "Chiinzi ha sana twa woola ku luzwiisa?" 29Jeeso na vacho kuti, "Iizi zo uuwu mushovo zi woolwa vulyo nnavo va rapera,"

31Lyiinu chiinga vaa zwaaho va ve njiri cha Galaleya. Jeeso ka heena va suni kuti vantu ve izive kuti vena kuhi, 32mukuti a vaalyi ku ruta Varutwana vakwe. A va vacho kuti, "Mwanaswisu o Mukwaame kaa heewa ku vantu, aavo veeti nni va mu ihaye. Mazuva oo tatwe ha a mana ku fwa, ka a vuuke mu lufu." 30Mu kuti ka heena vava zuwisisa, vava tiyi ku mu vuuza.

33Nni veeza kwa Kaperaname. Lyiinu cho siina mu inzuvo nna va vuuza, "Seke mu wamba kaha chiinzi mu inzira?" 34Va va tontolyi ka heena va ve itavi. Mu kuti vava ku keeza vu nganginsaana mu mu inzira kuti mukaando njeeni. 35Nne ikala haansi choku sumpa varutwana vaakwe, choku vacho kuti, "Haiva zumwe vulyo u saka kuva we intaanzi, u lukeere kuva wa mamanimani, mane nne muhikaana wa voonse."

36A va hinde muhwiire choku mu viika hakati kaavo. A va hindi zuna muhwire mu maanza aakwe choku vacho kuti, 37"Umwi ne umwi yoo tambula siina muhwire mu izina lyaangu, u taambula naame, mmi ha a ni taambula, ka taambulyi ime vulyo, u taambula nnaaye yaava kani tumi."

38Johani choku mucho kuti, "Muruti, twaa vona muntu zumwi nna zwiisa madimona mu izina lyako mmi twa mu ziimika, mu kuti ka a tu sheere mu masulye." 39"Mmi Jeeso choku vee tava kuti, "Mu siye ku mu ziimika mu kuti ka kwiina yeeti nna chite zintu zi kaando che izina lyaangu ku zwaaho choku waamba vuvi ka haangu.

40Zumwi nne zumwi ya saa lwi naaswe wiina nnaaswe. 41"Zumwe nne zumwe yo kuha inkomoki ya menzi mukuti u waangu, cho vusakusima nni mulwiirite, keeti nna vulye ku ruwerwa.

4244Zumwe nne zumwe yeeti nna chite kuti vo vwaava va nniini va zumina mwaangu kuti va chite mafosisa, ka a ku shiamerwa ku sumininwa ivwe mu insiingo choku soherwa mu iwate. 43Cho kuti iyaanza lyako lyiku chita kuti u fosa, lyi kosolye. Ku lotu kuti u ke njire mu vuhalo vu saa mani che iyaanza lye chiholye kunze lyoku kee njira cha maanza oonse mwi bimbiro lyo mulyiro.

4546Haiva iteende lyaako lyi ku pangisa mafosisa, lyi kosolye. Ku lotu ku tambula vuhalo nno u lyi u chiholye kunze lyo kuva nne mateende oonse choku ka soherwa mu ihere.

47Haiva lyinso lyaako lyi voola ku ku pangisa mafosisa, yi ngongomone. Kuku shiyamere kuti wii njire mu mu vuso we Ireeza nne lyinso lyi mmwiina kuunze lyo kuva nne menso oovere choku soherwa mu mulyiro, 48uuko masene aavo ku a saa fwi, mane nne mulyiro ku u saa zimwa

49Zumwe nne zumwe kaa luungwa cho mulyiro. 50Mwiinyo wu shiyeme, mmi lyiinu hawu kunkumuka vukalyi vwaawo njeeni yoo woola kuvu voozekeza hape? Muve nne mwiinyo mukati keeno, mane muve nne ikozo ku zumwe nne zumwe weenu."

101Jeeso nnazwa heecho chivaka nnaaya ku inkanda ya Judiya cho kuya nne ku inkanda iina ku vusu vo lwiizi lwa Jorodani, mmi vuungi vwa vantu nni vweeza kwaalyi hape.Nna taanga ku varuta hape siina kuya che itwayero yaakwe. 2Mmi VaFarasayi nni veeza kwaalyi choku mulyika choku mu vuuza kuti, ''Kuya cho mulao mukwaame u zuminiinwa ku kana muihaavwe?" 3Nne itava, ''Mushe a va mulawiiri ku tiinzi?" 4Nni vaacho kuti, ''Mushe a va zuminini mukwame kuti a ngolye ingolo lyoku mukaana ku zwaaho choku mu hindika.''

5vaalyi che vu kukuktu vwe inkulo zeenu chiingi a va mu ngolyeri uuwu mulao,'' Jeeso nna vacho vo ovo vulyo. 6Mmi ku mataangiro oku vuumbwa, Ireeza a vaa vuumbi Mukwaame ne mukulwaakazi.'

7chelyii Ivaaka mukwame ka siiye veesi nni vanyiina choku ka ngabasira mwihavhwe, 8ovo vuuveri vava Inyama imwina.' Kava siire vantu voovere, mmi cho muviri umwina. 9Lyinu chokwina vulyo chintu chaa kopanya Ireeza, muntu sanzi achi patalaza."

11Ku vaati chi veena mu inzuvo, Varutwana va Jeeso nni va mu vuuza hape che iyi indava. 10Naa vaacho kuti, "Umwi nne umwi yo kaana mukaakwe choku ka sesa mukulwaakazi uungi cha chita vuhuulye. 12Mmi nne mukulwakazi ha kaana mukaakwe choku sesa mukwame uungi, u chita vuhuulye."

13Hape nni va lyeeta vawiire vaniini kwaalyi kuti ava kume, mmi Varutwana va Jeeso choku tanga kuva lwiisa. 14Mmi Jeeso chiinga lyemuha, keena a valyi tumeri naa vacho kuti,'' Mu siye vahwiire veeze kwaangu, mu siye kuva viinda, mu kuti Muvuso we Ireeza nguwavoo va swaana naavo.

15Chini mulwiira cho vusakusima nko kuti, uuzoo ya seti naa taambulye muvuso we Ireeza siina muhwiirezana keeti naa wu injire.'' 16Ku zwaaho naa woonda vahwiire mu maanza aakwe choku vaha mikoonde nne ku va viika maanza mu mitwi.

17Mmi chiinga taanga ku zwiira ha vusu nne lweendo lwaakwe, unkosi choku mu ngombweera, nne ku mu fukamina, cho kucho kuti, ''Muruti yoo shiyeme, nni chite nzi kuti nni woolye ku vona vuhalo vusaa mani?'' 18Jeeso naa mucho kuti, ''Chiinzi hooni suumpa yoo shiyeme? Ka kwina yoo shiyeme, kuunze lye Ireeza ye yeena. 19Wiizi milao: 'Siye ku ihaya, siye ku chita vuhuulye, siye ku yiva, siye ku hambirikiza ,siye ku chengerera, nne kuti u kuteke veeso nne vaanyoko'.''

20Unkosi naacho kuti, ''Muruti, ku zwa mu vuniini vwaangu nni va zuwisiza iyii milao.'' 21Jeeso a va mu lolyi choku mu suna. Naa mucho kuti, ''O tayera chintu chii mwiina. U lukeere ku wuza zoonse zo wiina naazo, choku ziha vahumanehi, hoo chita vulyo, koo ve nne vuhumi ku iwulu. Ku zwaaho, wiize u nni shaalye mu masulye.'' 22Mmi aa manzwi a va mu sasamisa ahulu, choku katuka naa wiiriirwa che ivaka lyo kuti ava humine ahulu.

