Magalata

11Uzu nji Paulusi mulutwana. Kena ni mulutwana wa vantu kapa wa muntu kono wa Jesu kreste ni Reeza Tayo, ya va muvusi ku vaafu. 2Vonse vena name, ni ñolela ku nkereke za Magalata.

3Chisemo ni nkozo kuzwilila kwe Reeza Shetu ni simwine Jesu Kereste 4Iye ya va mu tambiki zivi zentu, cwale kuti ku zwiswe zivi ze nako yinu, ku zwila kwi tanto ye Reeza ni Tayo. 5Kwali ku ve ni kanya kuya kwile.

6Chi ni makele kuti chi musandukile ku Evangeli. Chi ni makele chi mu musandukile uzo ya va mi sumpi cha chishemo cha kereste. 7Linu kakwina Evangeli yimwi, kono kwina va mwi vakwame va filikanya mi vasaka ku shinya Evangeli lya Kereste.

8Kono ni heva iswe kapa In'geloi lizwa kwiwulu liswanela ku kutazwa kwenu Evangeli kuhita Evangeli li tu va kutazi kwenu, u swanelwa chikuto. 9Sina ha ku wambitwe kutanzi, cwale ni lyahanu ni cho kuti, "Heva kwina zumwi yo mikutaza linzwi kuhita linzwi li mu va tambuli, u swanela chikuto.'' 10Lya hanu ime ni kolwe vantu kapa Ireeza? Kana ni ka vusaka ku tavisa muntu? Heva ni si saka ku tavisa vantu, nji kuti kena ni muhikana wa Kereste.

11Kokuti ni saka kuti mwi zive inwe va kwangu, kuti Evangeli yini kutaza kena linzwi bulyo lizwa ku vantu. 12Kena ni vali tambuli ku zwililila ku muntu, kapa ku lutiwa. Kono ivali che sinulelo izwa kwa Jesu kereste kwangu.

13Mu va zuwi za vuhalo vwangu vwe ntanzi nini sili ni muJuda, muni vali kunyandisiza ni ku wondisa valumeli ve kereke ye Reeza ku hitiliza ni ku yi shandoola 14Ni va zwilile avusu ni vamwa ngu ntuto ya chi juda, ni va tukufalelwe mikwa ituva lituti kuzwila kuve sikulu kwetu.

15Kono Ireeza avasangi hahulu cha kuni keeta ku zwilila mwi vumu liva mayo. A va ni sumpi cha chisemo cha kwe, 16ku chitila kuti ni mwi ziva haze kuva Machava. Kena ni va litahaneli ku sakisisa ku muvili niku malaha. 17Cho kuti kena ni vayendeli kwa jerusalema kwa vo vava vile kale va lutwana intanzi nini seni.Kono ni va yendeli kwa Areviya ni kuvola kwa Damaseka.

18Linu haku mana zilimo zo tatwe ni va yendi kwa Jerusalema ku yendela ku ke zivana ni Kefasi. Mi, ni ne kala naye mazuva ene kumi ni mazuva a likane yanza. 19Kono kena ni va voni nanga yenke mulutwana kwanda Jakobo mwanche a Jesu. 20Mulole, kwe Reeza, kani chengi, ku zini ñolete kwenu.

21Linu, china yenda ku nkanda za Siriya ni Siliya. 22Lya hanu zile kani ziveki havusu vwe nkeleke ya Judeya vachi vena kwa Jesu, 23kono avo zile vatekeleze vulyo, "Uzo ya vali ku tunyandisa, lya hanu uzo cho lumbeka intumelo ya vali kulwisanisa ni kunyandisa." 24Zile va lumbeke reeza cha ngu.

21Linu ku zwa zilimo zi na yikumi ni ntoone ni va yendi konji kwa Jerusalema ni Varnavasi. 2Ni va hindi vulyo ni Tite. Ni va yendi vulyo kakuti Ireeza avali tondezi kwangu ku ni swanela kuyenda. Ni va va tuli ha vuusu byavo Mulayezo uva swanela ku kutaza ku va Lichava. Kono ni va li ku wamba kuvali cha kulipata kwavo va vali ku vonahali ku va vayendisi va vu tokwa. Ni va woli kutenda vulyo vakeni cha ku cho kuti kena ni va li ku hwelete kapa kutiya, cha ku sa sinya inako.

