1 Thessalonians

11Ako ni si Pablo, nga nagsulat niini nga sulat. Kauban nako si Silas ug Timoteo. Gipadala namo kining sulat sa inyo nga grupo nga tumutuo diha sa syudad sa Tesalonica nga nahiusa sa Dios nga Amahan ug sa Ginoong Jesu-Cristo. Hinaot nga ang Dios magpakita sa iyang kamaayo diha kaninyo ug hatagan kamo niya ug kalinaw.

2Nagpasalamat kami kanunay sa Dios sa inyong tanan sa dihang maghisgot kami kaninyo sa among pag-ampo. 3Nagpadayon kami ug hinumdom nga kamo nagtrabaho alang sa Dios kay gasalig kamo kaniya ug kay kamo matinguhaon nga mitabang sa mga tawo tungod kay gihigugma ninyo sila. Nilahutay pud kamo sa dihang gipaantos kamo sa mga tawo. Kamo nilahutay tungod kay namalandong kamo nga adunay pagsalig nga ang atong Ginoong Jesu-Cristo mobalik dayon gikan sa langit aron magluwas kaninyo.

4Mga kaubanan ko sa pagtuo nga hinigugma sa Dios, kami nagpasalamat pud kaniya kay nahibalo kami nga gipili kamo niya nga mahimo nga iyang katawhan. 5Nakahibalo kami nga gipili kamo niya tungod kay kadtong gisultian namo kamo sa maayong balita, labaw pa kadto sa pulong lamang. Ang Balaang Espiritu gamhanan kaayo nga naglihok kaninyo, ug gisigurado niya pag-ayo kanato nga iya gyud kini gibuhat. Sa parehas nga pamaagi, nakahibalo kamo kung giunsa namo pagsulti ug kung giunsa namo pagkinabuhi sa among mga kaugalingon sa dihang diha pa kami uban kaninyo, aron kami makatabang kaninyo.

6Nakadungog kami karon nga kamo nag-agwanta sa inyong mga kalisdanan sa dihang gipaantos kamo sa mga tawo tungod kay mituo kamo kang Cristo. Nag-agwanta kamo sama kang Cristo nga nag-agwanta, ug sama usab kanamo nga gipaantos sa mga tawo. Sa adto nga panahon gipalipay kamo kaayo sa Balaang Espiritu. 7Tungod kay giagwanta ninyo ang mga pag-antos alang sa Ginoo, ang tanang mga tumutuo nga nagpuyo sa mga probinsya sa Macedonia ug Acaya nakadungog kung unsa kalig-on ang inyong pagsalig sa Dios. Mao nga nakahibalo sila nga mosalig gyud sila sa Dios, sama sa gihimo ninyo.

8Ang uban nga mga tawo nakadungog kaninyo nga nag-sulti sa mensahe gikan kang Ginoong Jesus. Unya sila usab nagsangyaw sa mga maayong balita sa mga tawo nga nagpuyo sa tibuok Macedonia ug Acaya. Dili lamang kini, apan ang mga tawo nga nagpuyo didto sa mga layo nga mga lugar nakadungog pud nga misalig kamo sa Dios. Mao nga dili na kinahanglan nga kami mosulti sa mga tawo kung unsay gibuhat sa Dios sa inyong kinabuhi. 9Ang mga tawo nga nagpuyo layo sa inyo mao ang nag-sulti sa uban kung unsa kainit ang pagdawat ninyo kanamo kadtong diha pa kami kaninyo. 10Sila pud nagpamalita nga niundang na kamo sa pagsimba sa mga dili tinuod nga dios ug karon kamo nagsimba sa Dios nga makabuhat sa bisan unsa nga butang ug maoy tinuod nga Dios. Tungod sa Iya nahimo kamong tumutuo! Sila usab nagsulti kanamo nga karon naghulat kamo nga adunay paghandom sa iyang Anak nga mobalik diri sa kalibutan gikan sa langit. Malig-onon kamo nga mituo nga ang Dios maoy hinungdan nga siya nabuhi pag-usab human nga siya namatay. Mituo sad kamo nga si Jesus maoy magluwas sa atong tanan, nga misalig sa Iya, sa dihang silotan sa Dios ang tanang mga tawo sa tibuok nga kalibutan.

