Гэна сыр сыс ангил сарэстыр и сыр саро скэрдяпэ. Пало шов дэвэс Дэвэл скэрдя свэто и саро, со дэ лэстэ. Дэ перво дэвэс Дэвэл скэрдя Пхув. Пхув сыс дэ калыпэн и ничи пэ латэ на сыс, пал дова со Дэвэл ничи пэ латэ на скэрдя. Нэ Дэвлэскиро Духо сыс упрал панестыр.

Тэнче Дэвэл пхэндя: «Мэк авэла яг кай тэ авэл душло!» — и кэрдяпэ яг. Дэвэл удыкхья, со яг — ада дрыван куч, и кхардя Дэвэл яг, сыр душло, «дэвэсэса». Ёв откэдыя яг калыпнастыр, и калыпэн кхардя «ратяса». Ада сыс перво дэвэс.

Пэ второ дэвэс Дэвэл пхэндя: «Мэк авэл куполо упрэ панестыр!» — и кэрдяпэ куполо. И кхардя лэс Дэвэл «болыбэн».

Пэ трито дэвэс Дэвэл пхэндя: «Мэк саро паны скэдэлпэ кэтанэ и авэла шуко штэто!» И кхардя шуко штэто «Пхув», а паны кхардя «морё». Дэвэл подыкхья, со скэрдо Лэса и удыкхья, со када куч.

Тэнче Дэвэл пхэндя: «Мэк пэ пхув барьён вэша и сарэ чярья!» Адякэ саро и сыс. Подыкхья Дэвэл, со скэрдо Лэса и удыкхья, со када куч.

Пэ штарто дэвэс Дэвэл пхэндя: «Мэк авэна яга до болыбэн!» И до болыбэн лыяпэ кхам, чён и чергэня. Дэвэл скэрдя лэн ваш дова, соб ёнэ тэ сыкавэн ратяко пхув и соб тэ полас кай дэвэс кай рат, бэрш и сави пора бэршитко. Дэвэл подыкхья, со скэрдо Лэса и удыкхья, со када куч.

Пэ панджьто дэвэс Дэвэл пхэндя: «Мэк до паны авэна сарэ маче и до болыбэн авэна чирикля!». Адякэ Дэвэл скэрдя сарэн кон дживэл до паны, и сарэн чириклен. Дэвэл подыкхья пэ лэндэ и удыкхья, со када куч, и благословил лэн.

Пэ шовто дэвэс Дэвэл пхэндя: «Мэк пэ пхув авэна сарэ животна!» — и адякэ скэрдяпэ, сыр пхэндя Дэвэл. Екх животна сыс кхэратунэ, авир сыс вэшитка, а трита пхирэнас по пер пирэ пхув. Дэвэл подыкхья пэ лэндэ и удыкхья, со када куч.

Тэнче Дэвэл пхэндя: «Скэраса манушэн пир Амаро образо, дасавэн сыр Амэ. Ёнэ авэна барэ мануша и авэна хулаенса пэ Пхув и сарэнса кон дживэл пэ латэ».

Дэвэл лыя пхув, и скэрдя латыр манушэс и пхурдыя дэ лэстэ джиипэн. Адалэс манушэс кхарэнас Адам. Тэнче Дэвэл кэрдя баро садо, и яндя дэ садо Адамос, соб ёв тэ дыкхэл пал лэстэ.

Машкир садо барьёнас дуй дэмбы екх — дэмбо джиипэн авир дэмбо, соб тэ уджинэ лачипэн и дылныпэн. Дэвэл пхэндя Адамоскэ ха плодо всарэстыр садостыр, а на ха плодо дэмбостыр, саво дэл тэ уджинэ лачипэн и дылныпэн. Ёв пхэндя Адамоскэ, со кон схала плодо адалэстыр дэмбостыр, дова мэрэла.

Тэнче Дэвэл пхэндя: «Нанэ куч тэ авэл мануш кокоро. Адамоскэ трэби помощнико». Дэвэл подлыджялас кэ Адамо животнонэн, соб ёв тэ дэл лэнгэ лава. Нэ ни екх животно на подгия Адамоскэ дэ помощники.

Тэнче Дэвэл дыя Адамоскэ баро соибэн. Сыр ёв сыс суто, Дэвэл лыя лэскиро пашваро, и кэрдя лэстыр джювля и яндя ла кэ Адамо.

Сыр удыкхья Адамо джювля, ёв пхэндя: «Гэна ёй! Ёй дасави, сыр и мэ! Мэк кхарэлпэ джювляса, пал одова со ёй муршитконэ пашварэстыр ромэскирэстыр». Пал дова ачявэла мурш дадэс и да и авэна екх пэскирэ ромняса.

Пало дова сыр Дэвэл скэрдя муршэс и джювля пир Пэскиро образо. Ёв благословил лэн и пхэндя: «Мэк тумэндэ авэла бут чяворэн и внукэн! Мэк авэла тумэн бут пэ Пхув!» Дэвэл подыкхья, со скэрдя Ёв и удыкхья, со када куч, и сыс дрыван лошало. Саро ада сыс дэ шовто дэвэс.

Кэ эфтато дэвэс Дэвэл скэрдя сари Пэскири буты. И благословил Ёв эфтато дэвэс и кэрдя лэс свэнтонэ дэвэсэса, пал дова со дэ дава дэвэс Ёв скэрдя сари буты. Адякэ сыс скэрдо Свэто и саро, со пэ лэстэ.

Адамо и лэскири ромны дживэнас бахталэс дэ гожо садо, саво Дэвэл скэрдя ваш лэнгэ. Ёнэ наурьенас нисави идя, и лэнгэ на сыс ладжяво, пал дова со дэ свэто на сыс бэзэх. Ёнэ пхирэнас пиро садо и ракирэнас Дэвлэса.

Нэ дэ садо сыс сап. Ёв сыс дрыван хранто. Сап пучья джювлятыр: «Ада чячё, со Дэвэл пхэндя, соб тумэ тэ нахан плоды дэмбэндыр дэ садо?»

Джювлы пхэндя: «Дэвэл на запхэндя амэнгэ тэхас сарэндыр дэмбэндыр, а дэмбостыр, саво дэл тэ уджинэ лачипэн и дылныпэн нахан. Ёв пхэндя амэнгэ: “Сыр тумэ схана плодо адалэстыр дэмбостыр чи лэнапэ пал лэстэ, то мэрэна!”»

Сап пхэнэл джювлякэ: «Нанэ чячё! Тумэ на мэрэна. Дэвэл джинэл, со тумэ сыр схана адава плодо, то авэна дасавэ сыр Ёв, и авэна тэ полэн, со дасово лачипэн и дылныпэн».

Джювлы удыкхья, со плодо дрыван гожо и пэ видо гудло. Ёй закамья тэ авэл годявир, пал дава счиндя плодо и схая. Тэнче ёй дыя плодо пэскирэскэ ромэскэ, и ёв хая лэс.

И удыкхья Адамо и лэскири ромны Ева, саро пэ-авирто и полынэ, со ёнэ нангэ. Тэнче ёнэ закамнэ тэ закэрэнпэ листэнса, судэ лэндыр пэскэ кустыка.

Пхурдэлас на бари бавал и Адамо Еваса шундэ, сыр Дэвэл пхирэл пиро садо. И гарадынэ ёнэ Дэвлэстыр. Тэнче Дэвэл кхардя манушэс: «Адамо, кай ту?» Ёв пхэндя: «Мэ шундём, сыр ту пхирэс пиро садо, здарандыём, со мэ нанго, и пал дава гарадыём».

Дэвэл пучя: «Кон пхэндя тукэ, со ту нанго? Чи На хаян ту плодо, саво Мэ запхэндём тукэ тэ на хас?» Мурш пхэндя: «Ту дыян мангэ адалэ джювля, а ёй дыя мангэ тэ схав адава плодо». Тэнче Дэвэл пучя кэ джювлы: «Соскэ ту адава кэрдян?» Джювлы пхэндя: «Ада сап хохадя ман».

Тэнче Дэвэл пхэндя сапэскэ: «Ту бибахтало кана! И ту лэса тэ пхирэс по пер и тэхас пхув. Тумэ джювляса авэна врагэнса. И тумарэ чяворэ авэна врагэнса екх екхэса. Ту дандырэса джювлякирэ чявэскэ дэ гэрой, а ёв розмарэла тыро шэро».

Тэнче Дэвэл пхэндя джювлякэ: «Мэ кэрава, со тукэ авэла дрыван дукхано, сыр ту авэса тэ пхирэс пхари, и тэ биянэс чяворэн лэса дэ бари дукх. Ту лэса тэ камэс пэскирэс ромэс, а ёв авэла хуласа тукэ».

Тэнче Дэвэл пхэндя муршэскэ: «Ту кандыян пэскирья ромня и на кандыян Ман. Кана пхув бибахталы и тукэ приджялапэ тэ кэрэ бут буты, соб тэ дорэсэс лакирэ плоды. Тэнче ту мэрэса, и тыро трупо рисёла палэ дэ пхув». Мурш дыя лав пэскирэ ромнякэ Ева, адава лав ракирэл, со ёй «Дэл джиипэн», пал дава со ёй трэби тэ авэл дай сарэнгэ манушэнгэ. Дэвэл дыя Адамоскэ и Евакэ идя животнонэнгирэ цыпатыр.

Тэнче Дэвэл пхэндя: «Кана мануша, сыр Амэ, джинэн со дасаво лачипэн и дылныпэн, нашты тэ домэкэн, соб ёнэ тэхан плодо дэмбостыр, саво дэл джиипэн и тэ дживэн вечно». Пал дава Дэвэл вытрадыя Адамос и Ева садостыр и чидя зоралэн ангелэн сыр заджяс дэ садо, соб ни кон тэ нахал плоды дэмбостыр, саво дэл джиипэн.

Прогинэ бут бэрша. До свэто сыс бут манушэн. Ёнэ сыс дрыван захалэ, и лэндэ сыс барунэ илэ. Мануша дрыван кэрдэпэ хасютнэ, со Дэвэл пхэндя хаскирэла саро свэто, зачивэла лэс панеса.

Машкир сарэндэ манушэндэ Дэвэл сыс лошало екхэса Ноёса, пал дава со ёв пхирэлас ангил Дэвлэстэ, пашэ манушэндэ савэ дживэнас дэ бэзэх. Дэвэл роспхэндя лэскэ одова, со Ёв камэл тэ кэрэл. Пхув тэ зачивэл барэ панеса, и пал дава Ноё трэби тэ скэрэл баро ковчего.

Адава дрыван баро каштуно ковчего трэби тэ авэл длунгипэн 140 метров, буглыпэн 23 метра и вучипэн 13, 5 метров, до трин ярусы, бут отсеки, крышаса и хвылястраса. Ноё, лэски семья и сарэ животна трэби тэ зракхэнпэ панестыр машкирал дэ адава ковчего.

Ноё кандыя Дэвлэс. Ёв пэскирэнса тринэ чявэнса Скэрдя ковчего адякэ сыр пхэндя лэскэ Дэвэл. Кэрэнас ковчего бут бэрша, пал дова со ёв сыс дрыван баро.

Дэвэл пхэндя Ноёскэ тэ лэл бут хабэн ваш пэскэ, пэскирэ семьякэ и животнонэнгэ. Сыр саро сыс кэрдо, Дэвэл пхэндя Ноёскэ, со явья дова дэвэс лэскэ, ромнякэ и тринэ чявэнгэ пэскирэ ромненса тэ заджян дэ ковчего, Лэн сарэн сыс охто манушэн.

Дэвэл пхэндя Ноёскэ тэ лэл пэса до ковчего кожнонэстыр животнонэстыр муршэс и джювля и адякэ ж кожнонэ чириклятыр, соб ёнэ тэ зракхэнпэ барэ панестыр, и тэ лэл эфта муршэн и джювлен долэндыр животнонэндыр, савэн можно тэ янэн дэ жэртва. Сыр ёнэ сарэ загинэ дэ ковчего, Дэвэл Кокоро закэрдя пал лэндэ вудара.

Тэнче гия брышинд, саво на пирьячелас тэ джял саранда дэвэса и ратя! Брышинд джялас и джялас! И паны адякэ ж марэлас пхувьятыр. Саро дэ свэто учякирдяпэ панеса, адякэ ж сарэ вуче бэрги.

Сарэ мануша и животна, савэ дживэнас пэ пхув, похасинэ. Нэ сарэ, кон сыс машкирал до ковчего ачнэпэ джидэ и на хасинэ.

Сыр брышинд пирьячя ковчего сыс по паны панджь чёна. Паны лыя тэ уджял. Екхвар ковчего тэрдыя пэ вучипэн бэргако, нэ саро свэто сыс до паны. Пал трин чёна долэскэ сыс душло вучипэн бэргытко.

Прогинэ саранда дэвэса, и Ноё вымэкья воронос, соб тэ полэ, на вышутия ли паны пэ пхув. Вороно родэлас шуки пхув и на попэя.

Тэнче Ноё вымэкья голумбос, и ёв на попэя пхув шуки и рисия палэ кэ Ноё. Прогия курко и Ноё вымэкья голумбос, и ёв рисия кашторэса савэстэ сыс мурица маслина дэ муй! Паны уджялас, и пэ пхув гия тэ барьёл чяр сыр и сыс.

Ноё подужакирдя курко и вымэкья голумбос дэ трито моло. Пэ адава моло голумбо попэя пэскэ штэто, кай тэ бэшэл, и на рисия палэ. Пхув вышутия!

Прогинэ дуй чёна, Дэвэл пхэндя Ноёскэ: «Кана ту пэскирэ семьяса и сарэса скотоса выджя ковчегостыр. Мэк тумэндэ бияндёна бут чяворэ и внуки! Тэ авэл бут манушэн пэ пхув!» Тэнче Ноё семьяса выгия ковчегостыр.

Тэнче Ноё кэрдя жэртвеннико и яндя дэ жэртва разно скотина. Сави можно тэ янэ дэ жэртва. Дэвэл сыс лошало адалэ жэртваса и бичявдя Ноёскэ и лэскирэ семьякэ бахт.

Адякэ ж Дэвэл пхэндя Мэ дав лав, со бутыр на хаскирава пхув пал дова со мануша кэрэн холы и назачивава пхув панеса, наподыкхава пэ дова со мануша кэрэн бэзэх тыкнэ бэршэндыр.

Соб тэ зрикирэл Пэскиро лав, Ёв кэрдя радуга. И пхэндя, сарэ молы сыр до болыбэн авэла тэ сыкавэлпэ радуга, Ёв авэла тэ зрипирэл, со бутыр на лэла тэ зачивэл Пхув панеса.

Прогинэ бут бэрша сыр Дэвэл зачидя всаро панеса и тэнче пэ пхув бияндынэ бут мануша, и ёнэ всаек сыс захалэ и кэрэнас бэзэха ангил Дэвлэстэ и ангил екх екхэстэ. Тэнче сарэ мануша ракирэнас пэ екх чип. И сыр Дэвэл пхэндя манушэнгэ тэ дживэн пир сари пхув, ёнэ, накандынэ, скэдынэпэ кэтанэ и прылынэпэ кэ буты тэ скэрэн форо.

Мануша сыс дрыван пхуткирдэ. Ёнэ на камэнас тэ шунэн Дэвлэс и тэ дживэн адякэ сыр Ёв ракирэл. Ёнэ лынэ тэкэрэн бари башня кэ само болыбэн, соб тэ гадэн пэскиро лав и тэ нарозджяпэ пир саро свэто. Дэвэл удыхья, сыр ёнэ авэна дурэдыр тэ кэрэн пэскири буты, то кэрэна пэ бут бутыр бэзэха.

Тэнче Дэвэл парувдя екх чип манушэнги пэ бут авирта чиба и росчурдыя манушэн пир саро свэто. Форо, саво ёнэ лынэ тэ скэрэн, прокхардэ Вавилоно, со ракирэл «сарэ кэтанэ».

Прогинэ бут шэла бэрша Дэвэл пропхэндя лав ко мануш савэс кхарэн Аврамо. Дэвэл пхэндя лэскэ: «Ачяв пэскиро форо и пэскирэн пэскиро родо и джя пэ пхув, сави Мэ сыкавава тукэ. Мэ дава тукэ бахт и тутыр джяла баро родо. Мэ гадава тыро лав упрэ. Бахтало авэла кон благословит тыро лав, и бибахтало авэла дова кон проклининэла тут. Сарэ мануша пэ пхув авэна бахталэ пал тутэ».

Аврамо кандыя Дэвлэс. Ёв лыя пэскирья ромня Сара, сарэн пэскирэн бутярнэн, саро со лэскиро сыс, и гия дэ Ханаано – пхув, пэ сави пхэндя лэскэ Дэвэл.

Сыр Аврамо явья до Ханаано. Дэвэл пхэндя лэскэ: «Подыкх пэ кадая пхув. Мэ Дава тукэ ла сари и тыро родо авэла хулаенса пэ латэ вечно». Тэнче Аврамо дживэлас пэ кадая пхув.

Одой сыс мануш савэс кхарэнас Мелхиседеко — рашай Барэ Дэвлэскиро. Екхвар сыс марибэн и сыр ёнэ залынэ пэскирэс племяникос пленостыр Аврамо дыкхьяпэ Мельхиседекоса. Ёв благословил Аврамос и пхэндя: «Мэк Баро Дэвэл, Саво Хулай до болыбэн и пэ пхув, дэла тукэ бахт Аврамо!» Тэнче Аврамо дыя Мельхиседекоскэ дэшитко доля сарэстыр, со кэ ёв сыс.

Прогинэ бут бэрша, нэ кэ Аврамо и Сара на сыс чяворэн. Дэвэл заракирдя кэ Аврамо и пхэндя, со кэ ёв авэла чяво и адякицы родо, скицык чергэня до болыбэн. Аврамо патяндыя Дэвлэскирэ лавэскэ, и Дэвэл пхэндя, со Аврамо чячуно пал дова со ёв патяндыя дэ Лэскиро Лав.

Тэнче Дэвэл скэрдя завето Аврамоса. Завето кэрэлпэ дуенса манушэнса, савэ доракирэнпэ машкир пэстэ тэ кэрэн варисави пэскири буты. Нэ адава моло Кокоро Дэвэл доракирдяпэ Аврамоса и дыя лав, со лэстэ биянэлапэ чяво, кэ саво пириджяла саро Аврамоскиро . Дэвэл Пэскирэ Лавэса, отдыя пхув Ханаано родоскэ Аврамоскирэскэ. Тэнче дэ суно Дэвэл откэрдя, со авэла родоса Аврамоскирэса. Прогия бут бэрш, нэ кэ Аврамо адякэ и на сыс чявэс.

Тэнче, сыр Аврамо и Сара явнэ дэ Ханаано, прогия дэш бэрш, кэ ёнэ на сыс чяворэн. Тэнче Сара, ромны Аврамоскири, пхэндя лэскэ: «Сыр Дэвэл надомэкья соб кэ мэ тэ авэн чяворэ, а мэ дрыван пураны, соб тэ биянав, гэна тукэ мири бутярны Агарь. Джя пасёв ласа, соб ёй тэ биянэл ваш мангэ чяворэс».

Аврамо адякэ и кэрдя. Агарь сыс пхари и запхутия ангил Саратэ. А Сара пхэнэл, со банго дэ дава Аврамо. Явья дэвэс и Агарь бияндя чяворэс, и Аврамо дыя лэскэ лав Измаило. Сыр Измаилоскэ сыс дэшутрин бэрш, Дэвэл заракирдя кэ Аврамо.

Дэвэл пхэндя: «Мэ сын Дэвэл, Саво саро кэрав. Мэ скэрава туса завето». Сыр шундя Аврамо Дэвлэс, то пасия муеса пэ пхув. Дэвэл ракирэл: «Ту авэса дадэса бутэнгэ манушэнгэ. Ту авэса хуласа пэ пхув Ханаан ту и тыро родо, и Мэ авава тумарэ Дэвлэса. Ту трэби тэ обчинэс кожнонэс чяворэс и кожнонэс муршэс дэ пэскири семья».

«Кэ тыри ромны Сара биянэлапэ чяво — ёв и авэла одолэ чявэса, пал савэстэ Мэ ракиравас тукэ. Дэ лэскэ лав Исаако. Лэса Мэ чивава Пэскиро завето, и лэстыр авэла баро родо, Измаилостыр Мэ тоже кэрэва баро родо, нэ Миро завето авэла Исаакоса». Тэнче Дэвэл парудя лав «Аврам» пэ «Авраам», со ракирэл «дад бутэнгэ манушэнгэ». Дэвэл адякэ ж парудя лав «Сара» пэ «Сарра», со ракирэл «принцесса».

Дэ дова дэвэс Авраамо обчиндя сарэн чяворэн и сарэн муршэн дэ пэскиро кхыр. Варикай прогия бэрш, сыр Авраамоскэ сыс шэл бэрш, а Сарракэ енядэша, ёй бияндя Авраамоскэ чявэс. Ёнэ дынэ лэскэ лав Исаако, сыр и пхэндя лэнгэ Дэвэл.

Сыр Исаако сыс тыкнэ чяворэса, Дэвэл закамья тэ уджинэл патябэн Авраамоскиро. Ёв пхэндя: «Лэ Исаакос, тырэс чявэс, саво тутэ екх, и ян лэс дэ жэртва Мангэ». Авраамо кандыя Дэвлэс и камья тэ янэл дэ жэртва пэскирэс чявэс.

Сыр Авраамо и Исаако джянас ко штэто кай тэ янэн жэртва, Исаако пучя: «Дадо, амэндэ сын кашта, соб тэ янас жэртва, а кай бакроро?» Авраамо пхэндя: «Чяворо, Дэвэл дэла бакрорэс ваш жэртва».

Сыр ёнэ догинэ ко штэто, кай тэ янэн жэртва, Авраамо спхандя пэскирэс чявэс Исаакос и чудя лэс по жэртвеннико. Ёв камья тэ зачинэл пэскирэс чявэс, нэ Дэвэл пхэндя лэскэ: «Тэрдёв! На зачин чяворэс! Кана Мэ джинав, со ту дарэс Мандыр, пал дова со ту камьян тэ умарэс тырэс чявэс ваш Мангэ а ёв тутэ екх!»

И Авраамо удыкхья бакрэс, саво сыс паш лэндэ замардо дэ чяр. Ада Дэвэл дыя лэнгэ кадалэс бакрэс, соб ёнэ тэ янэн лэс дэ жэртва палэ Исаакостэ. Авраамо лошаса яндя бакрэс дэ жэртва.

Тэнче Дэвэл пхэндя Авраамоскэ: «Пал дова, со ту камьян тэ отдэ Мангэ саро, и пэскирэс чявэс, саво тутэ екх, Мэ пхэнав, со благославлю тут! Тутэ авэла родо бутыр чергэнендыр до болыбэн. Пал дова, со ту кандыян Ман, Мэ благославлю пал тутэ саро родо пэ свэто!»

Джянас дэвэса. Авраамо дрыван пураныя, а лэско чяво Исаако кэрдяпэ до бэрша мануш. Екхвар Авраамо бичявдя екхэс пэскирэс бутярнэс дэ пхув, кай дживэлас лэскиро родо, соб дова тэ попэрэл ромня Исаакоскэ.

Бутярно дрыван бут джялас кэ пхув кай Араамоскиро родо, и сыр ёв явья, Дэвэл яндя лэс кэ Ревекка. Ёй сыс Аврамоскирэ пшалэски внучка.

Ревекка закамья тэ ачкирэл пэскири семья и тэ утрадэ бутярнэса кэ Исаако. Сыр ёй явья одорик, Исаако дэ дова дэвэс лыя ла пало ром.

Прогинэ дрыван бут дэвэса. Авраамо мэя, и Дэвэл благословил Исаакос, чявэс Араамоскирэс, пир дова завето, саво Ёв скэрдя Араамоса. Дэ дава завето Дэвэл дыя лав, со ко Авраамо авэла дрыван баро родо. Нэ кэ Ревекка, ромны Исаакоскири, на сыс чяворэн.

Исаако мангья Дэвлэс пал Ревеккатэ, и Дэвэл дыя лакэ соб ёй тэ авэл пхари дуе чяворэнса. Дуй чяворэ кэ дай дэ ди лынэ тэ маранпэ екх екхэса. Тэнче Ревекка пучелас Дэвлэстыр пал дова, со кэрэлпэ.

Дэвэл пхэндя Ревеккакэ:Ту биянэса дуен чяворэн. Кадалэ чяворэндыр авэна дуй роды. Адалэ дуй роды авэна тэ джян екх пэ екхэстэ. Нэ родо, саво авэла пхурэдырэ чявэстыр, приджялапэ тэ покоринэнпэ родоскэ тыкнэдырэ чявэскэ.

Сыр явья дэвэс, Ревекка бияндя дуен чяворэн савэ счурдэнаспэ екх пэ екхэстэ. Пхурэдыр чяворо бияндыя рыжо и саро до бала. Лэскэ дынэ лав Исаво. А тыкнэдыр чяворо, саво бияндыя пал лэстэ и рикирэласпэ пал лэскири гэрой. Лэскэ дынэ лав Иаково.

Пшала барьёнас. Исаво сыс охотнико, а Иаково бэшэлас кхэрэ, Исаако камэлас Исавос а Ревекка камэлас бутыр Иаковос.

Екхвар Исаво явья бутятыр дрыван бокхало. Ёв пхэндя Иаковоскэ: «Дэ мангэ хабэн, саво ту карадян». Иаково пхэндя: «Ту дэ мангэ лав, со ту дэса мангэ тэ гинавпэ пхурэдырэса дэ семья». Исаво дыя лав, со дэла лэскэ тэ гинэл пэс пхурэдырэса. Тэнче ёв дыя лэскэ тэхал.

Исаако камья благословить Исавос, нэ благословил Иаковос, пал дова со Ревекка и Иаково хохадэ лэс. Иаково явья ко дад и выдыя пэс пал Исавостэ. Ёв уридяпэ сыр Исаво и чивдя пэ васта и пэ мэн пэскэ козытко цыпа до бала. Исаако сыс пурано и на додыкхэлас, и пал адава на полыя, со лэс хохадэ.

Иаково явья кэ Исаако и пхэндя: «Мэ — Исаво. Мэ явьём, соб ту тэ благословишь ман». Исаако лыяпэ вастэса палэ бала козытка и накхэса ушундя фано идятыр, и подуминдя, со када Исаво, а благословил Иаковос.

Исаво холясыя пэ Иаковостэ пал дова со Иакова хохаибнаса лыя благословение, саво трэби тэ авэл лэскиро. Пал дава Исаво пхэндя, со сыр Дад мэрэла умарэла Иаковос.

Нэ Рэвека галыя, со Исаво камэл тэ кэрэл, и лынэ Исаакоса и отбичялдэ Иаковос дур кэ родо Ревеккако.

Иаково проджиндя одой бут бэрша. Пал адалэ бэрша Ёв лыя ромня, и лэстэ бияндынэ дэшудуй чявэ и екх чяй. Дэвэл кэрдя лэс дрыван барвалэса.

Сыр проджиндя дуйдэша бэрш дур дадэскирэ кхэрэстыр, Иакова закамья тэ рисёл палэ дэ Ханаано пэскирэ семьяса, бутярнэнса и пэскирэса хулаибнаса.

Иаково дрыван дарэлас Исавостыр, ёв думиндя со Исаво камэл тэ умарэл лэс. Пал одова ёв бичявдя Исавоскэ дрыван бут ското. Бутярнэ яндэ ското кэ Исаво и ракирэн:Тыро рабо Иаково отдэл тукэ када ското. Ёв и кокоро сыго явэла.

Нэ Исаво кана на камэлас кокоро тэ умарэл Иаковос. И сыс кокоро лошало тэ дыкхэл пэскирэс пшалэс. Тэнче кадалэ пшала полэнас екх екхэс и бутыр накошэнаспэ и дживэнас дэ Ханаано. Сыр Исаако мэя, пшала гарадэ лэс. Лав пир завето, саво Дэвэл дыя Авраамоскэ, пиригия Исаакостыр кэ Иаково.

Прогинэ бут бэрша, сыр Иаково пураныя, а лэскирэ чяворэ выбаринэ, ёв бичявдя пэскирэс чявэс савэс дрыван камэлас Иосифос тэ джял тэ подыкхэл кай лэскирэ пхурэдыр пшала, савэ ракхэнас бакрэн.