23Jeeso ava lyolyi mumbalyi cho kucho varutwana kuti, ''Ku kaavo vulye kuti vahumi ve injire muvuso we Ireeza!'' 24Varutwana nni va komokerwa manzwi aakwe. Mmi Jeeso naa vacho hape kuti, ''Vahwiire, ku kukutu vulye ku injira muvusu we Ireeza! 25Ku huvirira kuti Ikaamera yi injire mulyiinso lye inaalyiti, kuunze lyo kuti muntu muhumi a ke injire muvuso we Ireeza.''

26Vava komokwa ahulo, cho kulyi vuuza kaha vuhavo, ''Lyiinu ku woola ku hazwa inni?'' 27Jeeso choku valola cho kucho kuti, ''Mmi ku kaavo ku vantu, choku saava vulyo kwe Ireeza. Zintu zoonse zi woolyeka kwe Ireeza." 28Pitorosi choku taanga ku waamba naaye, "Vone, uuswe tuka siyite chimwe nne chimwe mane tuku sheere mu masulye."

29Jeeso naacho kuti, Cho vusakusima nni mulwiirite, ka kwiina ava siyi inzuvo, nandi vaanaswiisu kunineenu, nandi vaanakazana kunineenu, nandi vaanyineenu, nandi ve isheenu, nandi vaana, nandi inkaanda, che ivaka lyaangu, nne che ivaka lye mulaeza, 30yeeti naa vulye ku heewa kwiina miyaanda koo vere choku zaamba hanu mwe yinu inkaanda: mazuvo, vaanaswiisu kunine, vaanakazana kunine, nne vaanyina, nne vaana, nne inkaanda, nni kwiina nne ku katazeha ha teni, nne mu inkaanda yi keeza, vuhalo vu saa mani. 31Mmi vangi veena ku vusu ka vave ku mamanimani, ku zwaaho va mamanimani cho kuva ve intaanzi."

32Va veena mu nzira, nni va kaya kwa Jerusalema, Jeeso naa va hitire ku vusu. Varutwana nni va komokwa, naavo va va ka musheere mu masulye cho kulyi kalyirirwa. Lyiinu Jeeso choku suumpira veena ikumi nne toovere he imbalyi choku taanga kuva lwiira kuti u keeza kuku pangahalyirwa inzi mu vufwihi. 33''Mu vone, tu kaya kwa Jerusalema, mmi mwaanaswiisu wo Mukwaame u kaya kuku heewa mu mayaanza a va purisita va kulwaana nne vangolyi. Ka va munyaansikiza lufu choku muha vantu ve inkaanda vulyo. 34Ka va mushewunwiine, choku mu swiira, ku mushimeha, choku mu ihaya. Mmi ku zwaaho chini kwaa hita mazuva ootatwe kaa vuuke."

35Vaana va Zebediya va sumpwa Jemusi nne Johani va veeza kwaalyi nni vati, ''Muruti, tu saka kuti u tu chitire cheeti tu sake kwaako.'' 36Naa vacho kuti, ''Mu saka kuti nni muchitire nzi?'' 37Aavo choku mucho kuti, ''Tu zuminine kuti twi kalye naawe muku vereenga kwaako, umwi e kalye ku malyo ako, umwi choku ikala ku mamonso.''

38Mmi Jeeso naa ve tava naati, '' Ka muiizi chi musaka. A mu woola ku nywa inkomoki yeeti nni nni nywe nandi ku zimanina ikolovezo yeeti nni nni kolovezwa chaayo?'' 39Nni va mucho kuti,'' Tu woola.'' Jeeso naa vacho kuti, "Inkomoki yeeti nni nni nywe ka mu yinywe. Ikolovezo yeeti nni nni kolovezwa chaayo, ka mu kolovezwa chaayo. 40Mmi yo kuti umwi yoo ni kala ku malyo nandi ku ma monso, ka heena iime nni nniha, mmi mbwiita kwaavo va vakanyereezwa."

41Mmi varutwana vamwi veena ikumi nne toovere chiinga va zuwa iyi ndava, choku taanga nni va nyerererwa Jemusi nne Johani. 42Jeeso choku valyi sumpira nnaati, ''Mwiizi kuti a voo va hindwa niiri va vusi va vantu ve Inkanda kuti va va lyaatiriza vulyo, mane nnaavo va maziimo a hee wulu vava laula vulye.

43Mmi ka ku lukeere kuva vulyo mukati keenu. zumwe nne zumwe yoo saka ku kuzwa mukati keenu a ve muhikaana wa voonse, 44mane nayee yoo saka kuva we ntaanzi u lukeere kuva chikombwa cha voonse. 45Ka kuti mwaanaswiisu wo Mukwaame ka heena a vee ziri ku teenderwa, mmi mbwiita ku teendera, mane nne kuha vuhalo vwaakwe nni yilyi chi wulyiso cha vaangi."

46Nni veeza kwa Jeriko. Mmi cho zwa mwa Jeriko nne varutwana vaakwe nne vantu vaangi, mwaanaswiisu wa Timayiyasi, Baritimayiyasi, mukumbiizi wo muhofu, nne ikeere he imbalyi ye inzira. 47Chiinga zuwa kuti nje Jeeso Munazareta, nna taanga ku huwa nnaati, "Jeeso, Mwaanaswiisu wa Daafita, nni fwiire inse!'' 48China vuungi cha vantu nni cha lwiisa mukwaame wo muhofu, nni chi mucho kuti toontolye. Mmi iiye naa zwiira ku vusu nne ku huwa, "Mwaanaswiisu wa Daafita, nni fwiire inse!''

49Jeeso nna ziima choku laula kuti a ka suumpwa. Nni va suumpa mukwaame yaa sa voni, cho kucho kuti, ''Kolye! ziime! U ku suumpa.'' 50Nna zavula chizwaato chaakwe choku zindira ku imbalyi, choku ziima choku hweera, cho kuiiza kwa Jeeso.

51Jeeso nna mu itava nnaati, ''U saka kuti nni ku chitire inzi?'' Unkosi a sa voni cho kucho kuti, ''Muruti, Nni saka ku taambula ku vona kwaangu.'' 52Ku zwaaho Jeeso choku mucho kuti, "Kwiya. Itumero yaako chiya ku hoza.'' Ho hwaaho choku taanga ku vona hape, mane nna mu shaala mu inzira.

111hwaaho chi va valyi ku keeza kwa Jerusalema, nni veena ha fwihi nne Bethiphage, nne Bethani ku iruundu lye ziteente, mane Jeeso avaa tumi varutwana vaakwe voo veere, 2mane nna vacho kuti, "Mukwiya ku muzi utu lyolyinzeene naawo. Mu muti chi mu injira mu ulyi, mu mu kawaane kadonkaana ka seeni ku taantwa. Mu kaka sumunune mu kalyeete kwaangu. 3Mane cho kuti zumwi u mucho kuti, ´´Chiinzi ha mu chita vuti?' Mucho kuti, ´Simwiine wuyi saka, mane mwaa kayi vooza."'

4Nni va yeenda choku ka waana kadonkaana nni ka sumiinwa haanze lye inzirazana yii wukite, mmi nni va ka sumununa, 5Mane vantu vamwi vava zimeenee nni vaacho kuti, ''Mu kweete ku chita nzi, hamu sumununa kadonkaana?'' 6Nni vava lwiira siina Jeeso mwaa ka vacho, mmi vantu nni vava siya cho kulyi yeendera mu inzira yaavo.