21Mga kaubanan nako nga tumutoo,nasayod gyud kamo nga labing mapuslanaon ang among panahon uban kaninyo. 2Bisan pa adtong una giisig-isig ug giinsulto kami sa mga katawhan sa syudad sa Pilipos, nakahibalo kamo nga ang Dios maoy nagpaisog kanamo. Tungod niini, misulti kami kaninyo sa maayong balita nga diin ang Dios nagpadala kanamo aron sultihan kamo, bisan pa ang ubang katawhan sa inyong syudad mibabag sab kanamo.

3Sa dihang nagdasig kami kaninyo sa pagsunod sa mensahe sa Dios, kami wala nagsulti kaninyo ug bakak. Ug dili namo gusto nga aduna kami makuha alang sa among kaugalingon sa imoral nga pamaagi. Wala sad kami naglinlang kaninyo o bisan si kinsa pa. 4Apan sa pagkatinood, gisaligan kami sa Dios nga mosulti kaninyo sa mga maayong balita, tungod kay nausisa niya kami ug gihunahuna niya kami ang sakto nga mga tawo nga magbuhat niini nga trabaho. Sa among pagtudlo sa katawhan wala kami gasulti sa gusto lang nila madunggan. Kondili, kami nagsulti kung unsa gyud ang gusto sa Dios nga among isulti, tungod kay hukman niya ang tanan natong gihunahuna

5Kamo nasayod nga wala kami naghimaya kaninyo aron makakuha ug bisag unsa nga butang gikan kaninyo. Ug wala sad kami misulti ug bisan unsa kaninyo aron makumbinsi kamo nga maghatag kanamo ug mga butang. Ang Dios nasayod nga kini tinood! 6Wala gyug kami misulay nga magpadayeg kaninyo o sa bisan kinsa pa, bisan pa ug pwede kami mamugos nga mohatag mo kanamo ug mga butang tungod kay si Cristo ang nagpadala kanamo para kaninyo.

789Sa tinuuray lang, kami malumo kadtong diha pa kami kaninyo, sama sa inahan nga malumo nga magmatuto sa iyang kaugalingong mga anak. 8Mao nga tungod kay kami nahigugma kaninyo, malipayon gyud kami nga kami mismo ang mosulti kaninyo sa maayong balita nga gihatag sa Dios kanamo. Apan malipayon sad kami nga gabuhat sa tanan namong mahimo aron makatabang kaninyo tungod kay nagsugod na kami paghigugma kaayo kaninyo. 9Mga kaubanan nako nga tumutoo, kamo nahinumdom nga kami nagtrabaho kaayo adlaw ug sa gabii usab. Mao kini ang paagi aron makakwarta kami, aron dili kami manginahanglan nga mangayo sa bisan kinsa kaninyo alang sa among mga panginahanglan. Gibuhat kini namo sa dihang kami nagsangyaw kaninyo sa mga maayong balita mahitungod sa Dios.

10Kamo ug ang Dios nahibalo nga kami nagkinabuhi diha kaninyo nga mga tumutuo sa maayo ug sakto nga pamaagi- sa pamaagi nga walay bisan kinsa nga makasaway. 11Kamo nakahibalo usab sa pagtagad namo sa matag usa kaninyo sama sa pagtagad sa usa ka amahan nga nahigugma sa iyang mga anak. 12Kami nagpadayon nga nag-awhag pag-ayo ug nagdasig kaninyo- nga magkinabuhi kamo ingon nga katawhan sa Dios, tungod kay gitawag kamo aron mahimo nga iyang katawhan nga diin ipakita niya ang iyang kaugalingon ingon nga hari nga adunay gahum nga pinakanindot.

13Mao kini nga kami kanunay nga nagapasalamat sa Dios, tungod kay sa dihang nadungog ninyo ang mensahe nga among gisulti kaninyo, gidawat ninyo ni nga tinood nga mensahe, nga maayo nga mensahe nga gihatag sa Dios kanamo. Wala ni namo gihimu-himo. Kami usab nagapasalamat sa Dios nga siya nagbag-o sa inyong mga kinabuhi tungod kay kamo misalig niini nga mensahe.