Пшала рикирэнас бари холы пэ Иосифостэ, пал дова со дад камэлас лэс бутыр сарэндыр, и пал сунэ, дэ савэ ёв дыкхэлас пэс лэнгирэ хуласа . Сыр Иосифо явья кэ пшала, ёнэ лынэ лэс, и бикиндэ манушэнгэ савэ бикнэнас бутярнэн.

Сыр тэ рисён кхэрэ, пшала росчиндэ идя Иосифоскири и вымакхнэ ла дэ козытко рат. Тэнче ёнэ сыкадэ адая идя дадэскэ, соб ёв тэ думинэл, со Иосифос росчиндэ рува. Иаково дрыван ровэлас, пал дова со лэскиро чяво савэс ёв дрыван камэлас мэя.

Одолэ мануша улыджинэ Иосифос дэ Египто. Дэ долэ дэвэса Египто сыс баро барвало форо, саво сыс ангил рэка Нил. Ёнэ бикиндэ Иосифос, сыр бутярнэс, барвалэ манушэскэ до Египто, савэс кхарэнас Патифаро. Нэ Дэвэл благословлял Иосифос. Ёв сыс лачеса бутярнэса и саро кэрэлас сыр трэби ваш пэскирэскэ хуласкэ.

Иосифо чялыя ромнякэ Патифароскирьякэ. Ёй камья лэса тэ пирисовэл, нэ ёв отпхэндяпэ тэ кэрэл дава бэзэх ангил Дэвлэстэ. Ёй холясыя пэ лэстэ и йивья пхэндя, со ёв камья ла. Лэс лынэ и чурдынэ до бэшибэн . Нэ и до бэшибэн Иосифо сыс чячуно Дэвлэскэ, и Дэвэл благословлял лэс.

Прогинэ дуй бэрша. Иосифо сыс до бэшибэн, нэ ёв на сыс ни дэсо банго. Екхвар ратяко фараоно дыкхья дуй сунэ, дэ савэ ёв здарандыя. Ни екх фараоноскиро мануш на роспхэндя, кэ со далэ сунэ.

Дэвэл дыя Иосифоскэ тэ полэ и тэ роспхэнэ сунэ. Пал дова фараоно припхэндя тэ янэн кэ ёв Иосифос бэшибнастыр Иосифо роспхэндя лэскэ пал сунэ. Ёв пхэндя фараоноскэ: «Дэвэл бичявэла эфта бэрш дэ савэ авэла уражаё, а тэнче — эфта бэрш бокхалыпэн».

Иосифо чялыя фараоноскэ адякэ, со ёв кэрдя лэс авиртонэ манушэса пал пэстэ до саро Египто!

Сарэ эфта бэрш сыс баро урожаё Иосифо пхэндя соб дэ форы Египетска тэ скэдэн маро дэ екх штэто, саво скэдэнас по маля. Ёв скэдыя бут маро, со тэ погинэ лэс нашты сыс. И сыр явнэ эфта бэрш бокхалыпэн, Иосифо лыя тэ бикнэл маро манушэнгэ и лэндэ сыс со тэха.

Бокхалыпэн сыс баро нанэ токи дэ Египто, нэ и до Ханаано, кай дживэлас Иаково и лэскири семья.

Иаково бичявдя пхурэдырэн чявэн до Египто тэ кинэн маро. Сыр ёнэ явнэ тэ кинэн маро, Иосифо удыкхья пэскирэн пшалэн и галыя лэн, ёнэ на галынэ лэс.

Иосифо закамья тэ подыкхэ пэ пшалэндэ чи парудэпэ ёнэ и ачнэ авирэ манушэнса. Сыр ёв полыя, со ёнэ ачнэ авир, то пхэндя лэнгэ: «Мэ тумаро пшал Иосифо! На дарэн! Тумэ кэрдэ холы, сыр бикиндэ ман дэ рабство, нэ Дэвэл кэрдя со холятыр выгия лачипэн! Явэнте дживэнте до Египто. Мэ на помэкава тумэн и тумарэ семьи».

Сыр пшала Иосифоскирэ рисинэ кхэрэ, ёнэ роспхэндэ саро дадэскэ Иаковоскэ, кай Иосифо джидо. Иакова дрыван сыс лошало и бахтало.

Иаково сыс дрыван пхуро мануш, нэ ёв традыя дэ Египто пэскирэ семьяса, и ёнэ дживэнас одой. Сыр тэ мэрэл Иаково ёв благословил сарэн пэскирэн чявэн.

Лав, саво дыя Дэвэл Авраамоскэ, пиригия Исаакоскэ, тэнче кэ Иаково, а тэнче кэ дэшудуй чявенгэ Иаковоскирэнгэ и лэнгирэ семьенгэ. Родо дэшудуе чявэнгирэ ачнэ дэшудуй роды Израилёскирэ.

Сыр мэя Иосифо саро лэскиро родо ачяпэ до Египто. Ёнэ и саро лэнгиро родо дживэнас одой бут бэрша и лэндэ сыс бут чяворэн. Лэн прокхарэнас израильтяне.

Прогия бут молы по шэл бэрш. Манушэн израильтянэн кэрдяпэ дрыван бут. Египтяне уже на рипирэнас Иосифос и саро, со ёв кэрдя ваш лэнгэ. Израильтянэн кэрдяпэ адякэ бут, со египтяне лынэ тэ дарэн лэндыр. И фараоно, саво дэ долэ дэвэса сыс правителё до Египто, кэрдя израильтянэн пэскирэ бутярнэнса.

Израильтяне сыс бутярнэ кэ египтяне, и кэрэнас кхэра и форы. Джиипэн лэндэ кэрдяпэ дрыван пхаро. Нэ Дэвэл благословлял лэн, и лэндэ сыс бут чяворэн.

Фараоно удыкхья, со лэндэ бияндён дрыван бут чяворэн. И тэнче ёв припхэндя пэскирэ манушэнгэ соб ёнэ тэ умарэн сарэн чяворэн савэ биянэнапэ кэ ёнэ, тэ чурдэн лэн дэ рэка Нил.

Дэ долэ дэвэса кэ екх израильтянка бияндыя чяворо, и ёй гаравэлас лэс.

Сыр тэ гаравэ лэс на сыс кай, дай чудя лэс дэ корзина и очядя дэ чяр пэ рэка Нил, соб тэ заракхэл тэ на умарэн лэс. Пхурэдыр пхэн чяворэски дыкхэлас пал лэстэ, со авэла дурэдыр.

Тэнче чяй фараоноскири явья кэ рэка, соб тэ морэлпэ. Ёй удыкхья корзина и подыкхья со дэ латэ машкирал. Удыкхья чяворэс, лакэ кэрдяпэ дор лэс. Пхурэдыр пхэн чяворэскири сави сыс одой, пхэндя лакэ соб ёй тэ лэл израильтянка кай тэ выдыкхэл лэс. И ёй лыя да манушня сави дэлас тэха чяворэскэ и на джиндя, со ада лэскири дай. Сыр чяворо потбария дай рискирдя лэс кэ фараоноскири чяй, и ёй кэрдя лэс пэскирэ чяворэса и дыя лэскэ лав Моисей.

Маисеё выбария. Екхвар ёв удыкхья, сыр египтянено марэл бутярнэс израильтяненос. Маисеё камья тэ заракхэл лэс пал дава, со ёв сыс израильтянено сыр ёв.

Подыкхья, со никонэс нанэ, Маисеё умардя египтяненос и загарадя лэс дэ пхув. Нэ адава удыкхнэ мануша.

Пал одова со кэрдя Маисеё шундя кокоро фараоно. Ёв припхэндя тэ умарэн Маисеёс, нэ Маисеё унастя Египтостыр дэ пустыня. Фараоноскирэ мануша на попэнэ лэс одой.

Дэ пустыня дур Египтостыр, Моисею сыс пастухоса. Ёв лыя пэскэ ромня одолэ штэтэндыр, и лэндэ бияндынэ дуй чявэ.

Моисею ракхэлас бакрэн кэ пэскиро тестё. Екхвар ёв удыкхья екх набаро дэмбо, саво хачёл и на схачёлас. Маисеё подгия кэ ёв тэ подыкхэл пэ лэстэ. Сыр ёв подгия пашэдыр, Дэвэл заракирдя кэ Маисеё: «Маисеё, зле тэрах тыри! Ту тэрдо пэ свэнто пхув».

Тэнче Дэвэл пхэндя: «Мэ удыкхьём сыр пхаро Мирэ манушэнгэ. Мэ бичявав тут ко фараоно, соб ту тэ вылыджяс мирэн манушэн Египтостыр, кай ёнэ сын бутярнэнса. Мэ дава лэнгэ пхув Ханаано — пхув, пал сави ракирдём Араамоскэ, Исаакоскэ и Иаковоскэ».

Маисеё пучя: «А сыр ёнэ закамэна тэ уджинэ, кон бичявдя ман? Со мэ лэнгэ тэ пхэнав?» Дэвэл пхэндя: «МЭ ДОВА КОН МЭ СЫН. Пхэн лэнгэ: “ОДОВА, КОН, СИН, бичявдя ман кэ тумэ”. Адякэ ж пхэн лэнгэ: “Мэ Яхвэ, Дэвэл тумарэ дадэнгиро — Авраамоско, Исаакоско и Иаковоско. Ада Миро лав пэ сарэ бэрша”».

Маисеё здарандыя и на камья тэ джял ко фараоно, пал дова со на джинэлас куч тэ ракирэл. Пал адава Дэвэл бичявдя лэскэ Ааронос Маисеёскирэс пшалэс.

Дэвэл пхэндя Маисеёскэ, со фараоно на закамэла тэ отмэкэл лэскирэн манушэн Египтостыр. Маисеё и Аароно гинэ ко фараоно и пхэндэ лэскэ: «Адякэ ракирэл Дэвэл: “Отмэк мирэн манушэн!”». Нэ фараоно на кандыя лэн. Ёв на мэкья лэн а припхэндя лэнгэ тэ кэрэн бутыр буты.

Маисеё и Аароно явэнас кэ фараоно нанэ екхвар, нэ всарэ молы фараоно отпхэнэлас лэнгэ тэ одмэкэл манушэн. Пал дова Дэвэл бичявдя пэ Египто дэш барэ биды. Адалэ бидэнса Дэвэл мардя фараонос и сыкадя лэскэ и всарэ Египтоскэ, со Ёв зоралэдыр фараоностыр и всарэ дэвлэндыр до Египто.

Перво бида сыс дасави:Дэвэл кэрдя паны дэ рэка Нило ратэса. Нэ фараоно на одмэкья израильтянэн.

Тэнче Дэвэл бичявдя пэ Египто дрыван бут жабэн. Фараоно мангэласпэ кэ Маисеё тэ улэл лэн Египтостыр. Нэ тэнче, сыр Маисеё помангья Дэвлэс тэ на авэн жабы и ёнэ повымэнэ, фараоно холясыя дрыванэдыр и на закамья тэ одмэкэл манушэн Египтостыр.

Пал дова Дэвэл бичявдя пэ Египто мошкэн, нэ фараоно на мэкэлас лэн. Тэнче Дэвэл бичявдя бэрлен. Фараоно кхардя Маисеёс и Ааронос и пхэндя лэнгэ, со сыр ёнэ улэна адая бида, то израильтяне уджяна Египтостыр. Маисеё помангьяпэ, и Дэвэл улыя бэрлен Египтостыр. Нэ фараоно холясыя дрыванэдыр и на мэкья манушэн.

Тэнче Дэвэл бичявдя насвалыпэн пэ сари скотина сави лэндэ сыс. И дава моло фараоно холясыя сарэ илэстыр и на мэкья манушэн

Тэнче Дэвэл пхэндя Маисеёскэ тэ чурдэл прахо упрэ ангил фараоностэ. Сыр Маисеё кэрдя адава, кэ египтяне явья насвалыпэн язва пэ цыпа, а ко израильтяне на сыс адава. Дэвэл бутыр кэрдя холы дэ ило фараоноскэ, и ёв на мэкья манушэн.

Тэнче Дэвэл бичявдя градо, саво хаскирдя саро урожаё дэ Египто и умардя саро джидо, со сыс тал болыбэн. Фараоно кхардя Маисеёс и Ааронос и пхэндя лэнгэ:Мэ кэрдём бэзэх. По мангэнпэ Дэвлэскэ, соб тэ пирьячел градо и мэ одмэкава тумэн. Маисеё помангьяпэ, и градо пирьячя.

Нэ фараоно кэрдя бэзэх и холясыя. Ёв на мэкья израильтянэн.

Тэнче Дэвэл бичявдя саранчя пэ Египто. Ёй схая саро урожаё, саво ачкирдяпэ, сыр прогия градо.

Тэнче Дэвэл бичявдя калы рат, сави сыс трин дэвэс. И на сыс ничи душло и египтяне на выджянас кхэрэстыр. А кай дживэнас израильтяне сыс саро душло.

И сыр прогинэ далэ иня биды фараоно отпхэнэласпэ тэ отмэкэл манушэн Египтостыр. Адякэ сыр фараоно на камья тэ шунэл Дэвлэс, Дэвэл бичявдя авир бида. Адая бида трэби сыс тэ кэрэл кай фараоно тэ одмэкэла израильтянэн.

Дэвэл бичявдя Маисеёс и Ааронос ко фараоно тэ пхэнэн лэскэ, соб ёв тэ одмэкэл израильтянэн. Ёнэ пхэндэ фараоноскэ, со сыр ёв на одмэкэла израильтянэн, то Дэвэл мулякирла дэ Египто сарэн муршэн савэ бияндынэ перва: сыр кэ мануша, адякэ и ко ското. Шундя адава, фараоно всаек на патяндыя Дэвлэскэ и на кандыя Лэс.

Египтяненэн дужакирлас бари бида. Нэ ваш израильска мануша савэ бияндынэ перва Дэвэл выкэдыя авирто дром, саво лэн заракхэла. Сарэ семьи трэби тэ выкэдэн бакрорэс бидошакиро и тэ зачинэн лэс.

Дэвэл пхэндя израильтянэнгэ тэ лэн бакрорэскиро рат и тэ помакхэн лэса удара дэ пэскирэ кхэра, а мас тэ запэкэн пэ яг и сыгэдыр тэ схан марэса, саво пэкло бизакваскако. Ёв пхэндя лэнгэ, соб ёнэ тэ скэдэнпэ тэ уджян Египтостыр, сыр схана мас и маро.

Израильтяне саро кэрдэ адякэ, сыр пхэндя лэнгэ Дэвэл. Дэ паш рат Дэвэл прогия пир Египто и мулякирдя сарэн муршэн савэ бияндынэ перва.

До кхэра кэ сарэ израильтяне по удара сыс рат бакрорэско, и Дэвэл прогия дурэдыр адалэ кхэрэстыр, Сарэ кон сыс дэ далэ кхэра, заракхнэпэ. Ёнэ заракхнэпэ пал дова со рат бакрорэско сыс пэ лэнго кхыр.

Фараоно на патяндыя Дэвлэскэ и на кандыя Лэс, пал дава Дэвэл холясыя пэ Египто. Ёв мулякирдя сарэн первонэн чяворэн до Египто

Сарэ египетска первенцы муршитконэ родостыр мэнэ:манушэндыр савэ до бэшибэн, кэ первенцо фараоноско. Пир саро Египто мануша ровэнас барэ бидатыр.

Дэ доя рат фараоно кхардя Маисеёс и Ааронос и пхэндя: «Скэдэн сарэн израильтянэн и сыгэдыр уджяньте Египтостыр!» Египтяне камнэ, соб израильтяне сыгэдыр тэ уджян.

Израильтяне лошаса выгинэ Египтостыр. Ёнэ бутыр на сыс бутярнэ до Египто. Ёнэ джянас кэ пхув, пал сави ракирэлас лэнгэ Дэвэл! Египтяне дынэ израильтянэнгэ саро, со ёнэ мангнэ, сунакай, и руп и саро, со дрого. Мануша авиртонэ родостыр патяндынэ дэ Дэвлэстэ и выгинэ лэнса Египтостыр.

Дэвэл джял ангил лэндэ дэвэсэ сыр облако, а ратяко джял сыр ягатыр столбо. Дэвэл сыс лэнса и сыкавэлас лэнгэ дром. Манушэнгэ трэби сыс тэ кандэн Дэвлэс и тэ джян пал Лэстэ.

Прогинэ нанэ бут дэвэса фараоно и лэскирэ манушэнса парудэ пэскиро лав. Лэнгэ закамьяпэ, соб израильтяне тэ авэн бутярнэнса и ёнэ чурдынэпэ лэн тэ рэсэн. Дэвэл кэрдя фараоноскиро ило баруно, соб мануша тэ дыкхэн, со Ёв — екх чячуно Дэвэл. И соб мануша тэ полэн, со Лэскиро лав — Яхвэ, и со Ёв зоралэдыр фараоностыр и сарэндыр дэвлэндыр.

Тэнче фараоно и лэскирэ мануша традынэ пал израильтянэндэ, соб тэ кэрэн лэн пэскирэнса бутярнэнса. Сыр израильтяне удыкхнэ савэ джян пэ лэндэ мануша фараоноскирэ, ёнэ полынэ, со лэнгэ нанэ карик тэ нашэн и лэн лэна мануша фараоноскирэ, долэскэ со ангил сыс Лоло морё. Ёнэ дрыван пиридарандынэ и загодлынэ: «Хвэдыр амэ тэ кэрас буты пэ египтянэндэ, а нанэ тэ мэрас дэ пустыня!»

Маисеё пхэндя израильтянэнгэ: «Пирачен тэ дарэн! Дадэвэс Дэвэл лэла тэ марэлпэ пал тумэндэ и заракхэла тумэн». Тэнче Дэвэл пхэндя Маисеёско: «Пхэн манушэнгэ, мэк джян кэ Лоло морё».

Тэнче Дэвэл пиричидя облачно столбо, и чидя лэс машкирал израильтянэндэ и египтянэндэ, ратяко адава столбо хачёлас соб египтяне тэ наподжян кэ израильтяне.

Дэвэл пхэндя Маисеёскэ тэ гадэл васта ангил морё. Маисеё гадыя васта, и Дэвэл бичявдя бавал, сави розлыджия паны до морё пир рига, адякэ откэрдяпэ дром тэ пириджя морё.

Израильтяне прогинэ морё пир шуки пхув, а пир дуй рига паны сыс тэрдо стенаса.

И египтяне удыкхнэ, сыр израильтяне нашэнас лэндыр. Египтяне закамнэ тэ праста пал лэндэ.

Ёнэ гинэ палал пал израильтянэндэ пир дром пир морё. Дэвэл кэрдя со египтяне пиридарандынэ. Ёв кэрдя адякэ со лэнгирэ вурда бэшнэ дэ блата. Ёнэ загодлынэ: «Нашас! Кокоро Дэвэл марэлпэ пал израильтянэндэ!»

Сыр сарэ израильтяне пиригинэ морё по авир риг састэ и зоралэ, Дэвэл пхэндя Маисеёскэ тэ гадэл васта по паны. Маисеё адякэ и кэрдя, паны рисия по пэскиро штэто и пэя пэ египтянэндэ. Сарэ фараоноскирэ мануша тасадынэ до паны.

И сыр израильтяне удыкхнэ, со египтяне похасинэ, ёнэ патяндынэ Дэвлэскэ и приджиндэ, со Маисеё — Дэвлэскиро пророко.

Израильтяне сыс дрыван лошалэ, со Дэвэл очядя лэн джидэнса и на рисинэ ёнэ палэ до бутярнэ пэ буты кэ фараоно. Кана ёнэ кандэнас Дэвлэс и ваш Лэскэ дживэнас пэ воля! Израильтяне багэнас бут гиля, лошалэ и прославляли Дэвлэс пал дова со Ёв заракхья лэн фараоноскирэндыр манушэндыр.

Дэвэл припхэндя израильтянэнгэ соб ёнэ тэ рипирэн адава дэвэс кай Ёв заракхья лэн египтянендыр и дыя лэнгэ воля. Адава свэнко кхардэ Патради. Пэ адава свэнко Патради израильтяне зачинэн бакрорэс бидошако и хан лэс марэса, саво пэкло бизакваскако.

Сыр Дэвэл пролыджия израильтянэн пир Лоло морё, Ёв лыджия лэн пир пустыня кэ бэрга сави кхарэласпэ Синай. Адая бэрга кай Маисеё дыкхья сыр хачёлас набаро дэмбо. Мануша росчурдынэ пэскирэ шатры пашэ бэрга Синай.

Дэвэл пхэндя Маисеёскэ и сарэнгэ манушэнгэ Израилёскирэнгэ: «Сыр тумэ лэна тэ шунэн Ман и тэ ракхэн завето, саво Мэ скэрава тумэнса, то тумэ авэна ваш Мангэ дрога, мирэ рашая и свэнта манушэнса»

Дэвэл припхэндя Маисеёскэ соб ёв тэ освятинэл манушэн кэ трито дэвэс тэ дыкхэнпэ Лэса. Мануша дуй дэвэс скэдэнаспэ соб тэ дыкхэнпэ Дэвлэса. Пэ трито дэвэс явья Дэвэл упрэ пэ бэрга Синай. Сыр Ёв джялас сыс баро громо, молнии, тхув и бари трубытко глос. Дэвэл кхардя Маисеёс и Маисеё гадыяпэ пэ бэрга.

Пэ бэрга Синай Дэвэл кэрдя манушэнса завето и дыя лэнгэ Дэш Заповеди. Ёв пхэндя: «Мэ – Яхвэ, тумаро Дэвэл. Мэ заракхьём тумэн сыр сыс тумэ бутярнэ до Египто. На мангэнпэ кэ авирта дэвэла».

«На кэрэн пэскэ идалос и на пэрэн по чянга ангил лэндэ, пал дова со Мэ, Яхвэ, трэби тэ авав тумэндэ екх Дэвэл. На ракирэн миро Лав бипатывако. Рипирэнте, со суббото – када свэнто дэвэс. Кэрэнте пэскири буты дэ шов дэвэс, а эфтато дэвэс – суббота, на кэрэнте ничи и думинэн пал Дэвлэстэ».

«Полэн пэскирэн дадэн и даен. На умарэн. На пасёв чужонэ ромняса. На чёрэнте. На хохавэнте. На камэн чужона ромня, нанэ пэско кхыр и саро, со нанэ тумаро».

Сарэ мануша прылынэ заповеди, савэ дыя лэнгэ Дэвэл. Сарэ закамнэ тэ авэн лэскирэ манушэнса и тэ прылэн Лэс екхэс Дэвлэс и тэ поклонинэпэ Лэскэ.

Дэвэл пхэндя израильтянэнгэ, соб ёнэ тэ кэрэн бари шатра – Шатра тэ Скэдэнпэ. Дэвэл саро роспхэндя лэнгэ, Сыр тэ кэрэн ла и со дэ латэ тэ чивэн. Дэвэл припхэндя лэнгэ тэ скэрэн бари цэрга, сави лэла тэ роскэрэл шатра по дуй. Дэвэл пхэндя, со Ёв явэла дэ шатра, сави палэ цэрга, и ачкирлапэ дэ латэ. Дэ дая шатра на заджял никон, екх баро рашай

Дэвэл выкэдыя Пэскэ рашаса Ааронос, пшалэс Маисеёскирэс, и лэскиро родо. Мануша трэби сыс тэ скэрэн жэртвеннико ангил Шатра тэ Скэдэнпэ. Сарэ, кон на кандыя Дэвлэско Законо, трэби тэ янэн пэ адава жэртвеннико ското. Рашай трэби тэ лэл и тэ зачинэл адава ското и тэ схачкирэл пэ жэртвеннико дэ жэртва Дэвлэскэ, Дэвэл пхэндя, со рат скотоско прикэрла бэзэх адалэ манушэско, пал дова Ёв на дыкхэла адава бэзэх. Пал дая жэртва мануш тэрдёла жужо дэ якха Дэвлэскирэ.

Дэвэл дыя манушэнгэ бут авирта законы сыр тэ дживэн и тэ лыджя пэскиро джиипэн. Дэвэл дыя лав со дэла лэнгэ бахт и лэла лэн тэ заракхэл, сыр ёнэ лэна тэ дживэн пир Лэскиро законо. А сыр на лэна тэ дживэн пир далэ законы, то Дэвэл пхэнэл со Ёв лэла лэн тэ помарэл. Дэвэл чингирдя Дэш Заповеди пэ дуй бара и пхэндя Маисеёскэ, соб ёв тэ гадэлпэ пэ бэрга Синай и тэ лэл лэн.

Маисеё бут дэвэса сыс пэ бэрга Синай и ракирэлас Дэвлэса. Мануша кхинынэ тэ дужакирэн лэс . Ёнэ яндэ Аароноскэ сунакай и помангнэ лэс тэ скэрэ лэнгэ идалос, савэскэ ёнэ лэна тэ поклонинэнпэ, а нанэ Дэвлэскэ. Адякэ ёнэ кэрдэ баро бэзэх ангил Дэвлэстэ.

Аароно кэрдя сумнакунэс идалос дэ облико гурувытко. Мануша сыр дылынэ лынэ тэ мангэнпэ ангил гурувэстэ лынэ тэ янэн лэскэ жэртвы. Дэвэл дрыван холясыя пэ лэндэ пал дава бэзэх. Ёв пхэндя Маисеёскэ, со камэл тэ хаскирэл лэн. Нэ Маисеё мангьяпэ Дэвлэскэ, соб Ёв тэ на хаскирэл лэн. Дэвэл шундя лэскиро мангипэн и на хаскирдя манушэн.

Сыр Маисеё змэкэласпэ бэргатыр Синай, ёв лыджялас до васта дуй тбара, пэ савэндэ Дэвэл чингирдя Дэш Заповеди. Удыкхья идалос, Маисеё адякэ росколясыя, со розмардя адалэ дуй бара.

Тэнче Маисеё схачкирдя идалос розмардя лэс до прахо. Ёв чурдыя прахо до паны и припхэндя манушэнгэ тэ пьен паны. Дэвэл бичявдя пэ манушэндэ насвалыпэна, и бут лэндыр по мэнэ.

Дэвэл припхэндя Маисеёскэ тэ кэрэл нэвэ бара ваш Дэш Заповеди поштэто одолэнгэ савэ ёв розмардя. Маисеё адякэ и кэрдя. Ёв гадыяпэ пэ бэрга и помангьяпэ, соб Дэвэл тэ простинэл манушэн. Дэвэл ушундя лэс, простиндя израильтянэн и зачиндя Дэш Заповеди пэ нэвэ бара. Маисеё рисия бэргатыр адалэнса барэнса. Тэнче Дэвэл отлыджия израильтянэн бэргатыр Синай кэ Пхув пал сави Ёв лэнгэ ракирлас.

Сыр Дэвэл дыя израильтянэнгэ сарэ законы, пир савэ ёнэ трэби тэ дживэн дэ завето Лэса, Ёв отлыджия лэн бэргатыр Синай. Дэвэл джялас ангил лэндэ до облачно столбо а мануша джянас пал Лэстэ. Ёв камья тэ янэл лэн кэ Пхув сави кхарэлпэ Ханаано.

Дэвэл дыя лав Авраамоскэ, Исаакоскэ и Иаковоскэ, со дэла Пхув пал сави Ракирдя лэнгирэнгэ родоскэ, нэ дэ долэ дэвэса одой дживэнас бут авир мануша. Лэн кхарэнас хананеи. Хананеи на поклонинэнаспэ Дэвлэскэ и на прылэнас Лэс. Ёнэ поклонинэнаспэ хоханэнгэ дэвлэнгэ и сыс захалэ мануша.

Дэвэл пхэндя израильтянэнгэ: «Сыр тумэ заджяна пэ Пхув, сави пхэндя дэла Дэвэл, тумэ трэби тэ умарэн сарэн хананеен. На кэрэн лэнса ни савэ договоры и на кэрэн лэнса бьява. Тумэ трэби тэ розмарэн сарэ лэнгирэ идалы. Сыр тумэ на кэрэна адякэ, сыр Мэ пхэндём, тэнче пирьячена Мангэ тэ поклонинэнпэ, а лэна тэ поклонинэнпэ лэнгирэ идалоскэ».

Сыр израильтяне подгинэ кэ штэто Ханаано, Маисеё выкэдыя дэшудуен муршэн, по екхэс кожнонэ родостыр Израилёскирэстыр. Ёв бичявдя адалэн манушэн тэ подыкхэн пхув, соб тэ уджинэ сави ёй. Ёнэ адякэ ж трэби сыс тэ уджинэн пало хананеи, соб тэ уджинэ зоралэ ёнэ чи нанэ зоралэ.