7Varutwana voo vere va Jeeso vava ka lyeeti kadonkaana choku sohera he iwulu lya teni zizavalo zaavo kuti Jeeso a kee chire. 8chiina vunngi nni chaa zala zizwato zaavo mu inzira, mane vamwi nni va zalyira tu tavi mu inkaanda. 9Aavo va vaalyi kuya vu yeenda ha vusu nni ha masulye aakwe nni vaa sumpwirira, ''Hosana! Ku sehuuhere iyee yo wiza mu izina lya semwine Ireeza. 10Kwiina mukoonde ku muvuso we isheetu Daafita! Hosana mu iwulu!''

11Jeeso a vaati cho wi injira mwa Jerusalema nna ke injira mu itempere choku taanga nna kweete u lola chimwe nne chimwe mukati kaayo yoonse. Che ivaka lyo kucho kuti, inako chiyi va va siyite, nna zwaaho nne veena ikumi nne voovere vaakwe cho kuya ku muuzi wa Bethani. 12Mu izuva lyi chirira, chiva ka voolyete kwa Bethani, a vaa fwi inzala.

13Mane a vaati choo lola ha vusu choku vona chisamu che ikuzu chi veena makova, mmi naaya ku ku vuna kuti aa chiinna zihaantu. mmi nna ka waana kuti ka chiina zihaantu makova vulyo, ka kuti ka heena yi vaalyi inako ya makuzu. 14Nna a lyi cho kuti, ''Ka kwiina yeeti nna voolye a lyie zihaantu mwaako hape.'' Varutwana vaakwe choku mu zuwa.

15Mmi nna sika mwa Jerusalema, nne ku injira mu itempere choku taanga nna hindika va wula nne va wuza mu itempere. Nn wiisa mataafulye ava vaalyi ku wuza malyi mane nne zipura zaavo va vaalyi ku wuzaanga inkwirimba. 16Mmi naa vula ku va zuminina kuti vazwe nne ziva vaalyi ku wuza.

17Mmi nna va ruta nna acho kuti, ''Aa ka ku ngolyetwa kuti inzuvo yaangu ka ive inzuvo ye itapero ya vantu ve inkaanda yoonse? Mmi unwe mu vayi pangi ireendi lya vasa. 18Mmi vapurisita vakulwaana nne vangolyi va va mu teekete kuti wa wamba kutinzi, mmi nni vaa saka inzira yoku mu ihaya. Nni va mu tiya ka kuti vantu voonse va va komweeswa ituto zaakwe. 19Mmi yi vaalyi kuti mu chitengwaana chimwe nne chimwe hachi sika, va vaalyi ku zwaanga mu muzi mukaando.

20Va vaati chiva hita ha kusasani, nni vaa vona isamu lye ikuzu nni lyi nyaaniine kuya ku mihisi yaalyo. 21Pitorosi naa kumbulukwa nna acho kuti, ''Muruti, vone! Isamu lye ikuzu lyo u vaa kuti lyi vaa nyaani.''

22Jeeso naa vee itava, ''Muve nne itumero mwe Ireeza. 23Cho vusakusima nni mulwiira kuti inni kamba inni yeeti naacho iilyi iruundu kuti, 'nyukuke ahoo uye mu iwate mmi naa saa nyaansa mu inkulo yaakwe mmi choku zumina kuti chaa waamba kachi pangahalye, iicho Ireeza ncheeti nna pange.

24Lyiinu nni mulwiira kuti: chimwe nne chimwe chi mu raperera nne ku kuumbira ka mu chi heewa mane ka chive cheenu. 25Chi mu ziima nni murapera, mu lukeere ku woondera vamwi naanwe kuti isheeno wiina ku iwulu a mu woondere zivi zeenu naanwe. 26Cho kuti ka mu woonderi vamwi, nne isheenu wiina ku iwulu naaye keeti nna mu woondere zive zeenu.''

27Nni va ka voola haape kwa Jerusalema. Jeeso a vaati choo kaya vu yeenda mu iteempere vapurisita vakulwana nne vangolyi nne vahitizi va veeza kwaalyi. 28Nni va mucho kuti, '' U va heewa nne iini kulawula nne ku pannga iizi zintu? Mane yaava kuhi ku lawula njeeni?''

29Jeeso nna vacho kuti, ''Muni mu vuuza ipuzo, yi mwiina. Muni lwiire naame muni mulwiire itayero yini chita chaayo iizi zintu. 30Ikolovezo ya Johani yi vaalyi kuzwaa ku iwulu nandi mu vantu? muni itave.''

31Mmi nni va wambisana mukati kaavu nni valyi cho kuti, ''Chi twa acho kuti, a vaalyi kuzwa ku iwulu, mbwa acho kuti chiinzi ha mu seena mu va mu zumini?' 32Mmi chi twa acho kuti, a vaalyi kuzwa mu vantu,'...''mmi nni va tiya vuungi vwa vantu ka kuti vantu va veezi kuti Johane muporofita. 33Mmi nni ve itava Jeeso kuti, ''Ka twIizi. ''Mmi Jeeso naa vacho kuti, ''Nnaame keeti nni mulwiire itayero yini chita chaayo iizi zintu.''

121Lyiinu Jeeso nna taanga ku va ruta che milya. Naa cho kuti, "Mukwaame a va viaalyi iwa lyo muwoomba cho kulyi zaakiriza, cho kusa iriindi ha kamwiinwa muwoomba. A vaa zaaki inzuvo yiina he iwulu, cho kulyi walyima valyimi. Ku zwaaho choku yeenda mu musipiri. 2Che inako isheyeme nna ka tumina muhikaana ku va tokumeri ve iwa kuiiza ku hiinda zihantu zo muluwa. 3Mmi vava mu hiindi, choku mukava nni va mu tumina kwaa kazwa, naasa kweete chiintu.

4Hape nna va tumina muhikaana zumwi, u va va horofaza naaye mu mutwi mane choku mu fwiisa insoni. 5Choku tumina zumwi hape uva ve ihayi. Vava chiti vangi che nzira yi swana, ku horofaza vamwi mane cho ku ihaya vamwi.

6A veena zumwi muntu ya vaa si sheere kuti a mutume, mwaanaswiisu waakwe yoo sunitwa. A vaalyi njeeye wa mamanimani ku mutuma ku valyi. Naa cho kuti, ''Mu va ka mukuteke.'' 7Mmi valyimi vo muwoomba nni va waambinsaana kuti, "Uuzu njeeye swaana. Mu iize, tu mu ihaye, ku zwaaho vuswa muvu ku veere vweetu."

8Vava mu woondi choku mu ihaya, choku mu sohera haanzi lye iwa. 9Lyiinu, si iwa kaa chiti vulye? Keeze choku sinya voonse va tukumeere luwa ku zwaaho choku luha vamwi.

10Ka heena mu va valyi iilyi ingolo? "Ivwe lyi vava kaani vazaakisi, njilyi vaavi ivwe lyoku zaakira. 11Iichi chi vaalyi ku zwa kwa Simwiine mane chi komosa mu menso eetu." 12Nni vaa saka mu va woola ku woonda Jeeso, mmi choku tiya vuungi vwa vantu, ka kuti va vee zivi kuti koto u va guviriza. Ku zwaaho mpu va mu siyiire cho kulyi yeendera.

13Mmi lyiinu nni vaa tumina Vafarasayi nni veena Heroda kwaalyi kuti vaka mu woonde cha manzwi. 14Chiinga vaa sika, choku mucho kuti, ''Muruti, twiizi kuti ku wiina indava ne muntu mwa lolyera zintu, mane ko salululyi vantu. U ruta cho vusakusima inzira ye Ireeza. Kwiina mulandu ku ruwera mutero kwa Kaishara nandii? Tu ruwere nandi tu siye?'' 15Mmi Jeeso nne ziva kulyi lyanganya kwaavo choku vacho kuti, ''Chiinzi ha mu ni lyika? Mu nihe malyi kuti nni woolye ku a vona.''