14Sigurado kami aning mga butanga, tungod kay kamo nagbuhat sama lang sa gibuhat sa mga grupo nga tumotoo sa Judea. Sila usab nahiusa kang Cristo Jesus, ug, sama sa ilang pag-agwanta sa pagdaog-daog kanila sa ilang kaubanan nga isig ka lungsod tungod kang Cristo, sa sama nga pamaagi kamo naka-agwanta niini sa dihang ang inyong kaugalingong kaubanan nagpaantos kaninyo. 15Kadtong mga Hudyo mipatay kang Ginoong Jesus ug sa daghang mga propeta, sab. Ang ubang dili tumotoo nga mga Hudyo gipugos mi pagpahawa sa nagkalain-lain nga lungsod. Gipasuko gyud nila ang Dios; ug sila nagbuhat taliwas sa unsa gyud ang maayo sa tanang mga katawhan! 16Pananglitan, misuway sila sa pagbabag kanamo sa pagsulti sa maayong balita sa mga dili Hudyo; kay dili nila gusto nga muhatag pud ang Dios ug kaluwasan kanila. Nakasala sila pag-ayo hangtod sa pagtugot sa Dios usa sila silotan na gyud!

17Akong mga kaubanan sa pagtuo, mura mi ug ginikinan nga nawad-an ug mga anak sa dihang nalayo mi kaninyo sa mubo nga higayon, naghandum mi kaayo nga makauban mo. 18Sa tinuod ako, si Pablo ikaduha misuway sa pagbalik aron makita mo. Apan sa matag higayon si Satanas nagbabag kanamo sa pagbalik. 19Sa tinood, tungod kaninyo naghandum kami nga mabuhat namo ug maayo ang buluhaton sa Dios; kay kamo ang naghatag kanamo ug kalipay.Tungod kaninyo nga kami naglaum nga magmalampuson sa pagpangalagad sa Dios. Tungod kaninyo ug ang uban sad nga kami naglaum nga ang Ginoong Jesus maghatag ug ganti kanamo sa iyang pagbalik sa kalibutan. 20Sa tinuod, tungod kaninyo nga hantod karon kami napahimuot ug malipayon.

31Tungod niini, kadtong wala na gyud ko maka-agwanta sa pagkabalaka kaninyo, nagdesisyon ako nga ako ug si Silas magpabilin na lang diri sa syudad sa Atens, 2ug gipaanha namo si Timoteo diha kaninyo. Nakahibalo kamo nga siya among suod nga kauban sa trabaho ug nag-alagad pud alang sa Dios pina-agi sa pagsangyaw sa mga maayong balita mahitungod kang Cristo. Gipaanha namo siya ni Silas aron awhagon kamo pag-ayo sa pagpadayon pagsalig nga malig-onon kang Cristo. 3Dili gyud namo gusto nga bisan kinsa sa inyo maghunahuna nga talikdan si Cristo tungod sa inyong pag-antos. Nakahibalo man kamo pag-ayo nga nakahibalo ang Dios nga isig-isigon kita sa uban tungod kang Cristo.

4Hinumdumi nga kadtong diha pa kami kauban ninyo, sige kami ug sulti nga isig-isigon kita sa uban. Ug mao gyud kining nahitabo! 5Mao kini nga gipaanha ko si Temoteo kaninyo: gusto gyud nako mahibal-an kung kamo misalig pa kang Cristo. Nahadlok ako nga si Satanas, nga manunulay kanato, gipaundang kamo sa pagsalig diha kang Cristo. Nahadlok ako nga ang tanan nga among gibuhat kauban kaninyo mahimong walay kapuslanan.

6Apan karon si Timoteo mibalik kanamo ni Silas gikan diha kaninyo, ug gisugilon niya ang mga maayoong balita nga nagtuo pa gihapon kamo kang Cristo ug gihigugma ninyo siya. Gisugilon pud niya sa amo nga malipayon kamo kanunay nga naghinumdum sa amoa ug gusto gyud ninyo nga mobisita kami kaninyo, ingon nga gusto pud namo mobisita kaninyo. 7Mga kaubanan ko nga tumutuo, bisan pa kami nag-antos kaayo tungod sa gibuhat sa mga tawo kanamo diri, nalipay kami tungod kay gisultian kami ni Timoteo nga kamo gasalig gihapon kang Cristo.

8Karon ingon nga nagkinabuhi kami sa bag-o nga pama-agi, kay kamo nagsalig pag-ayo sa Ginoong Jesus. 9Dili namo takos nga mapasalamatan ang Dios tungod sa mga gibuhat niya kaninyo! Daku ang among pagkalipay mahitungod kaninyo sa dihang gaampo kami sa atong Dios! 10Kanunay ug maalab kami nga gahangyo sa Dios nga makabisita kami kaninyo ug matabangan kamo namo aron mosamut pag-ayo ang pagsalig ninyo kang Cristo.