Дэшудуй мурша пхирэнас саранда дэвэса пир Ханаано, а тэнче рисинэ палэ. Ёнэ сарэ ракирэнас манушэнгэ: «Пхув дрыван лачи и дэл бут хабэн!» Нэ лэндыр дэш мануша лынэ тэ ракирэн: «Форы одой дрыван зоралэ, а мануша дрыван барэ! Сыр амэ джяса пэ лэндэ тэ марэпэ, то ёнэ амэн умарна.»

Дуй авирта мануша, Халево и Иисусо, чяво Навиноскиро, пхэндэ: «Ада чячибэн, со мануша до Ханаано барэ и зоралэ, нэ амэ лэн помараса! Дэвэл лэла тэ марэлпэ пал амэндэ!»

Нэ мануша на шундэ Халевос и Иисусос. Мануша холясынэ пэ Маисеёстэ и Аароностэ и пхэндэ: «Ваш со тумэ яндэ амэн дэ дава налачо штэто? Хвэдыр бы амэ тэ ачяспэ дэ Египто. Сыр ямэ заджяса пэ дая пхув, ямэ хасёваса до марибэн, а амарэ ромня и чяворэ авэна бутярнэ хананеенгэ». Мануша камнэ тэ выкэдэн пэскэ авирэс шэралэс, саво лыджялас бы лэн палэ дэ Египто.

Шундя, со ракирэн мануша, Дэвэл дрыван холясыя. Ёв явья дэ Шатра кай скэдэнпэ и пхэндя: «Пал дова со, тумэ гадынэтэ пэ Мандэ, сарэ мануша авэна тэ пхирэн пир пустыня. Сарэ мануша конэскэ биш бэрш и бутыр мэрэна адай и на заджяна дэ пхув, сави Мэ лэнгэ дав. Дэ латэ заджяла екх Иисусо, чяво Навиноскиро, и Халево».

Сыр мануша шундэ адалэ лава Дэвлэстыр, ёнэ зарондэ пал дова со кэрдэ бэзэх. Ёнэ закамнэ тэ марэпэ манушэнса савэ дживэн до Ханаано. Маисеё пхэндя лэнгэ, соб ёнэ тэ на джян тэ марэпэ манушэнса савэ дживэн до Ханаано, пал дова со Дэвэл на джяла лэнса, ёнэ на кандынэ Маисеёс.

Дэвэл на гия израильтянэнса тэ марэпэ, и пал дова хананеи розмардэ и умардэ бутэн лэнгирэн манушэн. Тэнче израильтяне отгинэ Ханааностыр . Тэнче ёнэ пхирэнас пир пустыня саранда бэрш.

Адалэ саранда бэрш, савэ ёнэ пхирэнас пир пустыня, Дэвэл дэлас саро, со лэпгэ сыс трэби, маро болыбнастыр, саво кхарэласпэ «манна». Сарэ далэ дэваса Дэвэл ракхэлас лэн, и лэнгири идя на чинэласпэ пэ лэндэ.

Дэвэл дэлас лэнгэ паны барытконэ бэргатыр. Но ёнэ на подыкхэ пэ саро адава, мануша Израильска ровэнаспэ и холясонас пэ Дэвлэстэ и Маисеёстэ. Дэвэл всаек зрикирэл пэскиро лав. И кэрэлас сарэ родоскэ Авраамоскирэскэ Исаакоскирэскэ и Иаковоскирэскэ адякэ сыр пхэндя.

Екхвар ко мануша на сыс паны. Дэвэл пхэндя Маисеёскэ: «Пхэн адалакэ барунэ баргакэ, соб ёй тэ дэл паны, и латыр по тхадэла паны». Нэ Маисеё на кандыя Дэвлэс паш сарэндэ манушэндэ. Ёв на пхэндя бэргакэ, соб ёй тэ дэл паны, а дуй молы пикадя пир латэ каштэса. Бэргатыр потхадыя паны, и сарэ пинэ, нэ Дэвэл холясыя пэ Маисеёстэ и пхэндя: «Пал дова со ту адякэ кэрдян, ту на заджяса пэ Пхув сави мэ ракиравас!»

Прогия саранда бэрш, сыр ёнэ пхирэнас пир пустыня, сарэ кон гадэнаспэ пэ Дэвлэстэ по мэнэ. Тэнче Дэвэл яндя манушэн ко штэто кэ Пхув сави Ракирэлас. Маисеё пураныя, и Дэвэл выкэдыя Иисусос, чявэс Навиноскирэс, пхурэдырэса манушэса. А Маисеёскэ Дэвэл пхэндя, со Ёв бичявэла манушэнгэ авирэс пророкос, дасавэс сыр ёв.

Дэвэл припхэндя Маисеёскэ тэ гадэлпэ упрэ пэ бэрга, соб тэ дыкхэл Пхув пал сави Ёв Ракирдя. Маисеё удыкхья адая Пхув, нэ Дэвэл на дыя лэскэ тэ заджя пэ латэ. Тэнче Маисеё мэя, и израильтяне ровэнас пал лэстэ трин дэша дэвэс. Иисусо чяво Навиноскиро, тэрдия пхурэдырэса манушэса. Ёв куч лыджялас манушэн, пал дова со патялас Дэвлэскэ и кандэлас Лэс.

Явья дэвэс израильтянэнгэ тэ заджя пэ Пхув сави ракирдя Дэвэл — до Ханаано. Пэ доя пхув сыс форо, саво кхарелпэ Иерихоно. Лэс заракхэнас барэ стены. Иисусо, чяво Навиноскиро, бичявдя дуен манушэн тэ угалён дэ Иерихоно. Дэ дова форо дживэлас лубны ла кхарэнас Раав. Ёй гарадя адалэн манушэн кэ пэ до кхыр, и дыя лэнгэ тэ уджя форостыр. Ёй кэрдя дава пал дова со патяндыя дэ Дэвлэски зор израильтянэнги. Адалэ дуй мануша пхэндэ со заракхэна Раав и лакири семья, сыр израильтяне розмарэна Иерихоно.

Соб тэ заджя дэ доя Пхув, израильтянэнгэ трэби сыс тэ пириджян рэка сави кхарэлпэ Иордано. Дэвэл пхэндя Иисусоскэ, чявэскэ Навиноскирэскэ: «Мэк ангил джяна рашая». Сыр рашая загинэ дэ рэка Иордано, о паны пирьячя тэ тхадэл и израильтяне пиригинэ пэ явир риг рэка пир шуко дром.

Тэнче сыр мануша пиригинэ рэка Иордано, Дэвэл пхэндя Иисусоскэ, чявэскэ Навиноскирэскэ, кай ёнэ лэна тэ заухтылэн дрыван зорало форо Иерихоно. Дэвэл пхэндя Иисусоскэ, соб ёнэ шов дэвэс рашая и мануша савэ лэна тэ марэнпэ, тэ обджян форо екхвар до дэвэс. Ёнэ кэрдэ адякэ сыр пхэндя Дэвэл.

Дэвэл адякэ ж пхэндя, со по эфтато дэвэс израильтяне трэби тэ обжян кругом форо эфта молы. Тэнче рашая трэби тэ пхурдэн дэ трубы а мануша тэ гадэн бари годла. Тэнче стены Иерихоноскирэ попэрэна и ёнэ лэна форо. Израильтяне адякэ и кэрдэ.

Сыр ёнэ кэрдэ саро со лэнгэ пхэндэ, стены Иерихоноскирэ пэнэ! Израильтяне дэ форо умардэ сарэн, сыр лэнгэ пхэндя Дэвэл. Ёнэ заракхнэ Раав и лакири семья, сави тэнче явья кэ израильска мануша. Сыр шундэ, со израильтяне розмардэ Иерихоно, то мануша савэ ачнэпэ до Ханаано здарандынэ, со ёнэ умарэна и лэн.

Дэвэл припхэндя израильтянэнгэ тэ накэрэ ни савэ договоро манушэнса Ханааностыр. Но екх родо дэ Ханаано хохадя Иисусос, чявэс Навиноскирэс. Ада сыс гаваонитяне. Ёнэ пхэндэ, со дживэн дур Ханааностыр и мангнэ Иисусос, тэ кэрэ лэнса договоро. Иисусо, и авир шэралэ до Израилё кэрдэ договоро с гаваонитянэнса, на пучнэ кэ Дэвэл, чи адякэ ёнэ кэрдэ. .

Прогия трин дэвэс и израильтяне уджиндэ, со гаваонитяне дживэн до Ханаано. Ёнэ холясынэ пэ лэндэ пал дова со ёнэ лэн хохадэ. И всаек израильтяне рикирэнас мирно договоро, саво кэрдэ лэнса, пал дова со пхэндэ ада ангил Дэвлэстэ. Прогинэ дэвэса и цари аморреевска, авирэскирэ родоскирэ дэ Ханаано, шундэ, со гаваонитяне кэрдэ израильтянэнса договоро. Адалэ цари скэдынэ манушэн и гинэ тэ марэпэ пэ Гаваонэндэ. Тэнче гаваонитяне явнэ кэ Иисусо чяво Навиноскиро, тэ мангэн лэс тэ заракхэл лэн.

Иисусо, чяво Навиноскиро, скэдыя израильсконэн манушэн савэ лэна тэ марэнпэ. Ёнэ джянас сари рат кэ гаваонитяне. Сыр вштэл кхам ёнэ лынэ аморреевсконэн манушэн и помардэ лэн.

Дэ дова дэвэс Дэвэл марэласпэ пало Израилё. Ёв кэрдя адякэ со ёнэ ничи на полынэ и бичявдя баро градо, саво умардя бутэн лэнгирэн манушэн.

И тэрдякирдя Дэвэл кхам до болыбэн, соб кэ Израилё тэ авэл барэдыр дэвэс ваш дова, соб саро тэ розмарэ кэ аморреи. Дэ дова дэвэс Дэвэл выкхэлдя дава марибэн ваш Израилёскэ.

Сыр Дэвэл розмардя адалэн манушэн, бут авир хананейска роды скэдынэпэ хкэтанэ, соб тэ марэн Израилёс. Нэ Иисусо чяво Навиноскиро манушэнса израильтянэнса, гинэ пэ лэндэ и умардэ лэн.

Сыр прогия дава марибэн Дэвэл дыя сарэнгэ родэнгэ Израильтянонэнгэ пэскиро котыр Пхув сави Ракирэлас и дыя дэ Израилё миро и сарэнса кон паш лэндэ дживэлас.

Сыр Иисусо, чяво Навиноскиро пураныя ёв скхардя сарэн Израилёскирэн манушэн . Ёв пхэндя израильтянэнгэ соб ёнэ тэ набистрэн, со ёнэ пхэндэ Дэвлэскэ, кай лэна тэ дживэн до завето, саво Дэвэл скэрдя лэнса пэ бэрга Синай. Мануша пхэндэ со авэна чячунэ Дэвлэскэ и тэ дживэн лэна пир Лэскирэ лава.

Сыр мэя Иисусо, чяво Навиноскиро, израильтяне перьячнэ тэ кандэ Дэвлэс и тэ дживэн пир Лэскиро лав. Израильтяне на вытрадынэ манушэн савэ ачнэпэ дэ Ханаано и лынэ тэ поклонинэнпэ хананейсконэнгэ дэвлэнгэ, а нанэ Яхвэ, чячунэ Дэвлэскэ. Кэ израильтяне на сыс царёс, пал дова мануша дживэнас адякэ сыр кон камэнас.

Израильтяне бут бэрш на кандэнас Дэвлэс, Ёв кэрэлас лэнгэ бида, отдэлас лэн дэ васта врагэнгэ, савэ дживэнас кругом лэндэ. Ёнэ марэнас израильтянэн, обчёрэнас и хаскирэнас саро со лэндэ сыс и бутэн манушэн умарэнас. Прогия бут бэрш дэ пхарипэн израильтяне мангэнас Дэвлэс тэ заракхэл лэн врагэндыр. Адякэ и сыс бут молы.

Сыр израильтяне мангэнас Дэвлэс, ёв заракхэлас лэн. Ёв бичявэлас лэнгэ сэндарёс, саво тырдо сыс бэргаса пал лэндэ и дэлас воля манушэнгэ . Тэнче мануша дживэнас и на дарэнас, и сэндарья чячунэс лыджянас манушэн. Дэвэл бичявэлас бутэн сэндарен тэ подрикирэн израильтянэн. Екхэс дасавэс сэндарёс Дэвэл бичявдя, сыр домэкья со мадианитяне савэ дживэнас пашил лынэ израильтянэн.

Эфта бэрш мадианитяне залэнас кэ израильтяне саро маро Израильтяне дживэнас даранэс и гаравэнаспэ до бэрги, соб мадианитяне тэ на попэрэн лэн. И ёнэ заракирдэ ко Дэвэл и мангэнас Лэс тэ заракхэл лэн.

Дэ долэ дэвэса дживэлас израильтянено кхарэнас лэс Гедеоно. Екхвар сыр ёв гаравэласпэ мадианитянэндыр, и соб никон тэ надыкхэл ёв вымарэлас маро, кэ ёв явья ангило Дэвлэстыр и пхэндя: «Зорало мануш, туса Дэвэл! Джя и эаракх Израилё мадианитянэндыр».

Ко дад Гедеоноско сыс жэртвеннико, скэрдо ваш идалоскэ. Дэвэл припхэндя Гедеоноскэ тэ розмарэл адава жэртвеннико и тэ чивэл жэртвеннико Дэвлэскэ Яхвэ. Нэ Гедеоно дарэласпэ манушэндыр, пал дова ёв подужакирдя рат и розмардя жэртвеннико по котыра. Пэ дава штэто кай розмардя жэртвеннико, Гедеоно кэрдя жэртвеннико Дэвлэскэ и яндя пэ лэстэ жэртва.

Сыр мануша удыкхнэ, со жэртвеннико розмардо, ёнэ дрыван росхолясынэ и гинэ по кхер ко Гедеоно, тэ умарэн лэс. Нэ дад Гедеоноско пхэндя: «Соскэ тумэ камэн тэ заракхэн пэскирэс дэвлэс? Сыр ёв дэвэл, то мэк заракхэл кокоро пэс!» Шундэ адалэ лава, мануша и пхэндэ на ласа тэ умарас Гедеонос.

Сыго мадианитяне явнэ тэ обчёрэн израильтянэн. Мадианитянэн сыс адякэ бут, со лэн напогинэса. Гедеоно скхардя израильтянэн, соб тэ марэпэ мадианитянэнса. Ёв мангья ко Дэвэл дуй знаки, соб тэ уджинэ со, Дэвэл чячибэн прикхарэл лэс тэ заракхэл Израилё мадианитянэндыр.

Ваш перво знако Гедеоно чидя пэ пхув бакрытко шэрсть и помангья Дэвлэс, сыр вштэла кхам роса тэ авэл пэ шэрсть, а пхув сари тэ авэл шуки. Дэвэл адякэ и кэрдя. Пэ авир рат Гедеоно помангья Дэвлэс, соб пхув тэ авэл кинды, а шэрсть шуки. Дэвэл кэрдя адякэ. Адалэ дуй знаки дынэ тэ полэ Гедеоноскэ, со Дэвэл чячибэн прикхарэл лэс тэ заракхэл Израилё мадианитянэндыр.

Тэнче Гедеоно кхардя кэпэ манушэн, и кэ ёв явнэ 32 барья манушэн. Нэ Дэвэл пхэндя лэскэ, со ада дрыван бут. Тэнче Гедеоно бичявдя кхэрэ 22 барья манушэн, савэ дарэнаспэ тэ марэнпэ. Дэвэл пхэндя Гедеоноскэ, со лэстэ всаек бут манушэн. Тэнче Гедеоно выкэдыя 300 манушэн савэ лэна тэ марэнпэ, пэ савэндэ сыкадя лэскэ Дэвэл, а сарэн авирэн бичявдя кхэрэ.

Дэ доя рат Дэвэл пхэня: «Поджья кэ лэнгирэ шатры и пошун со ракирэн мадианитяне. Сыр ту шунэса, пал со ёнэ ракирэн, то пирьячеса тэ дарэс тэ джя пэ лэндэ». Ратяко Гедеоно подгия ко шатры и шундя, сыр екх мануш‐мадианитянено роспхэнэлас авирэскэ суно, сыр пир мадианитянско лагирё кругло ячменно маро и розмардя шатра. Авир мануш пхэндя: «Адава суно кэ дова, со мануша Гедеоноскирэ розмарэна амэн мадианитянэн!» Шундя адава, Гедеоно поклониндяпэ Дэвлэскэ.

Тэнче Гедеоно рисия кэ пэскирэ мануша и пхэндя, Дэвэл отдэл мадианитянэн дэ лэнгирэ васта. И Гедеоно дыя кожнонэскэ рого, глинатыр чяро и факело. Ёнэ гинэ облынэ лагерё, дэ саво совэнас мадианитяне. Трин шэла манушэн Гедеоноскирэ рикирэнас захачкирдэ факелы до чярэ, соб мадианитяне тэ наявэл душлы лэнгири яг.

Тэнче сарэ мануша Гедеоноскирэ розмардэ чярэ — и кэрдяпэ душло ягатыр кай хачёнас факелы. Мануша пикадэ до трубы и загодлынэ: «Мечё Яхвэ и Гедеоноскиро!»

Дэвэл кэрдя со мадианитяне на полынэ со кэрэлпэ, и лынэ ёнэ тэ умарэн екх екхэс. Гедеоно на дужакирэлас а бичявдя манушэн, соб ёнэ тэ кхарэн бутыр израильтянэн, и ёнэ тэ явэн и тэ традэн мадианитянэн. Израильтяне умардэ бут лэнгирэн манушэн, а савэ ачнепэ джидэ вытрадынэ лэн пэскирэ пхувьятыр. До дава дэвэс хасия 120 барья мадианитян и Дэвэл заракхья Израилё!

Мануша закамнэ тэ кэрэн Гедеонос пэскирэса царёса. Нэ Гедеоно на закамья, а помангья лэндыр сумнакунэ ангрусня, савэ ёнэ залынэ кэ мадианистяне. Мануша яндэ Гедеоноскэ бут сумнакай.

Адалэ сумнакастыр Гедеоно кэрдя идя, дасави сави счурдэлпэ пэ идя рашаскири, и ачкирдя ла дэ пэскиро форо. Нэ мануша лынэ тэ поклонинэнпэ пэ адая идя сыр идалоскэ. Сыр Гедеоно пхурия и мэя, израильтяне ачнэ тэ поклонинэпэ идалоскэ. Пал дава Дэвэл мардя Израилёс и домэкья врагэнгэ тэ лэн лэс. Нэ всаек израильтяне помангнэ Дэвлэс тэ заракхэл лэн, и Дэвэл бичявдя лэнгэ авирэс сэндарёс.

Адякэ сыс бут молы:израильтяне кэрэнас бэзэх — Дэвэл лэн марэлас, ёнэ мангэнас тэ простинэл лэн — и Дэвэл бичявэлас лэнгэ сэндарёс, саво заракхэлас лэн. И бут бэрша Дэвэл дэлас израильтянэнгэ бутэн сэндарен, савэ заракхэнас лэн врагэндыр.

Сыр враги бут молы джянас пэ лэндэ, то израильтяне мангнэ ко Дэвэл царёс, сыр кэ сарэ авир мануша. Ёнэ камнэ царёс, саво лэла лэн тэ лыджял до марибэн. Дэвлэскэ на чялыя со ёнэ мангнэ царёс, нэ Ёв всаек дыя лэнгэ царёс, сыр ёнэ мангнэ.

Перво царё сыс до Израилё Сауло. Ёв сыс вучё гожо и чялёлас манушэнгэ. Перва бэрша Сауло сыс лачё царё до Израилё. Нэ дурэдыр ёв кэрдяпэ захало и пирьячя тэ шунэл Дэвлэс. Пал дава Дэвэл выкэдыя авирэс манушэс царёса пэ лэско штэто.

Дэвэл выкэдыя тэрнэс муршэс Израилёстыр савэс кхарэнас Давидо, и Ёв кэрдя саро соб ёв тэ авэл царёса пал Саулостэ. Давидо сыс пастухо форостыр Вифлеемо. Сыр ёв ракхэлас бакрэн дадэскирэн, лэскэ приджяласпэ тэ умарэл и львос и медвидёс, савэ чурдэнаспэ пэ бакрэндэ. Давидо сыс патывало и чячуно мануш. Ёв патялас Дэвлэскэ и кандэлас Лэс.

Сыр Давидо сыс тэрно, ёв мардяпэ дрыван барэса манушэса савэс кхарэн Голиафо. Ёв сыс зорало и джиндя сыр трэби тэ марэпэ, вучипэн лэско сыс гин трин метры! Нэ Дэвэл дыя Давидоскэ тэ умарэл Голиафос и тэ заракхэ Израилё. Тэнче Давидо бут молы выкхэлэлас марибэн врагэндыр Израилёскирэндыр. Ёв лыя куч тэ марэпэ и бут молы лыджялас манушэн Израильсконэн до марибэн врагэнса. Давидо чялёлас израильтянэнгэ, и ёнэ шарэнас лэс.

Мануша адякэ камнэ Давидос, со Саулос када захалас и ёв дарэлас, со Давидо тэрдёла пэ лэско штэто. Тэнче Сауло закамья тэ умарэл лэс, и Давидо настя дэ пустыня, гаравэласпэ Саулостыр и лэскирэ манушэндыр. Екхвар Сауло Пэскирэ манушэнса родэлас Давидос. Ёв загия дэ пещера кай гаравэласпэ Давидо, нэ ёв на удыкхья лэс. Давидо подгия кэ ёв палал и отчиндя лэскирэ идятыр наборо котыр. Сыр, Сауло отгия пещератыр, Давидо загодлыя Саулоскэ и сыкадя лэскэ котыр, саво лэстэ сыс до васта. Адякэ Сауло полыя, со Давидо, на умардя лэс, ваш дова соб тэ авэ царёса, нэ дава сыс дэ лэскирэ васта.

Прогия набут дэвэса и Сауло хасия до марибэн, а Давидо тэрдыя царёса до Израилё. Дэвэл благословил Давидос дэ саро со ёв кэрэлас. Ёв сыс лаче царё, и манушэнгэ ёв чялёлас. Давидо марэласпэ бут молы, и Дэвэл дэлас лэскэ тэ выкхэлэ кэ враги Израилёскирэ. Ёв марэласпэ пало Иерусалимо и кэрдя лэс барэса фороса, дэ саво ёв дживэлас и сыс хуласа пэ дая пхув. Давидо сыс царёса 40 бэрш. Пало бэрша дэ савэ ёв сыс хулай до Израилё, Израилё ачя зорало и барвало.

Давидо камья тэ кэрэл кхыр ваш Дэвлэскэ, кай сарэ израильтяне тэ поклонинэнпэ Дэвлэскэ и тэ янэн Лэскэ жэртвы. Кэ дава, 400 бэрш, мануша поклонинэнаспэ Дэвлэскэ и янэнас Лэскэ жэртвы дэ Шатра кай скэдэнпэ, сави скэрдя Маисеё.

Дэ долэ дэвэса дживэлас екх пророко савэс кхарэнас Нафано. Дэвэл бичявдя лэс кэ Давидо дасавэнса лавэнса: «Ту на кэрэса Дэвлэскэ Кхыр ваш Мангэ, пал дова со ту бут молы сыс до марибэн. Лэс кэрэла тыро чяво. Нэ Мэ тукэ дава бут саро. Екх тырэ родостыр авэла вечно хулай Мирэ манушэнгэ!» Екх родостыр Давидоскирэстыр, саво авэла вечно хулай. — ада Мессия. Мессия — ада Выкэдыно Дэвлэса, Саво заракхэла манушэн сарэ свэтостыр лэнгирэ бэзэхэндыр.

Сыр Давидо шундя лава Нафаноскирэ, ёв пхэндя Дэвлэскэ наис и прославиндя Лэс пал дова со Ёв дыя Давидоскэ бари патыв и дыя лэскэ бут благословения. Давидо на джиндя, дэ савэ бэрша Дэвэл кэрэла со пхэндя. Нэ, амэ джинас, со израильтянэнгэ трэби сыс бут тэ дужакирэн сыр явэла Мессия — гин 1000 бэрш.

Давидо бут бэрша чячунэс лыджялас пэскирэн мануша. Ёв кандэлас Дэвлэс, и Дэвэл благословлял лэс. Нэ тэнче Давидо кэрдя баро бэзэх ангил Дэвлэстэ.

Екхвар Давидо поддыкхья пэскирэ дворостыр и удыкхья гожона джювля, сави морэласпэ. Ёв на джиндя ла, нэ пучя пал латэ кэ пэскирэ бутярнэ, и лэскэ пхэндэ, со ла кхарэн Вирсавия.

Давидо на отрисия латыр, а бичявдя пал латэ бутярнэн. Ёв пирисутя ласа, и отбичядя ла кхэрэ, прогинэ дэвэса и Вирсавия пиридыя Давидоскэ, со ёй пхари.

Вирсавия сыс палором пал манушэстэ савэс кхарэн Урия. Ёв сыс хвэдыр машкир манушэндэ савэ марэнпэ ко Давидо. Дэ долэ дэвэса Урия марэласпэ до марибэн. Давидо кхардя Уриёс марибнастыр и припхэндя лэскэ тэ джял кэ пэскири ромны. Нэ Урия отпхэндяпэ тэ джя кхэрэ тэ пасёл, адякэ сыр авирта мануша марэнпэ до марибэн. Тэнче Давидо бичявдя лэс палэ по марибэн и припхэндя барэдырэ манушэскэ, соб лэс тэ чивэн одорик, кай марэнпэ дрыванэдыр сарэстыр, соб Урия тэ мэрэл. Адякэ и сыс:Урия мэя дэ марибэн.

Сыр Урия мэя. Давидо лыя пал пэстэ Вирсавия. Ёй бияндя лэскэ чявэс. Дэвэл дрыван холясыя пэ Давидостэ, пал дава со ёв кэрдя. Ёв бичявдя ко Давидо пророкос Нафанос, соб ёв тэ пхэнэл лэскэ, саво баро лэско бэзэх. Давидо мангьяпэ ко Дэвэл, пал пэскиро бэзэх, и Дэвэл простиндя лэс. Тэнче Давидо саро джиипэн джялас пал Дэвлэстэ и кандэлас Лэс, и сыр сыс кэ ёв пхарэ дэвэса, ёв всаек патялас Дэвлэскэ.

Нэ чяво Давидоско мэя тыкнэса. Адякэ Дэвэл мардя Давидос. Пэ Давидостэ гадынэпэ мануша лэскирэ семьятыр, и адава сыс саро лэскиро джиипэн. Лэскири власть хаскирдя зор . Хоч Давидо накандыя Дэвлэс, нэ Дэвэл ачяпэ чячуно и кэрэлас одова со пхэндя Давидоскэ. Тэнче кэ Давидо и Вирсавия бияндыя екх чяво, ёнэ кхардэ лэс Соломоно.

Давидо сыс царёса 40 бэрш. Сыр ёв мэя дэ Израилё ачя хулай лэскиро чяво Соломоно. Дэвэл пучя кэ Соломоно, со ту камэс бутыр сарэстыр. Соломоно мангья кэ Дэвэл тэ дэл лэскэ годы, соб ёв тэ авэл годявир хулай манушэнгэ. Дава чялыя Дэвлэскэ, Ёв кэрдя со Соломоно сыс годявирэдыр мануш сарэндыр по свэто. Дэвэл кэрдя Соломонос годявирэса хуласа, и Дэвэл кэрдя лэс дрыван барвалэса.

Дэ Иерусалимо Соломоно скэрдя Кхыр Дэвлэско, саво камня тэ кэрэл лэскиро дад Давидо. Сыр Давидо сыс джидо то ёв скэдыя саро со сыс трэби соб тэ скэрэ Дэвлэско Кхыр. Кана мануша поклонинэнпэ Дэвлэскэ и янэнас Лэскэ жэртвы до Кхыр, а нанэ дэ Шатра кай скэдэнаспэ. Дэвэл сыс до Кхыр пэскирэ манушэнса.

Соломоно и сыс годявир, нэ ёв на кандыя Дэвлэс, и лыя тэ лэл пал пэстэ ромнен авирэ родостыр, савэнса Дэвэл пхэндя тэ накэрэ бьява. Бут джювля яндэ пэса пэскирэн дэвлэн и поклонинэнаспэ лэнгэ. А сыр Соломоно пхурия, ёв лыя тэ поклонинэпэ лэнгирэ дэвлэнгэ.