3Kono kakwina ni heva Tite, ya vali kwina na me, ya vali Mugerike, ya va hambilizwa ku ya ku mupato. 4Yeyi yinda yi va letwe vakeñi cha valumeli va maapa va vali kukeza cha kuliwungula ku ku tweela yi tukuluho yi vena na yo kwa Jesu Kereste. Va vali ku shukelwe ku tu vika mu vutanga bwa mulawo. 5Kena tu ve chilili ku kuvikwa ku mulawo wavo ni heva ihoola, chakuli chilila vu niti bya inzwi mpoona chilishala ni lishala ni lisa chinchintwe kwenu.

6Kono vavo va vali ku voneka ku va va vutokwa ka kwina zi vava tusi kwangu. Zoonse zi va vali kutende kwangu ke na zi vali kwina tuuso. Ireeza ka tambuli muntu che sovozi. 7Ni hakuvavulyo va va voni kuti ni ka vu kutaza Linzwi kwa vo va sena va vali kwina mupato. 8Kwe Reeza, ku swana vulyo ni kwa Pitorosi ya va tendwa mulutwana kwavo va vali kwina mupato, ni kwangu ku va sebezwa vulyo ku va Lichava.

9Cwale Jakovo, Kefasi, ni Joani, va ve zibya ku va va zaki ve kereke, mu zuwisise chisemo chi va helwe kwangu, vava vonisi kutavela ku sevelisana ni Varnavasi name. Va vatendi vulyo kuti va wole ku yeenda kuva Machava, ni ku chokuti va wole kuyenda ku vena mupato. 10Va vali kusaka iswe kuti tu zeze va votana. Ni vali kwina chiseho ya kutenda chencho chi sakahala.

11Lyahanu linu Kefasi henza kwa Antioke, Chi ni mu kanina havusu bwe mpaata ya kwe kakuti ava foseze. 12Chetanzi vamwi vakwame ni va seni ku sika kwa Jakovo, Kefasi avali kulya ni va Machava. Kono cwale ava vakwame ha va keza, cha zimana mi ni kuva vutavuleni ni va Machava. Cha vali ku tite ava vakwame va vali kusaka mupato.

13Mane ni vungi bya Majuda ni va kopana ne Kefasi mu kulinyemona. Ikalavo ivaali kuti nanga Barabasi chava yembulwilwe ku linuneka kwaavo. 14Kono hani vona kuti ka ve chilile vusakusima bye linzwi, ni na waamba ne Kefasi ha vusu byaavo voonse, "Haiva mu Vajuda mi ni mu hala che ikute lya vantu va Lichava vulyo kwaanda a ikute lya Vajuda, mu woola ku hambiliza vule va Lichava kuhala ili Vajuda?

15Iswe tu maJuda cha ku pepya mi yisini "ve Lichava va tenda ziivi" 16mwi zive kuti ka kwina na ngati wu mwina yeta njolozwe cha musevezi wa mulawo. Ni hakuvavulyo, va njolozwa che tumelo ya Jesu Kereste. Tu vakezi che tumelo kwa Jesu Kereste cwale kuti tu njolozwe che tumelo kwa Kereste mi yi sinyi cha musevezi wa mulawo kakwina nyama ye te ni njolozwe.

17Kono heva, ni tusaka Reeza kuti atu njoloze ka Kereste, tu liwane na swe tu veene kuti tu va yenzalivi, kana Kereste u swanela ku va mutanga we chiivi? Sanzi ku ve vulyo! 18Heva ni zaaka isempo yangu cha kuya cha mulawo, Isempo ichini va sinyi kaale, ni livonahaza kuti ni mucholi wa mulawo. 19Ku zwila ku mulawo ni va fwi ku mulawo, ili kuti ni haale che Ireeza.

20Ni va konkotelwa vulyo ni Kereste. Kayisili me ni haala kono Kereste njo haala kwangu. Vuhalo vuni haala linu mwi nyama ni vuhala che tumelo ya Mwana Reeza, Uzo ya va ni suni ni kuliha yiye mwine kwangu. 21Ke se ni manise chisemo che Reeza, chokuti heva va lukite vavali kuhala mulawo, linu Kereste ni ku sena za va fwili.