11Nag-ampo kami sa Dios, atong Amahan, ug sa atong Ginoong Jesus, nga pabalikon niya kami diha kaninyo. 12Ug mahitungod kaninyo, nag-ampo kami nga ang Ginoong Jesus motabang kaninyo nga mosamut ang inyong paghigugmaay sa usa'g usa sama sa pagpadayon namo sa paghigugma kaninyo. 13Nag-ampo kami nga ang atong Ginoong Jesus himuon kamo niya nga samut nga makahimuot sa iya. Nag- ampo kami nga ang Dios nga atong Amahan himuon mo niya nga maparehas sa iya ,nga walay bisan kinsa nga makasaway. Giampo namo kini, aron inig balik ni Jesus diri sa kalibutan nga uban kaniya kadtong mga iya, mahimuot siya kaninyo.

412Akong mga kaubanan sa pagtuo, gusto na nako karon nga magsulat bahin sa ubang mga butang. Gi-awhag mo nako pag-ayo nga magkinamuhi kamo sa pamaagi nga makapahalipay sa Dios. Ang akong pag-awhag kaninyo, sama kini nga ang Ginoong Jesus ang nag-awhag. Mao na ang among gitudlo kaninyo nga buhaton ninyo tungod kay mao kini ang gipasulti sa Ginoong Jesus kanamo. Nakahibalo kami nagkinabuhi na kamo sa ingon niini, apan gi-awhag gyud mo namo pag-ayo nga mas buhaton pa ninyo kini.

3Buot sa Ginoo nga dili mo makasala, nga gapanginamuhi mo nga gapakita nga hingpit gyud mo nga iya. Gusto niya nga likayan ninyo ang mga binuhatan nga imoral nga lawasnon. 4Buot pasabot, gusto niya nga ang matag usa kaninyo makahibalo kung unsaon pagpakig-uban sa iyang asawa, sa pamaagi nga motahod kaniya ug dili makasala kaniya. 5Dili nimo siya angay gamiton aron matagbaw ang imong lawasnong kaibog (sama sa gibuhat sa mga dili Judio tungod kay wala sila kaila sa Dios). 6Gusto sa Dios nga ang matag usa kaninyo mapugngan ang inyong lawasnong kagana, aron nga walay bisan usa kaninyo ang makasala batok sa inyong kaubanan sa pagtuo ug magpahimulos kaniya sa pagbuhat niini. Hinumdomi nga gipasadad-an na gyud mo namo sauna pa nga silotan sa Ginoong Jesus ang tanang tawo nga maghimo ug mga binuhatan nga imoral nga lawasnon.

7Sa dihang gipili ta sa Dios mga magtutuo, dili niya gusto nga maglinihok sa pamaagi nga lawasnong imoral. Apan sa pagkatinuod, gusto niya nga mahimo kitang mga dili makasala. 8Mao nga gipasidad-an mo nako nga kadtong nagbaliwala aning akong gitudlo, dili lang ako nga usa ka tawo, ang gibaliwala niya. Apan sa pagkatinuod, ilang gibaliwala ang Dios, tungod kay ang Dios man ang nagsugo niini. Hinumdomi nga gipadala sa Dios ang iyang Espiritu, nga dili makasala, aron magpuyo kaninyo!

9Gusto usab mo nako awhagon pag-ayo nga angay ninyong higugmaon ang inyong mga kaubanan sa pagtuo. Dili na unta ninyo kinahanglan nga naay magsulat kaninyo bahin niana, tungod kay gitudluan na mo sa Dios kung unsaon maghigugmaay. 10Ug tungod sad kay nagpakita na mo nga inyong gihigugma ang inyong mga kauban sa pagtuo, nga nagpuyo sa ubang dapit diha sa inyong probinsiya sa Masedonia. Bisan pa niini, akong mga kaubanan sa pagtuo, giawhag mo namo pag-ayo nga magsigesige pa ug higugmaanay. 11Giawhag usab mo namo nga buhaton ninyo ang hangtod sa mahimo nga asikasuhon ang inyong kaugalingong mga tulumanon ug ayaw mo panghilabot sa mga tulumanon sa uban. Giawhag mo namo pag-ayo nga magtrabaho sa inyong kaugalingong panginabuhi aron naa moy kita para sa inyong kinahanglanon aron mabuhi. Hinumdomi nga gitudluan na mo namo sauna pa nga manginabuhi ug ingana. 12Kung buhaton ninyo kining mga butanga, ilhon mo sa mga dili tumutuo nga desente ang inyong pamatasan, ug dili mo na mo magsalig sa uban nga maghatag sa inyong mga gikinahanglan.