Пал дава Дэвэл холясыя пэ Соломоностэ и пхэндя, со Ёв росчурдэла израильсконэн манушэн пэ дуй царствы. И кэрлапэ када сыр мэрэла Соломоно.

Сыр Соломоно мэя, то царёса тэрдыя лэскиро чяво Ровоамо. Сарэ Израильска мануша скэдынэпэ кэтанэ, соб тэ приджинэ лэс царёса. Мануша пхэндэ Ровоамоскэ, со ёнэ кэрэнас пхари буты ко Соломоно и покинэнас лэскэ бут ловэ. Ёнэ помангнэ Ровоамос тэ на дэл лэнгэ пхари буты.

Нэ Ровоамо пхэндя лэнгэ: «Тумэ ракирэн, со кэ миро дад Соломоно тумэ кэрэнас пхари буты. А кэ мэ тумэ лэна тэ кэрэн бутыр и пхарэдыр буты, сыр кэ миро дад!»

Сыр шундэ мануша адала лава, бут лэндыр гадынэпэ пэ Ровоамостэ. Дэш роды Израилёскирэ на закамнэ тэ прылэн лэскиро лав и тэ прылэн лэс пэскирэ царёса. Ровоамоса ачнэпэ дуй роды, савэ лынэ тэ кхарэпэ царство Иудоско чи Иудейско.

Авир дэш роды выкэдынэ пэскэ царёса манушэс савэс кхарэн Иеровоамо, адалэ дэш роды дживэнас по северно риг свэто. Ёнэ лынэ тэ кхарэнпэ Царство Израилёско.

Царё Израилёско, Иеровоамо, сыс нанэ лачё царё. Ёв на кандэлас Дэвлэс и сыклякирэлас манушэн тэ дживэн до бэзэх. Иеровоамо чидя ваш пэскирэнгэ манушэнгэ дуй идалы, и мануша бутыр на пхирэнас до Иерусалимо, саво сыс пэ пхув Иудейско, и на поклонинэнаспэ Дэвлэскэ дэ Лэско Кхыр.

Иудея и Израилё кошэнаспэ бут молы и марэнаспэ машкир пэстэ.

Дэ нэво царство Израилёско сарэ цари сыс нанэ лаче хулая. Бут лэндыр сыс умардэ авирэнса израильтянэнса, савэ камнэ тэ тэрдён пэ лэнгиро штэто сыр цари.

Сарэ цари и бут мануша савэ дживэнас до царство Израилёскиро поклонинэнаспэ идалоскэ. Лэнгиро мангипэн сыс дэ бэзэх, а сыс дасаво со янэнас чяворэн дэ жэртва идалоскэ.

Царья Иудейска сыс родостыр Давидоскирэстыр. Бут кон адалэ манушэндыр сыс лаче царья, сыс чячунэ хулая и поклонинэнаспэ Дэвлэскэ. Нэ бутыр царен Иудеи сыс нанэ лаче хулая и поклонинэнаспэ идалоскэ. Койсавэ адалэ царендыр янэнас пэскирэн чяворэн дэ жэртва хоханэ дэвлэнгэ. Бут манушэн савэ дживэн дэ Иудэя поклонинэнаспэ авирэнгэ дэвлэнгэ, адалэса ёнэ гадэнаспэ пэ Дэвлэстэ.

Дэвэл нанэ екхвар бичявэлас израильтянэнгэ пророкэн. Пророки шунэнас лава Дэвлэскирэ и пиридэнас лэн манушэнгэ.

Сыр до Израилё сыс хулай Ахаво, до Израилё дживэлас пророко Илия. Ахаво сыс нанэ лачо мануш. Ёв прыкхарэлас манушэн тэ поклонинэнпэ нанэ чячунэ дэвлэскэ савэс кхарэнас Ваало. Илия пхэндя Ахавоскэ: «Пал дава со поклонинэнпэ идалоскэ дэ Израилё на авэла брышинд, ни роса, кэ дова дэвэс сыр мэ припхэнава, соб тэ джял брышинд». Шундя дава Ахаво адякэ росхолясыя пэ лэстэ, со камья тэ умарэл лэс.

Тэнче Дэвэл пхэндя Илияскэ тэ джял до штэто, саво дэ пустыня и тэ гаравэлпэ Ахавостыр. Илия гия ко паны кай на сыс манушэн, карик лэс яндя Дэвэл. Дывэсэса и бэвэле вороны янэнас Илияскэ маро и мас. Дэ долэ дэвэса Ахаво и лэскирэ мануша родэнас Илияс, нэ на попэнэ лэс.

Сыго паны вышутия, пал дова со на сыс брышинд. Тэнче Илия пир лав Дэвлэско гия до авир форо. Одой дживэлас екх чёрори манушны биромэско чявэса. Лэндэ гин на сыс со тэхан, пал дова со до форы на сыс урожаё. Нэ ёнэ дынэ тэхал лэскэ и саро со трэби, и Дэвэл дэлас лэнгэ тэхан:яржо и ксил на выджялас лэнгирэстыр кхэрэстыр, поки Дэвэл на бичявдя брышинд пэ пхув. Пэ дава надыкх со саро зашутия и до форы на сыс со тэха, а лэндэ всаек сыс хабэн. Адякэ сыс варикай трин бэрш.

И пхэндя Дэвэл Илияскэ, со Ёв бичявэла брышинд. Дэвэл припхэндя Илияскэ тэ рисёл до Израилё и тэ джял ко Ахаво. Илия явья ко царё. Удыкхья лэс, царё Ахаво пхэндя: «А гэна и ёв, пал конэстэ бида до Израилё» Илия лэскэ пхэндя: «Ада тутыр бида до Израилё! Ту ачкирдян Яхвэ, чячунэс Дэвлэс, и поклонинэспэ Ваалоскэ. Скэдэ пэ бэрга Кармил сарэн кон дживэл до Израилё и пророкэн хоханэ дэвлэндыр!»

Ахаво адякэ и кэрдя. Сарэ кон дживэлас до Израилё скэдыя пэ бэрга Кармил. Явнэ мануша, савэ ракирэнас лавэстыр Ваалоскирэстыр. Ада сыс пророки Ваалоскирэ. Илия пхэндя манушэнгэ: «Бут тумэ авэна тэ выкэдэн? Сыр Яхвэ — Дэвэл, то поклонинэнпэ Яхвэ! А сыр Ваало — дэвэл, то поклонинэнпэ Ваалоскэ!»

Тэнче Илия пхэндя пророкэнгэ Ваала: «Зачинэнте гурувэс, росчинэньтэ лэс по котыра и чивэн по жэртвеннико, нэ яг на захачкирэньте. Тэнче и мэ кэрава адякэ, и чивава ското по жэртвеннико ваш Дэвлэскэ. Одова Дэвэл, Саво бичявэла яг по жэртвеннико, и сын чячуно Дэвэл». Прорроки Ваала кэрдэ жэртва, нэ яг на захачкирдэ.

Тэнче ёнэ лынэ тэ мангэнпэ пэскирэ дэвлэскэ: «Пошун амэн, о Ваало!» Саро дэвэс ёнэ мангэнаспэ, годлэнас и чинэнас пэс чурьенса, нэ Ваало лэн на шунэлас и яг на бичявэлас.

Пророки Ваала мангэнаспэ гин саро дэвэс. Кэ бэвэль ёнэ пирьячнэ тэ мангэнпэ. Тэнче Илия чидя скотина пэ жэртвеннико ваш Дэвлэскэ. Ёв припхэндя манушэнгэ тэ чивэн дэшудуй вэдры паны пэ жэртва, тэ авэл мас, кашта и пхув пашэ жэртвеннико киндэ.

Тэнче Илия помангьяпэ: «О Яхвэ, Дэвэл Авраамоско, Исаакоско и Иаковоско! Сыкав амэнгэ дадэвэс, со Ту — Дэвэл Израилёско, а мэ — Тыро слуга. Пхэн мангэ, и мэк сарэ мануша уджинэна, со Ту — чячуно Дэвэл».

И сгия болыбнастыр яг и схачия мас, кашта, бара и паны пашэ жэртвеннико. Сыр мануша удыкхнэ адава, ёнэ пэнэ пэ пхув и загодлынэ: «Яхвэ — чячуно Дэвэл! Яхвэ — чячуно Дэвэл!»

Тэнче Илия пхэндя: «На дэнте ни екхэскэ пророкоскэ Ваала тэ нашэ!» Мануша вхтылдэ пророкэн Ваала, улыджинэ одотхыр и умардэ.

Тэнче Илия пхэндя царёскэ Ахавонэскэ: «Сыгэдыр рисёв кхэрэ, пал дова со авэла брышинд». Сыг болыбэн покалыя и гия баро брышинд, пал дова со пир лав Яхвэ шукипэн пирьячя. Ада сыс соб мануша тэ дыкхэн, со Ёв сын чячуно Дэвэл.

Сыр Илия докэрдя пэскири буты пэ пхув, Дэвэл выкэдыя Пэскэ пророкос манушэс савэс кхарэн Елисеё. Дэвэл сыкавэлас Пэскири зор пир Елисеёстэ. Екхвар Дэвэл сыкадя пэски зор пэ Нееманостэ, ёв сыс баро рай пэ врагэнгири риг. Ко Неемано сыс дрыван насвалы цыпа. Шундя пал Елисеёстэ, Неемано гия кэ ёв и помангья лэс тэ састякирэл. Нэ Елисеё на выгия кэ ёв, а пирипхэндя пескирэ манушэса, соб Неемано тэ морэлпэ дэ рэка Иордано эфта молы.

Неемано росхолясыя и на закамья тэ кэрэл адава пал дова со Елисеё на выгия кэ ёв. Нэ тэнче ёв пирикамья, и гия кэ рэка Иордано и эфта молы мордяпэ до паны. Сыр ёв выгия панестыр, Дэвэл састякирдя лэс.

Пал Елисеёстэ Дэвэл бичявэлас манушэнгэ Израилёскирэнгэ бут авирэн пророкэн. Сарэ ёнэ ракирэнас манушэнгэ, соб одолэ тэ пирьячен тэ поклонинэпэ идалоскэ и кэ мануша тэ отлыджянпэ патывалэс. Пророки ракирэнас манушэнгэ, со сыр ёнэ на пирьячена тэ кэрэн холы и на лэна тэ кандэн Дэвлэс, то Дэвэл лэла тэ сэндякирэл и тэ марэл лэн пал лэнги банг.

Нэ мануша на шунэнас Дэвлэс. И бут молы отлыджянаспэ ко пророки нанэ куч. Адякэ, сыр екхэс пророкос савэс кхарэнас Иеремия чидэ дэ шуки ганынг и ачкирдэ одой лэс тэ мэрэл. Ёв бэшэлас дэ ганынг дэ блата, нэ царё припхэндя пэскирэ бутярнэнгэ тэ вытырдэн лэс, сыр ёв сыс джидо. Мануша накамэнас Дэвлытконэн пророкэн а савэн и умарэнас.

Надыкхэнас пэ дая холы, пророки всаек пиридэнас манушэнгэ лава Дэвлэскирэ. Ёнэ ракирэнас манушэнгэ, со Дэвэл хаскирэла лэн, сыр ёнэ на порисёна ко Дэвэл, и прикхарэнас манушэн тэ шунэн Дэвлэс. Адякэ ж пророки ракирэнас манушэнгэ, Дэвэл ракирдя со бичявэла Мессияс.

Сарэ дуй царствы, Израилё и Иудея, кэрэнас бэзэх ангил Дэвлэстэ, Ёнэ на дживэнас пир завето, саво Дэвэл скэрдя лэнса пэ бэрга Синай, Дэвэл нанэ екхвар бичявэлас пророкэн, соб мануша тэ порисён кэ Ёв и тэ поклонинэнпэ Лэскэ, нэ ёнэ накамнэ тэ шунэн Дэвлэс.

Пал дава со ёнэ накандэнас, Дэвэл домэкэлас бида дэ сарэ дуй царствы, враги умарэнас лэн. Дэ долэ дэвэса сыс зоралы Ассирия. Ассирийцы дрыван нанэ куч обджянаспэ авирэ манушэнса. Ёнэ гинэ пэ Израилё и лынэ адаво царство. Ассирийцы умардэ бутэн манушэн до царство Израильско, залынэ саро со дрого и схачкирдэ бутыр пашэстыр форы.

И залынэ ассирийцы сарэн шэралэн, сарэн кон джинэлас саро тэ кэрэ, и адякэ ж барвалэн манушэн улыджинэ дэ Ассирия. До Израилё ачнэпэ дрыван чёрорэ мануша.

Тэнче ассирийцы бичявдэ тэ дживэн пэ пхув, кай сыс царство Израилёско, авирэн манушэн. Адала мануша скэрдэ розмардэ форы. Ёнэ кэрэнас бьява одолэнса кон ачяпэ дэ Израилё. Родо Израильтянэнго, савэ кэрэнас семьи авирэ манушэнса, кхарэнаспэ самаритянэнса.

Мануша Иудейска дыкхнэ, сыр Дэвэл марэлас манушэн Израильсконэн пал дова со ёнэ на патянас и на кандэнас Лэс. Нэ ёнэ всаек поклонинэнаспэ идалоскэ и дэвлэнгэ хананеенгирэнгэ. Дэвэл бичявэлас пророкэн, соб тэ заракхэ лэн, нэ ёнэ отпхэнэнаспэ тэ шунэн.

Варикай прогия 100 бэрш, сыр ассирийцы розмардэ Израилё, Дэвэл бичявдя пэ Иудея вавилонсконэс царёс Навуходоносорос. Дэ долэ дэвэса Вавилоно сыс зорало форо. Царёскэ Иудеи пригияпэ тэ явэ слугаса ко Навуходоносоро и сарэ бэрша тэ покинэ лэскэ ловэ.

Прогия варикицы бэрш и царё Иудейско гадыяпэ пэ Вавилоно. Тэнче вавилоняне рисинэ и чурдынэпэ пэ Иудея. Ёнэ закэдынэ Иерусалимо, розмардэ Дэвлэско Кхыр и улыджинэ саро барвалыпэн фороскиро и дэвлэскирэ Кхэрэско.

Пал дава со Иудея гадыяпэ по Навуходоносоростэ то лэскирэ мануша умардэ царёскирэн чявэн лэстэ по якха, а тэнче вылынэ лэскэ якха. Ёнэ улыджинэ царёс до Вавилоно, кай ёв и мэя до бэшибэн.

Навуходоносоро и лэскирэ мануша улыджинэ до Вавилоно гин сарэн манушэн Иудеи, а ачкирдэ екхэн чёрорэн манушэн соб ёнэ тэ обкэрэн пхув. Долэ дэвэса, сыр Дэвлытконэнгэ манушэнгэ пригияпэ тэ дживэн дур одолэ пхувьятыр кай Ракирэлас Дэвэл, кхарэлпэ Вавилонско плено.

Надыкх пэ дова, со Дэвэл домэкья Пэскирэн манушэн тэ улыджя до плено пало бэзэха, Ёв всаек на бистрэлас Пэскирэн манушэн и рипирэлас со Ёв лэнгэ ракирдя. Дэвэл и дурэдыр дыкхэлас пал Пэскирэ манушэндэ и ракирэлас кэ ёнэ Пэскирэнса пророкэнса. Дэвэл пхэндя, со проджяла 70 бэрш и израильтяне рисёна палэ дэ Пхув сави Ракирдя Дэвэл.

Варикай прогия 70 бэрш и Киро, царё Пэрсийско, розмардя Вавилоно. Кана нанэ Вавилонско царство, а Персидско царство сыс хуласа бутэнгэ манушэнгэ. Дэ долэ дэвэса израильтянэн лынэ тэ кхарэн иудеянэнса. Бут кон лэндыр саро джиипэн проджиндя до Вавилоно. Ачнэпэ набут пуранэ иудеи, савэ рипирэнас пэскири пхув.

Персидско царство сыс зорало, персы нанэ захалэс отлыджянаспэ кэ кандунэ мануша. Сыгэс пал дова сыр Киро ачя царёса дэ Персия, и ёв пхэндя пэскиро лав, саво на запхэнэлас тэ отмэкэ сарэн иудеен савэ камэнас тэ уджян Пэрсиятыр и тэ рисён дэ пэскири пхув дэ Иудея. И ёв дыя лэнгэ саро со трэби, соб ёнэ тэ скэрэн розмардо Кхыр Дэвлэско! Адякэ Прогия 70 бэрш дэ плено и нанэ бут мануша рисинэ до форо Иерусалимо.

Сыр мануша явнэ до Иерусалимо, ёнэ докэрдэ Кхыр Дэвлэско и гадынэ стены до форо. Хулаенса сыс пэрсы, нэ иудеи дживэнас пэ Пхув сави Ракирдя Дэвэл и поклонинэнаспэ Дэвлэскэ до Кхыр Лэско.

Сыр Дэвэл скэрдя свэто, Ёв джиндя со вариколи бичявэла пэ пхув Мессияс. Дэвэл ракирэлас адава Адамоскэ и Евакэ. Ёв пхэндя, со биянэлапэ мурш Еватыр, саво умарла сапэс до шэро. Адава сап сыс бэнг. Ёв явья сыр сап и хохадя Ева. И сыр Дэвэл ракирэлас, со мануш Евакирэ родостыр умарла до шэро сапэс, ада Ёв ракирлас пало Мессия, саво явэла и умарла бэнгэс.

Дэвэл дыя лав Авраамоскэ, со пал Мессия авэна благословена сарэ мануша до свэто. Дэвэл дэла пэскиро благословение, сыр бичявэла Лэс. Мессия зракхэла бэзэхэндыр манушэн сарэ свэтостыр.

Дэвэл дыя лав Маисеёскэ, со дурэдыр Ёв бичявэла авирэс пророкос, дасавэс сыр Маисеё. Адякэ Дэвэл дыя лав со бичявэла Мессия.

Адякэ Дэвэл пхэндя и царёскэ Давидоскэ, со лэскирэ родостыр авэла Мессия. Дэвэл ракирэлас, со дава Мурш авэла Царёса и вечно авэла Хуласа пэ Дэвлэскирэндэ манушэндэ.

Пророкоскэ Иеремияскэ Дэвэл пхэндя, со кэрла Нэво Завето манушэнса. Нанэ адякэ сыр до пурано завето, саво Дэвэл кэрдя Израилёса пэ бэрга Синаё, до Нэво Завето мануша авэна тэ джинэн Дэвлэс. Дэвэл пхэндя, со Ёв чивэла Пэскирэ законы до ило манушэнгэ. И ёнэ авэна тэ камэн Дэвлэс и тэ камэн тэ ракхэн Лэскирэ законы. Ёв авэла лэнгирэ Дэвлэса, и ёнэ Лэскирэнса манушэнса, пал одова кай Дэвэл простинэла бэзэха манушэшгирэ и бутыр на зрипирэла лэн. Дава Нэво Завето манушэнса кэрла Мессия.

Дэвлытка пророки ракирэнас, со одова Мессия авэла Пророкоса, Рашаса и Царёса. Пророко — ада мануш, саво шунэл лава Дэвлэскирэ и пиридэл лэн манушэнгэ. Мессия пал савэстэ ракирдя Дэвэл авэла пророко бидошакиро. Ёв авэла тэ шунэл Дэвлытка лава, тэ полэ лэн и тэ сыклякирэл манушэн.

Израильска Рашая мангэнаспэ Дэвлэскэ пал манушэндэ и янэнас жэртвы Дэвлэскэ манушэндыр. Адалэ жэртвы янэнаспэ, соб Дэвэл тэ на марэл пал бэзэха манушэн. Мануша янэнас ко рашая ското бидошакиро, а рашая янэнас лэн дэ жэртва Дэвлэскэ. Мессия трэби тэ авэл баро рашай бидошакиро, саво отдэл Пэс дэ жэртва Дэвлэскэ. Кэ Мессия на авэла ни, саво бэзэх и Ёв отдэла Пэс дэ жэртва, и тэнче на трэби тэ янэ нисавэ жэртвы пало бэзэха.

Кэ сарэ мануша сыс пэскирэ цари и шэралэ. Ёнэ нанэ сарэ молы кандэнас Дэвлэс и кэрэнас нанэ адякэ сыр трэби. И сыр Давидо сыс хулай екхэнгэ израильтянэнгэ, то Мессия родо Давидоско, авэла хулай всарэ свэтоскэ. Ёв авэла чячуно хулай авэла годявир и вечно!

Дэвлэскирэ пророки роспхэнэнас, саво авэла Мессия. И пророко Малахия пхэндя, сыр тэ авэл Мессия явэла пророко Илия. Лэскири буты авэла дрыван бари. Пророко Исаия джинэлас, со Мэссия биянэлапэ кэ чяй сави на джиндя ромэс. А пророко Михеё ракирэлас, со Мэссия биянэлапэ до форо Вифлеемо.

Пророко Исаия пхэндя, со Мессия авэла тэ дживэл дэ Галилея. Ёв авэла тэ подрикирэл манушэн савэнгэ пхаро и кон спхандо тэ отмэкэл пэ воля. Мессия авэла тэ дэл зор насвалэнгэ манушэнгэ, и долэнгэ, савэ кашукэ, корорэ, кон на ракирэл и на пхирэл гэрэнса.

Пророко Исаия ракирдя, со накамэна тэ дыкхэн пэ Лэстэ и отпхэнэнапэ Лэс тэ прылэн. Пророки ракирэнас, со Мессияс здэла пэскиро мануш. А пророко Захария пхэндя, со мануш, саво здэла лэс лэла пал дава 30 рупунэ ловэ. Пророки ракирэнас, со мануша умарна Мессияс и авэна тэ чурдэн жребиё пал дова, конэскэ дорэсэлапэ Лэскири идя.

Пророки роспхэнэнас пал дова, сыр Мессия мэрла. Исаия ракирэлас, со мануша авэна тэ чунгардэн пэ Лэстэ, тэ санпэ Лэстыр и тэ марэн Лэс. Ёнэ пропусавэна Лэс барьяса чурьяса, и Ёв мэрэла дэ бари дукх, а Ёв на кэрдя ни, саво дылныпэн.

Пророки ракирэнас, со кэ Мессия на авэла бэзэх. Ёв авэла мануш бидошако. Нэ Мессия мерла пал дова со Дэвэл марэла Лэс, пал бэзэха сарэ манушэнгирэ. Лэскири смэрть янэла миро машкир Дэвлэстэ и манушэндэ. Пал дова Дэвэл домэкэла кай Мессия тэ мэрэл.

Пророки ракирэнас пал дова со Дэвэл гадэла мулэндыр Мессияс. Ада ракирэлпэ амэнгэ, со мэя и вштыя мулэндыр Иисусо, адякэ кхарэна Мессияс, саво биянэлапэ, адава закамья Дэвэл соб тэ скэрэ Нэво Завето. Адякэ Дэвэл закамья тэ зракхэл манушэн савэ кэрэнас бэзэх ангил Лэстэ.

Дэвэл сыкадя манушэнгэ бут чячибэн пал Мессиястэ, нэ ни кон лэндыр на до джиндя кэ дова дэвэс сыр бияндыя Мессия. Прогинэ 400 бэрш сыр сыс последнё пророчество и явья дэвэс Дэвэл бичявдя пэ свэто Мессияс.

_Библейско история Бытие 3:15, Второзакония 18:15, 2 Царств 7, Иеремия 31, Исаия 59:16, Данила 7, Малахии 4:5, Исаии 7:14, Михея 5:2. Исаии 9. 1-7, 61, 53, Псалмов 21:19. 34:19, 68:5, 40:10, Захарии 11:12-13, Исаии 50:6, Псалмов 16:10-11. _

Бут бэрша Дэвэл ракирэлас Пэскирэнса пророкэнса, соб ёнэ тэ пиридэн Лэскирэ лава манушэнгэ. Нэ тэнче явнэ 400 бэрш штылыпэн, дэ далэ бэрша Ёв ничи на ракирэлас манушэнгэ. И Дэ екх дэвэс Дэвэл бичявдя ангелос ко рашай савэс кхарэнас Захария. Захария и лэскири ромны Елисавета полэнас Дэвлэс. Сарэ дуй ёнэ сыс до бэрша и лэндэ на сыс чяворэн.

Ангело явья ко Захария, сыр ёв сыс дэ Дэвлэско Кхыр, и пхэндя: «Кэ тыри ромны биянэлапэ чяворо. Ту дэса лэскэ лав Иоанно. Дэвэл бичявэла пэ лэстэ Свэнто Духо, и Иоанно подлыджяла манушэн кэ дова сыр явэла Мэссия»! Захария пхэндя:Сыр мэ тэ уджинав кай дава авэла? Амэ ромняса дрыван пуранэ, соб амэндэ тэ авэн чяворэ!»

Ангело пхэндя лэскэ: «Ман бичявдя Дэвэл, соб мэ тэ пхэнав тукэ лачо лав. Пал дова со ту на патяндыян мирэ лавэскэ, ту на лэса тэ ракирэс кэ дова дэвэс сыр на биянэлапэ чяворо». И Захария пирьячя тэ ракирэл. Ангело угия, а Захария рисия кхэрэ. Сыго лэскири ромны запхария.

Сыр Елисавета сыс пэ шовто чён пхари, одова ж ангело явья кэ манушны сави сыс пэскири Елисаветаки, савья кхарэнас Мария. Мария сыс чяёрьяса, засватано пало манушэстэ савэс кхарэнас Иосифо. Ангело пхэндя: «Ту авэса пхари биянэса чяворэс. Дэ Лэскэ лав Иисусо. Ёв авэла Чяво Баро Дэвлэскиро и авэла хуласа вечно».

Мария пхэндя лэскэ: «Сыр адава авэла, сыр мэ сын чяёри?» Ангело пхэндя: «кэ ту явэла Свэнто Духо, и Дэвлэски зор зджяла пэ тутэ. Пал дова Чяворо авэла свэнто, Ёв авэла Дэвлэскирэ Чявэса». И Мария патяндыя одолэскэ, со пхэндя ангело.

Сыго Мария гия кэ Елисавета. Сыр Мария поприветствовалась ласа, чяворо Елисаветако лошаса замардяпэ дэ латэ. Свэнто Духо сгия пэ Елисаветатэ, и ёй полыя, со паш латэ тэрды дай чяворэскири, саво явэла Мессия. Джювля сыс лошалэ и пхэнэнас наис Дэвлэскэ пал дова со Ёв скэрдя ваш лэнгэ. Мария сыс кэ Елисавета трин чёна, и рисия кхэрэ.

Прогинэ дэвэса и Елисавета бияндя чяворэс. Захария и Елисавета кхардэ чяворэс Иоанноса, сыр пхэндя лэнгэ ангело. И Дэвэл дыя со Захария заракирдя. Захария пхэндя: «Славинав Тут Дэвла пал дова со Ёв явьян кэ пэскирэ мануша и на бистырдя лэн! Ту, миро чяво, авэса Баро Дэвлэскирэ пророкоса. Ту роспхэнэса манушэнгэ пал дова сыр мануша заракхэнапэ пэскирэ бэзэхэндыр!»

Мария сыс засватано пал манушэстэ савэс кхарэнас Иосифо. Сыр ёв уджиндя, со Мария пхари, лэскэ кэрдяпэ ла дор и ёв камья тэ отмэкэл ла соб никон тэ наджинэл, соб тэ на авэл лакэ ладжяво манушэндыр. Нэ сыр дава тэ кэрэл кэ ёв дэ суно явья ангело и заракирдя лэса.

Ангело пхэндя: «Иосифо, нандырша тэ лэс Мария ромняса. Чяворо, Саво дэ латэ — Свэнтонэ Духостыр. Ёй биянэла Чявэс. Кхар Лэс Иисусо (со ракирэл “Яхвэ заракхэла”), пал дава со Ёв заракхэла манушэн лэнгирэндыр бэзэхэндыр».

Иосифо яндя Мария сыр ромня пэскэ до кхыр, нэ на сутя ласа кэ дова, сыр ёй на бияндя.

Дэ долэ дэвэса римско рай закамья тэ погинэ сарэн манушэн до Израилё. Ёв припхэндя, соб сарэ тэ традэн одорик катхыр сыс лэнгиро родо. Родо Марияко и Иосифоско сыс царё Давидо, саво бияндыя до Вифлеемо, пал дова ёнэ гинэ одорик. до Вифлеемо, и одой Мариякэ подгия дэвэс тэ биянэл.

Дэ Вифлеемо Мариякэ и Иосифоскэ на сыс кай тэ тэрдён пэ рат, и лэнгэ пригияпэ тэ раткирэн дэ штала кай о ското. Одой Мария бияндя Чяворэс. Ёй чидя Лэс до ясли пал дова со на сыс кай Лэс тэ чивэ. Мария и Иосифо кхардэ чяворэс Иисусо.