31Zihole za Magalata! Menso aani mavilala avamileteli inkonzi? Kana kuti Jesu Krisite ava swaniswe na hanzikwitwe habusu bwa menso enu? Kuti kanzi mukuteki initi? 2Nisa kulituta izi kwenu. Chumuva amuhela luhuho lujola cha musebezi wamulao kapa chakuzumina chimubazuwi? 3Muzihole ahulu? Muvatangi mu luhuho feela ni kumana hanu mwi nyama?

4Kana muvavi ni nzivo ingi isena chimwi-Heba cheniti ni kusena? 5Lunu iye yomiha luhuho ni ku panga imakazo zikolete mukati kanu uzipanga cha mulao kapa cha kuzuwa che tumelo?

6Abrahama "A vazumine kwa Ireeza mi a vazumininwa cha kuluka kwakwe." 7Mwinzila iswana, kuzuwisisa, linu, kuti avo va zumina vaana va Abrahama. 8Mi iñolo chakuvona kuti Ireeza kachenise valichava che intumelo. Inzwii nilya wambailwa che ntanzi kwa Abrahama: "Mwaako mishovao yonse ye nkanda kayi itonolofazwe." 9Kuti linu, avo veena itumelo va tonolofezwe ni Abrahama, yavena intumelo.

10Avo vahalila ha musebezi wa mulao vena mwikonde lya chikuto. Kakuli ku ñoletwe, va kutitwe vantu vonse vasechilili zintu ziñoletwe mwi mbuka yamulao, kuzipanga zonse." 11Hanu kuvoneka cwale kuti Ireeza kachenisi muntu cha mulao, kakuti "Valukite muvahale che intumelo." 12Mulao kawuzwi kwintumelo, kono nihakuva vulyo, "Iye yo panga izi zintu chamulao mwahale cho milao."

13Kresite ava tuhazi kuchikuto cha mulao heza kuba chikuto chetu. Kakuti kuñoletwe, "Yo kutitwe muntu yense yo dengelela kwi samu." 14Vutokwa ivali kuti imboyoti ivena kwa Abrahama pona chikeza ku chicaba chaa Jesu Keresite. Ili kuti chitutambula insepiso yaluhuho che intumelo.

15Vaakwaangu, niwamba cha mukwa wa muntu. Nihaike chilikani cha bantu chicha kolela, ka kwina yowola kuchikani kapa kuchi ekeza. 16Hanu insepiso ziva zivawamba kwa Abrahama ni lusika lwakwe. Kakuwambi kuti, "kulusika lwakwe," kuvoza kuvaangi, kono nihakuba bulyo kumuntu yenke, "nikulusika lwenu," yeli nji Keresite.

17Hanu ni wamba izi. Mulao, uvekezi mwaaka yina miyanda yone ne makumi otatwe ku masule aho, kaikanisi chilikani chibapangwa kuma masule ni Ireeza. 18Kakuti chifumu chibakezi cho mulao, ni chisena chibakezi che nzila ye sepiso. Kono Ireeza chakulukuluha ava chihi Abrahama che isepiso.

19Chinzi linu mulao ha u vahewa? Uva ekezwa che baka lya mafosisa, mbwita valusika lwa Abrahama lu vakwiza kwavo vavasepiswe. Mulao uva vikwa cha mañiloi che yanza lya muzimanini. 20Linu muzimanini uzimanina bantu bahitilila muntu yenke, kono Ireeza yenke bulyo.

21Kana mulao ulwisanisa insepo ya Ireeza? Sanzi kuwamba vulyo! Cwale mulao heva u bahewa u va kuwola kuha buhalo, valukite vava kuswanela cheniti kwiza cha mulao. 22Kono nihakuba bulyo, iñolo lisuminine zintu zonse mwikonde lya chivi. Ireeza ava tendi izi kuti insepiso yakwe itutuse che ntumelo mi Jesu Kresite pona cho hewa kwa vo vazumina.