13Mga kaubanan nako sa pagtuo, gusto sad namo nga makasabot mo unsay mahitabo sa atong mga kaubanan sa pagtuo nga namatay na. Kinahanglan dili mo maparehas sa mga dili tumutuo nga maguol kaayo sa mga tawong nangamatay. Tungod kini kay sa ilang pagkasayod, dili na sila mabuhi pag-usab. 14Kitang mga tumutuo nakahibalo nga si Jesus namatay ug nabanhaw aron mabuhi pag-usab. Mao nga nakahibalo gyud ta nga ang Dios ang magbanhaw sa mga nahiusa na kang Jesus, ug iya silang ibalik nga kuyog si Jesus. 15Gisulat ni nako tungod kay gipadayag sa Ginoong Jesus kanako ang akong gisulti kaninyo karon. Basin ang uban naghunahuna nga inig balik sa Ginoong Jesus, mauna ug tagbo kang Jesus kitang mga tumutuo nga buhi pa kay sa adtong mga namatay na. Siguradong dili gyud na tinuod!

16Gisulat ni nako, tungod kay ang Ginoong Jesus mismo ang mokunsad gikan sa langit. Inig kanaog niya, suguon niya nga mobangon kitang tanan nga mga tumutuo. Ang pinakapangulong anghel mosinggit nga naay dakong tingog, ug naay lain nga anghel ang mobulhot sa trumpeta para sa Dios. Unya ang una nga mahitabo mao nga mabanhaw ang mga tawong nahiusa na kang Cristo. 17Pagkahuman niadto, dad-on sa Dios ngadto sa mga panganod kitang tanan nga mga tumutuo nga nagpuyo pa niining kalibutan. Dad-on ta niya ug ang uban pang mga tumutuo nga nangamatay na, aron magdungan tang tanan nga motagbo sa Ginoong Jesus sa langit. Tungod niini, siya makauban na natong tanan sa kahangturan. 18Tungod kay tinuod kining tanan, dasiga ang usa'g usa pinaagi sa pagpaambit niining katudluan.

51Mga kaubanan ko sa pagtuo, buot nako nga isulti kaninyo ang dugang pa mahitungod sa oras sa pagbalik sa atong Ginoong Jesus. Sa pagkatinuod, dili na kinahanglan nga magsulat pa ako kaninyo mahitungod niini, 2tungod kay kamo mismo nakahibalo na pag-ayo mahitungod niini! Nakahibalo kamo nga ang Ginoong Jesus mubalik nga wala damha. Ang mga dili magdahom kaniya, sama usab nga walay usa nga nagdahom sa pag-abot sa kawatan sa gabii. Ug sa panahon nga umaabot daghang mga tawo ang mag-ingon, "Ang tanan malinawon ug walay katalagman kanato!" 3Unya kalit lang nga moabot ang Dios aron silutan sila pag-ayo! Sama sa mabdos nga dili pud niya mapug-ngan ang sakit, nga bation sa pagpanganak, kining mga tawhana pud wala gyuy paagi nga makalikay sila sa Dios.

4Apan kamo, akong mga kauban sa pagtuo, dili kamo sama sa mga tawo nga nagkinabuhi sa kangitngitan, tungod kay nakahibalo kamo sa kamatuoran mahitungod sa Dios. Mao nga inig balik ni Jesus, andam namo alang kaniya. 5Kamo iya sa kahayag, ug iya sa adlaw. Dili kamo sama kanila nga iya sa kangitngit, sa gabii. 6Mao nga kita nga mga tumutuo kinahanglan nga magmatngon sa mga panghitabo. Kinahanglan nga atong pugngan ang atong kaugalingon ug mag-andam sa pagbalik ni Jesus. 7Kay sa gabii matulog ang mga tawo ug wala makahibalo sa mga nanghitabo, ug sa gabii ang mga tawo mangahubog.