Дэ доя рат нанэ дур пастухи ракхэнас пэ маля бакрэн. Катхыр лыяпэ паш лэндэ сияющё ангело. Пастухи дрыван здарандынэ, нэ ангело пхэндя: «На дарэнте, мандэ сын кэ тумэ лачо лав. До Вифлеемо бияндыя Мессия Дэвэл!

Тумэ попэрэна Чяворэс дэ штала Ёв авэла тэ пасёл до ясли». Болыбэн пхэрдыя ангелэнса. Ёнэ славиндэ Дэвлэс и ракирдэ: «Слава Дэвлэскэ до болыбэн! А пэ пхув миро и Дэвлэскири благосклоность ко мануша!»

Тэнче ангелы угинэ. Пастухи ачкирдэ пэскирэн бакрэн и гинэ тэ подыкхэ Чяворэс. Сыгэс ёнэ явнэ кэ дова штэто, кай сыс Иисусо, и попэнэ лэс до ясли, сыр ракирдя лэнгэ ангело. Пастухи дрыван сыс дэ лош. Ёнэ роспхэндэ Иосифоскэ И Мариякэ пал дова со шундэ пал адалэ Чяворэстэ ангелэндыр. Тэнче пастухи рисинэ по маля кэ пэскирэ бакрэ, и прославиндэ Дэвлэс пал саро, со дыкхнэ и шундэ.

Дур пэ востоко дживэнас годявир мануша. Ёнэ сыклэ сыс тэ гинэн пиро чергэня. Екхвар годявир мануш удыкхнэ до болыбэн нанэ дасави чергэн. Ёнэ полынэ, со ёй сыкавэлас со биянэлапэ баро еврейско Царё. Пал дава ёнэ закамнэ тэ джян до дром соб тэ поклонинэпэ Лэскэ. Ёнэ дрыван бут прогинэ и явнэ до Вифлеемо и попэнэ кхыр, кай дживэна Иисусо и Лэскирэ дад и дай.

Сыр ёнэ удыкхнэ Иисусос и лэскирья да, то пэнэ пэ пхув и поклониндэпэ Лэскэ. Тэнче ёнэ дынэ Иисусоскэ дрога подарки и рисинэ кхэрэ.

Иоанно, чяво Захариёско и Елисаветако, выбария и ачя пророко. Ёв дживэлас дэ пустыня, и халас дико ягвин и саранчя и урьеласпэ дэ верблюжо шэрсть.

Бут манушэн явэнас дэ пустыня тэ шунэн Иоаннос. Ёв ракирэлас лэнгэ адякэ:Ачявэн пэскирэ бэзэха, адякэ сыр Дэвлэскиро Царство пашил!

Бут мануша савэ шунэнас Иоаннос мангэнаспэ пал пэскирэ бэзэха и Иоанно болэлас лэн дэ рэка Иордано. Явэнас тэ болэнпэ и бут религиозна шэралэ, нэ ёнэ на камнэ тэ приджинэнпэ дэ пэскирэ Бэзэха.

Иоанно ракирэлас лэнгэ: «Тумэ — сапа! Парувэнте пэскиро джиипэн. Дэвэл счингирэла и чурдэла дэ яг о дова дэмбо, саво на дэл лачо плодо». Бут мануша прылэнас Иоаннос пророкоса Дэвлэстыр и полэнас лэс патываса. Иоанно кэрдя дова со ракирэнас пророки: «Дыкх! Мэ бичявава ангил Тутэ Мирэс манушэс, саво прочивэла тукэ дром. Мэк сарэ овраги авэна пхэрдэ, и бэрги обмэкэнапэ, извилиста дрома вырисёна».

Варисавэ религиозна шэралэ пучэнас ко Иоанно:Ту Мессия? Иоанно ракирэлас:Мэ нанэ Мессия. Ёв явэла пал мандэ. Ёв барэдыр по бут мандыр, мэ на молав тэ лавпэ пал Лэскирэ гэра.

Пэ авир дэвэс ко Иоанно явья Иисусо, соб тэ болэнпэ лэстыр. Сыр Иоанно удыкхья Лэс, то пхэндя: «Дыкхэнте! Гэна Дэвлэско Бакроро, Саво слэла бэзэх сарэ свэтостыр».

Тэнче Иоанно пхэндя Иисусоскэ: «Мэ на молав Тут тэ болав. Ада Ту трэби ман тэ болэс». Нэ Иисусо пхэндя: «Нат. Ту трэби тэ болэс Ман, пал дова со адякэ авэла кэрды Дэвлэскири воля». Тэнче Иоанно болдя Лэс, нэ ко Иисусо на сыс нисаво бэзэх.

Сыр Иисусо болдяпэ и гадыяпэ панестыр, Дэвлэско Духо змекьяпэ болыбнастыр сыр голумбо и бэстя пэ Иисусостэ. И шундо сыс глос Дэвлэскири болыбнастыр: «Ада Миро Чяво! савэс Мэ камам!»

Дэвэл ракирэлас Иоанноскэ, со адякэ саро и авэла: «Свэнто Духо зджяла и обмэкэлапэ пэ екхэстэ Манушэстэ, Савэс ту болэса. Одова Мануш и авэла Дэвлэскирэ Чявэса». Адая история сыкавэл амангэ, со сын Екх Дэвэл, нэ дэ трин муя. И сыр Иоанно болэлас Иисусос, ёв шундя, сыр ракирэлас Дэвэл‐Дад дыкхья Дэвлэс‐Чявэс, и Дэвлэс‐Свэнтонэс Духос.

Сыр Иисусо болдяпэ Свэнто Духо Лыджия Лэс дэ пустыня. Иисусо сыс одой 40 дэвэса и 40 ратя. И сыр ёв пробокхалыя кэ Ёв подгия бэнг камья тэ залыджял Лэс до бэзэх .

Бэнг пхэндя Иисусоскэ: «Сыр Ту сын Дэвлэскиро Чяво, то кыр адалэ бара марэса, соб лэн тэха!»

Нэ Иисусо пхэндя: «Дэ Дэвлэско Лав чиндо: “Соб тэ дживэн манушэнгэ трэби нанэ екх маро, а саро со ракирла Дэвэл!”»

Тэнче бэнг лыя Иисусос и гадыя упрэ пэ Дэвлэскиро Кхыр и пхэндя: «Сыр Ту — Дэвлэскиро Чяво, чурдэпэ дэ пхув, чиндо дэ Лав Дэвлэскиро: “Дэвэл прыпхэнэла пэскирэнгэ ангелэнгэ тэ лыджян Тут соб тыри герой тэ пикадёл пиро бар”».

Нэ Иисусо на кэрдя адава, со камья Лэстыр бэнг. Ёв пхэндя: «Дэвэл ракирэл сарэнгэ: “На вылыджя тырэс Дэвлэс, саво сын Хулай тукэ”».

Тэнче бэнг яндя Иисусос пэ дрыван учи бэрга и сыкадя Лэскэ саро форы по свэто, лэнгири зор и барвалыпэн. Бэнг пхэндя Иисусоскэ: «Мэ дава Тукэ саро адава, сыр Ту, пэрэса мангэ до чянга».

Нэ Иисусо пхэндя: «Уджя мандыр бэнг! Дэ Дэвлэско лав Дэвэл припхэнэл пэскирэ манушэнгэ: “Поклонинэнпэ Дэвлэскэ, тумарэ Дэвлэскэ. Лэс полэн сыр Дэвлэс”».

Иисусо наподдыяпэ пэ дова со бэнг камья тэ залыджял Лэс до бэзэх, и бэнг очядя Лэс. Тэнче ко Иисусо явнэ ангелы и подрикирдэ Лэс.

Сыр Иисусо пирилыджия пхарэ дэвэса бэнгэстыр, Ёв рисия дэ Галилея, одорик кай и дживэлас. Свэнто Духо дэлас лэскэ бари зор. Иисусо пхирэлас пир Галилея форостыр ко форо, сыс дэ бут штэты и подрикирэлас манушэн. Сарэ дрыван куч ракирэнас пал Лэстэ.

Екхвар Иисусо гия до форо Назарето, кай пролыджия Пэскирэ тыкнэ бэрша. Дэ суббота Иисусо гия дэ синагога, штэто кай мангэнпэ Дэвлэскэ. Одой дынэ лэскэ лыл пророкоско Исаии, соб ёв тэ прогинэл, тэ шунэн мануша со чиндо до лыл. Иисусо роскэрдя лыл и лыя тэ гинэл.

Ёв прогиндя: «Дэвэл дыя Мангэ Пэскиро Духо, соб Мэ тэ пхэнав лачё лав чёрорэнгэ. Ёв бичявдя Ман тэ отмэкав пэ свобода, корорэ тэ дыкхэн и тэ одмэкэ одолэн, конэскэ пхаро. Ада дэвэса, сыр Дэвэл сыкавэла Пэско ковло ило и подрикирэла амэн».

Тэнче Иисусо прибэстя. Сарэ, кон сыс одой, дыкхэнас сарэ пэ Лэстэ. Ёнэ джиндэ, со штэто, саво сыс чиндо дэ лыл Дэвлэскиро, саво гиндя Иисусо сыс пал Мессия. Иисусо пхэндя: «Явья дэвэс тэ авэл саро адякэ сыр Мэ тумэнгэ прогиндём». Сарэ мануша ничи на полынас . «Ада Ёв нанэ чяво Иосифоско?» — ракирэнас ёнэ.

Тэнче Иисусо пхэндя: «чячибэн мануша на прылэн пророкос до дова форо, кай ёв выбария. До дэвэса Илияскирэ до Израилё сыс бут ромнен савэндэ мэя ром. Нэ сыр трин пашэса бэрш на сыс брышинд, Дэвэл на бичявдя Илияс ко ромня Израилёстыр, нэ бичявдя Илияс к ромны авирэ родостыр».

Иисусо ракирэлас дурэдыр: «И дэ дэвэса сыр сыс пророко Елисеё до Израилё сыс бут манушэн, савэ сыс насвалэ цыпаса. Нэ Елисеё ни конэс‐лэндыр на састякирдя. Ёв састякирдя екхэс Нееманос, саво сыс баро рай кэ враги Израилёскирэ». Мануша, савэ шунэнас Иисусос, сыс евреи. Пал дава сыр ёнэ шундэ Лэстыр далэ лава, ёнэ росхолясынэ.

Мануша савэ дживэн до Назарето вхтылдэ Иисусос и вылыджинэ Лэс синагогатыр. Ёнэ яндэ Лэс пэ бэрга и камнэ Лэс тэ счурдэн бэргатыр. Нэ Иисусо прогия машкир лэндыр и угия Назаретостыр.

Тэнче Иисусо пхирэлас пир сари галилея, дрыван бут мануша явэнас кэ Ёв. Ёнэ янэнас бут насвалэн манушэн, а адякэ ж корорэн, кашукэн, савэ наракирэнас. И Иисусо састякирэлас лэн.

Адякэ ж кэ Иисусо лыджянас бутэн манушэн дэ савэндэ сыс бэнга. Иисусо припхэнэлас бэнгэнгэ тэ выджян лэндыр, и ёнэ выджянас. Бут молы бэнга годлэнас: «Ту — Чяво Дэвлэскиро!» Нэ Ёв запхэнэлас лэнгэ тэ ракирэн, Кон Ёв. Бут манушэн дрыван дивиндэпэ и прославляли Дэвлэс пал зор и власть, сави сыс кэ Иисусо.

Дрыван бут манушэн пхирэлас пал Иисусостэ, и кон савэ лэндыр тэрдёнас лэскирэса сыклякирдэнса. Машкир пэскирэндэ конэс Ёв сыклякирэлас выкэдыя 12 манушэн, савэн Ёв кхардя «апостолонса». Апостолы пхирэнас Иисусоса сыклёнас кэ Ёв.

Екхвар ко Иисусо явья мануш, саво джинэл иудейско законо ваш дова, соб тэ сыкавэ манушэнгэ, со сыклярибэн Иисусоско сыс нанэ дасаво, пал дова ёв пхэндя: «Сыклымарё, со мэ тэ кэрав, соб тэ авав до вечно джиипэн?» и Иисусо лэстыр пучя: «А со чиндо дэ Дэвлэско Законо?»

Одова мануш пхэндя: «Дэ лэстэ пхэндо: “Кам пэскирэ Дэвлэс, сарэ илэса тырэса, сарэ зорьяса и годяса. И кам кон паш тутэ, сыр камэс кокоро пэс”». Иисусо пхэндя: «Ту чячё пхэндян! Сыр ту ада кэрэса, то авэла тукэ вечно джиипэн»

Мануш, саво куч джинэл законо камья тэ сыкавэл манушэнгэ, со лэскиро джиипэн чячуно, пал дава ёв пучя ко Иисусо: «А кон мангэ пэскиро?»

Иисуса роспхэндя адалэскэ манушэскэ екх история: «Екхвар екх евреё джялас Иерусалимостыр до Иерихоно.

Пир дром пэ лэстэ чурдынэпэ чёра. Ёнэ отлынэ саро, со лэстэ сыс, до мардэ адякэ со ёв гин мэя, а тэнче унашнэ.

Сыго пир дава дром проджялас еврейско рашай. Ёв дыкхья, со по дром пашло мануш, нэ пиригия пэ авир риг. Тэнче рашай гия дурэдыр пир пэскиро дром, на протырдыя лэскэ васт, и надыя лэскэ со трэби.

Тэнче пир дром проджялас левито. Левито – ада евреё родостыр Левия, саво кэрлас буты до кхыр Дэвлэско. Ёв подгия, подыкхья пэ далэ манушэстэ и гия дурэдыр на протырдыя лэскэ васт.

Пал левитостэ пир дава дром джялас мануш Самариятыр. Дэ долэ дэвэса самаряни и евреи на камэнас екх екхэс и на ракирэнас машкир пэстэ. Самарянино удыкхья по дром помардэс манушэс. Ёв полыя, со адава мануш евреё, нэ ёв всаек протырдыя лэскэ васт. Самарянино подгия кэ ёв и пирипхандя лэскирэ дукха.

Тэнче ёв гадыя лэс, чидя пэ пэскирэстэ ослостэ и отлыджия дэ гостиница, сави сыс пашо дром. Одой самарянино адякэ ж дыкхэлас пал лэстэ.

Пэ авир дэвэс самарянино трэби сыс тэ джял дурэдыр. Ёв дыя ловэ манушэскэ, саво сыс хулай дэ гостиница, и пхэндя: «Подыкх пал адалэстэ манушэстэ. Сыр ту роскэрэса бутыр долэстыр, со мэ тукэ дыём, мэ до покинава тукэ сыр рисёвава».

Иисусо пучя ко мануш, саво куч джинэл законо: «Сыр ту думинэс, кон лэндыр тринэндыр сыс пэскиро ваш манушэскэ, савэс обчёрдэ чёра и помардэ?» Ёв пхэндя: «Одова, саво на ачкирдя лэс до пхарипэн». Иисусо пхэпдя лэскэ: «Джя и кэр адякэ сыр ёв.».

Екхвар барвало патывало чяво подгия ко Иисусо и пучя Лэстыр: «Сыклымарё лачё, со мэ трэби тэ кэрав, соб мандэ тэ явэл вечно джиипэн?» Иисусо пхэпдя лэскэ: «Соскэ кхарэс Ман лачеса? Лачё сын Дэвэл. Сыр ту камэс тэ авэл кэ ту вечно джиипэн, джив пир Дэвлэскирэ заповеди».

Чяво пхэндя «Пир савэ заповеди мэ трэби тэ дживав?» Иисусо пхэндя: «На умар. Напасёв чужонэ ромняса ромнякэ. На чёр. На хохав. Полэ пэскирэн дадэс и да и тэ камэс долэс кон паш тутэ, адякэ сыр ту камэс кокоро пэс».

Тэрно чяво пхэндя: «Мэ дживав пир сарэ адалэ заповеди тыкнэ бэршэндыр. Со мангэ навхтылэл тэ кэрав, соб тэ дживав вечно?» Иисусо подыкхья пэ лэстэ и пхэндя.

Иисусо пхэндя «Сыр ту камэс тэ авэс бидошакиро, джя и бикин саро, тыро барвалыпэн, и роздэ чёрорэнгэ. И авэса барвало до болыбэн. Тэнче яв и джя пал Мандэ»

Сыр чяво шундя, со лэскэ пхэндя Иисусо, ёв дрыван холясыя и угия Иисусостыр. Пал дава, со ёв сыс дрыван барвало мануш и на камья тэ отдэл саро, со лэстэ сыс.

Иисусо пхэндя конас сыклякирэлас: «Дрыван пхаро барвалэнгэ тэ заджян до Дэвлэско Царство! Локхэдыр верблюдоскэ тэ проджя до кан сувьяко, чём барвалэ манушэскэ тэ заджя до Дэвлэско Царство».

Сыр сыклякирдэ шундэ адалэ лава савэ пхэпдя Иисусо, то дрыван думинэнас сыр дава тэ полэ. Ёнэ пучнэ: «Кон тэнче зракхэлапэ?»

Иисусо подыкхья пэ сыклякирдэндэ и пхэндя:Манушэнгэ нашты тэ заракхэн пэс. Нэ нанэ ничи пхаро ваш Дэвлэскэ».

Тэнче Петро пучя ко Иисусо: «Амэ, ачкирдям саро и гиям пал Тутэ. Со амэнгэ авэла пал дова со амэ кэрдям?»

Иисусо пхэндя: «Сарэ кон, ачкирдя пэскиро кхыр, пшалэн, пхэнен, дадэс, да, чяворэн чи барвалыпэн паш Мангэ, то лэла дэ шэл молы бутыр. Лэскэ дава вечно джиипэн. И бут ангилтунэ тэрдёна палал, а палатунэ – ангил».

Екхвар Петро пучя ко Иисусо: «Сыклымарё, скитцык молы мэ трэби простинав мирэс пшалэс, сыр ёв кэрэл бэзэх мангэ? Эфта молы?» Иисусо пхендя: «Нанэ эфта молы, а эфтадэша молы по эфта!» Иисусо пхэндя, со амэ трэби тэ простинас сарэн бут молы. Тэнче Иисусо роспхэндя дасави история.

«Дэвлытко Царство счурдэлпэ Екхэ царёскэ, саво закамья, соб лэскирэ бутярнэ тэ выпокинэн лэскэ сарэ пэскирэ бангипэна. Екх бутярно сыс бут банго 200 000 бэрш трэби тэ кэрэл буты соб тэ отдэл бангипэн.

Адякэ сыр кэ бутярно на сыс, со тэ отдэл, царё пхэндя: «Бикнэн до рабы, адалэс манушэс и лэскири семья, соб тэ плоскирэл бангипэн».

Тэнче бутярно пэя ангил царёстэ пэ чянга и лыя тэ мангэл лэс: «Подужакир мангэ, и мэ выпокинава саро, со тукэ банго». Царёстэ росковлыя ило и ёв простиндя лэскэ саро бангипэн и отмэкья лэс.

Сыр бутярно выгия царёстыр, ёв удукхья авирэс бутярнэс, саво сыс банго лэскэ. Адава бангипэн сыс сыр плоскирэн пало штар чёна буты. Бутярно вхтылдя лэс поло колын и пхэндя «Отдэ мангэ мирэ ловэ, савэ ту мангэ банго!»

Одова пэя лэскэ пэ чянга и лыя тэ мангэл лэс: «Подужакир мангэ, и мэ отдава саро, со мэ тукэ банго» Нэ ёв чурдыя лэс до бэшибэн, тэ отдэл лэскиро саро бангипэн.

Авирта бутярнэ удыкхнэ, со кэрдяпэ, и лэнгэ адава на чялыя. Ёнэ гинэ ко царё и саро роспхэндэ лэскэ.

Тэнче царё кхардя долэс бутярнэс и пхэндя: “Ту захало бутярно! Мэ умэкьём тукэ бангипэн, пал дова со ту мангьян ман дрыван. Соскэ ту на умэкьян лэскэ сыр мэ тукэ”. «Царё росхолясыя, и чурдыя захалэс бутярнэс до бэшибэн, кэ дова сыр ёв отдэла саро пэско бангипэн»

Иисусо пхэндя: «Адякэ кэрэла Миро Болыбнытко Дад, сарэнса кон на простинэла пэскирэн пшалэн сарэстыр илэстыр».

Иисусо бичявдя Пэскирэн апостолэн пир сарэ гава, соб ёнэ тэ роспхэнэн и тэ сыклякирэн манушэн пал Дэвлытко Царство. Сыр апостолы рисинэ одорик, кай сыс Иисусо, ёнэ роспхэндэ Лэскэ саро, со кэрдэ. Иисусо пхэндя лэнгэ тэ уджян пэ лодка Лэса до штэто кай никонэс нанэ, соб тэ откхинён. Ёнэ бэшнэ дэ лодка и угинэ пэ авир риг.

Бут мануша дыкхнэ, сыр Иисусо и Лэскирэ сыклякирдэ угинэ пэ лодка. Адалэ мануша прастандынэ пиро дром пашэ рэка, соб тэ явэн пэ авир брэго сыгэдыр Иисусостыр. Сыр Иисусо и лэскирэ сыклякирдэ докэдынэпэ ко брэго, лэн дужакирэнас бут мануша.

Манушэн сыс варикай 5 000, тэ нагинэ джювлен и чяворэ. Иисусостэ задукхандыя ило пал далэндэ манушэндэ. Со ёнэ сыс сыр бакрорэ бихуласко. Пал дава Ёв лыя лэн тэ сыклякирэл бут пал со и тэ дэ састыпэн долэнгэ, кон сыс насвало.

Бэвэляко склякирдэ пхэндэ Иисусоскэ: «Уже бэвэль. Одмэк манушэн, соб ёнэ тэ джян до гав и тэ кинэн пэскэ тэ ха».

Нэ Иисусо пхэндя сыклякирдэнгэ: «Тумэ дэнте лэнгэ тэхан!» Сыклякирдэ пхэндэ: «Сыр амэ адава тэ кэрас? Кэ амэ сын панджь марэ и дуй нанэ барэ мачёрэ».

Тэнче Иисусо пхэндя пэскирэнгэ сыклякирдэнгэ тэ пхэнэн манушэнгэ, соб ёнэ тэ бэшэн пэ чяр по панджьдэша мануша.

Тэнче Иисусо лыя панджь марэ и дуй маче, подыкхья до болыбэн и пхэндя наис Дэвлэскэ пал хабэн.

Тэнче Иисусо роспхагирдя маро и мачё пэ котыра. Ёв далэ котыра дыя сыклякирдэнгэ, соб ёнэ тэ роздэн манушэнгэ. Сыклякирдэ роздэнас хабэн, и хабэн на пирьячелас тэ авэл! Лэс вхтылдя сарэнгэ манушэнгэ, сарэ чялынэ, и ачяпэ.

Тэнче сыклякирдэ скэдынэ хабэн, саво ачяпэ и скэдынэ 12 корзины. Саро адава хабэн кэрдяпэ пандже марэндыр и дуе мачендыр ада сыс чуду.

Сыр Иисусо чялякирдя манушэн Ёв пхэндя сыклякирдэнгэ тэ бэшэн дэ лодка и тэ уджян пэ авир авир риг рэка. Иисусо отмекья манушэн кхэрэ, а Кокоро гадыяпэ пэ бэрга, соб тэ помангэпэ. Одой Ёв очяпэ кокоро и мангэласпэ кэ само рат.

Сыклякирдэ уджянас пэ лодка. Пхурдэлас бавал, машкир калы рат ёнэ догинэ кэ паш рэка.

Тэнче Иисусо пирьячя тэ мангэпэ и гия ко сыклякирдэ. Ёв джялас кэ лэнгири лодка пиро паны.

Сыр сыклякирдэ удыкхнэ Лэс, ёнэ дрыван здарандынэ, пал дова со думинэндэ, со ада призрако. Иисусо удыкхья, со ёнэ здарандынэ и пал дава пхэндя лэнгэ: «Надарэн. Ада Мэ!»

Тэнче Петро пхэндя Иисусоскэ:Сыклымарё, сыр ада Ту, припхэн мангэ тэ джяв кэ Ту пиро паны. Иисусо пхэндя Петроскэ: «Джя!»

Петро выгия лодкатыр и гия ко Иисусо пиро паны. Нэ сыр прогия набут ёв отлыджия якха Иисусостыр и дыкхэлас сыр пхурдэл бари бавал и савэ сыс барэ волны

Петро здарандыя и лыя тэ тасадёл до паны. Ёв загодлыя: «Сыклымарё, зракх ман!» Иисусо дыя лэскэ васт и гадыя лэс. Ёв пхэндя Петроскэ: «Кэ ту навхтылэл патябэн! Соскэ ту лыян тэ напатяс?»

Тэнче Петро и Иисусо бэшнэ дэ лодка, бавал пириачя тэ пхурдэл, а паны заштылыя. Сыклякирдэ дрыван дивиндэпэ. Ёнэ поклониндэпэ Иисусоскэ и пхэндэ: «Ту чячё Дэвлэскиро Чяво!»

Иисусо и Лэскирэ сыклякирдэ угинэ пэ лодка до форо, кай дживэнас герасинска мануша. Ёнэ докэдынэпэ кэ брэго и выгинэ лодкатыр.

Одой дживэлас мануш, дэ савэстэ сыс бэнг.

Ёв сыс дрыван зорало, со ни кон лэс наврикирлас. Мануша бут молы спхандэнас лэскирэ гэра и васта саструнэ шэлэнса, нэ ёв росчинэлас лэн.

Адава мануш дживэлас по могилки. Ёв годлэлас дэвэс и рат, сыс нанго и чинэлас пэс барэнса.

Ёв прыпрастандыя ко Иисусо и тэрдыя паш Лэстэ по чянга. Бэнг дэ далэ манушэстэ загодлыя дрыван: «Со ту камэс мандыр, Иисусо, Чяво Дэвлэско? Мангав на хаскир ман!»

Иисусо пхэндя бэнгэскэ: «Выджя адалэстыр манушэстыр!» Тэнче Иисусо пучя бэнгэстыр: «Сыр тут кхарэн?» Ёв пхэндя: «Легионо, пал дова со амэн бут».

Бэнга лынэ тэ мангэпэ ко Иисусо: «Мангав Тут, на бичяв амэн адалэ штэтэндыр»! Нанэ дур пэ бэрга чярёнас балыче. Бэнга помангнэ Иисусос: «Мангас, бичяв амэн дэ долэндэ балычендэ!» Иисусо дыя лэнгэ тэ кэрэн адава.

А балычен сыс одой 2000 шэрэ. Бэнга выгинэ манушэстыр и загинэ дэ балычендэ. И чурдынэпэ ёнэ бэргатыр дэ рэка и тасадынэ.

Сыр удыкхнэ адава пастухи савэ ракхэнас балычен, ёнэ прастандынэ до форо и роспхэндэ сарэнгэ пал дава, со кэрдя Иисусо. Мануша явнэ форостыр и удыкхнэ манушэс дэ савэстэ сыс бэнга. Ёв сыс дэ пэстэ, уридо и лыджялас пэс манушиткэс.

Мануша дрыван здарандынэ и мангнэ Иисусос тэ уджял лэнгирэ гавэстыр. Пал дова Иисусо бэстя дэ лодка, а мануш савэстыр выгинэ бэнга, мангья Иисусос тэ джял пал Лэстэ.

Нэ Иисусо пхэндя лэскэ: «Нат, Мэ камам, соб ту тэ джяс кхэрэ и тэ роспхэнэс сарэнгэ пал дова со кэрдя туса Дэвэл. Роспхэн со Дэвэл здыкхьяпэ пэ тутэ».

Мануш гия и роспхэнэл сарэнгэ со кэрдя ваш лэскэ Иисусо. И кон шунэлас лэс дова дрыван сыс дивиндэпэ.

Тэнче Иисусо пиритрадыя пэ авир брэго рэка. Сыр Ёв явья одорик, кэ Ёв скэдынэпэ дрыван бут мануша. Манушэн сыс дрыван бут со тасавэнаспэ паш Лэстэ. Одой сыс джювлы, савьятэ 12 бэрш джялас рат. Ёй отдыя сарэ пэскирэ ловэ соб тэ авэл састы, нэ ни екх мануш на дыя лакэ састыпэн, и ёй дрыванэдыр насвалёлас.