16Nni vaa lyeeta amwe kwa Jeeso. Choku vacho kuti, ''Chiswaniso nne izina lyaani iizi? Nni vaacho kuti, '' Nji za Kaishara.'' 17Jeeso naacho kuti,'' Muhe Kaishara za Kaishara, Ireeza zee Ireeza.'' va va mu komokerwa.

18Lyiinu Vasadukayi vacho kuti ka kwiina ku vuuka mu vafu, nni veeza kwaalyi. Nni va mu vuuza nni vati, 19"Muruti, Mushe a va tu ngulyeri, 'cho kuti mukulwa muntu waa fwa choku siya mukulwaakazi, nni ku seena mwaana, a hiindi muihaavo wo mwaanche,choku zaalyira mukulwe vaana.'

20I vaalyi vaanaswiisu va mana iyaanza nne voovere, we ntanzi a va hiindi mukulwakazi choku fwa naa seena mwaana, 21zumwi wo vuuveri a va mu hiindi naaye choku fwa naa seena vaana, wo vuutatu naaye. 22"Veena ku mana iyaanza nne toovere nni vula ku woonda vahwiire. Ku masulye aavo voonse mukulwaakazi naaye choku fwa. 23Mu ku vuuka kwa vafu, chiva vuuka hape, kaa ku veere mukaani? Ka kuti aava vaanaswiisu voonse va va musesi.''

24Jeeso naacho kuti, "Ka njo vuti chiingi mu fosa, ka kuti kamwiizi iviivere nne ziho ze Ireeza? 25Chini vaa vuuka mu vafu, ka kwiina ku seswa nne ku sesa, mmi chiva swana nne mangiloyi ku iwulu.

26Mmi cho kuya chava fwiire nne ku vuuswa kwaavo, a ka mwiini kuvala mu ivuuka ya Mushe, che indava ye chivuna, ne kuti Ireeza ava waambi kuti, 'Njeeme Ireeza wa Aburahama, nne Ireeza wa Isaka mane nne Ireeza wa Jaakovo'? 27Ka heena Ireeza wa va fwiire, mmi nje Ireeza wava hala. Mu foseeza.''

28Zumwi wa vangolyi nne za ku zuwa ziva vaalyi ku waamba; nna vona kuti Jeeso we itava nenza. Nna mu vuuza kuti, "Njo wuhi mulao o zamba imwi?" 29Jeeso avee tavi kuti, "Chiina musula njo kuti, 'Zuwe, Isiraere, Simwiine Ireeza weetu, Simwiine u mwiina. 30U lukeere ku suna Simwiine Ireeza che inkulo yaako yoonse, cho luhuho lwaako loonse, muhupulo waanko woonse, nne che ziho zaako zoonse. 31Wo vuuveri mulao njo uuwu, U lukeere ku suna muntu kuninaako mmo ulyi suniine.' Ka kwiina umwi mulao hape ku zaamba iiyi yoo vere.

32Mungolyi nnacho kuti, "Muruti, Yoo shiyeeme! wa waamba cho vusakusima kuti Ireeza u mwiina, mane nne kuti ka kwiina Ireeza zumwe kunze lyaakwe. 33Ku mu suna che inkulo yoonse yaako, cho muhupulo nne ziho zoonse. Nne ku suna zumwe siina mmo ulye suni, ku zaamba ineo zoku hiisha nne zitavero zoku hiisha." 34Jeeso chiinga vona kuti we itava nenza ipuzo, nna mucho kuti, Ka wiina kulye nee muvuso we Ireeza.'' Chiinga kwaa zwaaho, ka kwiina zumwi hape a vaati nna alyi zuwa ku mu vuuza ipuzo.

35Jeeso nne itava vuti, chaa vaalyi ku kweete ku ruta mu itempere; nnaati, Chiinze vangolyi ha vacho kuti Kiristi mwaanaswiisu wa Daafita? 36Daafita iiye mwiine, mo luhuhu lu julola, a vaacho kuti, Simwiine ava waambi nne Simwiine waangu, wu ikalye ku iyaanza lyaangu lya malyo, mbwiita chi naa chita zira zaaku hoo tenteka matende. 37Daafita u mu suumpa 'Simwiine,' lyiinu vulye kuti Kirisiti a suumpwe mwaanaswiisu wa Daafita?" Chiinavungi cha vantu nni cha mu teekereza choku saanga.

38Mu ituto zaakwe Jeeso a vaacho kuti, "Mutiye va vangolyi va yeenda nni va zweete zizavalo zilye nne ku saka ku rumereswa mu misika 39Nne ku saka ku ikala mu meekalo eena ha vusu mu masinagoge, nne ku ikala mu zivaka za maziimo mu mikiti. 40Va ziyeza va fwiirwa mu mazuvo aavo, mane va rapera itapero inde kuti vantu va va vone. Aava vakwaame ka va taambulye ku nyaanswa ku kaando."

41Mmi Jeeso nne ikala haansi ku vambana nne iputukesi lya malyi mu itempere, avaa lolyereere vantu chiva viika malyi mu iputukesi. Vantu vaangi vava humine nni va viika malyi maangi. 42Mmi fwiirwa wo mukulwaakazi wo muhumanehi nne iza cho kuiiza ku newula malyi aakwe oovere, a lyikana ipeeni.

43Mane ava suumpi varutwa vaakwi choku vacho kuti, ''Cho vusakusima nni mulwiirite, uuzu mukulwaakazi wo muhunanehi waa zwiisa malyi a zaamba a voonse aava vaa zwiisa mu iputukesi lyi zwiisikizwa. 44Ka kuti voonse vaavo vava zwiisa chukuya muvu humiine. Mmi uzu mufwiirwa woo mukolwaakazi a vaa zwiisa kuzwa mu vuhumanehi vwaakwe, choku viika malyi aakwe oonse aava viikite vuhalo vwaakwe ha teni.''

131Siina Jeeso ha vaalyi kuzwa mu iteempere, zumwi wa varutwaana vaakwe nnaa mucho kuti, "Muruti, vone vulotu vwaa mavwee nne vulotu vwaa mazuvo!" 2Nna mucho kuti,'' U vweene muzaako woonse uuwu mukaando? Ka kwiina ivwe lyeeti nni lyi shaalye he iwulu lye lyimwe lyeeti nni lyi vulye ku saa wisikizwa haansi."

3A vaati cho wii ikeere he iruundu lye ziteente lyi va lolyinzeene ne itempere, Pitorosi, Jemusi, Johani nne Enduru nni vaa mu vuuzikiza ku mbalyi, 4''Tu lwiire, iizi zintu kazi pangahalye lyiiri? Cheeti nni chive chishupo chiinzi ha kuti iizi zintu chi ziina ha fwihi nne ku pangahala?''

5Jeeso nna tannga ku vacho kuti, ''Mu tokomere ka nzi kuvi nne muntu yeeti nna muziyeza. 6Vaangi ka vee ze mu izina lyaangu mane nni vacho kuti, njeeme iiye, mane kava ziyeza vaangi.

7Chi nna mwa zuwa inkoondo mane nne mahulyuhulyu e inkoondo, nni mu siye ku vireera; iizi zintu zi lukeere ku pangahala, mmi vufero keeti nni vu ku sikite. 8Chisi ka chi lwiisa chisi chimwe, mane nne vusimwiine ka vu lwiisa vusimwiine vumwi. Ka kuve nne ku nyanganya kwe inkaanda mu zivaka zi siyeene siyeene mane nne lwiinza. Aa matangiro izitavi zoku hwizumuka.