8Apan kita nga mga tumutuo iya sa kahayag, mao nga pugngan nato ang atong mga kaugalingon. Magpaka sama kita sa mga sundalo, sama sa ilang pagpanalipod sa ilang dughan pinaagi sa ilang taming, panalipdan pud nato ang atong mga kaugalingon pinaagi sa pagsalig kang Cristo ug paghigugma kaniya. Sama sa pagpanalipod nila sa ilang mga ulo gamit ang mga helmet, atong panalipdan pud ang atong mga kaugalingon pinaagi sa paghandom kang Cristo nga iya kitang luwason gyud sa dautan. 9Sa dihang gipili kita sa Dios, wala siya mag plano nga kita ang katawhan nga iyang silutan. Apan sa pagkatinuod, buot sa Ginoo nga kita luwason tungod kay kita nagsalig sa gihimo ni Jesu Cristo alang kanato. 10Si Jesus namatay aron bayaran ang atong kasal-anan aron kita magkinabuhi kauban niya, buhi man kita o patay man kita inig balik niya sa kalibutan. 11Tungod kay kamo nakahibalo nga kini tinu-od, magpadayon kamo sa pagdasig sa usa'g usa, sama sa inyong gihimo karon.

12Mga kauban nako nga tumutuo, kami naghangyo kaninyo nga inyong ilhon nga pangulo kadtong naghago pag-ayo alang kaninyo. Buot ipasabot nga inyong tahuron kadtong mga nanguna kaninyo isip mga kauban natong tumutuo nga nahiusa sa atong Ginoong Jesus, mga pangulo nga nagpasidaan kaninyo nga dili ninyo himuon ang sayop. 13Naghangyo kami kaninyo nga sila ilhon ninyo kay gihigugma man ninyo sila ug tungod kay naghago sila kaayo aron matabangan kamo. Naghangyo ako kaninyo nga magkinabuhi kamo sa kalinaw sa usa'g usa. 14Mga kauban nakong tumutuo, gi-awhag mo nako pag-ayo nga inyong pasidad-an ang mga tumutuo nga gusto lang mabuhi sa mga hatag sa uban imbes nga magtrabaho. Awhaga usab ninyo ang mga tumutuo nga mahadlukon, ug tabangan ang tanang tawo nga luya sa bisan unsang bahin. Gi-awhag usab kamo namo pag-ayo nga magpinasensiyahay kamo.

15Siguraduha gyud ninyo nga walay magbuhat kaninyo ug dautan ngadto kang bisan kinsa nga magbuhat ug dautan kaninyo. Kondili, kinahanglan nga kanunay kamo nga magbuhat ug maayong mga binuhatan sa usa'g usa ug sa uban usab. 16Magmalipayon sa tanang panahon, 17pag-ampo nga walay undang, 18ug magpasalamat sa Dios sa tanang kahimtang. Buot sa Dios nga ingon niini ang inyong buhaton tungod sa gihimo ni Cristo Jesus alang kaninyo.

19Ayaw supila ang Espiritu sa Dios nga anaa kaninyo. 20Pananglitan, ayaw tamaya ang bisan unsang butang nga giingon sa Espiritu sa uban. 21Kondili, hunahunaa pag-ayo ninyo ang tanang mga mensahe nga sama niini. Dawata ang mga maayo ug inyong tumanon sila. 22Ayaw ug sunod sa bisan unsang dautang mensahe.

23Hinaot nga ang Dios maghatag kaninyo ug kalinaw ug himoon kamong walay sayop aron kamo dili makasala. Hinaot unta nga ilayo kamo niya sa pagbuhat ug sala hangtod sa pagbalik sa atong Ginoong Jesu Cristo sa kalibutan. 24Tungod kay gitawag kamo sa Dios aron mahimo niyang katawhan, masaligan gyud ninyo siya nga magpadayon ug tabang kaninyo sa niini nga pamaagi.

25Mga kaubanan nakong tumutuo, i-ampo ninyo ako, ug si Silas, ug si Timoteo. 26Kung kamo mga tumutuo mag-tigomtigom, kumustaha ninyo ang usa'g usa nga adunay paghigugma, nga angayan nga buhaton ninyo sa mga kaubanan sa pagtuo. 27Siguradoha gyud ninyo nga basahon kini nga sulat sa tanan nga tumutuo nga anaa uban kaninyo. Sa akong pag-ingon niini, sama ra usab kini nga ang Ginoo ang nagasulti kaninyo! 28Hinaot nga ang atong Ginoong Jesu Cristo magpadyon nga magahimo ug maayo kaninyong tanan.