Ёй шундя, со Иисусо састякирэл бутэн насвалэн манушэн, и подуминдя дэ пэстэ:Мэ патяв со сыр лавапэ пал Иисусоскири идя то авава састы! Пал дова ёй подгия ко Иисусо палал и лыяпэ пал Лэскири идя. Сыр ёй лыяпэ пал Лэстэ, рат пирьячя тэ джял.

Тэнче Иисусо шундя, сыр Лэстыр выгия зор. Ёв обрисия и пучя: «Кон лыяпэ пал мандэ?» Сыклякирдэ ракирнас:Паш Тутэ дрыван бут манушэн, сарэ пал Тутэ лэнпэ. Соскэ Ту пучес: «Кон лыяпэ пал Тутэ?»

Тэнче джювлы пэя по чянга ангил Иисусостэ и, дэ дар роспхэндя Лэскэ пал дова со ёй кэрдя и сыр кэрдяпэ састы. Иисусо пхэндя лакэ: «Тыро патябэн састякирдя тут. Джя Дэвлэса».

Екхвар Иисусо сыс пашэ рэка. Ёв сыклякирэлас манушэн. Тэ шунэн Иисусос явнэ бут мануша, Ёв бэстя дэ лодка сави сыс до паны соб Лэс куч тэ дыкхэн и тэ шунэн. Сыр бэстя дэ лодка, Ёв лыя тэ сыклякирэл манушэн.

Иисусо роспхэндя манушэнгэ, савэ шунэнас Лэс дасави история: «Екх мануш, саво обкэрэл пхув выгия тэ росчурдэл зёрно дэ пхув. Сыр ёв росчурдэлас зёрны, на бут зёрны пэнэ по дром. Явнэ чирикля и поханэ адалэ зёрны.

Авир зёрны пэнэ пэ баруны пхув . Ёнэ сыго выбаринэ нэ корни на гинэ дэ пхув. Сыр припэкья кхам ёнэ зашутинэ и хасинэ.

Сыс зёрны савэ пэнэ дэ сувьитко чяр. Ёнэ лынэ тэ пробарьён, нэ сувьитко чяр замардя лэн. Пал дова зёрно савэ пробаринэ машкир сувья, надыя нисаво плодо.

Сыс дасавэ зёрны, савэ пэнэ дэ лачи пхув. Ёнэ выбаринэ и яндэ дэ 30, 60 и савэ и дэ 100 молы бутыр зёрно, долэндыр со чурдыя дэ пхув. Кон камэл тэ джял пал Дэвлэстэ, мэк лэла дэ годы одова со Мэ ракирав!

Сыклякирдэ на полэнэ кэсо дая история, нэ Иисусо роспхэндя лэнгэ сыр ёнэ ачнэпэ кокорэ.: «Зёрно — ада Дэвлэскиро Лав. Дром — ада мануш, саво шунэл Дэвлэскиро Лав, нэ на полэл лэс. И бэнг чёрэл кэ ёв Лав, соб мануш тэ напатял и тэ на зракхэлпэ.

Баруны пхув — ада мануш, саво шунэл Дэвлэскиро Лав и лошаса прылэл лэс. Нэ сыр явэн пхарэ дэвэса и сыр авир мануша кэрэн лэскэ холы тэнче ёв отджял Дэвлэстыр.

Пхув дэ сувьитко чяр — ада мануш, саво шунэл Дэвлэскиро Лав. Нэ ёв дрыван бут думинэл пало джиипэн сыр тэ закэрэл бутыр ловэ и тэ кэрэл пэскэ миштыпэн. Проджян дэвэса и ёв пирьячел тэ камэл Дэвлэс. И дова со ёв сыклёлас Дэвлэскирэ Лавэстыр забистрэлпэ сыр тэ пхирэ ангил Дэвлэс тэ . Дасаво мануш сыр марытко чяр бизёрноско.

Нэ зёрно дэ лачи пхув — ада мануш, саво шунэл Дэвлэскиро Лав, патял лэскэ и янэл плодо».

Иисусо роспхэнэлас бут истории пал Дэвлэскиро Царство. Ёв ракирэлас: «Дэвлэскиро Царство сыр горчично зёрно, саво мануш чудя дэ пхув дэ пэскирэ маля. Тумэ джинэн, со горчично зёрно — и сын тыкнэдыр сарэндыр.

Нэ сыр горчично зёрно выбарьёл, ёв ачел учедыр сарэндыр, кэрэлпэ дрыван баро дэмбо, со чирикля явэн и кэрэн пэ лэстэ гнёзды».

Иисусо роспхэндя екх история: «Дэвлэскиро Царство сыр закваска, сави джювлы чивэл дэ тясто, и закваска гадэл саро тясто.

Адякэ Дэвлэскиро Царство сыр сунакай, саво сыс загарадо пэ маля. Екх мануш попэя адава сунакай, и лэскэ закамьяпэ тэ лэл лэс пэскэ. Пал дава ёв заганадя лэс соб никон тэ напопэрэл. А тэнче, лошало со попэя, гия, бикиндя саро, со лэстэ сыс, и киндя адая мал, кай сыс загарадо барвалыпэн.

Дэвлэскиро Царство сыр мануш, саво скинэл дрога бара, ёв родэлас жемчуго бидошако. Сыр ёв попэян жемчужина, то гия и бикиндя саро, со лэстэ сыс, и киндя ла».

Мануша, савэ пхирэнас пал Иисусостэ, машкир лэндэ сыс дасавэ, савэ гинэнас пэс чячунэдыр авирэндыр, пал дова со ёнэ кэрэнас лаче рынды. Адалэ мануша пхутёнас ангил долэндэ кон накэрэлс лаче рынды. Иисусо роспхэндя лэнгэ дасави история: «Дуй мануша явнэ до Дэвлэскиро Кхыр тэ помангэпэ. Екх лэндыр скэдэлас ловэ, а авир — фарисеё.

Фарисеё мангэласпэ адякэ: “Дэвла, наис Тукэ пал дова со мэ нанэ до бэзэха, сыр авир мануша:чёра, хоханэ, нанэ чячунэ, чи сыр адава, саво скэдэл ловэ манушэндыр.

Мэ на хав дуй молэ дэ курко, отдав Тукэ дэшитко котыр мирэ ловэндыр и сарэстыр со мандэ сын.

Авир мануш, саво скэдэлас ловэ манушэндыр тэрдёлас дурэдыр фарисеёстыр. Ёв ладжятыр на гадэлас якха кэ болыбэн, нэ марэлас пэс дэ колын и мангэласпэ: “Дэвла, мангав, зракх ман, пал дова со мэ дживав дэ бэзэх”».

Иисусо пхэндя: «Ракирав тумэнгэ, со Дэвэл гинэла чячунэса долэс кон скэдэлас ловэ манушэндыр, а на нэ фарисеёс. Пал дова со, кон пхутёл пашэ манушэндэ авэла ладжакирдо, а кон гинэл пэс тыкнэса, долэс Дэвэл гадэла».

Екхвар Иисусо сыклякирэлас манушэн, савэ скэдынэпэ лэс тэ пошунэн. Лэндыр сыс мануш, саво скэдэлас ловэ манушэндыр и авир мануша, савэ на дживэнас пир законо Маисеёско, и пал дова лэн гинэнас со ёнэ дживэн дэ бэзэха.

Фарисеи и сыклякирдэ пиро законо удыкхнэ, со Иисусо ракирэлас одолэнса манушэнса сыр пэскирэнса. Пал дова ёнэ лынэ тэ холясон и тэ ракирэн екх екхэскэ: «Ёв кэрэл нанэ куч, ракирэл манушэнса и хал лэнса и пьел савэ дэ бэзэха». Иисусо шундя со ёнэ ракирэн и роспхэндя дасави история:

«Кэ екх мануш сыс дуй чявэ. Екхвар тыкнэдыр чяво пхэндя дадэскэ: “Дадо, мэ камав тэ лав пэскиро барвалыпэн дадэвэс!” Тэнче дад пэскиро барвалыпэн дыя дуенгэ пэскирэнгэ чявэнгэ по паш.

Тэнче тыкнэдыр чяво залыя саро, пэскиро барвалыпэн, и угия дур до авир форо, одой ёв роскэрдя саро пэскиро барвалыпэн и дживэлас сыр камэлас до бэзэха.

Сыго дэ дова форо кэрдяпэ баро бокхалыпэн, а лэстэ на ачнэпэ ловэ по хабэн. Пал дава ёв гия бутярнэса тэ дыкхэл балычен. Ада сыс екх буты, сави ёв попэя. Ёв бокхалыя адякэ со сыс лошало тэхал балыченса кэтанэ нэ и дава лэскэ надэнас.

Тэнче, тыкнэдыр чяво пхэндя пэскэ: “Со мэ кэрав? Кэ миро дад бут бутярнэн, и сарэ ёнэ хан и чялён, а мэ адай мэрав бокхатыр. Рисёвава кэ миро дад и мангавапэ кэ ёв бутярнэса”.

И тыкнэдыр чяво гия палэ кэ дадэскиро кхыр. И сыр ёв сыс дур кхэрэстыр, дад удыкхья лэс и зарондя пал лэстэ. Ёв прастандыя кэ пэскиро чяво, облыя лэс и чямудэлас лэс.

Чяво пхэндя:Дадо, мэ кэрдём бэзэх ангил Дэвлэстэ и тутэ. Мэ на молав тэ авав тырэса чявэса.

Нэ дад пхэндя пэскирэ бутярнэнгэ: «Сыгэдыр джянте янэнте хвэдыр идя и урьенте пэ мирэ чявэстэ! Дэнте ангрусны пэ лэскиро васт и тэраха пэ гэра. Тэнче зачинэнте лачес гурувэс. Амэ аваса тэхас и тэ кэрас свэнко, пал дова со миро чяво сыс муло, нэ кана ёв джидо! Ёв сыс хаскирдо, а кана попэяпэ!»

Свэнко сыс ваш всарэнгэ. Сыго пхурэдыр чяво явья кхэрэ малендыр, кай ёв кэрэлас буты. Ёв ушундя гиля и кхэлыбэн и, подкхардя екхэ бутярнэс, и пучя, со одой кэрэлпэ.

Сыр пхурэдыр чяво уджиндя, со до кхыр свэнко, пал дова со рисия лэскиро пшал, ёв дрыван холясыя и на загия до кхыр. Дад выгия и мангэлас лэс тэ заджял, соб тэ авэл лошало пэ да свэнко лэнса кай рисия чяво, нэ ёв отпхэндяпэ.

Пхурэдыр чяво пхэндя дадэскэ: “Всарэ адалэ бэрша мэ патываса кэравас пэ тутэ. Мэ кандавас тут, нэ ту на дэсас мангэ ни екхэс бакрорэс, соб мэ тэ авав лошало пэскирэ манушэнса. А адава чяво роскэрдя тыро барвалыпэн по джиипэн до бэзэха. Кана ёв рисия кхэрэ, и ту зачиндян лачес гурувэс, соб тэ кэрэ свэнко!”

Дад пхэндя: “Чяво миро, ту дживэс манса, и саро миро, — тыро . Амэ кэрас адякэ сыр трэби, кай кэрас дава свэнко. Пал дава со тыро пшал сыс муло, а кана ёв джидо. Ёв сыс хаскирдо, а кана попэяпэ!”»

Екхвар Иисусо гия пэ учи бэрга, соб тэ помангэпэ. Ёв лыя пэса тринэн пэскирэн сыклякирдэн:Петрос, Иаковос и Иоаннос, саво сыс сыклякирдо Иисусоско, а нанэ дова Иоанно, саво болдя Иисусос.

Сыр пэ бэрга Иисусо мангэласпэ, Лэскиро муй кэрдяпэ, сыр кхам. Лэскири идя кэрдяпэ дрыван попарныя, сыр ни екх мануш пэ пхув на скэрэла дасаво парныпэн.

И явья Маисеё и пророко Илия, савэ дживэнас шэла бэрша палэ. Сыр сыкадэпэ пэ бэрга, ёнэ ракирэнас Иисусоса пал дова со Лэскэ сыгэс приджялапэ тэ мэрэл до Иерусалимо.

Сыр Маисеё и Илия ракирэнас Иисусоса, Петро пхэндя Иисусоскэ: «Амэнгэ адай дрыван куч! Кэраса трин шатры:екх — ваш Тукэ, екх — ваш Маисеёскэ и екх — Илияскэ». Даратыр Петро кокоро на полэлас, со ракирэл.

Сыр Петро ракирлас, пэ лэндэ згия сияющё облако, саво облыя лэн. И облакостыр шундэ глос сави ракирлас: «Ада — Миро Чяво, Савэс Мэ камам! Мэ лошало Лэса. Шунэнте Лэс». Трин сыклякирдэ дрыван здарандынэ и пэнэ муеса пэ пхув.

Тэнче Иисусо лыяпэ пал лэндэ и пхэндя: «На дарэнте! Вштэнте!» Ёнэ подыкхнэ ангил пэстэ, нэ на удыкхнэ никонэс сыс екх Иисусо.

Тэнче Иисусо тринэ сыклякирдэнса згия бэргатыр. Ёв пхэндя лэнгэ: «Никонэскэ на роспхэнэн пал дова со адай сыс. Сыго Мэ мэрава, а тэнче рисёвава ко джиипэн. Тэнче ту мэ роспхэнэна пал дава манушэнгэ».

Дэ долэ дэвэса дживэлас екх мануш кхарэнас лэс Лазарё. Кэ ёв сыс дуй пхэня — Мария и Марфа. Лазарё, Марфа и Мария сыс пэскирэ мануша Иисусоскэ. Екхвар Иисусоскэ пхэндэ, со Лазарё дрыван насвало. Сыр шундя пал дава Иисусо пхэндя: «Адава насвалыпэн на ачкирла лэс мулэса. Нэ обрисёла кэ слава Дэвлэски».

Иисусо дрыван камэлас пэскирэн манушэн, нэ ачяпэ дова штэто, кай уджиндя пал насвалыпэн Лазарёско, дуй дэвэс. Тэнче Ёв пхэндя пэскирэ сыклякирдэнгэ: «Рисёваса дэ Иудея». Нэ сыклякирдэ пхэндэ: «Сыклымарё, нагарка мануша дэ Иудея камнэ Тут тэ умарэн!» Иисусо пхэндя: «Амаро Лазарё засутя мэ джяв тэ джингавав лэс».

Сыклякирдэ Иисусоскирэ пхэндэ: «Сыклымарё, сыр Лазарё засутя, то лэскэ кэрлапэ хвэдыр». Тэнче Иисусо пхэндя лэнгэ адякэ сыр исын: «Лазарё мэя. И мэ лошало, со Ман одой на сыс, пал дава со тумэ кана патяна дэ Мандэ».

Сыр мэя Лазарё прогия штар дэвэс, сыр Иисусо явья дэ дава гав, кай дживэнас Лэскирэ мануша. Марфа выгия ко Иисусо и пхэндя: «Сыклымарё сыр Ту тэ авэс адай, миро пшал на мэрэлас бы. Нэ мэ патяв, со Дэвэл дэла Тукэ саро, со Ту кэ Ёв помангэса».

Иисусо пхэндя: «Мэ — гадав мулэндыр манушэн и дав Джиипэн. Кон патял дэ Мандэ, дова авэла тэ дживэл, и сыр мэрэла. Одова кон патял дэ Мандэ, на мэрэла. Патяс ту дэ дава?» Марфа пхэндя: «Патяв Сыклымарё! Мэ патяв, со Ту — Мессия, Дэвлэскиро Чяво».

Тэнче явья Мария. Ёй пэя до гэра Иисусоскэ и пхэндя: «Сыклымарё, сыр Ту тэ авэс адай на мэрэлас бы миро пшал». Иисусо пучя пхэнендыр: «Кай тумэ лэс чидэ?» Ёнэ пхэндэ: «Дэ гробница. Джя подыкх». Иисусо зарондя.

Гробница сыс дэ бэрга, сави сыс закэрды барэ барэса. Сыр Иисусо подгия кэ гробница, Ёв пхэндя: «Отлэнте бар». Нэ Марфа пхэндя: «Лазарё мэя сыр штар дэвэс. Лэстыр джял налачё фано».

Иисусо пхэндя: «Чи Мэ напхэндём тукэсо ту дыкхэса Дэвлэскири зор, сыр патяса мангэ!» И мануша улынэ бар гробницатыр.

Иисусо подыкхья до болыбэн и пхэндя: «Дад, наис Тукэ пал дова со ту шунэс Ман. Мэ джинавас со Ту шунэс Ман, нэ Мэ ракирав адава, ваш дова соб мануша савэ тэрдэ адай тэ патян дэ дова со Ту ман бичявдян». Тэнче Иисусо пхэндя годласа: «Лазарё, выджя!»

И Лазарё выгия гробницатыр! Ёв сыс запхандо дэ мулытко цэргаса. Иисусо пхэндя манушэнгэ: «Слэнте лэстыр кадая цэрга, вымэкэнте лэс!» Сыр удыкхнэ адава чудо, бут евреи патяндынэ дэ Иисусостэ.

Нэ еврейска рашая и фарисеи дарэнас, со мануша авэна тэ патян дэ Иисусостэ сыр дэ Мессия. Пал дова ёнэ скэдынэпэ сарэ кэтанэ соб тэ ракирэн сыр тэ умарэн Иисусос и Лазарёс.

Прогия трин бэрш, сыр Иисусо лыя тэ роспхэнэл и тэ сыклякирэл манушэн. Сыр прогия бут форы, Иисусо и лэскирэ сыклякирдэ явнэ до Иерусалимо. Джянас дэвэса кэ патради, и Иисусо закамья тэ пролыджял ла пэскирэ сыклякирдэнса. Бэрш до бэрш евреи пролыджянас Патради, соб тэ зрипирэн сыр шэла бэрша палэ Дэвэл зракхья амарэн дадэн евреен, сыр вылыджия лэн тэ на авэн бутярнэнса до Египто. До дэвэса ангил свэнко Иисусо пхэндя пэскирэнгэ сыклякирдэнгэ. со Лэс сыгэс умарна.

Екх апостолэндыр сыс мануш савэс кхарэнас Иуда. Иуда пхирэлас ящикоса, дэ саво чурдэнас ловэ, а ёв одотхыр лэн чорэлас. Сыр Иисусо сыклякирдэнса явья до Иерусалимо, Иуда гия кэ барэ рашая. Ёв закамья тэ здэл Иисусос лэнгэ пало ловэ. Иуда джинэлас, со барэ рашая на гинэнас Иисусос Мессияса и камнэ Лэс тэ умарэн.

Мануш, саво куч джинэлас законо и пхурэ мануша евреи и барэ рашая покиндэ Иудаскэ 30 рупунэ ловэ пал дова соб ёв тэ здэл лэнгэ Иисусос. Саро скэрдяпэ адякэ сыр ракирэнас пророки дэ Лав Дэвлэско. Иуда лыя ловэ и угия. Кана Ёв родэлас сыр тэ здэл Иисусос.

Сыр Иисусо сыс пэ Патради пэскирэ сыклякирдэнса, сыр ёнэ ханас Ёв лыя маро пхагирдя и пхэндя: «Лэнте и ханте. Ада — Миро трупо, саво мэ отдав пал тумэндэ. Кэрэнте адава сыр авэна тэ рипирэн ман». Адякэ Иисусо откэрдя сыклякирдэнгэ со Ёв мэрла пал лэндэ, отдэла пэскиро трупо дэ жэртва.

Тэнче Иисусо лыя тахтай виноса и пхэндя: «Лэнте и пьенте! Ада — Миро рат Нэвэско Заветоско, саво тхадэл кай Дэвэл тэ заракхэл тумарэ бэзэха. Кэрэнте адякэ, сыр лэна тэ рипирэн Ман».

Тэнче Иисусо пхэндя сыклякирдэнгэ: «Екх тумэндыр здэла Ман». Сыклякирдэ на полынэ пал конэстэ ракирэл и лынэ тэ пучен, кон адава кэрэла. Иисусо пхэндя: «Здэмарё одова, конэскэ Мэ дава котыр маро». И дыя маро Иудаскэ.

Сыр лыя Иуда маро, дэ лэстэ загия бэнг. Тэнче Иисусо пхэндя: «Сыгэдыр кыр дова со камэс тэ кэрэс». Иуда гия кэ барэ рашая, тэ здэл лэнгэ штэто кай сыс Иисусо. Джялас рат.

Сыр хая Иисусо сыклякирдэнса гия пэ Елионско бэрга. Одой Иисусо пхэндя: «Тумэ сарэ дэ дая рат ачкирна Ман. Сыр ракирэл Дэвлэскиро Лав: “Умарава пастухос и рознашэнапэ бакрорэ”».

Петро пхэндя: «Сыр сарэ ёнэ ачкирна Тут, нэ мэ на ачкирава Тут, Мэ на кэрава адякэ сыр ёнэ!» Тэнче Иисусо пхэндя Петроскэ: «бэнг камэл тэ хаскирэл сарэн тумэн, нэ Мэ мангьёмпэ пал тутэ Петро, соб тыро патябэн тэ авэл зорало. Дэ дая рат на пробагэла башно, сыр ту трин молы отпхэнэсапэ Мандыр».

Тэнче Петро пхэндя Иисусоскэ: «Мэк мангэ приджялапэ тэ мэрав, мэ на отпхэнавапэ Тутыр!» И сарэ сыклякирдэ ракирэнас адякэ сыр ёв.

Иисусо и лэскирэ сыклякирдэ гинэ по штэто, саво кхарласпэ Гефсимания. Иисусо припхэндя Пэскирэнгэ сыклякирдэнгэ тэ мангэнпэ, соб ёнэ тэ на поддэнпэ дэ бэзэх. И отгия Ёв лэндыр нанэ бут и мангэласпэ екхджино.

Иисусо трин молы мангэласпэ: «Дадо, мангав Тут пролыджя Ман тэ на проджяв пир адава пхаро дром. Нэ сыр нанэ авир дром тэ заракхэ манушэн бэзэхостыр, мэк авэла адякэ сыр Ту камэс». Иисусоскэ сыс дрыван пхаро и лэскиро пото джялас ратэса, саво пэрэлас пэ пхув. Дэвэл бичявдя ангелос, соб тэ подрикирэл Лэс.

Саре молы сыр Иисусо мангэласпэ Ёв рисёлас кэ пэскирэ сыклякирдэ нэ ёнэ совэнас. Сыр Иисусо рисия трито моло Ёв пхэндя: «Вштэнте Миро здэмарё явья адариг».

И явья Иуда барэ рашаенса, и шэралэнса савэ сыс стражы Дэвлэскирэ Кхэрэскэ, пхурэ манушэнса халадэнса и бут авирэнса манушэнса. Ёнэ сыс чурьенса и каштэнса. Иуда подгия ко Иисусо и пхэндя: «Яв бахтало Сыклымарё», — и чямудя Лэс. Ёв кэрдя дава соб тэ сыкавэл лэнгэ Манушэс Савэс трэби тэ лэн. Иисусо пхэндя: «Иуда, ту чямудян Ман и далэса здыян ман?»

Сыр халадэ лынэ Иисусос, Петро вылыя пэскири чури и отчиндя екхэскэ слугаскэ кан. Нэ Иисусо пхэндя: «Гарав чури! Сыр трэби Мэ мангава Дадэс и явэна бут ангелы, тэ заракхэн Ман, нэ Мэ трэби тэ авав кандуно пэскирэскэ Дадэскэ». Тэнче Иисусо састякирдя кан слугаскэ. И лынэ Иисусос, а сарэ Лэскирэ сыклякирдэ рознашнэпэ.

Машкир рат яндэ Иисусос до кхыр ко баро рашай, пал дова со ёв камья тэ допучел Иисусос. Петро джялас пал лэндэ нэ кэ ёнэ наподжялас. Сыр Иисусос андэ ко баро рашай, Петро ачеласпэ до дворо и подгия кэ яг, паш сави татёнас слуги и стражники.

Пураныпэн евреендыр и законоскирэ сыкламаря лынэ тэ сэндякирэн Иисусос до кхыр ко баро рашай. Ёнэ попынэ бут хоханэн манушэн, савэ йивья ракирэнас пэ Иисусостэ. Нэ лэнгирэ лава на зжянаспэ, и ёнэ на допхэндэ бангипэн Иисусоско. Кокоро Иисусо ничи на ракирэлас пал Пэстэ.

И сыр баро рашай подыкхья пэ Иисусостэ и пучя: «Пхэн амэнгэ, Ту Мессия, Чяво джидэ Дэвлэскиро?»

Иисусо пхэндя: «Да, Мэ — Мессия, и тумэ дыкхэна Ман, сыр Мэ бэшто паш Дэвлэстэ и явава болыбнастыр». Баро рашай росчиндя пэ пэстэ гад, пал дова со лава Иисусоскирэ яндэ лэс дэ холы. Ёв загодлыя: «Амэнгэ бутыр на трэби мануша, савэ лэна тэ ракирэн со кэрдя адава Мануш! Тумэ кокорэ шундэ, сыр Ёв пхэндя, со Ёв — Чяво Дэвлэско. Со тумэ пхэнэна Лэскэ»

Сарэ, кон одой сыс, загодлынэ барэ рашаскэ: «Ёв молэл тэ мэрэл!» Ёнэ запхандэ Иисусоскэ якха, лынэ тэ чунгардэн пэ Лэстэ, тэ марэн Лэс и тэ санпэ Лэстыр.

Петро дужакирэлас до дворо. Лэс удыкхья екх манушны. Ёй пхэндя лэскэ: «Ту сыс Иисусоса!» Нэ Пэтро на приджиндяпэ. Тэнче авир манушны пхэндя лэскэ дова со и англатуны пхэндя, нэ Петро и адай на приджиндяпэ. Тэнче авир мануша пхэндэ: «Амэ джинас, со ту сыс Иисусоса, тумэ сарэ дуй Галилеятыр».

Петро лыя тэ солахал, со ёв на джинэл Иисусос. Ёв ракирдя: «Солахав, мэ на джинав адалэс Манушэс и на полав пал со, тумэ ракирэн!» Тэнче Иисусо порисия, подыкхья пэ Петростэ, и ёв зрипирдя, сыр Иисусо пхэндя лэскэ: «Дадэвэс ратяко, сыр загодлэла башно, ту трин молы отпхэнэса, со на джинэс Ман».

Петро выгия дворостыр и дрыван ровэлас. Дэ дова дэвэс и Иуда уджиндя, со Иисусос савэс ёв здыя камэн тэ умарэн. Ёв, зарондя, рискирдя ловэ барэ рашаенгэ и пхурэдырэ манушэнгэ, а тэнче гия и убладыя.

Дэ долэ дэвэса римско хулай дэ Иудея сыс Пилато. Барэ рашая и пхурэ мануша Израилёскирэ яндэ Иисусос ко Пилато. Ёнэ камнэ, соб римско хулай тэ сэндякирэл Иисусос и тэ приракирэл Лэс тэ умарэн. Пилато пучя ко Иисусо: «Ту — Царё Иудейско».

Иисусо пхэндя: «Ту чячибэн пхэнэс. Нэ Миро Царство нанэ пэ дая пхув. Тэ авэл адава адякэ, то Мирэ слуги бы марэнаспэ пал Мандэ. Мэ явьём пэ пхув, соб тэ роспхэнэ чячибэн пал Дэвлэстэ. Сарэ кон, камэл чячибэн, шунэн Ман». Пилато пучя: «Со исын чячибэн?»

Сыр поракирдя Иисусоса, Пилато выгия ко мануша и пхэндя: «Мэ на попэём нисаво бангипэн, дэ адалэ Манушэстэ, соб тэ умарэ Лэс». Нэ сарэ лынэ тэ годлэн: «Прымар кэ трушул Лэс!» Пилато пхэндя: «Ёв накэрдя ничи, со тумэ ракирэн пэ Лэстэ». Нэ ёнэ лынэ тэ годлэн дрыванэдыр. Тэнче Пилато пхэндя дэ трито моло: «Ёв нанэ банго!» Нэ мануша загодлынэ дрыванэдыр: «Прымар кэ трушул Лэс!»

Даратыр со мануша гадэнапэ пэ лэстэ, Пилато кандыя лэн и припхэндя пэскирэ манушэнгэ тэ примарэн ко трушул Иисусос. Римска мануша счингирдэ Иисусос чукненса. Тэнче ёнэ санаспэ Лэстыр, уридэ пэ Лэстэ царско идя и терново венко. Ёнэ ракирэнас: «Дыкхэнте! Гэна Царё иудейско!»

Тэнче сыр счингирдэ чукненса римска мануша лыджинэ Иисусос, соб тэ прымарэн Лэс по трушул. Ёнэ дынэ Лэскэ тэ лыджял трушул, пэ саво Лэс прымарэна.