9Mu ikalye nni mulyi tokomeere. Ka va mutwaalye ha vusu vwe zikota zo molau, mane ka mu ku kaviwa mu ma sinagoge. Ka mu ziime ha vusu vwa va hitizi mane nne ha vusu vu vasimwiine che ivaka lyaangu, nni mulyi mu vupaki ku valyi. 10Mmi manzwi a lukeere ku waambwa ku vantu voonse.

11Chi nna vamu woonda mane choku mu sumina, mu siye ku vireera kuti kamu waambe nzi. Ka kuti mwe iiyo inako, cheeti nni mu wambe kamu chi heewa; keeti nni yi ku veere uunwe mu waamba, mmi kayi ku veere luhuho lu jolola. 12Mwaanaswiisu kunninaa o muntu kaa wuze waa zaalwa nnaaye kuti e ihayiiwa, mane nne isii wo mwana. Vaana ka va sandukire vazaazi vaavo mane choku va twaala ku lufu. 13Ka mu toyeewa nne vantu voonse che ivaka lye izina lyaango. Mmi iiye yeeti nna alyi woonderere mbwiita ku mamanimani, uuzo nje muntu yeeti nna hazwa.

14Chi nna mwa vuna chintu chiina ikwe nni chi ziimeene haantu ha jolola(a yoo vala a kumbulukwa), aavo veena kwa Judea va tiirire ku maruundu, 15aavo veena ku iwulu lye inzuvo va siye ku suuka choku injira mukati kaayo, nandi ku hiinda chimwi mwa teni, 16Mane naaye yo wiina ku luwa saanzi aa ka voolyi kuiiza ku hiinda chizavalo.

17Mmi ku mayivite aavo veena vahwiire mane nnavo veena tuchiche mwaawo mazuva! 18Mu rapere kuti sanzi nni ivi inako ya malyiha. 19Ka kuti ka kuve nne manyaando, a chita kuti ka eeni kuva ha teni mu inkaanda ku zwa ku matangiro e inkaanda, Ireeza cho u vuumba inkaanda, ku iiza ku sika suunu vuti, nnee, mane keeti nni kuve hape. 20Kwaanda o kuti Ireeza a vaa fwiisa aavo mazuva nni ku sana ku vaavi nne inyama yeeti nni yiva hazwa. Mmi che ivaka lya va salyitwa, aavo vaa va salyii, a vaa kosolyi mazuva.

21Cho kuti zumwi kaa mucho kuti, 'Mu vone, Kirisiti zunuu!' 'kamba mu vone, zu nnaa kuna!' saanzi nni mu zumuni. 22Ka kuti Vakirisiti va mapa nne vaporofita va mapa ka va voneke mane ka vahe zitoondezi nne zikomosa, zoonse iizi nni zi pangirwa he iwulu lyoku ziyeza, chiku woolyeka, mane nne va salyitwa. 23Mu tokomere! chi nna mulwiira izii zintu zoonse inako nni yi siina ha vusu.

24Mmi ku mamanimani aawo mazuva a manyaando, izuva kalyi siiswa, mweezi keeti nni wuhe iseri, 25inkaani naazo ka ziwe ku iwulu, mane nne ziho ziina mu iwulu kazi nyungooswa. 26Lyiinu njeeti nni va vone mwaanaswiis wo Mukwaame nna keeza mu makope che ziho zikaando nne ku vereenga. 27Ku zwaaho kaa tumine mangiloyi aakwe ku ka kunganya vantu vaakwee vaa salyitwa ku zwa mu imbalyi ze inkaanda zoonse nne inhuho zoonne, ku zwa inkaanda kuyi manina mane nne ku iwulu kulyi manina.

28Mu lyi tute ituto ye isamu lye ikuzu. Hoo hwaaho vulyo tu tavi twa teni chitu taanga ku huvahala mane nne ku taanga ku mena makova, wiizi chipeto chi mwe iziva kuti imbumbi chi yiina ha fwihi. 29Voo vo vuti hape ha mu vona iizi ziintu, Nnaa ho hape, ha mu vona iizi zintu nni zi pangahala, mu izive kuti wiina ha fwihi, ha fwihi nne mulyaango vulyo toota.

30Cho vusakusima nni mulwiirite, uulu luzuvo keeti nni lu hite mbwiita zonse iizi zintu chini zaa pangahala. 31Iwulu nne inkaanda kazi hite mmi manzwi aangu aawo keeti nni a mane. 32Mmi ka heelyo izuva ne nako, ka kwinna yo wiizi nandi mangiloyi ku iwulu, nne haiva mwaanaswisu, mbwiita taayo.

33Mu tukomere! mu lyiisa, ka kuti kamwiizi kuti inako inzi. 34Ku kola mane iiri unkosi wa hinda lweendo- yoo siya inzuvo yaakwe choku yi siira vahikaana vaakwe, zumwe nne zumwe nni kwiina haa tokomeere, mmi choku laula shaangavira kuti saanzi a laalyi.

35Chiingi lyiinu mu ikalye nni mu tokomeere, ka kuti ka muiizi kuti simwiine we inzuvo u keeza lyiiri; yi woola kuva chiteengu, hakati ka masiku, mukoombwe chiwu lyira, nandi ha kusasani. 36Haiva nneeza choku hweera, saanzi amu waani mu lyeere. 37Chini mulwiira nni chi lwiira zumwe nne zumwe; Mu lyiisa!''

141Ku vaati chiku sii sheere mazuva ooveere kuti mukiti wee chiinkwa kuti u injire. Varuti va kulwaana nne vangolyi va vaa ku nahana mweeti chi va wonda Jeeso mane choku mu ihaya. 2Mmi vava kucho kuti, "Nanta che inako yo mukiti, ku chitira kuti saa nzi kuvi nne mukuvukuvu"

3Yi vaati Jeeso cho wiina kwa Bethani, mu inzuvo ya Sayimoni we chiseenda, nna a lyi ghonkete he itafulye, mukulwakazi nne e za kwaalyi nna kweete inkooma ya mafuta a vaalyi ku dura, a vaa chiititwa che naradi yoo yoona. Nna pwachula inkooma choku mu itira mu mutwi. 4Mmi nni kwaava vamwi vava nyeerwa. Nni valyi waamba nni vacho kuti, "Ivaka lyoku siinya vuti nje lyihi? 5A a mafuta nni a va wuzwa cha malyi a lyikana miyaanda yoo tatwe, ku zwaaho cho kuha vahumanehi."Mmi nni va mu lwiisa.

6Mmi Jeeso nna vacho kuti, "Mumu siye yee yeena. Mu mu katalyeeza iinzi? Wa nni chitira chintu chilotu. 7Vahumanegi mumu kwiina nnaavo inako zoonse, mmi ha mu saka ku va tusa mumu ku va tusa, mmi imme keeti mu kwiina naame inako zoonse. 8Wa chiita cha woola ku chiita: wa siinga muviri wangu nna wu vakanyeza ku wuungwa. 9Cho vusakusima nni mulwiirite, kumwi nne kumwi uuwu mulaeza kweeti nniwu ka kutazwa mu inkaanda yoonse, uuzu mukulwaakazi cha chaa chita kachi ku waambwa, mu ku mu kumbulukwa."

10Mmi Judasi Isikariyota, zumwi waavo veena ikumi nne toovere, cho kuzwa cho kuya ku varuti vakulwaana ku gaana inzira yoku mu vaha. 11Mmi varuti vakulwaana chiinga vaa zuwa vulyo, nni va saanga choku mu sepisa malyi. Nna taanga ku gana inzira yo kuti a woonde Jeeso choku mu vaha.