23Kono intumelo ni seni kusika cha Keresite, tuva suminwe ni ku lyatililwa cha mulao kusikila hakuvezili insinulo ya ntumelo. 24Cwale linu mulao chi wa keza kuba Muvavaleli wetu kusikila Jesu hasika, ili kuti tu tucheniswe che ntumelo. 25Hanu intumelo hachiya keza, katusina mwi konde lya muvavaleli. 26Kakuti muvonse muvana ve Ireeza mwi intumelo cha Jesu Keresite.

27Muvonse mu kolovezwa cha Kresite muvalizwatiki Kresite muvene. 28Kakusina kuti uzu mu Juda kapa Mu Gerike, muhikana kapa mulukuluhi, mukwame kapa mwanakazi, kakuti muvonse muchintu chonke kwa Jesu Keresite. 29Haiva muva Kresite, Linu muva lusika lwa Abrahama, mikamuyole kakuya che nsepiso.

41Ni wamba kuti ya te na yole chanda nji muhwile, iye kakwina ha chinchanela ni muhikana, ni hakuva kuti nji mwine wa chivaka chonse. 2Ni hakuvavulyo, u siina mwikonde lya muvavaleli ni kusepwa kusikila inako i vatomwa kwe vesi.

3Cwale ni iswe vulyo, ne tusili tuvahwile, tuvakwina muvuhikana bwe intuto zamulao we fasi. 4Kono inako yina hande haisika, Ireeza ni chatuma Mwanakwe, ya va pepwa kumwanakazi, ya vapepelwa mwikonde lya Mulao. 5A vatendi vuti chamulao kulukulula a vo va vena muikonde lya mulao, kuti tuamuhele kuañulwa sina tuvana.

6Kakuti muvana, Ireeza a vatumini Luhuho lwamwanakwe mwinkulo zetu, Luhuho lusumpa, "Abba, Ndanda!" 7Cheli ivaka kosili umuhikana kono u mwana. Haiva u mwana, linu nawe koyole cha Ireeza.

8Mwisule, ne museni kwiziva Ireeza mu vali mu vahikana kwavo vasali vavali va milimu 9Kono hanu ha chimwizi Ireeza, kapa, hanu ha chimwizivitwe kwa Ireeza, chinzi ha chimuvolela hape nkwintuto za matangilo, zi fokola, zi satusi chimwi? Muchisaka ku va vehikana konse hape.

10Inwe chakutokomela mulolelo mazuva a vutokwa, kutasa kwa myezi, inako, ni zilimo. 11Ni tiya chako. Ni tiya kuti hamwi ni va misevelezi ne kusena intuso.

12Ni mikumbila, vaakwaangu, mube mo niikalile, name ni ve mo mu mwikalile. Kana mu va ni fosekezi. 13Kono mwizi kuti ivali ivaka lya kulwala mumuvili chingi ni va wambi inzwi kwenu che tanzi. 14Nihaike mayemo amuvili wangu a va miviki he ntatubo, kana mu vanihindiki kapa ku ni kaana. Kono muvaniamuheli sina ingeloi lye Ireeza, i mi ivali njime Jesu Kelesite i ye mwiine.

15Kuhi, chiingi, hanu cheli intavo yenu? Chingi ni paka kwenu kuti, kambe kuwoleka, ne chi muvatuloli menso enu ni kuaniha. 16Ili kuti, chi ni vavi ni chila chenu kakuli ni miwambila vuniti?

17Va tukufalelwe kumigana, kono ne kusena zilotu. Vasaka kumizwisa kwangu kuti muvecililie. 18Inako yonse kushiyeme ku va ni ilato cha mavaka ena siinte, isinyi feela heva nina nenwe.

19Vana vangu vanini, ni nyandiswa kucisa kwakupepa kwenu hape kutwala Kelesite cha vumbwa kwenu. 20Ni tabela kukava ko nanwe haho ni kukachincha muwambilo wangu, kokuti ni ziyelehete kwamana nanwe.

21Mu ni wambile, inwe mulakaza ku ba mwikonde lya mulao, Kamuzuwi mulao zo wamba? 22Kuñoletwe kuti Abrahama a vena vana vovele, zumwi i vali wa mwanakazi wa muhikana mi zumwi wa mwanakazi yo lukuluhite. 23Kokuti, u zu wa muhikana a va pepwa feela chenyama, kono u zu wa mwanakazi yo lukuluhite a va pepwa che sepiso.