Иисусос яндэ по штэто, саво кхарэлпэ Голгофа, пэ саво ракирэн «Черепо». Одой Лэс примардэ ко трушул, примардэ Лэскирэ васта и гэра. Иисусо подыкхья до болыбэн и пхэндя: «Дадо, простинэ лэн, пал дава со на джинэн, со кэрэн». Римска мануша примардэ табличка паш шэро Иисусоско. Пэ латэ сыс чиндо «Царё иудейско», сыр припхэндя тэ чинэ Пилато.

Римска мануша чурдэнас жребиё, соб тэ джинэн, конэскэ дорэсэлапэ Иисусоскири идя. Адякэ сыс сыр пхэндэ пророки дэ Дэвлэско Лав: «Ёнэ росчурдынэ идя машкир пэстэ и чурдэнас пал латэ жребиё».

Паш Иисусостэ сыс примардэ дуй чёра, чудэ лэнгирэ трушила пэ дуй рига Лэстыр. Екх чёр лыя тэ подсал Иисусос, а авир пхэндя лэскэ: «Хиба ту на дарэс, кай Дэвэл марла тут? Амэ бангэ дэ дова со кэрдям дэ, а адава Мануш нанэ банго ни дэсо». Тэнче ёв пхэндя Иисусоскэ: «Мангав Тут, зрипир ман, сур явэса дэ Пэскиро Царство». Иисусо пхэндя лэскэ: «Дадэвэс ту авэса Манса дэ раё».

Сарэ мануша, и барэ рашая, мануша савэ куч джинэн Законо и пхурэ мануша подсанас Иисусос. Ёнэ ракирэнас Лэскэ: «Сыр Ту — Дэвлэскиро Чяво, то зджя трушулэстыр и заракх кокоро Пэс! Тэнче амэ патяса дэ Тутэ».

И болыбэн покалыя, а и сыс ада машкир дэвэс. И дава калыпэн джялас трин чясы.

Тэнче Иисусо дрыван пхэндя: «Скэрдяпэ! Дад, Мэ одав Миро Духо дэ Тырэ васта». Тэнче Ёв обмэкья шэро и мэя. И лыя тэ тринскирэлпэ пхув. А дэ Кхыр Дэвлэско бари цэрга, сави закэрэл манушэн Дэвлэстыр, росчиндяпэ пэ дуй рига упрал кэ низо.

Кана сыр Иисусо мэя Ёв откэрдя дром манушэнгэ, соб сарэ тэ явэн ко Дэвэл. Сыр римско мануш, саво ракхэлас Иисусос, удыкхья саро, со сыс, ёв пхэндя: «Адава Мануш чячё сыс нанэ банго! Ёв — Дэвлэско Чяво».

Тэнче дуй мануша — Иосифо мануш иудейсконэ шэралэндыр и фарисеё Никадимо — явнэ ко Пилато тэ мангэн кэ ёв трупо Иисусоско. Ёнэ патянас со Иисусо сыс Мессия. Иосифо и Никадимо закэрдэ трупо дэ цэрга, отлыджинэ кэ гробница, сови кэрды дэ бэрга, и чидэ Лэс одорик. Тэнче ёнэ причидэ баро бар кэ гробница, соб тэ на заджял ни кон.

Сыр римска мануша прымардэ ко трушул Иисусос, баро рашай и фарисеё явнэ ко Пилато и пхэндэ лэскэ: «Адава мануш – хохано, сыр Ёв сыс джидо, ракирэлас, со проджяла трин дэвэс Ёв уштэла мулэндыр. Припхэн тэ чивэн манушэн, тэ ракхэн Лэс кай Ёв пашло, трин дэвэс, соб сыклякирдэ тэ навычёрэн Трупо и тэ на пхэнэн манушэнгэ, со Ёв вштыя мулэндыр».

Пилато пхэндя: «Лэнте кокорэ манушэн и ракхэн лэскиро гробо, сыр тумэ гинэн адякэ и кэрэн». Ёнэ гинэ и чидэ пичять пэ баро бар, соб никон тэ на заджял до гробо, и чидэ одой манушэн, соб никон тэ на чёрэл трупо Иисусоско.

Пэ авир дэвэс сыр мэя Иисусо сыс суббота. Дэ дава дэвэс нашты ничи тэ кэрэн, пал дава сыклякирдэ на гинэ кэ Лэскиро гробо. А сыр прогия суббота, пэ авир дэвэс кэдава сыр тэ вштэл о кхам, джювля камнэ тэ джя ко гробо Иисусоско. Ёнэ лынэ ксил савэстыр джял лачо фано, соб тэ помакхэн Лэскиро трупо.

На догинэ джювля кэ гробница, сыр пхув сари лыя тэ тринскирэлпэ. И болыбнастыр явья ангело. Ёв отлыя бар, саво закэрэлас дром кэ гробница, и бэстя пэ лэстэ. Ангило хачёлас саро сыр молния. Мануша савэ ракхэнас Иисусос паш гробница удыкхнэ лэс, передарандынэ, пэнэ пэ пхув, сыр мулэ.

Сыр джювля явнэ кэ гробница, и ёнэ удыкхнэ ангелос. Ёв пхэндя лэнгэ: «На дарэн мандыр. Мэ джинав, со тумэ родэн Иисусос, нэ Лэс адай нанэ. Ёв вштыя мулэндыр, сыр и ракирлас! Подыкхэн дэ гробница удыкхэна кокорэ». Джювля подыкхнэ дэ гробница и удыкхнэ штэто, кай пасёлас Иисусо. Лэскиро трупо одой на сыс.

Ангело пхэндя джювленгэ: «Джянте и пхэнэнте сыклякирдэнгэ: «Иисусо вштыя мулэндыр, и Ёв дужакирэл тумэн дэ Галилея».

Джювля дрыван дивиндэпэ и сыс лошалэ. Ёнэ прастандынэ ко сыклярдэ Иисусоскирэ, соб тэ роспхэнэн лэнгэ со кэрдяпэ.

Сыр джювля джянас пиро дром, ангил лендэ тэрдыя Иисусо. Ёнэ пэнэ ангил Лэстэ пэ пхув и облынэ Лэскирэ гэра. Иисусо пхэндя: «На дарэн. Джянте и пхэнэнте Мирэнгэ сыклякирдэнгэ, соб ёнэ тэ джян дэ Галилея. Одой ёнэ удыкхэна Ман»

Дэ дова дэвэс, сыр Дэвэл гадыя Иисусос мулэндыр, дуй лэскирэ сыклякирдэ джянас до авир форо. Пиро дром, ёнэ ракирэнас пал дова со кэрдяпэ Иисусоса, и сыр ёнэ думиндэ, со Иисусо Дова Мессия, саво дэла воля Израилёскэ. Нэ а Лэс умардэ. Тэнче джювля пхэндэ, со Ёв всаек джидо. Сыклякирдэ на наджинэнас, конэскэ кана тэ патя.

Сыр адалэ дуй сыклякирдэ джянас и ракирэнас, кэ ёнэ подгия Иисусо и гия лэнса. Ёв пучя, пал со тумэ ракирэн, а ёнэ думиндэ со Ёв авирэ форостыр, со на джиндя со кэрэлпэ до Иерусалимо, и роспхэндэ Лэскэ саро, со сыс Иисусоса пал далэ дэвэса.

Тэнче Иисусо лыя тэ роспхэнэл лэнгэ, со сыс чиндо пал Маисеёсте дэ Дэвлэско Лав. Гара пророки ракирэнас, со захалэ мануша кэрэна со Мессия пирилыджяла дукха и умарна Лэс. Адякэ ж пророки ракирэнас, со пэ трито дэвэс Мессия вштэла мулэндыр.

Сыс бэвэль, сыр сыклякирдэ явнэ до форо, дэ саво камнэ тэ ачепэ. Пал дава ёнэ кхардэ Иисусос тэ ачелпэ пэ рат. И Ёв загия лэнса до кхыр. Сыр ёнэ бэшнэ тэха, Иисусо лыя маро, пхэндя наис Дэвлэскэ и роспхагья маро. И адай сыклякирдэ полынэ, со ада сыс Иисусо. Нэ Лэс на ачя лэнса, Ёв кэрдяпэ нанэ душло ваш лэнгэ.

Тэнче сыклякирдэ пхэндэ екх екхэскэ: «Ада сыс Иисусо! Гэна пал со амэ адякэ шунасас Лэс, сыр Ёв роспхэнэлас амангэ Лав Дэвлэскиро!» И Ёнэ гинэ палэ до Иерусалимо. Сыр Ёнэ одорик явнэ, то роспхэндэ авирэнгэ сыклякирдэнгэ: «Иисусо джидо! Амэ дыкхьям Лэс!»

Сыр сыклякирдэ пал дава роспхэнэнас, то кэ ёнэ до кхыр явья Иисусо. Ёв пхэндя лэнгэ: «Бахт тумэнгэ!» Сыклякирдэ подуминдэ, со када призрако, нэ Иисусо пхэндя: «Соскэ тумэ дарэн? Соскэ тумэ на патян, со када Мэ? Подыкхэн пэ Мирэ васта и гэра. Ко призрако нанэ трупо». И соб тэ допхэнэ лэнгэ, со Ёв нанэ призрако, Иисусо помангья лэндыр хабэн. Ёнэ дынэ Лэскэ котыр мачё, и Ёв хая лэс.

Тэнче Иисусо пхэндя: «Мэ ракиравас тумэнгэ, со саро чиндо пал Мандэ дэ Дэвлэско Лав трэби адякэ и тэ авэл, адякэ саро и кэрдяпэ». Тэнче Иисусо роскэрдя Дэвлэско Лав соб ёнэ тэ полэн. Ёв пхэндя: «Гара пророки чинэнас, со Мэ, Мессия, пролыджява бут пхарипэна, мэрэва и пэ трито дэвэс вштава мулэндыр.

Пророки адякэ ж чинэнас, со Мирэ сыклякирдэ авэна тэ роспхэнэн Дэвлэско Лав. Ёнэ Лэна тэ прыкхарэн манушэн, соб ёнэ тэ порисён ко Дэвэл и тэ ачявэн бэзэха. И тэнче Дэвэл простинэла манушэнгэ бэзэха. Мирэ сыклякирдэ лэна тэ роспхэнэн адава пир саро свэто и, авэла ада Иерусалимостыр, и джяна кэ сарэ мануша. Тумэ роспхэнэна саро, со тумэ дыкхнэ, со Мэ тумэнгэ пхэндём, со кэрдём и со манса кэрдяпэ».

Тэнче Саранда дэвэс Иисусо бут молы сыкавэласпэ Пэскирэ сыклякирдэнгэ. Екхвар Ёв сыкадяпэ дэ екх дэвэс бутэн манушэнгэ, савэн сыс варикай панджьшэла манушэн! И бут молы Иисусо допхэнэлас Пэскирэнгэ сыклякирдэнгэ, со Ёв джидо, и сыклякирэлас лэн пал Дэвлэскиро Царство.

Иисусо пхэндя Пэскирэнгэ сыклякирдэнгэ: «Дэвэл дыя мангэ зор до болыбэн и пэ пхув. Пал дава Мэ пхэнав тумэнгэ, джянте кэ сарэ мануша и сыклякирэн лэн. Болэн лэн до лав Дадэско, Чявэско, и Свэнтонэ Духоско. Тумэ трэби тэ сыклякирэн лэн тэ кэрэн саро, со Мэ тумэнгэ ракирдём. И Рипирэн, со Мэ авава тумэнса».

Прогия саранда дэвэс, сыр Иисусо вштыя мулэндыр, Ёв пхэндя пэскирэнгэ сыклякирдэнгэ: «Аченпэ дэ Иерусалимо, кэ дова дэвэс сыр Миро Дад на дэла тумэнгэ зор. Ёв бичявэла тумэнгэ Свэнтонэс Духос» Тэнче Иисусо гадыяпэ до болыбэн, и облако закэрдя Лэс лэндыр. Кана, Иисусо хулай пэ саро, со сын до свэто, бэшто по троно по право васт Дэвлэстыр до болыбэн.

Сыр Иисусо рисия до болыбэн, Лэскирэ сыклякирдэ аченаспэ до Иерусалимо, сыр Ёв лэнгэ и пхэндя. Ёнэ скэдынэпэ кхэтанэ соб тэ мангэнпэ.

Екхвар до бэрш, сыр проджян пандэша дэвэс пал Патради, евреи кэрэнас свэнко жатва марэскири, сави кхарэласпэ Пандэшитко. Евреи сарэ свэтостыр скэдэнаспэ до Иерусалимо, соб тэ пролыджя свэнко кэтанэ. Дэ дова бэрш, сыр Иисусо сыс умардо и уштыя мулэндыр, Пандэшитко дэвэс сыс варикай куркэстыр, сыр Иисусо рисия до болыбэн.

Пэ пандэшитко свэнко сарэ патянкунэ сыс кэтанэ. Кхыр, до саво ёнэ сыс, пхэрдыя глосаса, сыр бари бавал. Катхыр лыяпэ ангил лэнгиро шэро явья дасаво сыр чиба ягытка. Сарэ патякунэ сыс пхэрдэ Свэнтонэ Духоса и лынэ тэ ракирэн пал Дэвлэстэ пэ авир чиба. Ёнэ на джиндэ пир сави чиб ракирэн, нэ ада сыс чиба, пэ савэ дыя лэнгэ тэ ракирэн Свэнто Духо.

Сыр мануша до Иерусалимо шундэ адая глос, скэдынэпэ кэтанэ. Сарэ камнэ тэ подыкхэн, со кэрэлпэ. Адалэ мануша сыс всарэ форэндыр, и ракирэнас пэ всарэ чиба, а сыклякирдэ Иисусоскирэ сыс Галилеятыр и ракирнас по-арамейско и по-греческо чип. Нэ дэ дава дэвэс сыклярдэ ракирэнас пэ авир чиба и мануша на полэнас со кэрэласпэ, адякэ сыр кажно мануш шунэлас ракирибэн пэ пэски чип, лошалэ лава со кэрдя Дэвэл.

А авир мануша лынэ тэ санпэ и тэ ракирэн, со сыклякирдэ пинэ вино и поматынэ. Нэ Петро годласа пхэндя лэнгэ: «Пошунэньте ман! Адалэ мануша нанэ матэ. Тумэ акана дыкхэн, со ракирэлас пророко Иоилё: “Со авэна дэвэса сыр Мэ бут прочивава Миро Духо пэ сарэндэ манушэндэ”.

Пошунэньтэ, израильтяне, Иисусо сыс Мануш, саво кэрэлас бут чуды, соб тэ сыкавэл кон Ёв сыс. Ёв кэрэлас адалэ чуды Дэвлэскирэ зорьяса. И тумэ джинэн, и саро дыкхнэ адава кокорэ. Нэ тумэ прымардэ Лэс по трушул!

Тумэ умардэ Иисусос, Нэ Дэвэл гадыя Лэс мулэндыр. Адякэ ракирэласпэ до пророчество, дэ, саво сыс чиндо: «Ту на домэкэса Тырэскэ Свэнтонэскэ тэ пасёл дэ могила вечно». И амэ дыкхьям одова, со Дэвэл рискирдя Иисусос ко джиипэн.

Дэвэл-Дад дыя Иисусоскэ тэ бэшэл пэ право васт Пэстыр. А Иисусо бичявдя амэнгэ Свэнтонэс Духос, сыр и ракирдя. И адава Свэнто Духо кэрэл саро, со тумэ дыкхэн и шунэн.

Тумэ примардэ ко трушус Манушэс, савэс кхарэн Иисусо. Нэ джинэн, со Дэвэл скэрдя Лэс Мессияса и Хуласа пэ саро, со сын дэ свэто».

Мануша, шунэнас Петроскирэ лава, задуминдэпэ. Ёнэ пучнэ Петрос и сыклякирдэн: «Пшала, со амэнгэ тэ кэрас?»

И Петро пхэндя: «Тумэнгэ сарэнгэ трэби, соб Дэвэл тэ простинэл тумарэ бэзэха. Мэк мануш порисёла ко дэвэл и болэлапэ до лав Иисусоско Христоско. Тэнче Дэвэл дэла тумэнгэ Свэнтонэс Духос».

Дэ дова дэвэс варикай 3000 манушэн патяндынэ со ракирэлас Петро. Ёнэ помангнэ Дэвлэс тэ простинэл бэзэха, болдэпэ и загинэ дэ кхангири, и ачнэ сыклякирдэ Иисусоскирэ.

Патянкунэ скэдэнаспэ кэтанэ. Ёнэ шунэнас со сыклякирэнас апостолы, мангэнаспэ и славинэнас Дэвлэс. Кэтанэ ханас и саро со лэндэ сыс ёнэ росчурдэнас машкир пэстэ. Сарэ до форо ракирэнас пал лэндэ лачипэн. Дэвэс дэвэсэстыр мануша аченаспэ патянкунэнса

Екхвар Петро и Иоанно гинэ до Кхыр Дэвлэскиро. Дэ вудара Кхэрэско сыс бэшто лангало мануш, саво мангэлас ловэ.

Петро подыкхья пэ лэстэ и пхэндя: «Ловэ мандэ нанэ, соб тэ дэ тукэ. Нэ мэ дава тукэ одова, со мандэ сын. Зорьяса Иисусоскирьяса, вшты и пхир!»

И Дэвэл дыя зор лангалэскэ манушэскэ. Ёв лыя тэ пхирэл и тэ ухтэл, прославляя Дэвлэс. Мануша до дворо Кхэрэско дрыван дивиндэпэ.

Мануша скэдынэпэ кэтанэ, камнэ тэ дыкхэн манушэс, саво лыя тэ пхирэл. Петро пхэндя: «На дыкхэн адякэ пэ лэстэ, кай ёв зорало. Ада нанэ амэ пэскирэ зорьяса дыям лэскэ састыпэн. Ада Иисусо лэс гадыя Пэскирэ зорьяса, пал дава со мэ патяс дэ Лэстэ.

Ада тумэ мангнэ ко Римско хулай тэ умарэн Иисусос. Тумэ умардэ Долэс, Кон дэл сарэнгэ джиипэн. Нэ Дэвэл гадыя Лэс мулэндыр. Тумэ на полэнас, со кэрэнас, нэ сыр саро дава кэрдяпэ, сыс адякэ сыр ракирнас пророки. А ёнэ ракирэнас, со Мессия проджяла пхаро дром и авэла умардо. И Дэвэл кэрдя адякэ, соб саро адава тэ авэл. Шунэнте, мангэн Дэвлэс и порисён кэ Ёв, соб ёв тэ зморэл тумарэ бэзэха».

Рашая и шэралэ савэ ракхэн кхыр, шундэ Петрос и Иоаннос, дрыван росхолясынэ. Ёнэ вхтылдэ апостолэн и чурдынэ лэн до бэшибэн. Нэ бут мануша патяндынэ, со ракирдя Петро. И манушэн савэ патяндынэ дэ Иисусостэ дэ дова дэвэс, выбария кэ 5000.

Пэ авир дэвэс скэдынэпэ барэ рашая, мануша савэ куч джинэнас Законо и пхурэ мануша. Кэ ёнэ яндэ Петрос и Иоаннос, и долэс манушэс, саво сыс лангало. Ёнэ пучнэ лэндыр: «Савэ зорьяса тумэ дынэ састыпэн лангалэскэ?»

Петро пхэндя лэнгэ: «Адава мануш, састыя, зорьяса сави дэл Мессия Иисусо. Тумэ примардэ Лэс ко трушул, нэ Дэвэл гадыя Лэс мулэндыр! Тумэ отпхэндэпэ Лэстыр, нэ нанэ авир дром тэ зракхэпэ, сыр тэ патя Иисусоскэ!»

Всарэ кон одой сыс лэнгэ дрыван чялыя сыр, зоралэс ракирэнас Петро и Иоанно. Ёнэ дыкхнэ со паш лэндэ сыс нанэ барвалэ и сыклэ мануша, нэ зрипирдэ, со дыкхнэ лэн Иисусоса. Тэнче рашая и пураныпэн пхэндэ Петроскэ и Иоанноскэ: «Амэ тумэнгэ припхэнас, пирьячен тэ ракирэ пал адалэ манушэстэ Иисусостэ». Адалэ лавэнса ёнэ одмэкнэ Петрос и Иоаннос.

Кхангири барьёлас и апостолы выкэдынэ манушэн пэскэ савэ лэна тэ подрикирэн васта дэ кхангири. Екхэс манушэс лэндыр савэс кхарэнас Стефано, сарэ мануша кэ ёв отлыджянаспэ патываса. Ёв сыс пхэрдо зорьяса и годяса, саво дыя лэскэ Свэнто Духо и кэрэлас бут чуды. Бут мануша тэрдёнас Иисусоскирэ сыклякирдэнса сыр роспхэнэлас Стефано.

Екхвар, сыр Стефано сыклякирэлас пал Иисусостэ, иудеи савэ на патянас дэ Иисусостэ авирэ форэндыр лынэ лэса тэ заханпэ, нэ ничи на попэнэ, со тэ пхэнэн лэскирэ лавэнгэ. Тэнче ёнэ зракирдэпэ тэ ракирэн, со Стефано пхэндя на лаче лава пэ Маисеёстэ и Дэвлэстэ. Адава адала лава росхолякирдэ пураныпэн сыклымарен законоскирэн. Ёнэ росхолясынэ вхтылдэ Стефанос и яндэ лэс ко баро рашай. Адякэ ж одорик явнэ хоханэ мануша савэ йивья ракирэнас пэ Стефаностэ.

Баро рашай пучел ко Стефано: «Чячё ракирэн адалэ мануша пал тутэ?» Стефано саро роспхэндя барэ рашаскэ, сыр Дэвэл бут кэрэлас чуды ваш израильсконэнгэ манушэнгэ, сыр дживэлас Авраамо и ко дэвэса Иисусоскирэ. Нэ мануша на камнэ тэ шунэн Дэвлэс и кэрэнас нанэ пир Лэскиро. Стефано пхэндя: «Тумэ на камэн тэ шунэн Дэвлэс и нанэ кандунэ мануша! Тумэ на прылэн Свэнтонэс Духос, сыр тумарэ дада на прылэнас Дэвлэс, и умарэнас Лэскирэн пророкэн! Нэ тумэ бутыр кэрдэ лэндыр! Тумэ умардэ Мессияс!»

Сыр шундэ адалэ лава мануша савэ сыс одой росхолясынэ адякэ, со закэрдэ кана и дрыван загодлынэ, чурдынэпэ пэ Стефаностэ. Ёнэ вылыджинэ лэс форостыр и лынэ тэ чурдэн дэ лэстэ бара, и ёв мэя.

Сыр Стефанос домарэнас барэнса, ёв ракирэлас: «Иисусо, прылэ миро духо!» Тэнче тэрдыя пэ чянга, и дрыван прогодлыя: «Иисусо, на гин лэнгэ адава бэзэх!» Пхэндя далэ лава и мэя.

Дэ долэ дэвэса бут мануша до Иерусалимо лынэ тэ традэн сыклякирдэн Иисусоскирэн, пал дава патянкунэ роспрастандынэ дэ Иудея и Самария. Нэ, надыкхэнас пэ дова со лэн традэнас, ёнэ всаек роспхэнэнас пал Иисусостэ одой кай ёнэ сыс.

Кэ апостолы явья мануш савэс кхарэн Филиппо тэ подрикирэл лэн. Ёв адякэ ж настя Иерусалимостыр, сыр, авир сыклякирдэ. Филиппо гия дэ Самария, одой роспхэнэлас манушэнгэ пал Иисусостэ. Бут мануша савэ патяндынэ лэскэ заракхнэ. Екхвар ко Филиппо явья Дэвлытко ангело и припхэндя лэскэ тэ джял пир дром кай нанэ манушэн. Филиппо адякэ и кэрдя. Сыр ёв джялас пирэ дава дром то дыкхья манушэс, саво традэлас по вурдэн. Ада сыс патывало баро мануш, саво дживэлас до Эфиопия. Свэнто Духо пхэндя Филиппоскэ, соб ёв тэ поджял кэ дава мануш и тэ поракирэл лэса.

Филиппо подгия ко вурдэн и шундя, сыр эфиопо гинэлас Дэвлэскиро Лав. Ада сыс лава пророкоскирэ Исаии: «Ёнэ лыджянас Лэс, сыр бакрорэс тэ умарэн. И сыр бакроро штыл, адякэ и ёв нэ пхэндя ни лав. Ёнэ ладжякирдэ Лэс, нанэ чячунэс сэндякирдэ и залынэ Лэстыр джиипэн»

Филиппо пучя ко эфиопо: «Ту полэс одова, со гинэс?» Эфиопо пхэндя лэскэ: «Нат. Мэ на полава, сыр мангэ никон на роспхэнэла. Мангав тут, подгадыпэ и бэш паш мандэ. Исаия чинэлас пал пэстэ чи пал вариконэстэ авирэстэ?»

Филиппо бэстя до вурдэн и роспхэндя эфиопоскэ, со Исаия чинэлас пророчество пал Иисусостэ. Филиппо адякэ ж роспхэндя пал бут авир штэты дэ Дэвлэско Лав, пиридыя одолэ манушэскэ Лачё Лав пал Иисусостэ.

Филиппо и эфиопо традэнас пашил панестэ. Эфиопо пучя: «Подыкх, гэна паны. Со надомэкэл ман тэ болэнпэ?» Филиппо пхэндя лэскэ: «Сыр ту патяс сарэ илэстыр, то кыр дава». Эфиопо пхэндя: «Да, мэ патяв, со Иисусо— Када Чяво Дэвлэскиро» Тэнче ёв припхэндя тэ тэрдякирэн вурдэн.

Ёнэ загинэ до паны, Филиппо болдя эфиопос. Сыр ёнэ выгинэ панестыр, Свэнто Духо пирилыджия Филиппос пэ авир штэто. Одой Филиппо дурэдыр роспхэнэлас манушэнгэ пал Иисусостэ.

А эфиопо традыя кхэрэ. Ёв сыс бахтало долэстыр, со уджиндя пал Иисусостэ.

Дэ долэ дэвэса дживэлас екх мануш савэс кхарэнас Савло. Ёв на прылэлас сыклярибэн Исусоско . Савло сыс пэ дова штэто, кай чурдэнас бара дэ Стефаностэ, и ракхэлас ёв идя манушэнгири, савэ умарэнас Стефанос. Тэнче Савло лыя тэ традэл патянкунэн. Ёв пхирэлас кхэрэстыр до кхыр до Иерусалимо, вхтылэлас муршэн и джювлен и чурдэлас до бэшибэн. Екхвар Савло явья ко баро рашай и мангья лэстыр лыла ко синагоги до Дамаско, соб лэстэ тэ авэл зор тэ лэл лэн и тэ бичявэл до Иерусалимо манушэн савэ патянас дэ Иисусостэ.

Сыр дынэ лэскэ адалэ лыла, Савло традыя до Дамаско. Сыр Ёв сыс нанэ дур форостыр, бари яг болыбнастыр захачкирдя саро паш лэстэ, и Савло пэя пэ пхув. Ёв шундя, сыр Варикон-то пхэндя: «Савло! Савло! Соскэ ту традэс Ман?» Савло пучя: «Кон ту Дэвла?» Глос пхэндя: «Мэ — Иисусо, Савэс Ту традэс!»

Сыр Савло гадыяпэ пхувьятыр, ёв ничи на дыкхэлас. Мануша савэ сыс лэса отлыджинэ лэс до Дамаско. Трин дэвэс ёв ничи на хая и на пия.

Дэ Дамаско джиндя сыклярдо савэс кхарэн Анания. Дэвэл пхэндя лэскэ: «Джя до кхыр, кай тэрдыя Савло. Чив пэ лэстэ васта, соб ёв тэ дыкхэл». Анания пхэндя: «Сыклымарё, мэ шундём, со Адава мануш традэл патянкунэн». Дэвэл лэскэ пхэндя: «Джя! Мэ выкэдыём лэс, соб ёв тэ роспхэнэл пал Мандэ евреенгэ и авирэнгэ манушэнгэ. Ёв трэби тэ пирилыджял бут пхарипэн ваш Мангэ»

Анания гия ко Савло, чидя пэ лэстэ васта и пхэндя: «Иисусо, Саво явья тукэ пэ дром, бичявдя ман, соб мэ тэ откэрав тукэ якха и соб ту тэ дыкхэс и тэ зджял пэ тутэ Свэнто Духо». Тэнче Савло лыя тэ дыкхэл якхэнса, и Анания болдя лэс. Савло набутка хая, и кэ ёв рисия зор.