12Luzuuva lwee ntani lwe chinkwa chi sa viriswa, chiva chita chitavero che Imbereere yoku zambuluka, varutwana vaakwe nni va mucho kuti, "U saka kuti tuka vakanyeza kuhi zilyio zoku zambuluka?" 13Nna tuma varutwana vaakwe voo vere nna vacho kuti, "Mu injire mukati ko muzi, mumu vone unkosi yo ulyi twiikite iyeemere lya menzi mwaa kopane nnaanwe. Mu mu shaalye mu masulye. 14Che njiira mu inzuvo, mu mu ichirire mukati cho kucho si inzuvo, "Muruti u cho kuti, "Inzuvo yaangu ya masikiro yiina kuhi kweeti nni lyiire zilyio zo ku zambuluka nne varutwana vaangu?"

15Mwa mu toondeza inzuvo yiina ku iwulu yiina chimwi nne chimwi. Mutu vaakanyereza koo kooko. 16"Varutwana nni vaa zwa choku injira mu muzi. Nni va ka waana chmwi ne chimwi chi viikitwa mwaa va vacho, mmi nni vaa vaakanyeza zilyio zo ku zambuluka hoo hwaaho.

17Ivaati chi kuva chiitengwana, nne za nne veena ikumi nne voo vere. 18Chiva sii kosi he itaafulye ni va kweete va lyia, Jeeso nnacho kuti, "Cho vusakumasima nni ti, zumwi weenu yoo kweete u lyia naame mwaa nni wuza.." 19Voonse va va zuwi vutuku, ku zwaaho zumwi nne zumwi waavo choku tanga nni va mucho kuti, "A ka heena iime toota?"

20Jeeso naave tava nna vacho kuti, "Nje zumwi wa veena ikumi nne toovere, yo kweete u suunsa chinkwa naame mu kasuva ha hanu. 21Ka kuti Mwaanaswiisu wo Mukwaame mwa yeende che inzira ya mangolo mu a waambite ka haakwe. Mmi kwaalyi iiye yoo wuza Mwaanaswiisu wo Mukwaame kaku kwiina vumayi! chiimu shiameere. Mane ku veena vutuka kuti nna sana a vaa zaalwa."

22Chiva si kweete va lyia, Jeeso nna hiinda chinkwa, nna chiha mikoonde cho kuchi ghamoona. Choku vaha nna vacho kuti, "Mu hinde iichi. Uuwu ngo muviri waangu." 23Nna hiinda inkomoki, cho kulyi tumeresa, choku vaha, mmi nni va nywa mwa teni voonse. 24Nna vaacho kuti, "Ichi nje malaha aangu oku zuminzaana, e itiriirwa vaangi. 25Cho vusakusiima nni mulwiirite, keeti nni nni voolye nni nywe iichi chi haantu cho muwoomba mbwiita mwe lyina izuva chi nni nnaati chi nni chinywa chihiya mu muvuso we Ireeza."

26Chiinga vaa mana ku zimba luzimbo, vava yeendi ku iruundu lye ziteente. 27Jeeso nna vacho kuti, "Mu voonse mwiina hanu mu mu nni tiyire, mu kuti ku ngolyetwa, 'Kani dame mulyisani mmi imbereere ka zi hasane."

28Mmi chi nni nna vuuswa, ka nni yeendere kuvusu vweenu kwa Galaleya." 29Pitorosi choku mucho kuti, "Nangati voonse kava ku tiyire, imme keeti nni nni kutiyire."

30"Jeeso nna mucho kuti, "Nni ku lyira vusakusiima kuti, masiku a suunu, mukoombwe nni wu seeni kulyira koo vere, mo u kulyi nni sampwiire koo tatwe." 31Mmi Pitorosi nnaacho kuti, "Cho kuti nni lukera kufwa naawe, keeti chi nni kulyi sampula." Vonse nni va zumizana kaha iichi.

32Nni vaa sika ku chivaka chi sumpwa Gethesemani, mmi Jeeso cho kucho varutwana vaakwe kuti, "Mu ikalye aha chi nni si ka rapera". 33Nna hiinda Pitorosi, Jemusi nne Johani choku yeenda naavo mmi nna taanga ku katazeha mu luhuho lwaakwe a hulu. 34Mmi nna vacho kuti, "Nni zuwiire vutuku a hulu mu luhuho lwaangu mu nni woola kufwa. Mu ikalye hanu mu lolyerere."

35Jeeso nna chuutira ha vusuzana, choku wiira haansi, mmi nna rapera kuti cho kuti ku woolyeka, ichi chivaka chi zwiiswa kwaalyi. 36Nnacho kuti, "Abba, Ita, zintu zoonse zi woolyeka kweenu. Mu zwiisa iyi inkomoki mwaangu. Mmi nni yi saalyi choku suna kwaangu mmi ive choku suka kwaako."

37Cho voola ku valyi a vava waani chi va lyeere, mmi nnacho Pitorosi kuti, "Sayimoni, u lyeere?" Ko woolyi ku yiiza luvaka lu mwiina?" 38Lyiisa nne ku rapera kuti sanzi wu injiri mu mulyiko. Luhuho lu taveere, mmi muviri u suntikite." 39Mmi nna voola hape kuku ka rapera nna voolyera manzwi aava ku waamba.

40Mmi hape neeza kuva waana va lyeere, mmi menso aavo a vaalyi ku lyema mane nni va seezi kuti muva mu tiinzi. 41Nneeza lo vuutatu mmi nna vacho kuti, "Mu sii lyeere nne kulyi teeka? Chikwe injiha! Chivaka chi chaa sika! Mu vone! Mwaanaswiisu wo Mukwaame u kweete u wuzikizwa vaheedane. 42Mu ziime, tuyende. Mu lolye, yoo kweete u ni wuza wiina hafwihi."

43Cho usii kweete ku waamba, Judaasi, umwi waavo va veena ikumi nne toovere, choku sika, mmi chiinavuungi cha vantu ku zwa mu varuti vakulwaana, vangolyi ne vakulwaana vava kweete masaavulye nne milyiinga nne inkulyi. 44Mmi muwuzi wa kwe cha vava heere chishupo cho kuti, "Weeti nni koote, injeye. Mumu voonde mane choku mu hiinda. 45Judasi chinga sika, a va hiitiriri kwa Jeeso chiku mu cho kuti, "Muruti!" Ku zwaaho nna mu koota. 46Nni va vika manza halyi choku mu wonda.

47Zumwi waavo a vaa ziimeene he imbalyi nna zwiisa isaavulye yaakwe choku kanka muhikaana wo muruti mukulwaana choku mu kosola kutwi. 48Jeeso choku vacho kuti, "Mu nni iziriire mane iiri mu keeza kuku woonda musa, cha masaavulye nne inkolyi kuku nni woonda? 49Nni va ku zuuza naanwe, nni nni ruta mu itempere, ka heena mu va nni woondi. Mmi iichi chi va chitahalyiri kuti mangolo e izuzirizwa." 50Mmi voonse va veena nne Jeeso choku mu siya choku ngombola.

51Muswiisuzana, a vaa zweete ijira vulyo lya vaalyi vungiite chaalyo, a vaa sheere Jeeso mu masulye. Vakwaame chiinga va mu woonda 52nna zwa mu ijira lyaakwe hoo hwaaho choku ngombola nna saa zweete.

53Nni vaa twaala Jeeso ku varuti vakulwaana. Va vaa kungeene haalyi Jeeso nne varuti vakulwaana, vakulwaana nne vangolyi. 54Lyiinu Pitorosi a vaa shalyiire ku masulye neena kulyezana, vuulye ku ya ku mazuzo a varuti vakulwaana. Nne ikala mukati ka vashaangavira, va vaa zootete mulyiro.