24Izi zintu ziwoleka kutolokwa cha kusevelisa inguli, Cwale a vo vanakazi vaswana sina intumelelano zo vele. Yimwi yazo i zwa he Lundu la Sinai. U pepa vaana va va hikana. U zo nji Hagare. 25Hanu Hagare nji Ilundu la Sinai, mwa Arabia. Chisupo chi zimanina Jerusalema wa suunu, i ye nji muvuhikana ni vaana vakwe.

26Kono Jerusalema ina mwiulu i lukuluhite, uzo nji, nyinetu. 27Kakuti kuñoletwe, "Tave, i we mwanakazi wa muumba, iwe yo sa pepi. Luluweze mi uhuwe nce tabo, iwe yo sezi kupepwa kwa mwana. Vungi bwa vahwile vaana va muumba, kuhita vakwe uzo wina mukwame."

28Hanu inwe, vaakwaangu, kuswana ni Isaaka, nji vahwile ve sepiso. 29Cheina inako zuna ya vapepwa chakuya kenyama a va nyandisi ya vapepwa cha Luhuho. Kuswana bulyo nahanu.

30Chinzi chiwambwa mwiñolo? "Mutwale kule muhikana wa mwanakazi ni mwaanakwe. chokuti mwaana wamwanakazi wamuhikana kete nayole chaanda hamwina ni mwaana wa mwanakazi yo lukuluhite." 31Chovulyo, vaakwaangu, ka tuvana va mwanakazi wa muhikana, kono wa mwanakazi yo lukuluhite.

51Tuba wani intukuluho ku zwililila kwa Jesu kreste ya va tulukululi. Linu muve vakolete mi sanzi mu wondwa hape kwi joko lya vuvi. 2Muvone, Ime, Paulusi niti kwenu haiva ni muya ku mupato, Kreste kese na mihe mupuzo munzila i mwi ne imwi.

3Hape ni paka mukwame zumwi ni zumwi mukwame ya va yendi ku mupato linu uswanela kukuteka ni kwi chilila mulao wonse. 4Inwe mukauhenye ku "zwililila" kwa krest.muvonse mu va wani ku shemuviwa cha mulao. Muva wilile kule ni chisemo.

5Kuzwililila ku Luhuho, che ntumelo, linu tulivelele che nsempo ni ku shiyama. 6Cha Jesu Kereste nanga cha mupato kapa cha kusaya ku mupato kutolokwa chintu chimwina. Kwande ntumelo iseveza che lato nji yiine tuso. 7Zile mutiya hande. Njeni ya va mizimiki ku kuteka buniti? 8Ku susuwezwa ku tenda vulyo, ka ku zwili kwali uzo ya va misumpi.

9Chi vilisa chi nini chi tende muñende kufunduluka. 10Ni na nsepo kwenu che Reeza kuti ke se muhupule kusanduka munzila imwi ne imwi. Uzo yo milyanganise u swanela inkatulo ya kwe, iye mwine.

11Va kwangu, heva ni ni si kutaza za mupato, chi nzi hani sinyandiswa? Che yo nzila chi sitataliso cha chifano ka chi shinyiwe. 12Ni lakaleza avo va mi lyanganisa ka vali kawule avo vene.

13Chokuti Ireeza ava misumpi, vakwangu, kwi ntukuluho. Sanzi mu sevelisi intukuluho yenu sina ha mu wanina ze nyama. Ni hakuvavulyo che lato mutusana ha mwina. 14Chokuti mulawo wonse wi zuzilikizwe cha mulawo wumwina, "Mu swanela kusaka va mu vambene navo sina mu mu lisakila inwe mu vene." 15Kono heva ni musumana ni kulisana ha mwina, mutokomele kuti ka mu liholofazi ha mwina.

18Niti, muyende cha Luhuho, mi ke se mwi zuzilikize intakazo ze nyama. 17Chokuti inyama ine ntakazo nkando yi lwisa Luhuho, mi Luhuho lwine ntakazo nkando kuhite nyama. Chokuti inzi zi lwisanisa izo ziine. Inkalabo yi chokuti ka muwoli kutenda chintu chi mulakaza kutenda. 16Kono heva Luhuho lu miyendisa, ka musina mwi konde lya mulawo.