Савло ачяпэ нанэ бут дэвэса до Дамаско сыклякирдэнса Иисусоскирэнса и роспхэнэлас евреенгэ дэ синагоги. Ёв ракирлас: «Иисусо — Чяво Дэвлэско!» Евреи на полэнас со кэрдяпэ, со кэ дава Ёв традэлас патянкунэн, а кана кокоро ачя тэ патя дэ Иисусостэ! Савло допхэнэлас лэнгэ, со Иисусо сыс Мессия.

Прогинэ дэвэса и иудеи савэ на патянас дэ Иисусостэ закамнэ тэ умарэн Савлос и скэрдэ ваш дава саро. Ёнэ бичявдэ манушэн тэ дужакирэн лэс дэ форытка вудара, соб тэ умарэн лэс. Нэ Савло уджиндя адава, и лэскирэ пшала дынэ лэскэ тэ нашэ. Ратяко ёнэ змэкнэ лэс дэ бари корзина пир форытко стена. Сыр Савло настя форостыр, ёв всаек роспхэнэлас пал Иисусостэ.

Савло гия до Иерусалимо, соб тэ дыкхэпэ апостолэнса, нэ сарэ дарэнас лэстыр, на патянас, со ёв кана сыклякирдо Иисусоско. Тэнче екх патянкуно савэс кхарэн Варнава яндя Савлос ко апостолы. Ёв роспхэндя лэнгэ, сыр Савло зоралэс роспхэнэлас до Дамаско. Тэнче апостолы прылынэ Савлос.

До Иерусалимо традэнас патянкунэн, савэ нашнэ дур до форо Антиохия и роспхэнэнас одой пал Иисусостэ. Бут манушэн дэ Антиохия на сыс евреенса, нэ шундэ лав сыклякирдэндыр пал Иисусостэ, ачнэ патянкунэнса. Ада перва мануша, савэ на сыс евреенса, нэ патяндынэ дэ Иисусостэ сыр дэ Дэвлэскирэ Чявэстэ. Варнава и Савло гинэ дэ Антиохия, соб бутыр тэ роспхэнэ нэвэнгэ сыклякирдэнгэ пал Иисусостэ и тэ подрикирэн кхангири духоса. Дэ Антиохия патянкунэн дэ Иисусостэ лынэ тэ кхарэн «христианэнса».

Екхвар, сыр сыклярдэ Иисусоскирэ дэ Антиохия сыс до посто и мангэнаспэ, Свэнто Духо пхэндя лэнгэ: «Откэдэн ваш Мангэ Варнавас и Савлос, соб ёнэ тэ кэрэн одова, кэсо Мэ лэн прикхардём». Патянкунэ дэ Антиохия по мангнэпэ пал Варнавастэ и Савлостэ чидэ пэ лэндэ пэскирэ васта. Тэнче Варнава и Савло угинэ Антиохиятыр и сыклякирэнас манушэн, и бут лэндыр патяндынэ дэ Иисусостэ.

Сыр Савло пхирэлас пир Римска штэты и роспхэнэлас пал Христостэ, лэскэ дынэ римско лав — «Павло». Екхвар Павло и Сила гинэ до форо Филиппы, соб тэ роспхэнэ одой пал Иисусостэ Христостэ. Ёнэ выгинэ пало форо, кэ рэка, кай скэдэнаспэ патянкунэ тэ мангэнпэ. Машкир лэндэ сыс джювлы савя кхарэн Лида, ёй бикнэлас дрога матерьи. Лида камэлас Дэвлэс и поклонинэласпэ Лэскэ.

Дэвэл откэрдя ило Лидакэ тэ полэл со роспхэнэл Павло, и ёй патяндыя дэ Иисусостэ. Павло и Сила болдэ Лида и лакири семья. Тэнче ёй кхардя апостолэн кэ пэ кхэрэ и мангья лэн тэ аченпэ кэ ёй. Ёнэ на отпхэндэ лакэ.

Павло и Сила дыкхэнаспэ манушэнса по штэто кай мангэнаспэ. Екхвар сыр ёнэ джянас одорик, то пиро дром дыкхнэ сыр екх бутярны, дэ савьятэ сыс налачё духо, саво роспхэнэлас манушэнгэ со авэла лэндэ ангил. Адалэса ёй закэрэлас бут ловэ пэскирэнгэ хулаенгэ.

Сарэ дэвэса ёй пхирэлас пал Павлостэ и Силастэ, бутярны годлэлас: «Адалэ мануша — слуги Барэ Дэвлэскирэ . Ёнэ сыкавэн дром сыр тэ зракхэпэ!» Адякэ ёй кэрэлас дэвэс до дэвэс, и Павлоскэ ада на чялыя.

Дэ екх дэвэс, сыр ёй лыя тэ годлэл, Павло порисия кэ ёй и пхэндя, на лаческэ духоскэ, саво сыс дэ латэ: «Лавэса Иисусоскирэса, выджя латыр!» И ёв выгия латыр.

Хулая лакирэ дрыван росхолясынэ. Ёнэ полынэ, со ёй би далэ духоско налаческо на лэла тэ роспхэнэл манушэнгэ со дужакирэл лэн ангил. И пал дава ёнэ хаскирэна пэскирэ ловэ.

Лакирэ хулая яндэ кэ римска сэндарья Павлос и Силас и пхэндэ со ёнэ бангэ дэ дова, со кэрэлпэ до форо. Бут мануша подрикирдэ лэнгирэ лава. Сэндарья припхэндэ тэ марэн каштэнса апостолэн а тэнче чурдынэ лэн до бэшибэн.

Павло и Сила бэштэ сыс до бэшибэн, одой сыс бут манушэн савэ ракхэнас бэшэбнарен, и прымардэ лэнгирэ гэра кэ каштунэ колоды. Дэ паш рат Павло и Сила лынэ тэ багэн гиля, тэ славинэн Дэвлэс.

И лыя дрыван тэ тринскирэлпэ пхув. Сарэ вудары дэ бэшибэн откэрдэпэ, и ко бэшибнарья спэнэ гэрэндыр састэра.

Мануш, саво ракхэлас бэшибэн, сыр вштыя соибнастыр и дыкхья, со вудары сыс откэрдэ. Ёв думиндя со бэшибнарья сарэ рознашнэпэ, и здарандыя, со лэс умарэна со понашнэ бэшибнарья, пал дава ёв камня тэ умарэл пэс. Павло, удыкхья дава, загодлыя: «Тэрдёв! На кыр адава. Амэ сарэ адай»

Лэс тринскирэл даратыр, ёв подгия ко Павло и Сила и вылыджия лэн бэшибнастыр. Тэнче ёв пучя: «Со мэ тэ кэрав, соб тэ зракхэпэ?» Павло пхэндя: «Патя дэ Дэвлэстэ Иисусостэ, и ту зракхэсапэ пэскирэ семьяса». Тэнче ёв отлыджия Павлос и Силас кэпэ кхэрэ и промордя лэнгирэ дукха. Одой Павло роспхэндя пал Иисусостэ сарэнгэ, кон сыс до кхыр.

Ёв и сари семья лэскири патяндынэ дэ Иисусостэ, и Павло болдя лэн. Тэнче ёв дыя лэнгэ тэхан, и сарэ до кхыр сыс лошалэ, со патяндынэ дэ Дэвлэстэ. А Павло и Сила рисинэ до бэшибэн.

Пэ авир дэвэс, уджиндэ, со Павло – римско мануш, сэндарья припхэндэ тэ одмэкэн Павлос и Силас и помангнэ лэн тэ уджян Филиппэндыр. Павло и Сила загинэ кэ Лида и кэ пэскирэ мануша, тэнче угинэ форостыр. Сыклярибэн Иисусоско сыс шундо до хворо и кхангири барьёлас.

Павло и авир шэралэ кхангирьякирэ пхирэнас пир бут форы, роспхэнэнас и сыклякирэнас манушэн пал Иисусостэ. Ёнэ чиндэ дэ кхангирья бут лыла, соб тэ подрикирэн и тэ сыклякирэн патянкунэн. Сын савэ адалэ лыла ачнэ лылэнса дэ Библия.

Сыр Дэвэл скэрдя свэто, саро сыс бидошако . Пэ свэто на сыс бэзэх. Адамо и Ева камэнас Дэвлэс и камэнас екх екхэс. Пэ пхув на насвалёнас и на мэрэнас. Дэвэл кэрэлас, соб свэто дасаво и тэ авэл.

Нэ бэнг хохадя Ева, сапэса подгия кэ ёй и заракирдя ласа, Адамо Еваса кэрдэ бэзэх ангил Дэвлэстэ. Пал дова со ёнэ кэрдэ бэзэх, пэ пхув лынэ тэ мэрэн мануша.

Пал дава бэзэх Адамо и Ева ачнэ врагэнса Дэвлэскэ, и на камэнас тэ кандэн Лэс. Тэнче сарэ мануша, сыр чяворэ Адамоскирэ и Евакирэ, латхэнпэ до бэзэх. Бэзэх надэл манушэнгэ тэ кандэн Дэвлэс и тэ кэрэ Лэскири воля. Ёв марэлпэс Дэвлэса накандэл Лэс. Машкир Дэвлэстэ и манушэндэ хасия миро. Нэ Дэвэл камэл тэ риськирэ адава хаскирдо миро, палэ сыр сыс Лэстэ манушэнса.

Дэвэл ракирдя со екх мануш Евакирэ родостыр розмарэла бэнгэскэ шэро, а бэнг дандырла лэс пал гэрой. И бэнг умарэла Мессияс, нэ Дэвэл риськирэла Лэскэ джиипэн. И Мессия пэ сарэ дэвэса розмарла бэнгэскири власть. Прогия бут бэрш Дэвэл бичявдя манушэнгэ Мессияс. И адава Мессия сыс Иисусо.

Бут бэрш кэ дава сыр латцяпэ Иисусо, Дэвэл припхэндя Ноёскэ тэ кэрэл ковчего, соб семья лэскири тэ заракхэлпэ тэ натасадёл до паны, саво Дэвэл камья тэ бичявэл пэ Пхув. Дэвэл камья тэ хаськирэ свэто панеса пал дова со мануша кэрэнас бэзэх. Ноё патяндыя Дэвлэскэ и кэрдя ковчего. Ноё и лэски семья зракхнэпэ. Адякэ ж и дадэвэс — сарэ мануша молэн тэ мэрэн, пал дова со мануш дживэл дэ бэзэха и на кандэл Дэвлэс. Нэ Дэвэл бичявдя Иисусос, соб тэ заракхэл сарэн, кон дэ Лэстэ патяла.

Бэршэнса рашая янэнас Дэвлэскэ жэртва соб тэ зморэн бэзэха. жэртвы сыкавэнас манушэнгэ, со ёнэ кэрэн бэзэха ангил Дэвлэстэ. Нэ жэртвы на зморэнас бэзэха екхвар и пэсаро джиипэн. Иисусо кэрдя дова, со на кэрдя ни екх рашай. Ёв отдыя Пэско джиипэн екхаса жэртваса, и дая жэртва зморэл манушэско бэзэх екхвар и пэ саро джиипэн. Иисусо прылая пэ пэстэ дукх, сави трэби тэ авэл пэ амэндэ пал амарэ бэзэха. Пал дава Иисусо – сын Баро Рашай.

Сыр пэ Пхув дживэлас Авраамо, Дэвэл лэскэ пхэндя: «Мэ дэ тутэ дава бахт сарэнгэ манушэнгэ пэ Пхув». Иисусо сыс родостыр Авраамоскирэстыр. Дадэвэс дэ Аврамостэ Дэвэл дэл бахт сарэнгэ манушэнгэ, сыр ёнэ лэна тэ патян дэ Иисусостэ. Дэвэл заракхэл и на марэл лэн пал бэзэха и гинэл лэн духовнонэ родоса Авраамоскирэса.

Екхвар Дэвэл пхэндя Авраамоскэ тэ янэ дэ жэртва пэскирэс чявэс Исаакос. Нэ, здыкхья со ёв кандэл Лэс, то бичявдя лэскэ бакрорэс тэ янэл дэ жэртва пал Исаакостэ. Амэ сарэ молас тэ мэрас пал амарэ бэзэха, Нэ Дэвэл бичявдя Иисусос дэ жэртва, соб Ёв тэ мэрэл пал амэндэ. Гэна пал со амэ кхарас Иисусос Дэвлэскиро Бакроро.

Сыр Дэвэл бичявдя бида по Египто, Ёв припхэндя сарэ семьи израилёскирэ тэ зачинэн бакрорэс. Ада заракхья израильтянэн бидатыр сыр до Египто мэя пхурэдыр чяво дэ семья. Бакрорэс савэс янэнас дэ жэртва трэби тэ авэл бидошако. Евреи трэби тэ помакхэн ратэса бакрорэскирэса пэскирэ вудары. Сыр Дэвэл дыкхэлас адава рат, Ёв проджялас дурэдыр и бида на заджялас дэ дава кхыр. Ада кхарэласпэ Патради.

Иисусо на кэрэлас бэзэх и на сыс банго ни дэ со. Ёв счурдэлпэ пэ патрадитконэ Бакрорэстэ, Савэс зачиндэ по свэнко Патради. Сыр мануш лэл тэ патял дэ Иисусостэ, то рат Иисусоскиро кэрэлпэ тимин пал бэзэх адалэскирэ манушэскэ и Дэвэл на марэл лэс. Дэвэл сыр бы пролыджял манушэс бидатыр.

Дэвэл кэрдя завето израильтянэнса, пал дова ёнэ сыс манушэнса, савэн Ёв выкэдыя ваш Пэскэ. Нэ Дэвэл кэрдя Нэво Завето, ваш сарэнгэ манушэнгэ. Кана мануш, саво заджял до Нэво Завето, гинэлпэ Дэвлэскиро мануш. Пал дова со патяндыя дэ Иисусостэ.

Маисеё сыс баро пророко, саво пиридэлас Дэвлэско Лав барэ зорьяса. Нэ Иисусо барэдыр сарэндыр пророкэндыр. Ёв — Дэвэл, пал дава саро, со Ёв кэрэлас и ракирэлас, сын Кокорэстыр Дэвлэстыр. Гэнакэ пал со дэ Библия Иисусо кхарэлпэ Дэвлэскиро Лав

Дэвэл ракирдя царёскэ Давидоскэ, со Екх лэскирэ родостыр авэла вечно хулай кэ Дэвлэскирэ мануша. Иисусо и сын Дова Родо Давидоско. Ёв Дэвлэскиро Чяво и Мессия, саво авэла хулай вечно.

Давидо сыс царёса до Израилё, нэ Иисусо – Царё пир саро Свэто! Ёв явэла и вечно лэла тэ лыджял Пэскиро Царство до миро и чячибэн.

Ангил дова сыр латцяпэ Иисусо кэ чяй савя кхарэнас Мария явья ангело и пхэндя, со ёй биянэла Дэвлэскирэс Чявэс. Мария сыс чяёри, нэ Свэнто Духо сгия пэ латэ, и ёй кэрдяпэ пхари. Мария бияндя Чявэс и дыя лэскэ лав Иисусо. Пал дава Иисусо – и Дэвэл, и Мануш.

Иисусо кэрэлас бут чуды, савэ сыкавэнас, со Ёв – Дэвэл. Ёв пхирэлас пир паны и врикирэлас бавал . Ёв састякирлас насвалэн манушэн и вытрадэлас бэнгэн. Иисусо гадэлас мулэн, Ёв кэрдя пандже марэндыр и дуендыр тыкнэ мачендыр бут хабэн, со чялынэ бутыр 5000 манушэн.

Иисусо сыс баро Сыклымарё. Саро Лэскиро сыклярибэн сыс Чячуно. Пал дава амэ трэби тэ кэрас, дова со Иисусо амэнгэ ракирдя, Ёв – Дэвлэско Чяво. Екх со камня тэ пхэнэл Иисусо, соб амэ тэ камас авирэн манушэн, адякэ сыр амэ камас кокорэ пэс.

Ёв сыклякирэлас, со трэби бутыр сарэстыр тэ камас Дэвлэс.

Иисусо пхэндя, со хвэдыр тэ заджя дэ Дэвлэско Царство, чем тэ авэ барвалэса манушэса. Соб ту тэ заджяс дэ Дэвлэско Царство, Дэвэл трэби тэ заракхэл тут тэ намарэл тут пал тырэ бэзэха.

Иисусо пхэндя, со авэна мануша савэ прылэна Лэс, и Дэвэл заракхэла лэн. Нэ авэна и дасав мануша савэ на прылэна Лэс. Иисусо пхэндя, со сын мануша савэ сыр лачи пхув. Дэвлэско Лав, сыр зёрно, пэрэл пэ адая пхув, и пробарьёл. Дасавэ мануша прылэн Иисусос, и Дэвэл лэн заракхэл. Нэ авирта мануша сыр нанэ ковлы пхув пашэ дром. Дэвлэско Лав сыр зёрно, пэрэл пэ дая пхув, нэ на пробарьёл. Дасавэ мануша на прылэн Иисусос. Ёнэ отпхэнэнпэ тэ заджян дэ Лэско Царство.

Иисусо сыклякирэлас, со Дэвэл дрыван камэл сарэн манушэн, и савэ мануша дэ бэзэха. Ёв камэл тэ простинэл и тэ прылэл сарэн сыр Пэскирэн чяворэн.

Сыр Адамо и Ева кэрдэ бэзэх, сарэ мануша лынэ тэ бияндён пэ пхув до бэзэха. Сарэ мануша кэрэн бэзэх и отджян Дэвлэстыр. Сарэ мануша сыр бияндён пэ пхув, на шунэн и на кандэн Дэвлэс.

Нэ Дэвэл адякэ камэл манушэн, со отдыя Пэскирэс екхэс чявэс, саво Лэстэ сыс. Дэвэл на марэла одолэн, кон патял дэ Иисусостэ, и сарэ патянкунэ авэна тэ дживэн Лэса вечно.

Ту молэс тэ мэрэс, пал дава со ту кэрэс бэзэха. И Дэвэл сыр марэлас бы тут пал тырэ бэзэха авэлас бы чячуно. Нэ пал тутэ и тырэ бэзэха Дэвэл мардя Иисусос. Дэвэл пиричидя тыро бангипэн пэ Иисусостэ, сыр примардэ Лэс по трушул.

Иисусо нэ кэрэлас бэзэх. Нэ Ёв лыя амарэ бэзэха, ямаро бангипэн и мэя по трушул. Иисусо ачя жэртваса ваш дова, соб тэ залэл тырэ бэзэха и бэзэха сарэнгирэ манушэнгирэ дэ дава свэто. Иисусо яндя Пэс дэ жэртва пал бэзэх, и пал дава Дэвэл простинэл сарэ бэзэха сарэнгэ, кон патяла дэ Иисусостэ.

Тырэ лаче рынды на заракхэна тут. Ту ничи на кэрэса кокоро ваш дова, соб тэ авэс лачё Дэвлэскэ. Нэ тукэ трэби тэ патяс, со Иисусо — Чяво Дэвлэскиро, со Ёв мэя по трушул пал тутэ и Дэвэл рискирдя Лэс ко джиипэн. Сыр ту дэ дава патяса, Дэвэл простинэла сарэ тырэ бэзэха.

Дэвэл заракхэла сарэн, кон патял дэ Иисусостэ и прылэл Лэс пэскирэса Хуласа. Нэ Ёв на заракхэла долэн, кон дэ Лэстэ на патял. Всаек барвало ту чи чёроро, Мурш ту чи джювлы, тэрно ту чи пурано, и кай ту дживэс. Дэвэл камэл тут, и Ёв прикхарэл тут соб ту тэ патяс дэ Иисусостэ.

Иисусо прикхарэл тут тэ патяс дэ Лэстэ и тэ болэнпэ. Ту патяс, со Иисусо — Мессия и екх Чяво ко Дэвэл? Ту патяс, со ту – дэ бэзэх и молэс кай Дэвэл тэ марэл тут пал тырэ бэзэха? Ту патяс со Иисусо мэя по трушул, соб тэ залэл тырэ бэзэха.

Сыр ту патяса дэ Иисусостэ, и авэса тэ приджинэ и тэ ракирэс пал Лэстэ, со Ёв кэрдя ваш тукэ, то авэса тэ джяс пал Иисусостэ. Бэнг бутыр на авэла тырэ хуласа. Нэ кокоро Дэвэл лэла тэ подпхэнэл тукэ пэскирэ Царствостыр. Дэвэл дэла тукэ зор тэ накэрэ бэзэх дэ тыро джиипэн. Ёв дэла тукэ нэво и чячуно джиипэн.

Сыр ту патяндыян дэ Иисусостэ, то Дэвэл простиндя тырэ бэзэха пал дава со Иисусо сын жэртва. Кана Дэвэл гинэл тут пэскирэса манушэса.

Сыр ту — пэскиро Дэвлэскэ, сыр ту слуга Иисусоско, а Иисусо — тыро Хулай, то ту закамэса тэ кэрэс саро, со лэла тут тэ сыклякирэл Иисусо. Сыр ту патяндыян дэ Иисусостэ, всаек бэнг лэла тут тэ залыджял до бэзэх. Нэ Дэвэл лэла тэ кэрэл со ракирдя. А ёв ракирдя, со сыр ту приджинэс пэскирэ бэзэха и мангэс ко Дэвэл тэ простинэл тут, то Ёв простинэла тут и дэла тукэ зор тэ на кэрэс бэзэх.

Дэвэл камэл, со ту тэ мангэспэ и тэ сыклёс дэ Лэско лав. Ёв адякэ ж камэл, соб ту тэ поклонинэспэ Лэскэ одолэнса кон джял пал Иисусостэ. Адякэ ж ту трэби тэ роспхэнэс авирэнгэ манушэнгэ, со Ёв кэрдя ваш тукэ. Сыр ту авэса тэ кэрэ саро, со ракирэл тукэ Дэвэл, то тыро джиипэн авэла бахтало Дэвлэстыр.

2000 бэрш бутыр и бутыр мануша дэ саро свэто шунэн Дэвлэскиро Лав пал Иисусостэ. И кхангири на пирьячел тэ барьёл, Иисусо пхэндя, со Ёв рисёла ангил дова, сыр адава свэто пирьячела тэ авэ. Хоч Ёв поки Ёв на рисия, нэ Ёв зрикирэла Пэскиро Лав Ёв рисёла.

Мэ дужакирас Иисусос, Дэвэл камэл, соб амаро джиипэн тэ авэл свэнто и тэ полас Лэс, и тэ роспхэнас пал Лэскикиро Царство. Сыр Иисусо джиндя пэ пхув, Ёв пхэндя: «Мирэ сыклякирдэ роспхэнэна Лачё Лав пал Дэвлэско Царство манушэнгэ пир саро свэто, и тэнче явэла концо»

Бут мануша савэ и дадэвэс на шундэ пал Иисусостэ пал дава, кэ дава сыр Ёв тэ рисёл дэ болыбэн, Иисусо припхэндя сыклякирдэнгэ тэ роспхэнэн Лачё Лав манушэнгэ, савэ на шундэ. Ёв пхэндя: «Джянте кэ сарэ мануша и сыклякирэн лэн!» Адякэ Ёв пхэндя: «Маля трэби тэ укэдэ. Буты бут, а бутярнэн набут. Пал дава мангэн Дэвлэс, соб тэ бичявэл бутярнэн пэ дая буты». Трэби тэ авэл бутыр сыклякирдэн, тэ роспхэнэн Лачё Лав.

Иисусо пхэндя: «Бутярно нанэ барэдыр, пэскирэ хуластыр. Адава свэто на камэл Ман. Мануша лэна и тумэн тэ на камэн, тэ марэн пал Мандэ. Тумэнгэ авэла пхаро, нэ аченпэ зоралэнса, Мэ выкхэлдём ко бэнг, саво сыс хуласа дэ дава свэто! Сыр тумэ ачкирнапэ чячунэ Мангэ, то Дэвэл заракхэла тумэн!»

Иисусо роспхэндя история Пэскирэнгэ сыклякирдэнгэ, тэ полэн, со авэла манушэнса, сыр пирьячела тэ авэ адава свэто. Ёв пхэндя: «Екх мануш чидя дэ пхув тэ барьёл лачё зёрно марытко. Сыр ёв сыс суто, явья враго, и ёв чидя дэ пхув тэ барьёл чяр машкир маро и угия».

Сыр гадыяпэ саро, бутярнэ манушэскирэ пучнэ кэ ёв: «Хулай, ту чидян дэ пхув лачё зёрно. Кацыр лыяпэ дая чяр?» Хулай пхэндя: «Ада кэрдя екх мирэ врагэндыр»

Бутярнэ пучнэ ко хулай: «Тэ вычинас кадая чяр?» Хулай пхэндя: «Нашты. Сыр тумэ лэна тэ вычинэн дая чяр, то тэ на вычинэн маро. Подужакирэн ко дэвэс сыр ласа тэ укэдас маро, и тэнче тумэ скэдэна чяр и схачкирэна ла. А маро скэдэна и чивэна кай трэби»»

Сыклякирдэ на полынэ кэ со дая история и помангнэ Иисусос тэ роспхэнэл ла лэнгэ. Иисусо пхэндя: «Мануш, саво чидя дэ пхув лачё зёрно, — ада Мессия. Пхув — ада свэто. лачё зёрно — ада мануша Дэвлэскирэ Царствостыр.

Чяр ада бэнгэскирэ мануша. Враго манушэнго, — ада бэнг. Тэ скэдэ маро — ракирэл со пирьячела адава свэто тэ авэл, а бутярнэ — Дэвлэскирэ ангелы.

Сыр дава свэто пирьячела тэ авэл, ангелы скэдэна кэтанэ сарэн манушэн, савэндэ хулай бэнг, и чурдэна лэн дэ хачкирды яг. Одой авэна дрыван тэ годлэн дукхатыр. А патянкунэ мануша, авэна сыр кхам, дэ Царство Дэвлэскиро, кэ пэскиро Дат».

Иисусо пхэндя, со Ёв рисёла пэ пхув кэ дова сыр пирьячела тэ авэл адава свэто. Ёв явэла адякэ ж сыр и угия:Ёв явэла сыр мануш, и Ёв явэла болыбнастыр пэ облако. Сыр явэла Иисусо сарэ патянкунэ дэ Лэстэ, савэ мэнэ гара, вштэна мулэндыр и дыкхэнапэ Лэса до болыбэн.

А долэ патянкунэ дэ Иисусостэ, савэ авэна тэ джидэ, ёнэ гадэнапэ до болыбэн и авэна кэтанэ авирэнса патянкунэнса, савэ вштынэ мулэндыр. И сарэ кэтанэ авэна Иисусоса, саво ачкирлапэ тэ дживэн Пэскирэ манушэнса. Манушэндэ авэла вечно бахт, пал дава со лэнса авэла Иисусо.

Иисусо пхэндя дэла венцо долэскэ кон патял дэ Лэстэ. Дасавэ мануша авэна хулаенса Дэвлэса пэ саро свэто. Ёнэ лэна тэ дживэн бахталэс.

Нэ Дэвэл лэла тэ сэндякирэл сарэн, кон на патяндыя дэ Иисусостэ. Ёв чурдэла лэн дэ яг. Одой ёнэ авэна тэ ровэн и тэ годлэн дукхатыр. Дукх напириачёла. Яг, сави на пирьячела, лэла лэн тэ хачкирэл, и кирмэ на пирьячена лэн тэ хан.

Сыр Иисусо рисёла, Ёв умарэла бэнгэс и лэско царство. Иисусо чурдэла лэс дэ яг. Бэнг лэла тэ хачёл вечно одолэнса кон кандэл лэс, а нанэ Дэвлэс.

Адамо и Ева на кандынэ Дэвлэс и яндэ бэзэх до свэто, Дэвэл проклининдя Пхув, и лакэ явэло концо. Явэла дэвэс, сыр Дэвэл кэрла нэво болыбэн и нэви Пхув, пэ сави на авэла бэзэх.

Иисусо и Лэскирэ мануша лэна тэ дживэн пэ нэви Пхув, и Ёв авэла вечно хулай сарэскэ. Иисусо выкхосэла ясва манушэндыр. Никон бутыр на авэла тэ ровэл, тэ лыджя пхарипэн. На авэна тэ насвалён и тэ мэрэн. Холы кана на авэла. Иисусо авэла хулай Пэскирэ Царствоса чячуно и мирно. И Ёв ачелапэ Пэскирэнса манушэнса.