55Lyiinu varuti vakulwaana nne vu ziwululyi voonse vwa Vajuda nni vaava ku sakira Jeeso indava kuti va woolye ku mu ihayire ha teni. Mmi nni vaa vula mane nnaangati indava yii mwiina. 56Mmi vaangi vantu nni va lyika ku lyeeta indava za mapa zoku mu hambiriza, ku zwaaho indava zaavo nni zaava nni zi saa zumiinzaani.

57Vamwi vava ziimi choku mu hambiriza indava za mapa, nni vacho kuti, 58"Tu va mu zuwi naata kuti, 'kani sinye iyi iteempere yi va chitwa cha maanza, mmi mu mazuva ootatwe kani zaake yimwe yi saa zaakwi cha mayaanza.''' 59Nni ha kuva vulyo ku hambiriza kwaavo nni kwa vula ku zumiinzaana.

60Muruti mukulwaana nna ziima mukati kaavo choku vuuza Jeeso, ''A ka wi itavi? Zinzi iizi ziva kweete vaku hambiriza aava vakwaame?'' 61Mmi iiye a valyi toontoza nna vula ku itava. Hape muruti mukulwaana nna mu vuuza naati, "Aa njoowe Kirisiti, mwaanaswiisu wa yoo wiina mikoonde?'' 62Jeeso nnacho kuti, "Njeeme. Mmi kamu vone Mwaanaswiisu wo Mukwaame cho wii keere ku iyaanza lya malyo lye ziiho mmi nna keeza cha makope e iwulu.''

63Muruti mukulwaana choku haloola zizwaato zaakwe cho kucho kuti, "Aa tu si saka vashupi? 64Chi mwaa zuwa matuka oonse. Lyiinu mu tinzi?" Mmi nni va zumiinzaana voonse kuti u lukera ku ihayiwa. 65Vamwi nni vaa taanga kumu swiira mate, mane nne ku mu wuumba vusu vwaakwe choku mukava ku zwaaho choku mucho kuti, "Porofite!" Vaveresi nni va mu hiinda choku mukava.

66Ivaati Pitorosi, nna siina mu irapa lyiina haansi, zunwe wa vahikaanakazana vo muruti mukulwaana neeza kwaalyi. 67Nna vona Pitorosi nna zimeene ha mulyiiro nna zootete, mmi nna mu chuutira choku mu lola nenza. Choku mucho kuti, "Naawe saka wiina nne Jeeso, wo munazareta." 68Mmi iiye nna alyi saampula, nnaati, "Ka niizi mane nne ku taluhanya zo kweete u waamba chaazo." Ku zwaaho nna zwa choku injira mu irapa.

69Mmi mukazana wo muhikaana choku mu vona, choku taanga kucho vava ziimeene aho, "Uzu nkosi nje umwi waavo!" 70Mmi iiye nna alyi saampula hape. Ka vakazana vulyo hape nnaavo aavo vava ziimmee hoo hwaaho nni vaacho Pitorosi kuti, cho vusakusima u mwiina Galaleya.''

71Mmi choku taanga kulyi fwiiza nne kulyi koonka, ''Ka nni mwiizi uzu nkosi umu kweete mu wamba ka haakwe" 72Mukoombwe hoo hwaavo vulyo choku lyira lo vuuveri. Lyiinu Pitorosi choku kumbulukwa manzwi a Jeeso aava waambi nnaaye: "Piri mukoombwe nni wu seeni kulyira koovere, ko u kulyi nni saampwiire koo taatwe." Mmi nna zuwa vutuku a hulu mane choku taanga kulyira.

151Ha ku sasani, Vapurisita vakulwaana nni va kopana nne vakulwaana nne vangolyi nne voonse va ziululyi va Vajuda. Ku zwaaho nni vaa sumina Jeeso choku hindiira kuungi. Nni va mulyeeta kwa Pilato. 2Pilato nna mu vuuza kuti, ''Aa njoowe Simwiine wa Vajuda?'' Nna mu itava kuti, ''Chi waa waamba." 3Vapurisita vakulwaana nni va lyeetera Jeeso milaandu miingi.

4Pilato hape nna mu vuuza, "Ka wii tavi? ''Vone kuti milaandu yoolye yi va kweete vaku hambirza!" 5Mmi Jeeso naa ziimika ku itava Pilato, ku zwaaho iichi nni cha mukomosa a hulu maaswe.

6Mmi lyiinu mu inako yo mukiti, Pilato a vaalyi ku sumunuaanga ibantiti lwii mwiina, ibantiti lyiva vaalyi ku kuumbiraanga. 7Kwa teni uuko nne zihaanga mu intorongo, mukati ke ziihayi va vaa woondeerwa vuhanga vwaavo, ku veena mukwaame yaa vaalyi ku suumpwa Barabasi. 8Chiina vuungi nni cheeza kwa Pilato, choku taanga nni chi mukumbiira kuti a va chitire mwaa vaalyi kuva chiteraanga kalye.

9Pilato nna a vee tava cho kuti, "Mu saka kuti nni mu zwiisikiza Simwiine wa Vajuta?" 10Ka kuti a veezi kuti ivaalyi cha mavaka o muna chiingi Vapurisita vakulwaana va vaa twaalyi Jeeso kwaalyi, 11Mmi Vapurisita vakulwaana nni vaa ngunduganya vantu kuti ku zwiiswa Barabasi nni ha kuva vulyo.

1213Pilato nna vee tava hape kuti, ''Lyiinu nni chite nzi cha Simwiine wa Vajuda?'' Nni vaa huwa hape, "A vaambulwa!"

14Pilato nna vacho kuti, "Mulaandu iinzi waa chiite?" Mmi aavo nni va zwiira kuvusu nni va huwa, "A vaambulwa." 15Pilato nna saka ku koonda vantu, lyiinu nna a va zwiisikiza Barabasi. Choku shimeha Jeeso ku zwaaho choku mu vaha kuti va mu vaambulye.

16Masolye nni va mu hiindira mu irapa (iiyo yi vaalyi nje inzuvo inkaando yo muvusu), nni vaa suumpa chikwata choonse cha masolye. 17Nni vaa muviika chizavalo iiye Jeeso chi kola chi suvira, ku zwaho mane c hoku mu pangira ihwiisi yo miiya cho kuyi mu zwaatika. 18Nni vaa taanga ku mu kuteka choku shewunwiina nni vati, "Rumere, Simwiine wa Vajuda!"

19Va va mukavi mu mutwi nne ku muswiira mate. Nni va mufukamina cho kulyi chitisa iiri va murapera. 20Chiinga vaa mana ku mu shewunwiina, choku mu zavula ijira lyi kola lyi suvira ku zwaaho choku mu zavika zizwaato zaakwe, mane choku mu hiindira kuunze kuku ka mu vaambula. 21Nni vaa hambiriza muntu yaa vaalyi kulyi hitira nna kazwa kuungi kuti a hiinde chitavero cha Jeeso, mukwaame yaa vaalyi ku suumpwa Sayimoni wa Serene iisi wa Alekizanda nne Rufaasi.

22Masolye nni va lyeeta Jeeso mu chivaka chi suumpwa Gologota (chiku landununwa njo kuti, Chivaka cha kagovolyi"). 23Va va muhi vujwara vu kopeenywa nne mafuta a nuunkisa vulotu, mmi nna kaana ku vunywa. 24Va va mu vambulyi choku halola chizavalo chaakwe choku kava indawula ku vona kuti isolye lyimwe nne lyimwe mulyi hiinde chibalyi chihi.