19Linu misevezi ye nyama i bwenekete. Vena vuvuki, vahule, vasa njolwele, ve takazo zihitilize, 20ni kulapela vazimu, ni vulozi, ni kuli toya, ni kuli fwila muna, ni kuwamba cha kukalimela, 21ne fufa, ni muna ni vundakwa, ni vulyavi, ni zimwi zi fosahele. Ni mi kalimela, sina muni va mi kalimeleli ku tanzi, kuti avo va tundamena izo zintu ke se ni va yole muvuso we Reeza.

22Linu zichelantu za Luhuho i laato, yi ntavo, inkonzo, inkulo inde, chisemo, vulotu, ni tumelo, 23ni kulishuwa ni kuliyeleza. Linu kakwina mulawo ulwisa nisana nezo zintu. 24Kwavo vena kwa Jesu Kereste vava kokotelwa ni takanzo ze nyama ni hamwina ni ntakazo zi fosahele.

25Heva tu hala cha Luhuho, tu swanela lyaho ku yenda cha Luhuho. 26Sanzi tu saki ku vuvekwa ku sene ntuso, kuli shemayeta kapa kuli fwila muna.

61Vaakwangu, heva muntu na kwateka mu mafosisa, yinwe mwina luhuho mu swanela kuvooza zuna muntu mwi nzila yi shiyeme. Mu litokomele inwe muvene, ili kuti sanzi mulikiwa. 2Mu hindisane miziyo, mi cwale ka mwi zuzilize mulawo wa Kereste.

3Chokuti heva zumwi na zeza kuti nji chimwi kono ni ku sena, u li chenga yiye mwine. 4Zumwi ni zumwi ali tatuve musevezi wa kwe. Linu mwa ve chimwi yiye mwine cheta likumuse kaacho, na sa livaambanyi ku vamwi. 5Chokuti zumwi ni zumwi ka kulike chiputu cha kwe.

6U zo ya va lutwa linzwa u swanela kuli yavela zintu zi lootu ni va muluti. 7Sanzi mu chengelelwa. Ireeza ka shewununwa. Chonse vulyo cha byeala muntu, chete na kutule. 8Chokuti yiye yo byela lutanga mu vuhalo bya kwe bya chivi mwa ikutule yakwe mwilyangane, kono yiye yo byela lutanga ku Luhuho, ka kutule vuhalo vu sa maani vuzwa ku Luhuho.

9Sanzi tusiyi kupanga ku tende vulotu. chokuti che nako yi shiyeme ka tukutule ikutulo heva ni tu sa voleli mwisule. 10Cwale linu, chi twina chivaka, tu pange vulotu ku zumwi ni zumwi. Tutende bulotu sihulu kwavo ve nzubo ye intumelo.

11Mu vone tanku zi kando zi ni ñoleli kwenu cha muñolo wangu. 12Vavo va sanka ku livonisa vulotu mwi nyama va mi hambiliza kwi njila mu mupato. Va tenda vulyo kuti sanzi va nyandiswa che vaka lya chifapano cha Kereste. 13Nanga vavo vasa pangitwe mupato ka va kuteki mulawo. Ni hakuvavulyo, va saka inwe ku va mu mupato ku tendela kuti va ve ni kulitemba hewulu lye inyama.

14Mane sanzi kuvi vulyo kuti nili kumusa konji che chifapano cha fumwentu Jesu Kereste. Ku zwila kwali kuti i faasi li va konkotelwa kwangu nime kwi faasi. 15Kamba kwina mupato kapa kakwina mupato konse. Ni hakuvavulyo, kuvumbwa kuhya kwa vutokwa. 16Kwavo vonse ve te va haale cheyi mpunso, inkoozo ni chisemo chi ve kuvali, ni ha Isilaele ye Ireeza.

17Kuzwahanu sanzi ku waniki yo ni kataza, kakuti ni kulikite imaaka ya Kereste ha muvili wangu. 18Mi chisemo cha Simwine Jesu Kereste chive mu luhuho lwenu, vaakwangu. Amen.