25vaalyi inako yo vuutatu chiva mo vaambula. 26Nni va ngola ha shishupo milaandu yaakwe, "Simwiine wa Vajuda." 27Mmi nna vambulwa nne vasa voovere, zumwe nnena mu iyaanza lya malyo zumwe nneena ku mamonso. 28Mmi ingolo nni lyee zuzirizwa lyicho kuti,

29Aavo va vaalyi ku hita nni va mutuka, nni va nyuunga mitwi nni vati, "Aaha! uuwe yoo va ku woola ku rutununa iteempere choku yi zaaka mu mazuva ootatwe, 30Lyi haze mane u suuke haansi lye chifwapaano!"

31Che nzira yi swana Vapurisita vakaando va vaalyi ku mushewunwiina voonse, nne vangolyi, nni vaacho kuti, a vaa haza vantu vaangi, mmi lyiinu iiye ka woolyi kulyi haza. 32Lyiinu a Kirisiti, Simwiine wa Isiraera, a suuke ha hanu vuti ha chifwapaano, kuti tu woolye ku vona choku zumina." Mmi mane nnaavo vava vambulwa nnaaye nni va mutangoola.

33Che inako yoku mana iyaanza nne ka mwiina keerima nni ka zavala inkaanda yoonse mbwiita ku inako yoku mana iyaanza nne toonne. 34Che inako yoku mana iyaanza nne toonne Jeeso nna huwa che lyiinzwi ikaando, 'Eloyi, Eloyi, Lama savakatani? yi landununwa kuti, "Ireeza waangu, Ireeza waangu, Uni soherereere inzi?" 35Vamwe vava ziimeene ha fwiihi nni vaa zuwa maanzwi aakwe ku zwaaho cho kucho kuti, "Mu vone kweete u suumpa Elija."

36Zumwe nna ngoombola, choku ka viika shaantukwe ha chipoonji, kuchi someka ha luhe, ku zwaaho choku muha kuti anywe. Mukwaame wa teni nnaacho kuti, "Mutu vone nandi Elija mweeze a mu suusa." 37Lyiinu Jeeso nna huwa che lyiinzi ikaando mmi choku fwa. 38Mmi ijira lyo mu iteempere nni lyaa haluka koovere kuzwa ku iwulu lya teni kuya haansi.

39Mmi lyiinu musenchurona yaava lolyereere Jeeso chiinga vona kuti lyiinu chaa fwa che iiyi inzira, nnacho kuti, "Cho vusakusima uuzu unkosi, Mwaanaswiisu we Ireeza." 41Mmi ku veena vakulwaakazi vava lolyereere nni va ziimeene halyezana. Mukati kaavo ku veena Mariya Magadalena, Mariya ( nyina wa Jemusi nne mwaanche wa Josese), nne Salome. 40Ka kuti cho u siina kwa Galaliya va vaati nni va mushaala mu masulye nne ku muteendera. Mmi hape nne vakulwaakazi vaangi nni veeza nnaaye nni va keeza kwa Jerusalema.

42Chitengwaana chiinga chaa sika, ka kuti chilyi vaalyi Izuva lyo kulyi Tukisereza, iilyo nje, izuva lyiina ha vusu vwe Insavata, 43Joosefa wa Aramatiya nne za kwa teni. A vaalyi mukwaame yoo kutekeha wo vukopano yaa va zimaniine muvuso we Ireeza. A vaa yeendi kwa Pilato nna seena lyoowa choku ka kumbiira chituunta cha Jeeso. 44Pilato nna komokwa kuti Jeeso mane chaa fwa kalye; mmi choku suumpa musenchurona choku mu vuusa nandi Jeeso chaa fwa kalye.

45Lyiinu Pilato chiinga a lyemuha cho musenchuriyona kuti Jeeso chaa fwa, muviri wakwe nna wuha Joosefa. 46Joosefa a va ka wulyite ijira ihiya. Nna a ka mu suusa ha chifwapaano, naa mu hambeera che ijira, choku ka muviika mu ikuumbu lyi vaa veezwa mu ivwe. Ku zwaaho nna pindumwiina ivwe ha mulyaango we inkuumbu. 47Mariya Magadalena nne Mariya nyiina Josese nni vaa vona haa va wuungwa Jeeso.

161I vaati Luzuva lwe Insaavata chiinga lwa mana, Mariya Magadalena nne Mariya nyina wa Jemusi, nne Salome vava ka wulyi mafuta kuti veeze va ka siinge muviri wa Jeeso. 2Ka ku sasaani ahulu ku siri ku luunza luzuva lwe intanzi lwe insuunda, nni va fumina ku ikuumbu izuva chi lyi zwa.

3Va vaalyi ku wambinsaana, ''Injeeni yeeti a ka tu chunduluseza ivwe lyiina ha mulyaango we ikuumbu?'' 4Mmi yi vaati chi va nyemuna menso, nni va vona kuti ivwe lyi zwiisiizwa, mu kuti lyi vaalyi ikaando.

5Nni ve injira mu ikuumbu choku vona mulombwaana a vaa zweete ku tuva, nne ikeere ku malyo, nni vaa komokwa. 6Nnaa vacho kuti, ''Saanzi mu tiyi. Mu saka Jeeso wo mu Nazareta, iiye a va vambulwa. U vuukite! Ka heena aha. Mu vone ha chivaka ha vava mutuulyite. 7Mmi mu yeende, mu ka lwiire varutwana vaakwe nne Pitorosi kuti u kaya vu yeendera ha vusu vweenu kwa Galaleya. Ka mu kamu vone koo kooko siina mwa va mulwiiri.''

8Nni va zwa mu ikumbu nni va kaya vutiya; nni va chachalyikite nne ku komokwa. Ka kwiina u va vaa lwiiri che ivaaka lyo kuti va veena lyowa.

9Ka ku sasani a hulu nni ku siri ku luunza izuva lye ntanzi lye insunda, cho mana ku vuuka, choku kalyi vonesa kwa Mariya Magadalena, waa va zwiisa madimona eena ku mana iyaanza nne toovere. 10Nnaa zwa choku ka lwiira va veena nnaavo, chi va vaalyi ku sii kweete ku mulyira. 11Va vaa zuwi kuti u hala mane a vaa vonwa naaye, mmi ka heena vaa va zumini.

12Ha masulye eezi zintu a vaa kalyi vonahaza mu vantu vooveere va vaalyi kuya vu yeenda mu nzira. 13Nni vaa yeenda choku kalwiira varutwwana voonse, mmi nni va vula ku zumina.

14Ku zwaaho Jeeso naa lyi toondeza kwaavo va veena ikumi nne kamwiina chiva sii keere nni valyia he itafulye, choku va lwiisikiza ku vula itumero kwaavo nne inkulo inkukutu, che ivaka lyo kuti keena vava zumini avo vava mu voni chiinga mana ku vuuka mwaavo va fwiire. 15Nna vacho kuti, ''Mu kwiiya mu inkaanda yonse, mu ka chumayire mulaeza mu vantu voonse. 16Iiye yo zumina choku kolovezwa kaa hazwa, mmi iiye yaa saa zumini ka nyanswa.

17Iizi zitoondezi kazi yeende naavo va zumina: Mu izina lyaangu ka va zwiisa Madimona. Ka va waambe mu indimi zihiya. 18Ka va woonde inzoka cha maanza aavo, mane hape ka vati nni ha vanywa chinywantu chi ihaya, keeti chichi va sasamisa. Ka va viike valwaala maanza, ku zwaaho ka va holye."

19Yi vaati Simwiine choo mana ku waamba nnaavo, nna a taantusizwa ku iwulu choku ke ikala ku iyaanza lye Ireeza la malyo. 20Varutwaana nni vaazwa choku ka kutaza kumwe nne kumwe, voovo vulyo Ireeza nneena naavo nne izuziriza manzwi che zitoondezi ziva vaalyi ku panga mukati kaavo.